Mẹpinplọn He Bọawu

Nuhe Jesu Wà

VIDEO: Jesu Yí Apajlẹ lẹ Zan Nado Do Mẹtọnhopọn Otọ́ Mítọn Tọn Hia

1. Pọ́n VIDEO lọ, kavi hia Matiu 6:25-27. Enẹgodo, lẹnnupọndo kanbiọ he bọdego lẹ ji:

1. Apajlẹ tẹlẹ wẹ Jesu yizan nado dohia dọ Jehovah nọ hò mítọn pọ́n?

2. Dile etlẹ yindọ Jesu yọ́n nudọnamẹ susu gando ohẹ̀ lẹ go, adà gbẹzan yetọn tọn he ma gẹdẹ tẹ ji wẹ e zinnudo? Naegbọn enẹ do yin aliho mẹpinplọn tọn dagbe de?

Etẹwẹ Nuyiwa Jesu Tọn Ehe Plọn Mí?

2. Eyin mí nọ plọnnu mẹlẹ to aliho he bọawu mẹ, yé na nọ flin nuhe mí plọn yé lẹ bọ mí nasọ jẹ ahun yetọn mẹ.

Hodo Apajlẹ Jesu Tọn

3. Ma nọ dọho susu blo. Kakati a ni dọ nuhe a yọnẹn do hosọ de ji lẹpo, yí nudọnamẹ he to owe he gbadopọnna mì te lọ mẹ lẹ zan nado plọnnumẹ. Whenue a kàn kanbiọ de sè, yí homẹfa do nọtepọn nuplọntọ lọ nado na gblọndo. Eyin e ma yọ́n gblọndo lọ kavi gblọn nude he jẹagọdo nuplọnmẹ Biblu tọn lẹ, yí kanbiọ devo lẹ zan nado hẹn ẹn lẹnnupọndo whẹho lọ ji. Eyin nuplọntọ towe ko mọnukunnujẹ nuagokun tangan lọ mẹ, a gán zindonukọn.

4. Nọ gọalọna nuplọntọ towe nado mọ kanṣiṣa he to nuhe e ko yọnẹn dai lẹ po nuyọyọ he plọn e te lẹ po ṣẹnṣẹn. Di apajlẹ, whẹpo a nido bẹ nupinplọn he dọhodo fọnsọnku ji jẹeji hẹ ẹ, a gán dọho hẹ ẹ kleun nado yọ́n nuhe e ko yọnẹn dai gando ninọmẹ oṣiọ lẹ tọn go.

5. Nọ yí apajlẹ lẹ zan po sọwhiwhe po. Whẹpo a nido yí apajlẹ de zan, nọ kanse dewe dọ:

1. ‘Be apajlẹ lọ bọawu ya?’

2. ‘Be nuplọntọ ṣie na yawu mọnukunnujẹemẹ ya?’

3. ‘Be e na gọalọna nuplọntọ ṣie nado nọ flin nuagokun lọ —bọ e ma yin apajlẹ lọ poun ya?’