Nukun He Jiwheyẹwhe Nọ Yí Do Pọ́n Ahọ́dudu

JIWHEYẸWHE whẹdida dodo tọn, Jehovah, ma nọ yí nukundagbe do pọ́n mẹhe ma nọ sú ahọ́ he yé dù lẹ gba. Psalm-kantọ gbọdo lọ dohia dọ: “Mẹylankan nọ yàn, e masọ nọ gọwá sú.” (Psalm 37:21) To hodidọ gando nukun he Klistiani lẹ na yí do pọ́n whẹho ehe go mẹ, apọsteli Paulu na tulimẹ dọmọ: “Mì duahọ nude tọn do mẹde blo; adavo nado yiwanna mìnọzo.”—Lomunu lẹ 13:8.

Enẹwutu mẹhe jlo nukundagbe Jiwheyẹwhe tọn dona yin ahunmẹduna dogbọn akuẹ he e yàn po nuhe ewọ họ̀ po gọna azọ́n he yin wiwà na ẹn lẹpo tọn súsú dali. Na enẹwutu, e dona nọ aṣeji ma nado didá agbàn pinpẹn akuẹzinzan tọn hú ehe e tindo to alọnu. E yin e ma yinmọ e sọgan wá biọ ninọmẹ de mẹ bo ma na penugo nado sú ahọ́ he e dù. Humọ, ahọ́ lọ súsú ma dona dọngbàn. E na yin lẹnpọn dagbe matindo po dagbe mayọnẹn po na mẹde nado sẹ̀ ahọ́ súsú do nukọn bo nado to adà daho akuẹ he nọ jẹ e si tọn yizan na ayidedai zẹjlẹgo, gbẹdudu kavi gbọjẹ yìyì he nọ biọ akuẹzinzan susu.

Mẹdelẹ sọgan lẹndọ azọngban lọ ma klo sọmọ eyin mẹde duahọdo hẹnnumẹ sẹpọ kavi họntọn de. Ṣigba be e ma yin mẹtọnhopọn matindo wẹ eyin nado gbọn ṣejannabi dali yí onú depope he yin hẹnnumẹ kavi họntọn de tọn ya?

Na taun tọn, mẹhe yí nukunpẹvi do pọ́n súsú ahọ́ he e dù do mẹdevo lẹ to awugbopo nado do owanyi hia. E to aliglọnna yé ma nado zan akuẹ he yé tindo jlọjẹ na. Ehe tlẹ sọgan hẹn awugble wá na yé. Di apajlẹ, lẹnnupọndo ninọmẹ azọ́n mẹdetiti tọn watọ lẹ tọn ji—doto lẹ, whẹ̀yidọtọ lẹ, miyọ́n lẹtliki tọn zọ́nwatọ lẹ, whlẹpatọ lẹ po mọmọ po sọyi. E nọ biọ akuẹzinzan susu nado wazọ́n yetọn. Ahọ́ he na yin súsú na azọ́n yetọn dona pé na akuẹzinzan ehelẹ podọ dona sù ganji nado sọgan penukundo nuhudo yetọn lẹ go. Todin, eyin mẹsusu gboawupo nado suahọ yé, azọ́nwatọ ehelẹ sọgan gọn ma penugo nado jẹ akuẹzinzan yetọn lẹ kọ̀n, podọ e sọgan wá biọ dọ yé ni jo agbasazọ́n yetọn lẹ do. E họnwun dọ mẹhe nọ glọnalina aliho he mẹdevo lẹ nọ gbọ̀n nado dùnú ma to owanyi dohia gba.

Mí ma dona yí nukunpẹvi do pọ́n whẹho ehe gba. Apọsteli Johanu hẹn ehe họnwun to whenue e kanwe hlan Klistiani lẹ dọmọ: “Mẹdepope he gbẹwanna mẹmẹsunnu etọn mẹhutọ de wẹ; mì sọ yọnẹn dọ ogbẹ̀ madopodo ma na nọhẹ mẹhutọ gba. Ehe mẹ wẹ mí yọ́n owanyi [Jiwheyẹwhe tọn] te, na [Jesu] yí gbigbọ etọn bọdai na mí wutu: e jẹ dọ míwlẹ ni yí gbigbọ mítọn bọdai na mẹmẹsunnu lẹ ga. Ṣigba mẹhe tindo adọkunnu aihọn he tọn, bo mọ mẹmẹsunnu etọn to ohẹ́n mẹ, bosọ glọn lẹblanu homẹ etọn tọn sọn e dè, nawẹ owanyi Jiwheyẹwhe tọn na nọhẹ omẹ lọ do?”—1 Johanu 3:15-17.

Eyin mẹmẹsunnu he tin to nuhudo mẹ lọ ma sọgan mọ alọgọ yí sọn asisa devo de mẹ, e na kú eyin ewọ ma tindo dandannu lẹ na ojlẹ dindẹn. Na enẹwutu, mẹhe ylọ ede dọ Klistiani he gbẹ́ nado gọalọ na ẹn na hùwhẹ sinsinyẹn vọdonanu tọn. Mọdopolọ, eyin Klistiani lẹ na yí dotẹnmẹ yisenọ hatọ de tọn zan gbọn sisẹ ahọ́ he yé dù lọ súsú do nukọn zẹjlẹgo dali, yé sọgan hùwhẹ hinhẹn ẹn po huhlọn po nado jo agbasazọ́n etọn do tọn. Ehe sọgan zọ́n bọ e na tindo nuhahun sinsinyẹn akuẹzinzan tọn bosọ sọgan hẹn ẹn biọ nuhudonọ-yinyin mẹ. Eyin ehe jọ, be mí ma na dọ dọ yé he gbẹ́ nado sú ahọ́ yetọn lẹ wà nuylankan taun do mẹmẹsunnu yetọn lẹ ya?

Klistiani ayihadawhẹnamẹnu dagbenọ lẹ ma nọ tẹnpọn nado duale dagbenu lẹ tọn na yedelẹ na haṣinṣan gbigbọmẹ tọn lẹ wutu gba. Yé yọnẹn dọ mọwiwà na yin “adọwhẹ́nnọ na ale.” (1 Timoti 3:8) Sọn Owe-wiwe lẹ mẹ, mí plọn dọ nukunkẹnnọ-yinyin mọnkọtọn sọgan ze teninọ mẹde tọn hẹ Jehovah Jiwheyẹwhe do owù mẹ. Ehe yin yẹdena ganji to whẹho mẹdemẹ Eliṣa tọn Gehazi tọn mẹ. Gbọn Eliṣa dali, awhàngán Silia tọn Namani ko yin azọ̀nhẹngbọna sọn pòzọ̀n mẹdèpo tọn mẹ. Nado do pinpẹn-nutọn-yinyọnẹn hia na azọ̀nhẹngbọ lọ, Namani jlo na basi nunina de na yẹwhegán lọ. Ṣigba Eliṣa gbẹ́ nado kẹalọyi, na e ma jlo nado duale sọn otẹn nunina dọdai didọ tọn he Jiwheyẹwhe na ẹn po huhlọn he e na ẹn lọ po tọn mẹ wutu. Ṣigba, Gehazi gbọn nukunkẹn dali jlo nuhe Eliṣa ko gbẹ́ bo yí nunina de sọn Namani si gbọn yẹnuwiwa dali. Taidi kọdetọn de, to dohia whẹdida Jehovah tọn mẹ, Gehazi yin hihò po pòzọ̀n po.— 2 Ahọlu lẹ 5:15, 20-23, 27.

Mọdopolọ, eyin nukunkẹn wutu wẹ mẹde gboawupo nado sú ahọ́ he e dù, e sọgan hẹn whẹgbledomẹ sinsinyẹn wá ede ji. Biblu na mí avase dọ ‘nukunkẹnnọ lẹ ma na dugu ahọluduta Jiwheyẹwhe tọn.’ (1 Kọlintinu lẹ 6:10) Mọwẹ, nukunkẹn mọnkọtọn sọgan zọ́n bọ mí na gbọ̀ nunina ogbẹ̀ madopodo tọn go. Nuhẹnbu daho nankọtọn die!

To whelọnu lo, taidi Klistiani lẹ mí jlo na yin nugbonọ to nuyiwa mítọn lẹ mẹ hẹ mẹlẹpo. Mí dona yin anadena gbọn nunọwhinnusẹ́n he bọdego ehelẹ dali he dọmọ: “Onú depope mìwlẹ jlo gbẹtọ ni wà hlan mì, mọkẹdẹ wẹ mì ni wà hlan yé.” (Matiu 7:12) “Le míwlẹ mọtẹn do, mì gbọ mí ni nọ wà dagbe hlan omẹ popo, humọ hlan yé he yin yise whédo tọn lẹ.” (Galatianu lẹ 6:10) Enẹwutu, eyin mí jlo dọ mẹdevo lẹ ni yin ahunmẹduna gbọn nukunpipedo ahọ́ yetọn go dali, be e ma jẹ dọ míwlẹ ni ze apajlẹ dagbe dai ya? Na taun tọn dagbe wiwà hlan mẹmẹsunnu mítọn lẹ dona nọ duahunmẹna mí, e ma yin nado nọ ṣì homẹdagbe yetọn zan eyin e wá biọ dọ mí ni sú ahọ́ he mí dù do yé lẹ gba.

E ma sọgbe dọ Klistiani lẹ ni lẹndọ, to whẹho ajọwiwa tọn lẹ mẹ eyin dandan na yisenọ hatọ lẹ nado de akuẹ pò bo do nukundagbe hia yé gba. Ṣigba eyin mẹtọnhopọn vonọtaun de yin didohia, yè dona yọ́n pinpẹn etọn. Klistiani lẹ dona jlo dọ mẹmẹsunnu yetọn lẹ ni mọ nudepope he yé tindo jlọjẹ etọn yí. Ayinamẹ apọsteli Paulu tọn hlan afanumẹ Klistiani lẹ ze anademẹ dagbe de dai dọmọ: “Mẹhe tindo mẹmẹnu yisenọ lẹ, yé vlẹ yé blo, na mẹmẹsunnu wẹ yé wutu; ṣigba yé ni gbọ̀ bo kúkú nọ sẹ̀n yé, na yisenọ, mẹyiwanna wẹ yé, mahẹtọ azọ́n dagbe lọ tọn.” (1 Timoti 6:2) Klistiani he ahọ́ súsú na yisenọ hatọ etọn lẹ nọ duahunmẹna, na nugbo tọn na kọngbedopọ hẹ tudohomẹnamẹ ehe.

Na nukunpipedo ahọ́ mítọn lẹ go ni dohia dọ mí to anadena nuyiwa mítọn lẹ sọgbe hẹ nunọwhinnusẹ́n Biblu tọn lẹ. Mí ma dona yí nukunpẹvi do pọ́n nugbo lọ dọ awugbopo sọn ojlomẹ wá nado sú ahọ́ he mí dù yin oylan sinsinyẹn. Gigogán lọ ma na yí nukundagbe do pọ́n mẹhe gbọn nukunkẹn kavi ṣejannabi dali ma ylọ azọngban yetọn lẹ dọ nujọnu pọ́n gbede gba. Gbọn hinhẹn ẹn diun dọ ‘mí ma duahọ nudepope tọn do mẹde adavo owanyi’ kẹdẹ dali, wẹ mí na donukun dona Jehovah tọn lẹ.