AFỌDIDONA MẸHE DO OJLO HIA LẸ
NUPINPLỌN 7
Linsinsinyẹn
Nunọwhinnusẹ́n: “Yé zindonukọn nado to mẹplọn bo to wẹndagbe lọ lá mapote.”—Owalọ lẹ 5:42.
Nuhe Paulu Wà
1. Pọ́n VIDEO lọ, kavi hia Owalọ lẹ 19:8-10. Enẹgodo, lẹnnupọndo kanbiọ he bọdego lẹ ji:
Kakati Paulu ni gbọjọ to whenue mẹdelẹ diọnukunsọ ẹ, nawẹ e yí linsinsinyẹn do gọalọna mẹhe do ojlo to owẹ̀n lọ mẹ lẹ gbọn?
Whetẹnu wẹ Paulu nọ lẹkọyi plọnnu hẹ jlodotọ enẹlẹ, podọ nawẹ e wàmọ dẹnsọ?
Etẹwẹ Nuyiwa Paulu Tọn Ehe Plọn Mí?
2. E na biọ whenu po vivẹnudido susu po to mí si nado basi gọyìpọn kọdetọn dagbenọ lẹ bo bẹ plọnmẹ Biblu lẹ jẹeji.
Hodo Apajlẹ Paulu Tọn
3. Nọ diọ tito towe sọgbe hẹ mẹlọ tọn. Kanse dewe dọ: ‘Whetẹnu wẹ e na yọnbasi na mi hugan nado lẹkọyi e dè? Whetẹnu podọ fie wẹ e na yọnbasi na ewọ te hugan nado dọhodopọ hẹ mi?’ Nọ wleawufo nado doafọna jlodotọ lọ, eyin ojlẹ he e de ma tlẹ yọ́n na we.
4. Nọ basi tito hẹ mẹlọ. To vivọnu hodọdopọ dopodopo tọn, nọ tẹnpọn nado kọngbedopọ hẹ ẹ do ojlẹ tangan de ji he mẹ mì gán vọ́ hodọ te. Dovivẹnu nado hodo tito he mì yí.
5. Nọ tindo pọndohlan dagbe. Ma nọ yawu wá tadona kọ̀n dọ mẹhe a nọ saba bapò to whégbè kavi he sin alọnu nọ ján taun de ma do ojlo blo. (1 Kọl. 13:4, 7) Kakatimọ dile a to linsinyẹn hẹ mẹlọ, yí whenu towe zan po nuyọnẹn po.—1 Kọl. 9:26.