Nọ Payi Nusisọ́ Towe po Aṣọ́dido Towe po Go

Mímẹpo wẹ do aliho he mẹ e nọ jlo mí dọ mí ni sọnú bosọ doaṣọ́ te. Nunọwhinnusẹ́n Biblu tọn kleun delẹ hihodo gán gọalọna mí nado nọ doaṣọ́ to aliho he jẹeji na mí mẹ, ṣogan bosọ hẹn homẹhun Jehovah. Mì gbọ mí ni gbadopọnna delẹ to nunọwhinnusẹ́n enẹlẹ mẹ.

1. Nunọwhinnusẹ́n tẹlẹ wẹ mí dona nọ hodo whenue mí jlo na de nusisọ́ po aṣọ́dido mítọn po?

Mí dona nọ “gbọn mẹdehihọ́ po wunza po dali yí avọ̀ he jẹ do doaṣọ́na [míde],” podọ mí dona nọ mẹ́sin na mẹdevo lẹ nido mọdọ ‘mí ko ze míde jo na Jiwheyẹwhe.’ (1 Timoti 2:9, 10) Gbadopọnna nunọwhinnusẹ́n ẹnẹ he bọdego ehelẹ: (1) Mí dona nọ sọnú to aliho he “jẹ” mẹ. Dile a na ko doayi e go do to opli agun tọn lẹ ji, omẹ Jehovah tọn lẹ nọ sọnú bosọ nọ doaṣọ́ to aliho voovo lẹ mẹ, amọ́ mí nọ hẹn ẹn diun dọ nusisọ́ mítọn lẹ po oda he mí nọ blá kavi pà lẹ po nọ do sisi hia na Jiwheyẹwhe he mí nọ sẹ̀n. (2) Nado nọ sọnú po “mẹdehihọ́” po, enẹ wẹ po jlẹkajininọ po zẹẹmẹdo dọ mí ma na nọ do avọ̀ he na fọ́n ojlo zanhẹmẹ tọn dote na mẹdevo lẹ kavi he na zọ́n bọ mí na nọ dọ̀n ayidonugo mẹdevo lẹ tọn wá míde ji zẹjlẹgo. (3) Mí nọ dohia dọ mí tindo “wunza” eyin mí ma nọ kẹalọyi aliho nusisọ́ po asọ́dido po tọn he to zòji lẹpo. (4) Awusọhia mítọn dona nọ dohia to whelẹponu dọ mí ko ‘ze míde jo na Jiwheyẹwhe,’ ehe na zọ́n bọ mẹdevo lẹ na doayi e go dọ Jiwheyẹwhe nugbo lọ sẹ̀n wẹ mí te.—1 Kọlintinu lẹ 10:31.

2. Nawẹ nusisọ́ mítọn gán yinuwado yisenọ hatọ mítọn lẹ ji gbọn?

Dile etlẹ yindọ mí vò nado nọ sọnú to aliho he jlo mí mẹ, mí sọ dona nọ kanse míde eyin nusisọ́ mítọn na dotukla mẹdevo lẹ kavi lala. Mí nọ dovivẹnu ma nado hẹn homẹgble mẹdepope, kakatimọ, mí nọ tẹnpọn nado “hẹn homẹhun kọmẹnu [mítọn] na dagbe etọn, yèdọ nado jlọ ẹ dote.”—Hia Lomunu lẹ 15:1, 2.

3. Nawẹ nusisọ́ mítọn gán zọ́n bọ mẹdevo lẹ na do ojlo na sinsẹ̀n-bibasi nugbo lọ gbọn?

Nugbo wẹ dọ mí nọ tẹnpọn nado sọnú to aliho he jẹ mẹ to whelẹponu, amọ́ mí sọ nọ na ayidonugo nujọnu tọn nusisọ́ mítọn lẹ whenue mí jlo na yì opli agun tọn lẹ kavi yì kunnudegbe. Mí ma nọ jlo dọ nusisọ́ mítọn ni fẹayihasẹna mẹdevo lẹ sọn owẹ̀n titengbe he lá mí te ji. Kakatimọ, mí nọ jlo dọ awusọhia mítọn ni dọ̀n mẹdevo lẹ nado wá plọn nugbo lọ bosọ “doaṣọ́na oplọn Mẹwhlẹngántọ mítọn [tọn].”—Titu 2:10.

DINDONANU DOGỌ

4. Mí nọ na sisi Jehovah eyin mí tindo awusọhia dagbe de

Whẹwhinwhẹ́n titengbe hugan tẹ wutu wẹ mí nọ na ayidonugo awusọhia mítọn? Hia Salmu lẹ 47:2, enẹgodo dọhodo kanbiọ ehelẹ ji:

• Aliho tẹ mẹ wẹ mí dona nọ sọnú te eyin mí flindọ afọzedaitọ Jehovah tọn lẹ wẹ mí yin?

• Be a lẹndọ nujọnu wẹ e yin dọ nusisọ́ po aṣọ́dido mítọn po ni nọ duahunmẹna mí to whenue mí jei opli agun tọn lẹ kavi kunnudegbe ya? Naegbọn a do dọ mọ?

5. Nudide dagbe lẹ bibasi gando nusisọ́ po aṣọ́dido po go

Hò VIDEO lọ.

VIDEO: “Mì Nọ Wà Nulẹpo Na Gigo Jiwheyẹwhe Tọn” (10:18)

Vlavo avọ̀ he mí nọ do lẹ nọ vẹakuẹ kavi pọ̀kuẹ, yé dona wé bosọ nọ sọgbe na fie mí jei. Hia 1 Kọlintinu lẹ 10:24 gọna 1 Timoti 2:9, 10. Enẹgodo, dọhodo nuhe bọdego ehelẹ ji, enẹ wẹ nuhewutu nusisọ́ mítọn ma dona . . .

• nọ to kluyọ̀ kavi kudiho.

• nọ finyọ́n tánun-tánun, do omẹ́ hia, kavi fọ́n ojlo zanhẹmẹ tọn dote na mẹdevo lẹ.

Dile etlẹ yindọ Klistiani lẹ ma pò to Osẹ́n Mose tọn glọ, mí gán plọn nususu sọn e mẹ gando pọndohlan Jehovah tọn go. Hia Deutelonomi 22:5, enẹgodo dọhodo kanbiọ ehe ji:

• Naegbọn mí dona dapana nusisọ́ po aṣọ́dido delẹ po he nọ do sunnu hia di yọnnu podọ yọnnu hia di sunnu?

Hia 1 Kọlintinu lẹ 10:32, 33 gọna 1 Johanu 2:15, 16, enẹgodo dọhodo kanbiọ ehelẹ ji:

• Naegbọn mí dona nọ hẹn ẹn diun dọ aṣọ́dido po nusisọ́ mítọn po ma dotukla mẹdevo lẹ to lẹdo mítọn mẹ kavi to agun lọ mẹ?

• Nusisọ́ po aṣọ́dido tẹlẹ po wẹ gbayipe to lẹdo towe mẹ?

• Detẹ lẹ to yé mẹ wẹ a lẹndọ e ma sọgbe na Klistiani lẹ? Naegbọn a do dọ mọ?

BLADOPỌ

Mí nọ dohia dọ mí tindo sisi na Jehovah po mẹdevo lẹ po eyin mí nọ basi nudide dagbe lẹ gando awusọhia mítọn go.

Dogbapọn

• Naegbọn nusisọ́ po aṣọ́dido mítọn po nọ duahunmẹna Jehovah?

• Nunọwhinnusẹ́n tẹlẹ wẹ mí dona nọ yí do yizan mẹ whenue mí jlo na basi nudide he gando awusọhia mítọn go lẹ?

• Nawẹ awusọhia mítọn gán yinuwado nukun he mẹdevo lẹ nọ yí do pọ́n sinsẹ̀n-bibasi nugbo lọ ji gbọn?

PỌ́N NUDỌNAMẸ DEVO LẸ

Pọ́n nuhe nusisọ́ towe lẹ gán nọ dohia mẹdevo lẹ gando gowe.

“Nawẹ Nusisọ́ Ṣie Nọ Nọ̀?” (Hosọ Intẹnẹt ji tọn)

Pọ́n nuhewutu e yin nuyọnẹnnu dọ yè ni nọ lẹnnupọndo kọdetọn he demẹ ji whẹpo do kannu do agbasago.

“Nukinkan Do Agbasago—Etẹwẹ Biblu Dọ Gandego?” (Hosọ Intẹnẹt ji tọn)

Gbadopọnna nunọwhinnusẹ́n devo lẹ dogọ he ji mí gán nọ ze nudide mítọn lẹ sinai do.

“Be Aṣọ́dido Towe Nọ Pagigona Jiwheyẹwhe Ya?” (Atọ̀họ̀-Nuhihọ́ lọ Tọn, septembre 2016 tọn)

Nawẹ nawe ahunjijlọnọ de wá wleawuna pọndohlan jlẹkaji tọn gando nusisọ́ mẹdevo lẹ tọn go gbọn?

“E Vẹawuna Mi Nado Diọ Pọndohlan He N’Tindo Gando Nusisọ́ po Aṣọ́dido po Go” (Fọ́n!, 22 décembre 2003 tọn)