Be Hiẹ Dona Yin Bibaptizi Ya?

DIBLAYÌ livi dopo gbẹtọ lẹ tọn wẹ yin bibaptizi gbọn Kunnudetọ Jehovah tọn lẹ dali to owhe atọ̀n he wayì lẹ mẹ. Ehe yin madozẹnzẹn gbẹtọ 824 tọn to gbedopo, kavi gbẹtọ 4 yin bibaptizi to nukunwhiwhe 7 lẹpo mẹ. Be apajlẹ zohunhun sinsẹ̀n tọn heyin owhe kanweko 15tọ po 16tọ tọn po poun wẹ e yin ya?

Lala, omẹ ehelẹ ma yin bibaptizi po huhlọn po, taidi apadewhe linlẹn didiọna gbẹtọgun hlan sinsẹ̀n kọ̀n tọn, kavi taidi kọdetọn numọtolanmẹ mẹdọndogo tọn gbọn hodọtọ sọn oplo ji sinsẹ̀n delẹ tọn dali gba. Yé yin bibaptizi na Jesu Klisti, Ogán po Nukọntọ Klistiani lẹ tọn po, degbe dọ ehe dona yin bibasi wutu. Yé ko hodo afọdomẹ po aliho nuyiwa tọn lẹ he Jesu zedai po he yin zize do yizan mẹ gbọn apọsteli lẹ he ewọ lọsu dè bo plọ́n dali.

To fọnsọnku Jesu tọn godo podọ jẹnukọnna hihẹjiyì olọn mẹ etọn tọn, e na hodotọ etọn lẹ azọ́ndenamẹ e zun whedenu tọn ehe dọmọ: “Enẹwutu mì yì, bo hẹn akọta lẹpo zun nuplọntọ, bo sọ nọ baptizi yé do oyín Otọ́ tọn, po Ovi tọn po, po gbigbọ wiwe tọn po mẹ: na mì ni sọ nọ plọn yé nado nọ do ayi onu lẹpo go, nudepope he yẹn degbena mì: bo pọ́n, yẹn tin to mì de to whepoponu, kaka jẹ opodo aihọn tọn.” (Matiu 28:19, 20) Sọn ojlẹ enẹ mẹ sọyì, ehe wẹ yin kiki baptẹm osìn tọn dopo kẹdẹ lọ he tindo alọkẹyi Jiwheyẹwhe tọn.

To gbesisọ mẹ, Biblu dọ na mí dọ hodotọ fliflimẹ Klisti tọn enẹlẹ lẹzun “kunnudetọ na [Jesu] to Jelusalẹm mẹ, to Judé lẹpo mẹ, po Samalia po, podọ jẹ opòdo aigba tọn.” (Owalọ lẹ 1:8) Dile Jesu ko dọ dọdai etọn do, azọ́n yẹwhehodidọ po mẹpinplọn tọn po na dekọtọn do baptẹm yisenọ lẹ tọn mẹ he na sọ yin hodotọ Klisti tọn lẹ.

Apajlẹ tintan ehe tọn he yin kandai basina wá aimẹ to Jelusalẹm to azán Pẹntikọsti 33 W.M. tọn mẹ. To ojlẹ enẹ mẹ apọsteli Pita “fọ́n ṣite po omẹ widopo” lẹ po bo dọho dogbọn Jesu Mẹssia lọ dali na gbẹtọgun he plidopọ lẹ. Kandai lọ dọ na mí dọ hodidọ etọn ‘sọwhán ayiha yetọn,’ bọ yé kan nuhe yé dona wà biọ. “Mì lẹnvọjọ, na yé ni sọ baptizi dopodopo mìtọn to oyín Jesu Klisti tọn mẹ na desẹ̀ ylando tọn,” wẹ Pita dọ. Kọdetọn lọ wẹ yindọ “yè baptizi mẹhe yí homẹhùnhùn do yí oho etọn lẹ: yè sọ hia dogọ yé ayiha foofọtọ́n nkọ to gbedopo nẹ.” (Owalọ lẹ 2:14-41) Kandai he bọdego lẹ zinnudeji dọ sisè owẹ̀n Klistiani tọn, tintindo yise to wẹndagbe lọ mẹ, po linlẹnvọjọ po jẹnukọnna baptẹm devi lẹ tọn.—Owalọ lẹ 8:12, 13, 34-38; 10:34-48; 16:30-34; 18:5, 8; 19:1-5.

To Ninọmẹ Tẹ́ Mẹ?

Ṣigba nawẹ devi yọyọ ehelẹ yin bibaptizi to osìn mẹ gbọn? Be gbọn osìn húnhún do mẹji, osìn kọ̀n do ota namẹ, kavi omẹ yinylọ́n do osìn mẹ pete dali wẹ ya? Etẹwẹ kandai Biblu tọn dohia? To whenuena eyindọ Jesu zé apajlẹ de dai na mí na “míwlẹ nido nọ gbọn afọ etọn ji,” to ninọmẹ tẹ mẹ wẹ ewọ yin bibaptizi te?—1 Pita 2:21.

Biblu dohia dọ Jesu yin bibaptizi to otọ̀ Jọdani tọn mẹ, yedọ otọ̀ jlẹmẹ de. To yinyin bibaptizi godo, e tọ́n “sọn osìn mẹ.” (Malku 1:10; Matiu 3:13, 16) Enẹwutu Jesu na nugbo tọn ko yin yinylọ́n mlẹnmlẹn do otọ̀ Jọdani tọn mẹ. E yin bibaptizi gbọn Johanu dali, mẹhe, na dindin otẹ̀n dagbe de nado basi baptẹm lẹ wutu, dè otẹ̀n de to Agbado Jọdani tọn mẹ sẹpọ Salimi “na osìn susu tin to finẹ” wutu. (Johanu 3:23) Nugbo lọ dọ mẹylọ́ndosìnmẹ mlẹnmlẹn wẹ yin nujinọtedo nuyiwa baptẹm tọn he sọgbe to hodotọ Jesu tọn lẹ ṣẹnṣẹn yin mimọ to hogbe ojọ̀ Etiopianu lọ tọn lẹ mẹ. Gbọn alọkẹyi nuplọnmẹ Filipi tọn dali, e dawha dọmọ: “Pọ́n, osìn tin to ofi; etẹ wẹ hẹn mi do ote nado baptizi?” Enẹgodo mí doayi e go dọ “yé omẹ awe lẹ sọ jẹte yì osìn mẹ” podọ to enẹgodo “tọ́n jẹ age sọn osìn mẹ.”—Owalọ lẹ 8:36-39.

Be whenuho aihọn tọn dlẹnalọdo baptẹm bibasi gbọn mẹylọ́ndosìnmẹ dali to Klistiani lẹ ṣẹnṣẹn ya? Na nugbo tọn e wàmọ. Podọ ojlofọ́ndotenu wẹ e yin nado doayi e go dọ basia daho baptẹm tọn susu he yọ́n na mẹylọ́ndosìnmẹ wẹ gbẹsọ tin to sọha susu aigba lẹ tọn ji. “Kunnudenu whenuhokantọ-dokùntọ lẹ tọn dekunnu taun hlan mẹylọ́ndosìnmẹ taidi aliho paa baptẹm bibasi tọn to owhe kanweko ao jẹ wiẹnẹ tintan tọn lẹ whenu,” wẹ linlinwé lọ Ministry dọ. E yidogọ dọmọ: “To gbakija họgbigba Klistiani dowhenu tọn lẹ tọn ṣẹnṣẹn, podọ to ṣọṣi hohowhenu tọn lẹ he yè gbẹsọ po to yiyizan to alọnu dinvie lẹ mẹ, whenuho baptẹm Klistiani tọn sọgan yin afọdona. Osẹ̀n he yè sado yọdo lẹ po ṣọṣi lẹ po, yẹdide do aigba lẹ, adó lẹ go, po azà lẹ, anazọ́nwiwa lẹ, po nudide lẹ po to owe Alẹnu Yọyọ hohowhenu tọn lẹ mẹ yí zẹẹmẹ lẹ dogọ na whenuho ehe ... Ehe tin to yidogọ mẹ na kunnudenu he yin mimọ to wekinkan lẹdopé yẹwhenọ lẹ tọn mẹ dọ mẹylọ́ndosìnmẹ yin aliho baptẹm bibasi he gbayipe ṣọṣi dowhenu tọn tọn.”

Otanwé Nouvelle Encyclopédie Catholique (Glẹnsigbe) yigbe dọmọ: “E họnwun dọ baptẹm to Ṣọṣi dowhenu tọn mẹ yin gbọn mẹylọ́ndosìnmẹ dali.” To whelọnu lò, e ma yin nuhe paṣamẹ dọ, mí nọ mọ hosọ linlinwé lẹ tọn taidi ehelẹ: “Katholiki lẹ Hẹn Baptẹm Mẹylọ́ndosìnmẹ tọn Gọwa Otẹ̀n Etọn Mẹ” (The Edmonton Journal, Canada, 24 septembre 1983), “Baptẹm Gbọn Mẹylọ́ndosìnmẹ Dali ko Lẹzun Onu Paa na Katholiki lẹ Tofi” (St. Louis Post-Dispatch, 7 avril 1985), “Susu Katholiki lẹ tọn to Dide Baptẹm Gbọn Mẹylọ́ndosìnmẹ Dali” (The New York Times, 25 mars 1989), po“Baptẹm Gbọn Mẹyinylọ́ndosìnmẹ Dali yin Huhlọnna” po (The Houston Chronicle, 24 août 1991).

Na Lẹndai Tẹ?

Etẹwutu wẹ Jesu biọ to devi etọn lẹ si nado yin bibaptizi? Nalete, yẹhiadonu mẹdezejo mlẹnmlẹn hlan Jiwheyẹwhe he jẹ de wẹ eyin. “Wẹndagbe” lọ dona yin yẹwheho etọn dọ lẹdo aigba pé, podọ devi lẹ dona yin bibasi sọn gbẹtọ “akọta lẹpo” tọn mẹ. (Matiu 24:14; 28:19) Ehe zẹẹmẹdo dọ Jiwheyẹwhe ma sọ to nuyiwa hẹ akọta Ju lẹ tọn kẹdẹ, he bẹ gbẹtọ he klan yede do wiwe hlan ẹn sọn jiji whenu lẹ hẹn gba. Kọnẹliọsi po whẹndo etọn po wẹ yin Kosi tintan, kavi mẹhe ma yin Ju lẹ, nado kẹalọyi nugbo lọ dogbọn Jesu Klisti dali bo yin bibaptizi.

Yinyin yinylọ́n do osìn mẹ dohia dọ mẹhe to yinyin bibaptizi lẹ ko kú na nuyiwa gbẹmẹ tọn de he yin na yede kẹdẹ tọn. Yinyin zize daga sọn osìn mẹ yetọn dohia dọ yé tin to ogbẹ̀ todin na ojlo Jiwheyẹwhe tọn wiwà bo nọ ze e do otẹ̀n tintan mẹ to gbẹzan yetọn lẹ mẹ, dile Jesu wà do. (Matiu 16:24) Yinyin bibaptizi “do oyín Otọ́ tọn, po Ovi tọn po, po gbigbọ wiwe tọn po mẹ” dohia dọ yé ko plọn bo ko sọ kẹalọyi nugbo dogbọn dopodopo ehelẹ tọn dali bo yọ́n nuhe yé yin. (Matiu 28:19; yijlẹdo Owalọ lẹ 13:48 go.) Baptẹm yin afọdide tintan tonusise na Jiwheyẹwhe po mẹdezejo na ojlo etọn po.

Owe Wiwe lẹ ma nọgodona pọndohlan gbayipe sinsẹ̀n tọn lẹ dọ baptẹm yin nuyiwa sinsẹ̀n tọn, enẹ wẹ yindọ, hunwhẹ sinsẹ̀n tọn de he nọ namẹ ale—yedọ ojlo, wiwe-yinyin, kavi alè gbigbọmẹ tọn—hlan mẹhe yin bibaptizi lọ gba. Di dohia, gbedide papa-yinyin tọn heyin Papa Eugenius IV he mẹ yè yihodọ sọn to hosọ he jẹnukọn mẹ zindonukọn nado dọ gando baptẹm go dọmọ: “Nuyiwadomẹji hunwhẹ titengbe baptẹm Klistiani tọn ehe yin jona ylando lẹpo tọn, dowhenu po nujọnu tọn po; mọdopolọ wẹ yasanamẹ lẹpo he jẹ na ylando. Taidi kọdetọn etọn, pekọ depope na ylando he ko juwayi lẹ ma nọ yin zizedo mẹhe ko baptizi lẹ ji gba; podọ eyin yé kú whẹpo yé do wàylando depope, yé nọ yì ahọluduta olọn tọn mẹ to afọdopolọji bo nọ mọ numimọ Jiwheyẹwhe tọn yí.”

Ṣigba, Jesu yin bibaptizi dile e tlẹ yindọ e “ma waylando depope.” (1 Pita 2:22) Humọ, sọgbe hẹ Owe wiwe lẹ, jona ylando lẹ tọn nọ wá kiki gbọn avọsinsan ofligọ Jesu Klisti tọn gblamẹ. Anania dotuhomẹna Saulu Tasu tọn dọmọ: “Tite, na yè ni baptizi we, bo klọ ylando towe lẹ sẹ̀, bo sọ to oyín [Jesu] tọn ylọ.” (Owalọ lẹ 22:12-16) Mọwẹ, whlẹngan yọnbasi kiki gbọn yizan ohùn sọ̀ndai Jesu tọn dali podọ gbọn ‘oyín etọn yiylọ’ to yise mẹ dali.—Heblu lẹ 9:22; 1 Johanu 1:7.

Etẹwẹ, to whelọnu lo, dogbọn hogbe Pita tọn lẹ to 1 Pita 3:21 mẹ dali? To finẹ e dọmọ: “Ohia mọtọnhunkọ hlan ehe baptẹm do to mí whlẹn dinvie ga, (e ma yin diho agbasalan tọn didesẹ gba, ṣigba ogbèyí ayiha dagbe de tọn hlan Jiwheyẹwhe,) gbọn fọnsọnku Jesu Klisti tọn mẹ.” Pita to yiyi baptẹm jlẹdo numimọ Noa tọn go heyin jujugbọn osìn Osingigọ lọ tọn mẹ. (Wefọ 20) Noa, na dido yise gigọ hia to Jiwheyẹwhe mẹ, gbá aki lọ na whlẹngan whẹndo etọn tọn. (Heblu lẹ 11:7) Mọdopolọ, gbọn yise tintindo to Jehovah Jiwheyẹwhe po nuwleawudai etọn na whlẹngan po dali gbọn Klisti Jesu gblamẹ, gbẹtọ lẹ to egbehe sọgan yin whinwhlẹngan sọn aihọn ylankan dinwhenu tọn ehe si. Yé sọ dona yinuwa do yise enẹ ji. Gbọn linlẹnvọjọ sọn ylando yetọn lẹ mẹ, po lilẹ́ sọn nuyiwa agọ̀ de mẹ po dali, podọ bibasi klandowiwe mlẹnmlẹn hlan Jehovah Jiwheyẹwhe to odẹ̀ mẹ, obiọ lọ nọ yin bibasi hlan Jiwheyẹwhe na ayihadawhẹnamẹnu dagbe de. Ṣigba to dodonu avọsinsan Jesu tọn ji wẹ, podọ fọnsọnku etọn gbọn ehe dali e zé nuhọakuẹ-yinyin avọsinsan enẹ tọn donukọnna Jiwheyẹwhe to olọn mẹ, wẹ ylando lẹ nọ yin jijona podọ whlẹngan yọnbasi.—1 Pita 3:22.

Etẹwẹ Hiẹ na Wà?

Be hiẹ yin mẹde he ko to gbẹdo hẹ Kunnudetọ Jehovah tọn lẹ na ojlẹ de ya? Vlavo hiẹ ko basi diọdo he jẹ lẹ to gbẹzan towe mẹ to gbesisọ mẹ hẹ nunọwhinnusẹ́n Biblu tọn lẹ ṣigba ma ko zé afọdide lọ lẹ heyin klandowiwe po baptẹm po tọn gba. Hiẹ sọgan jlo nado wà ojlo Jiwheyẹwhe tọn, ṣogan hiẹ sọgan dibú dọ baptẹm na hẹn we tin to dandannu glọ. Nalete, hiẹ sọgan jlo nado dapana azọ́ngban po nulẹnjo mọnkọtọn po na ojlẹ de. Diblayì gbẹtọ livi 11 daa wẹ wá hunwhẹ Tenu-nududu Oklunọ tọn tẹnmẹ to owhe he wayi mẹ. Ṣigba, sọha agayiyi enẹnọ he to mahẹ tindo to azọ́n yẹwhehodidọ wẹndagbe lọ tọn mẹ to owhe lọ gblamẹ yin nuhe whè sọn livi 4 daa mẹ. Ehe zẹẹmẹdo dọ nudi gbẹtọ livi ṣinawe to dido pinpẹn nutọn yinyọnẹn delẹ hia na nugbo Jiwheyẹwhe tọn, dile etlẹ yindọ yé ma yin Kunnudetọ klandowiwe Jehovah tọn lẹ gba. Nugbo wẹ dọ, delẹ to omẹ ehelẹ mẹ yin yọpọvu lẹ po jlodotọ yọyọ lẹ po. Ṣigba delẹ to mẹhe to mahẹ tindo to azọ́n yẹwhehodidọ lọ tọn mẹ lẹ ma ko yin bibaptizi gba. Mẹsusu wẹ tin he ko yí oyọnẹn he pegan Biblu tọn ṣigba ma ko zé yede jó mlẹnmlẹn na nuwleawudai Jiwheyẹwhe tọn na whlẹngan gbọn baptẹm dali gba.

Onu agokun de he yè dona flin wẹ yindọ oyọnẹn nuhe Jiwheyẹwhe biọ to asi we wẹ nọ hẹn nulẹnjó wá. “Ewọ he yọ́n dagbe dọ wiwà wẹ, bo ma basi i, ylando wẹ e yin hlan ẹn,” wẹ Jakobu 4:17 dọ. Ezekiẹli 33:7-9 dohia dọ mẹhe gbedide po nuplọnmẹ Jiwheyẹwhe tọn po lẹ yin didọna tindo azọ́ngban lọ nado hẹn yé di. Enẹwutu kanbiọ lọ wẹ yindọ vlavo omẹ lọ tindo owanyi nujọnu tọn na Jiwheyẹwhe po ojlo nujọnu tọn po nado hẹn homẹ etọn hùn. Mẹde he tindo owanyi mọnkọtọn nugbo bo jlo haṣinṣan vonọtaun de hẹ Jehovah Jiwheyẹwhe ma na dọ̀n yonu do godo sọn klandowiwe mlẹnmlẹn bibasi mẹ hlan ẹn gba. Baptẹm yin dohia gbangba klandowiwe enẹ tọn. Afọdide he jẹ wẹ e yin hlan whlẹngan kọ̀n. Yisenọ nujọnu tọn nọ basi baptẹm.—Owalọ lẹ 8:12.

Nukundido daho he Jiwheyẹwhe tindo na nugbonọ, he klan yede do wiwe lẹ to aihọn yọyọ he ja lọ mẹ pẹnzin taun hugan alè ojlẹ gli tọn lẹ he titonu hoho ylankan ehe sọgan taidi nuhe na namẹ. Obú gbẹtọ hatọ mẹtọn tọn nọ busẹ sọn aimẹ to whenuena mí gbadopọnna alọ̀ huhlọnnọ Jiwheyẹwhe tọn. (1 Kọlintinu lẹ 10:22; 1 Pita 5:6, 7) Na nugbo tọn, dinvie wẹ ojlẹ lọ nado kanse dewe, dile ojọ̀ Etiopianu lọ kanbiọ Filipi do dọmọ: “Etẹ wẹ hẹn mi do ote nado baptizi?” (Pọ́n w-F 1/4/93, weda 4.)

[Yẹdide to weda 7]

Taidi ojọ̀ Etiopianu lọ, be hiẹ nọ kanse dewe dọmọ: “Etẹ wẹ hẹn mi do ote nado baptizi” ya?