Wekanhlanmẹ de sọn Hagbẹ Anademẹtọ lọ Dè

Mẹvivẹ He Yiwanna Jehovah lẹ Emi:

To 1971, mẹhe yì plidopọ agbegbe tọn “Oyín Jiwheyẹwhe” tọn lẹ gọ́ na ayajẹ to whenue yé mọ zinjẹgbonu owe yọyọ susu tọn yí. “Mẹdepope ma gán yise dọ” owe lẹ na yin didetọn sọmọ. Mẹmẹsunnu de dọ gando dopo to owe he yin didetọn lọ lẹ mẹ go dọmọ: “Bladopọ he fọnjlodotenamẹ hugan nuhe to nukọn ja lẹ tọn he mí ma ko tindo pọ́n de wẹ!” Etẹ hodọ wẹ e te? Owe de wẹ, he hosọ etọn yin “Les nations sauront que je suis Jéhovah”—Comment? Ṣigba, naegbọn owe ehe do fọnjlodotenamẹ sọmọ? Na e bẹ zẹẹmẹ yọyọ lẹ hẹn gando dọdai he tin to owe Ezekiẹli tọn he to Biblu mẹ go—yèdọ dọdai delẹ he na yinuwado sọgodo gbẹtọvi lẹpo tọn ji.

Sọn whenue gbọ́n owe lọ “Les Nations Sauront” ko yin zinzinjẹgbonu godo, sọha omẹ Jiwheyẹwhe tọn lẹ tọn ko jideji po awuyiya po—sọn nudi livi dopo daa jẹ livi ṣinatọ̀n linlán. (Isa. 60:22) Devizọnwatọ Jehovah tọn livi susu ehelẹ nọ do ogbè voovo 900 linlán. (Zek. 8:23) Mẹsusu wẹ ma ko tindo dotẹnmẹ lọ nado plọn owe de he bẹ zẹẹmẹ gigọ́ hẹn gando dọdai gbọdo he yẹwhegán Ezekiẹli basi kandai etọn lẹ go.

Humọ, sọn 1971 gbọ́n, nukunnumọjẹnumẹ mítọn gando nugbo Biblu tọn susu go ko yin hinhẹn pọnte taun dile hinhọ́n lọ fọ́n bo to wunhọ́n dogọ. (Howh. 4:18) To 1985, lehe “lẹngbọ devo lẹ” nọ yin lilá taidi dodonọ bo nọ yin pinpọnhlan di họntọn Jiwheyẹwhe tọn do wá jẹ wunhọ́n na mí ji. (Joh. 10:16; Lom. 5:18; Jak. 2:23) Enẹgodo to 1995, mí mọnukunnujẹemẹ whla tintan dọ owhẹ̀ he na yin didá na “lẹngbọ lẹ” po “gbọgbọẹ lẹ” po gbọngodo na wá aimẹ “nukunbibia daho” lọ whenu. (Mat. 24:21; 25:31, 32) Vọjlado ehe lẹpo ko yinuwado nukunnumọjẹnumẹ mítọn ji gando owe Ezekiẹli tọn go.

To owhe agọe tọn lẹ mẹ, hinhọ́n lọ fọ́n bo to wunhọ́n dogọ. Lẹnnupọndo nuplọnmẹ he apajlẹ Jesu tọn lẹ bẹhẹn lẹ ji. Suhugan nuplọnmẹ enẹlẹ tọn ko wá họnwun gblegede to ayiha po ahun mítọn lẹ po mẹ. Susu to apajlẹ enẹlẹ mẹ dlẹnalọdo nujijọ he na wá aimẹ to nukunbibia daho he to unklẹn ja lọ whenu lẹ. To aliho dopolọ mẹ, nukunnumọjẹnumẹ mítọn gando delẹ to dọdai he to owe Ezekiẹli tọn mẹ lẹ go ko yin vivọjlado. Delẹ to yé mẹ wẹ dọdai he dọhodo Gọgi Magọgi tọn ji (weta 38 po 39 po), podọ do azọ́n he dawe he hẹn wesinzo wekantọ tọn lọ na wà (weta 9), agbàdo ohú húhú lẹ tọn po owhlẹ awe he yin kinkọndopọ to yẹhiadonu-liho lẹ po ji (weta 37). Enẹwutu, nuhe yin kinkan sọn owhe susu die to owe lọ “Les Nations Sauront” mẹ lẹ dona yin vivọjlado.

Abajọ susu to omẹ Jehovah tọn lẹ mẹ ko kanse dọ, “Whetẹnu wẹ mí na mọ owe de he na bẹ zẹẹmẹ yọyọ lẹ hẹn gando dọdai Ezekiẹli tọn lẹ go?” Owe mọnkọtọn wẹ Sinsẹ̀n-Bibasi Wiwe-Ṣeke Jehovah Tọn Yin Hinhẹngọwa Lo! Dile a to dogbapọnna weta 22 he e bẹhẹn bo to ayihamẹlẹnpọn do yẹdide whanpẹnọ he to e mẹ lẹ ji, awú na ji we gando dodinnanu sọwhiwhe tọn he yin bibasi nado wleawuna ẹn lẹ go. Mí lẹnnupọn bo hodẹ̀ susu nado mọnukunnujẹ nuhewutu Jehovah do wleawuna owe Ezekiẹli tọn mẹ, yèdọ owe Biblu tọn he fọnjlodotenamẹ taun de. Mí na ayidonugo sọwhiwhe tọn kanbiọ delẹ taidi: Nuplọnmẹ tẹlẹ wẹ owe Ezekiẹli tọn bẹhẹn na mẹhe nọgbẹ̀ to ojlẹ Ezekiẹli tọn mẹ lẹ podọ na mí to egbehe? Dọdai tẹlẹ wẹ dọhodo nujijọ he na gbẹ́ wá mọ hẹndi to sọgodo lẹ ji? Be mí dona yí aliho nude nọtena nudevo tọn zan nado basi zẹẹmẹ dọdai Ezekiẹli tọn lẹ tọn wẹ ya? Gblọndo kanbiọ enẹlẹ tọn na gọalọna mí nado mọnukunnujẹ owe Biblu tọn he mí yiwanna taun ehe mẹ.

Dile a to owe Ezekiẹli tọn hia sọn bẹjẹeji jẹ vivọnu, awú na ji we taun gando adà olọn mẹ tọn titobasinanu Jehovah tọn go. Ayihaawe ma tin dọ nujinọtedo yiaga he Jehovah zedai na mẹhe to olọn mẹ podọ to aigba ji bo jlo na basi sinsẹ̀n hlan ẹn dile ewọ jlo do lẹ na yinuwado ji we sisosiso. Owe lọ Sinsẹ̀n-Bibasi Wiwe-Ṣeke na zọ́n bọ a na yọ́n pinpẹn nuhe Jehovah ko wà na omẹ etọn lẹ po nuhe e na wà na yé to sọgodo he to yakẹ lọ po lẹ tọn dogọ. A na doayi e go dọ owe ehe zinnudo hosọ awe delẹ ji whlasusu. Tintan, nado hẹn homẹ Jehovah tọn hùn, mí dona yọ́n ewọ bosọ kẹalọyi i taidi Nupojipetọ Wẹkẹ lọ tọn. Awetọ, mí dona sẹ̀n Jehovah to aliho he ewọ kẹalọyi mẹ, bo hẹn gbẹzan mítọn sọgbe hẹ nujinọtedo yiaga etọn lẹ.

Ojlo vẹkuvẹku mítọn wẹ yindọ owe ehe ni hẹn gbemima towe nado sẹ̀n Jehovah to aliho he na gbògbéna oyín daho podọ wiwe etọn mẹ lodo. To ojlẹ dopolọ mẹ, e ni sọ na tuli we nado to nukọnpọnhlan ojlẹ he mẹ akọta lẹpo na yọnẹn dọ ewọ wẹ Jehovah.—Ezek. 36:23; 38:23.

Na Otọ́ owanyinọ mítọn, Jehovah, ni dona vivẹnudido towe nado mọnukunnujẹ owe he e gbọdo yẹwhegán Ezekiẹli nado kàn lọ mẹ.