Jesu Yin Wiwle

Jesu po apọsteli etọn lẹ po zinzọnlin gbọn Agbàdo Kidlọni tọn mẹ yì Osó Olivie tọn ji. Zánhomẹ wẹ bọ osun blebu ko tọ́n. Whenue yé jẹ jipa Gẹtsemani tọn mẹ, Jesu dọna yé dọmọ: “Mì nọfi bo nọ nukle.” Enẹgodo, Jesu sẹyì nukọn vude to jipa lọ mẹ bo jẹklo. E hodẹ̀ hlan Jehovah to ayimajai sinsinyẹn mẹ dọmọ: “Dike ojlo towe ni yin wiwà.” To whenẹnu, Jehovah do angẹli de hlan nado na tuli Jesu. Whenue Jesu lẹkọyi apọsteli lẹ dè, e mọdọ atọ̀n to yé mẹ to amlọndọ. E sọ dọmọ: ‘Mì fọ́n! E ma yin ojlẹ lọ die nado damlọn! Ojlẹ ko sọ̀ bọ yẹn na yin jijodo alọ kẹntọ ṣie lẹ tọn mẹ.’

E ma dẹn bọ Juda wá bọ gbẹtọgun daho de hodo e bo hẹn ohí po aglọpò lẹ po. E yọ́n fie e na mọ Jesu te na yé ko nọ saba wá jipa enẹ mẹ. Juda ko dọna awhànfuntọ lọ lẹ dọ emi na de Jesu hia yé. E yì Jesu dè tlọlọ bo dọmọ: ‘Kudo lewhenu, Mẹplọntọ,’ enẹgodo e donùnùgo na ẹn. Jesu sọ dọmọ: ‘Juda, nùdonùgo wẹ hiẹ yí do to dide mi hia ya?’

Jesu deafọ yinukọn bo kanse gbẹtọgun lọ dọmọ: “Mẹnu dín wẹ mì te?” Yé dọmọ: “Jesu Nazalẹti tọn.” E sọ dọna yé dọmọ: “Yẹn wẹ,” bọ yé joagọyigodo bo họ́jai. Jesu sọ vọ́ kanse gbẹtọgun lọ dọ: “Mẹnu dín wẹ mì te?” Yé sọ vọ́ gblọn dọ: “Jesu Nazalẹti tọn.” Jesu gblọnna yé dọmọ: ‘N’dọna mì dọ yẹn wẹ. Mì gbọ omẹ ehelẹ ni yì.’

Whenue Pita mọ nuhe to jijọ, e dọ̀n ohí etọn sún bo pà otó na Malkọs, yèdọ afanumẹ yẹwhenọ daho lọ tọn de. Amọ́, Jesu doalọ otó dawe lọ tọn go bo hẹn ẹn jẹgangan. Enẹgodo, e dọna Pita dọmọ: ‘Gọ̀ ohí towe do apà etọn mẹ. Eyin a yí ohí do hoavùn, a na kú gbọn ohí dali.’ Awhànfuntọ lọ lẹ wle Jesu bo blá alọ etọn lẹ, bọ apọsteli lẹ họnyi. Enẹgodo, gbẹtọgun lọ plan ẹn yì Annas he yin yẹwhenọgán lọ dè. Annas kanhose Jesu bo do e hlan owhé Kaifa yẹwhenọ daho lọ tọn gbè. Ṣigba, etẹwẹ jọ do apọsteli lẹ go?