Be Mẹpinplọn Towe Nọ Tindo Kọdetọn Dagbe Ya?

MẸJITỌ lẹ, mẹho lẹ, wẹndagbe-jlatọ lẹ—yemẹpo wẹ dona yin mẹplọntọ. Mẹjitọ lẹ nọ plọn ovi yetọn lẹ, mẹho lẹ nọ plọn hagbẹ agun Klistiani tọn lẹ, podọ wẹndagbe-jlatọ lẹ nọ plọn jlodotọ yọyọ lẹ. (Deutelonomi 6:6, 7; Matiu 28:19, 20; 1 Timoti 4:13, 16) Etẹwẹ hiẹ sọgan wà nado hẹn mẹpinplọn towe yin kọdetọn dagbenọ hugan? Aliho dopo wẹ nado hodo apajlẹ podọ aliho he mẹ mẹplọntọ nugopetọ heyin nùdego to Ohó Jiwheyẹwhe tọn mẹ lẹ plọnmẹ te. Ẹzla yin mẹplọntọ mọnkọtọn de.

Nupinplọn sọn Apajlẹ Ẹzla Tọn Mẹ

Ẹzla yin yẹwhenọ he wá sọn kúnkan Aalọn tọn mẹ de bo nọgbẹ̀ to nudi owhe 2 500 lẹ die wayi to Babilọni. To owhe 468 J.W.M., e yì Jelusalẹm nado sọgan ze sinsẹ̀n-bibasi wiwe ṣeke daga to Ju he nọ nọ̀ finẹ lẹ ṣẹnṣẹn. (Ẹzla 7:1, 6, 12, 13) Azọngban ehe biọ dọ e ni plọn Osẹ́n Jiwheyẹwhe tọn gbẹtọ lọ lẹ. Etẹwẹ Ẹzla wà nado hẹn ẹn diun dọ nuplọnmẹ etọn tindo kọdetọn dagbe? E ze afọdide voovo titengbe delẹ. Doayi afọdide ehelẹ go dile yé yin kinkàndai to Ẹzla 7:10 mẹ do:

‘Ẹzla ko [1] wleawuna ayiha etọn [2] nado to osẹ́n Jehovah tọn dín, podọ [3] nado nọ basi i, podọ [4] nado nọ plọnmẹ osẹ́ndoai lẹ po whẹdida dodo po to Islaeli mẹ.’ Mì gbọ mí ni gbadopọnna afọdide lọ lẹ dopodopo to kleun mẹ bo pọ́n nuhe mí sọgan plọn sọn yé mẹ.

‘Ẹzla Ko Wleawuna Ayiha Etọn’

Kẹdẹdile glesi de nọ yí nuhe nọ jlò aigba de zan nado wleawuna aigba whẹpo do dó jinukun do, Ẹzla gbọn odẹ̀ dali wleawuna ayiha etọn nado yí ohó Jiwheyẹwhe tọn. (Ẹzla 10:1) To hogbe devo lẹ mẹ, e ‘lẹ́ ayiha etọn’ hlan nuplọnmẹ Jehovah tọn kọ̀n.—Howhinwhẹn lẹ 2:2.

Mọdopolọ, Biblu dọ dọ Ahọlu Jehọṣafati ‘wleawuna ayiha etọn nado dín Jiwheyẹwhe nugbo lọ.’ (2 Otannugbo lẹ 19:3) To vogbingbọn mẹ, omẹ Islaeli tọn delẹ ‘he ma wleawuna ayiha yetọn’ yin yiylọdọ “tolivẹtọ, atẹṣitọ.” (Psalm 78:8) Jehovah nọ mọ “gbẹtọ he whlá to ayiha mẹ.” (1 Pita 3:4) Mọwẹ, “homẹmimiọnnọ wẹ e nasọ plọn ali etọn.” (Psalm 25:9) Enẹwutu, lehe e yin nujọnu dọ mẹplọntọ lẹ to egbehe ni hodo apajlẹ Ẹzla tọn gbọn ayiha yetọn hinhẹnwa ninọmẹ he sọgbe mẹ to odẹ̀ mẹ jẹnukọn whẹ́ dali do sọ!

‘Nado to Osẹ́n Jehovah Tọn Dín’

Nado yin mẹplọntọ nugopetọ de, Ẹzla dín Ohó Jiwheyẹwhe tọn. Eyin hiẹ dona dín doto de mọ na pọngbọ towe, be hiẹ ma na dotoai ganji bo hẹn ẹn diun dọ a mọnukunnujẹ nuhe e dọ kavi amasin he e wlan lẹpo mẹ ya? Matin ayihaawe hiẹ na wàmọ, na agbasalilo towe tin to owù mẹ wutu. To whelọnu lo, e yin onú titengbe hugan dọ mí ni na ayidonugo gigọ́ hlan nuhe Jehovah to didọna mí gbọn Ohó etọn, Biblu lọ gblamẹ, podọ gbọn “afanumẹ nugbonọ, nuyọnẹntọ” lọ gblamẹ. To popolẹpo mẹ, ayinamẹ etọn gando ogbẹ̀ mítọn go! (Matiu 4:4; 24:45-47) Nugbo wẹ dọ doto de sọgan dọho gbọ̀, ṣigba ‘osẹ́n Jehovah tọn pé.’ (Psalm 19:7) Nuhudo ma na tin nado dindona nugbo-yinyin etọn to mẹdevo dè gbede.

Owe Otannugbo lẹ tọn (ehe Ẹzla wlan to tintan whenu taidi bladopọ dopo) dohia dọ Ẹzla yin nuplọntọ vivẹnunọ de na nugbo tọn. Nado kàn owe enẹlẹ, e pọ́n asisa voovo lẹ mẹ.a Ju he ṣẹṣẹ lẹkọ sọn Babilọni lẹ tindo nuhudo bladopọ whenuho akọta yetọn tọn. Yé ma yọ́n nususu sọmọ gando hùnwhẹ sinsẹ̀n yetọn tọn lẹ, sinsẹ̀nzọnwiwa tẹmpli mẹ tọn, po azọngban Levinu lẹ tọn po go. Kandai he slẹ kúnkan yetọn lẹ yin nujọnu taun na yé. Ẹzla na ayidonugo vonọtaun hlan whẹho enẹlẹ. Kakajẹ whenuena Mẹssia lọ na wá, Ju lẹ dona yin akọta de he tindo aigba, tẹmpli, yẹwhenọduta, po gandutọ yetọn titi po. Na nudọnamẹ he Ẹzla bẹpli wutu, pọninọ po sinsẹ̀n-bibasi nugbo po sọgan yin hihọ-basina.

Nawẹ aliho nupinplọn towe tọn lẹ sọgbe hẹ Ẹzla tọn gbọn? Sọwhiwhe yíyí do plọn Biblu na gọalọna we nado plọnmẹ Biblu lọ po kọdetọn dagbe po.

‘Dín Osẹ́n Jehovah Tọn’ Taidi Whẹndo De

Osẹ́n Jehovah tọn dindin ma nọte do oplọn mẹdetiti tọn ji gba. Oplọn whẹndo tọn yin dotẹnmẹ hundote dagbe de nado wà ehe ga.

Jan po Julia po, yèdọ asu po asi po de to Pays-Bas, ko nọ hiawe po gbèzeyiaga po na visunnu yetọn awe lẹ sọn azán he gbè yé yin jiji gbọ́n. Todin, Ivo yin owhe 15 mẹvi bọ Edo tindo owhe 14. Yé gbẹsọ nọ basi oplọn whẹndo tọn yetọn whladopo to osẹ mẹ. Jan dọmọ: “Yanwle tangan mítọn mayin nado dọhodo nususu ji to oplọn lọ whenu gba ṣigba dọ ovi lọ lẹ ni mọnukunnujẹ nuhe yin hodọdeji mẹ.” E yidogọ dọmọ: “Visunnu lọ lẹ nọ basi dodinnanu susu. Yé nọ pọ́n hogbe he yé ma jẹakọ hẹ lẹ po mẹhe yin nùdego to Biblu mẹ lẹ po—whenue yé nọgbẹ̀, mẹhe yé yin, azọ́n he yé wà, po mọmọ po sọyi. Sọn whenue gbọ́n yé yọnwehia, yé ko nọ gbadopọnna owe lẹ taidi Étude perspicace des Écritures, wezẹhomẹ, po otanwe lẹ po. Ehe nọ hẹn oplọn whẹndo tọn lọ yin awuvivinu dogọ. Visunnu mítọn lẹ nọ to tenọpọn oplọn whẹndo tọn lọ po jejejininọ po.” Taidi alemọyi devo, ovi awe lọ lẹ sọ tọ́nta to nugopipe ogbè devo sisè tọn mẹ to klasi yetọn lẹ mẹ.

John po Tini po, yèdọ asu po asi po devo to Pays-Bas plọnnu hẹ visunnu yetọn, Esli (he tindo owhe 24 todin bo to gbehosọnalitọ basi to agun devo mẹ), po viyọnnu yetọn, Linda (he tindo owhe 20 todin bo ko wlealọ hẹ mẹmẹsunnu jọja dagbe de) po. Ṣigba, kakati nado plọn owe tangan de bo yí aliho kanbiọ-po-gblọndo po tọn zan, yé nọ diọadana oplọn whẹndo tọn lọ sọgbe hẹ owhe po nuhudo ovi lọ lẹ po tọn. Aliho tẹwẹ yé yizan?

John basi zẹẹmẹ dọ visunnu po viyọnnu etọn po nọ de hogo ojlofọndotenamẹ tọn de sọn “Kanbiọ lẹ sọn Wehiatọ lẹ Dè” (to Atọ̀họ̀-Nuhihọ́ Lọ Tọn mẹ) podọ “Pọndohlan Biblu Tọn” (to Réveillez-vous! mẹ). To enẹgodo, yé nọ dọ nuhe yé ko wleawuna, he nọ saba dekọtọn do hodọdopọ whẹndo tọn he fọnjlodotenamẹ lẹ mẹ. To aliho ehe mẹ jọja lẹ nọ tindo numimọ to dodinnanu bibasi mẹ podọ to hodidọ do kọdetọn nupinplọn yetọn tọn lẹ ji mẹ. Be hiẹ nọ ‘dín osẹ́n Jehovah tọn’ po ovi towe lẹ po ya? E mayin dọ ehe na hẹn nugopipe mẹpinplọn tọn towe pọnte kẹdẹ wẹ gba ṣigba e nasọ gọalọna ovi towe lẹ nado lẹzun mẹplọntọ kọdetọn dagbenọ lẹ dogọ.

“Nado Nọ Basi I”

Ẹzla yí nuhe e plọn lẹ do yizan mẹ. Di dohia, to whenuena e gbẹsọ tin to Babilọni, e sọgan ko zan gbẹzan vivomẹninọ tọn de. Etomọṣo, to whenuena e wá yọnẹn dọ emi sọgan gọalọna omẹ emitọn he tin to tògodo lẹ, e jo gbẹzan vivomẹninọ Babilọni tọn do bo yì otò dindẹn Jelusalẹm tọn mẹ, mahopọnna tukla, nuhahun, po owù he e bẹhẹn lẹ po. Na nugbo tọn, e mayin dọ Ẹzla ko to oyọnẹn Biblu tọn lẹ bẹpli kẹdẹ wẹ gba ṣigba e tin to awuwle mẹ nado yí nuhe e ko plọn lẹ do yizan mẹ.—1 Timoti 3:13.

To nukọn mẹ, to whenuena Ẹzla tin to Jelusalẹm, e dohia whladopo dogọ dọ emi yí nuhe emi ko plọn bo to pinplọnmẹ lẹ do yizan mẹ. Ehe wá họnwun to whenuena e se kanṣiṣa alọwle tọn he sunnu Islaelivi lẹ to tintindo hẹ yọnnu jonọ lẹ. Kandai Biblu tọn lọ dọna mí dọ e ‘tlẹ́n awugbó etọn po avọ̀kọdo etọn po bosọ sún oda etọn sẹ po ogbì etọn po, bosọ sinai awujinọ kakajẹ whèjai.’ ‘Winyan tlẹ hù i nado ze nukunmẹ etọn daga’ hlan Jehovah dè.—Ẹzla 9:1-6.

Lehe nuhe e ko plọn sọn Osẹ́n Jiwheyẹwhe tọn mẹ yinuwadeji do sọ! Ẹzla yọ́n kọdetọn ylankan tolivivẹ omẹ lọ lẹ tọn ganji. Sọha Ju he lẹkọwa whé lẹ tọn whè. Eyin yé biọ kanṣiṣa alọwle tọn mẹ hẹ jonọ lẹ, yigodo yinukọn yé sọgan wá kọnawudopọ hẹ akọta kosi he lẹdo yé lẹ, bọ sinsẹ̀n-bibasi wiwe ṣeke sọgan busẹ sọn aigba ji po awubibọ po!

Pẹdido wẹ dọ apajlẹ obu mẹdezizejo po zohunhun Ẹzla tọn po whàn Islaelivi lẹ nado jla pọndohlan yetọn lẹ do. Yé yàn asi jonọ yetọn lẹ. To osun atọ̀n gblamẹ, onú lẹpo ko yin jijlado. Nugbonọ-yinyin Ẹzla tọn hlan Osẹ́n Jiwheyẹwhe tọn yí nususu wà nado hẹn mẹpinplọn etọn yin kọdetọn dagbenọ.

Whẹho lọ yin nudopolọ to egbehe. Otọ́ Klistiani dopo dọmọ: “Ovi lẹ ma nọ wà nuhe a dọ gba; yé nọ wà nuhe hiẹ to wiwà!” Nunọwhinnusẹ́n dopolọ yọn-na-yizan to agun Klistiani tọn mẹ. Mẹho he nọ ze apajlẹ dagbe dai lẹ sọgan donukun dọ agun lọ na kẹalọyi nuplọnmẹ yetọn lẹ.

‘Nado Nọ Plọnmẹ Osẹ́ndoai po Whẹdida Dodo po to Islaeli Mẹ’

Nalete, whẹwhinwhẹ́n devo tin he wutu mẹpinplọn Ẹzla tọn tindo kọdetọn dagbe. E ma plọnmẹ linlẹn edetiti tọn lẹ gba, ṣigba e plọnmẹ ‘osẹ́ndoai po whẹdida dodo po.’ Enẹ wẹ osẹ́ndoai kavi osẹ́n Jehovah tọn lẹ. Azọngban etọn niyẹn taidi yẹwhenọ de. (Malaki 2:7) E sọ plọnmẹ whẹdida dodo, podọ e wleawuna apajlẹ nuhe plọnmẹ e te tọn gbọn titẹdo nuhe sọgbe lẹ go to aliho dodo matin mẹnukuntahihopọn tọn mẹ, sọgbe hẹ nujinọtedo de dali. To whenuena mẹhe tin to otẹn aṣẹpipa tọn mẹ lẹ do whẹdida dodo hia, dolilo nọ tin bọ kọdetọn dagbe dẹn-to-aimẹ lẹ nọ yin tintindo. (Howhinwhẹn lẹ 29:4) Mọdopolọ, Klistiani mẹho lẹ, mẹjitọ lẹ, po lilatọ Ahọluduta tọn lẹ po he jẹakọ hẹ Ohó Jiwheyẹwhe tọn ganji na wleawuna dolilo gbigbọmẹ tọn eyin yé plọn osẹ́ndoai po whẹdida dodo Jehovah tọn lẹ po to agun mẹ, to whẹndo yetọn lẹ mẹ, podọ hlan jlodotọ lẹ.

Be hiẹ ma yigbe dọ mẹpinplọn towe na tindo kọdetọn dagbe hugan eyin a hodo apajlẹ Ẹzla nugbonọ tọn mlẹnmlẹn ya? Enẹwutu, ‘wleawuna ayiha towe, nọ dín osẹ́n Jehovah tọn, nọ basi i, bosọ nọ plọnmẹ osẹ́ndoai po whẹdida dodo Jehovah tọn po.’—Ẹzla 7:10.

[Nudọnamẹ odò tọn

[Apotin/Yẹdide to weda 22]

ETẸLẸ WẸ HẸN MẸPINPLỌN ẸZLA TỌN TINDO KỌDETỌN DAGBE?

1. E hẹn ayiha etọn wá ninọmẹ he sọgbe mẹ

2. E dín Osẹ́n Jehovah tọn

3. E ze apajlẹ dagbe dai to nuhe e plọn lẹ yíyí-do-yizan mẹ

4. E dovivẹnu nado plọn mẹdevo lẹ nuhe Owe-wiwe dọ