Angẹli lẹ Lá Jiji Jesu Tọn

Ahọluigbagán Lomu tọn, Sesali Augusti, degbe dọ Juvi lẹpo ni lẹkọyi tòdaho yetọn lẹ mẹ nado ze yinkọ dai. Enẹwutu, Josẹfu po Malia po zingbejizọnlin yì Bẹtlẹhẹm, fihe whẹndo Josẹfu tọn wá sọn. Ojlẹ ko dibla sọ̀ na Malia nido jivi.

Whenue yé jẹ Bẹtlẹhẹm, fidopo gee he yé mọ bo gán nọ wẹ kanlinpo de mẹ. Finẹ wẹ Malia ji visunnu etọn Jesu te. Malia sọ blá ẹ do avọ̀ mẹ bo tẹ́ ẹ do otò he mẹ kanlin lẹ nọ dùnú te de mẹ.

Lẹngbọhọtọ delẹ tin to danji to ozán lọ mẹ bo to lẹngbọ yetọn lẹ ṣọ́, sẹpọ Bẹtlẹhẹm. To ajiji mẹ, angẹli de ṣite to nukọn yetọn bọ gigo Jehovah tọn họ́n lẹdo yé pé. Obu jẹ lẹngbọhọtọ lọ lẹ ji, amọ́ angẹli lọ dọna yé dọmọ: ‘Mì dibu blo. Wẹndagbe ayajẹ tọn de wẹ yẹn tindo na mì. Mẹsia lọ yin jiji to Bẹtlẹhẹm to egbehe.’ To ojlẹ enẹ mẹ, angẹli susu sọawuhia to agahomẹ bo to didọmọ: ‘Gigo to oji aga hlan Jiwheyẹwhe, podọ jijọho hlan mẹhe tin to aigba ji lẹ.’ Enẹgodo, angẹli lọ lẹ busẹ. Nawẹ lẹngbọhọtọ lọ lẹ yinuwa gbọn?

Yé dọna ode awetọ dọmọ: ‘Mì gbọ mí ni yì Bẹtlẹhẹm to afọdopolọji.’ Yé sọ yawu yì bo mọ Josẹfu po Malia po gọna viyẹyẹ yetọn to kanlinpo lọ mẹ.

Eyin mẹdepope sè nuhe angẹli lọ dọna lẹngbọhọtọ lọ lẹ, e nọ paṣa ẹ. Malia lẹnnupọn sisosiso do hogbe angẹli lọ tọn lẹ ji bo ma wọn yé gbede. Lẹngbọhọtọ lọ lẹ lẹkọyi lẹngbọpa yetọn lẹ kọ̀n, bo to pẹdona Jehovah na nuhe yé ko sè bo mọ lẹpo wutu.