Dotudo Jehovah Go Nado Hẹn Lẹndai Etọn Di
“Dodonọ wẹ na dugu aigba tọn, bo nasọ nọnọ̀ e mẹ kakadoi.”—PSALM 37:29.
1. Etẹwẹ yin lẹndai Jehovah tọn na gbẹtọvi lẹ podọ na aigba ehe?
WHENUENA Jehovah dá mẹjitọ mítọn tintan lẹ, yedọ Adam po Evi po, e basi yé to pipe mẹ. Podọ e dá yé na yé nido sọgan nọgbẹ̀ kakadoi to aigba ehe ji—eyin yé setonuna osẹ́n etọn lẹ. (Gẹnẹsisi 1:26, 27; 2:17) Humọ, Jiwheyẹwhe zé yé do lẹdo paladisi tọn lẹ mẹ. (Gẹnẹsisi 2:8, 9) Jehovah dọ na yé dọmọ: “Mì yin sinsẹ́nnọ, bo sudeji, bo sọ gọ́ aigba ji, bo dugán do e ji.” (Gẹnẹsisi 1:28) Gbọnmọ dali, ovi yetọn lẹ to agọgbọnẹnmẹ na gbayipe lẹdo aigba, bọ planẹti ehe na lẹzun paladisi de he na yin gigọ po akọ̀ gbẹtọ pipe, ayajẹnọ lẹ tọn po. Bẹjẹeji dagbe nankọ die he whẹndo gbẹtọvi lẹ tọn tindo! “Jiwheyẹwhe sọ mọ onú he e da lẹpo, bo dayi e go e yọ́n tlala.”—Gẹnẹsisi 1:31.
2. Ninọmẹ whẹho gbẹtọvi lẹ tọn fọ́n kanbiọ tẹlẹ dote?
2 Ṣogan, ninọmẹ gbẹtọvi lẹ tọn he ko tin to aimẹ na owhe fọtọ́n lẹ ma dekunnu na ojlẹmọ lẹndai dowhenu Jiwheyẹwhe tọn gba. Gbẹtọvi lẹ dẹn tlala do pipe yinyin podọ ma yin ayajẹnọ depope gba. Ninọmẹ aihọn tọn lẹ ko yin mẹhẹnjẹflumẹ tọn, podọ dile yè dọ dọdai etọn do, yé ko tlẹ sọ ylan humọ tlala to ojlẹ mítọn mẹ. (2 Timoti 3:1-5, 13) Enẹwutu nawẹ mí sọgan tindo jide dọ lẹndai Jiwheyẹwhe tọn na gbẹtọvi lẹ na yin hinhẹndi to sọgodo he tin to yakẹ de mẹ gbọn? Be ojlẹ gaa dogọ na sọ juwayi po ninọmẹ flumẹjijẹ lẹ tọn po wẹ?
Etẹwẹ Hẹn Ninọmẹ lẹ Ylan?
3. Etẹwutu wẹ Jehovah ma doalọtena atẹṣiṣi gbẹtọvi lẹ tọn to afọdopolọji?
3 Mẹhe tindo oyọnẹn he pegan Ohó gbọdo Jiwheyẹwhe tọn lẹ yọ́n nuhewutu Jehovah do jotẹnna ninọmẹ ylankan ehelẹ to aigba ji. Yé sọ yọ́n nuhe e na wà dogbọn dali yetọn. Sọn kandai Biblu tọn mẹ, yé ko plọn dọ mẹjitọ mítọn tintan lẹ ṣi nunina jiawu lọ heyin dide mẹdekannujẹ tọn he Jiwheyẹwhe na gbẹtọvi lẹ zan. (Yijlẹdo 1 Pita 2:16 go.) Yé dè aliho agọ̀ mẹdekannujẹ sọn Jiwheyẹwhe go tọn. (Gẹnẹsisi, weta 2 po 3 po) Atẹṣiṣi yetọn fọ́n kanbiọ daho hugan de dote, taidi: Be Nupojipetọ Wẹkẹ tọn tindo jlọjẹ nado duahọlu do gbẹtọvi lẹ ji ya? Be gandudu etọn yin dehe yọ́n hugan na gbẹtọvi lẹ ya? Be gandudu gbẹtọvi lẹ tọn sọgan tindo kọdetọn dagbe matin nukunpedonugo Jiwheyẹwhe tọn ya? Aliho he yọ́n hugan nado din gblọndo na kanbiọ ehelẹ wẹ yin nado dike na owhe kanweko gandudu gbẹtọvi lẹ tọn ni wayì whẹ́. Kọdetọn lẹ na dohia zẹ ayihaawe tintindo depope go eyin gbẹtọvi lẹ sọgan tindo kọdetọn dagbe to ovò sọn Mẹdatọ yetọn go.
4, 5. (a) Etẹwẹ ko yin kọdetọn gandudu Jiwheyẹwhe tọn gbigbẹdai gbẹtọvi lẹ tọn? (b) Etẹwẹ jujuwayi ojlẹ lẹ tọn dohia zẹ ayihaawe tintindo depope go?
4 To whenuena Adam po Evi po jó Jiwheyẹwhe do, e ma sọ hẹn yé dogbẹ̀ to pipe mẹ bà. Matin alọgọ etọn, yé poyọnho. Kọdetọn lọ wẹ yin mapenọ-yinyin, yọnhopipo, podọ wagbọ wagbọ etọn okú. Gbọn osẹ́n ogú sọn mẹjitọ lẹ dè dali, mẹjitọ mítọn tintan lẹ dlẹnkan nuyiwadomẹji ylankan enẹlẹ hlan ovivu yetọn lẹ, gọna míwlẹ. (Lomunu lẹ 5:12) Podọ etẹwẹ yin kọdetọn gandudu owhe fọtọ́n susu gbẹtọvi lẹ tọn dali? Nugbajẹmẹji tọn wẹ e yin, kẹdẹ dile Yẹwhehodọtọ 8:9 dohia po nugbonọ-yinyin po do dọmọ: “Mẹde to gandu do omẹ awetọ ji na awugble etọn.”
5 Jujuwayi ojlẹ tọn ko dohia zẹ ayihaawe tintindo depope go dọ e ma yin gbẹtọvi lẹ tọn nado deanana nuyiwa yetọn lẹ po kọdetọn dagbe po matin alọgọ Mẹdatọ yetọn tọn lẹ gba. Wekantọ gbọdo Biblu tọn Jẹlemia dohia dọmọ: “Oklunọ e, yẹn yọnẹn dọ aliho gbẹtọ tọn ma tin to ewlọsu mẹ gba: e ma tin to omẹ he to zọnlinzin mẹ nado do afọdide etọn lẹ gba.”—Jẹlemia 10:23; Deutelonomi 32:4, 5; Yẹwhehodọtọ 7:29.
Lẹndai Jiwheyẹwhe tọn ma ko Diọ Gba
6, 7. (a) Be owhe fọtọ́n whenuho tọn ko diọ lẹndai Jehovah tọn wẹ? (b) Etẹwẹ lẹndai Jehovah tọn bẹhẹn?
6 Be jujuyì owhe fọtọ́n whenuho gbẹtọvi lẹ tọn—he gọna ylanwiwa po oyajiji po—diọ lẹndai Jiwheyẹwhe tọn wẹ ya? Ohó etọn dọmọ: “Na le wẹ Oklunọ he da olọn lẹ lọ dọ, Jiwheyẹwhe lọsu he da aihọn, bo sọ basi i; e ko hẹn ẹn nọte, e ma da ẹ tata gba, e do e na mí nido nọnọ e mẹ.” (Isaia 45:18) Enẹwutu Jiwheyẹwhe wleawuna aigba lọ nado yin ninọ e mẹ gbọn gbẹtọvi lẹ dali, podọ enẹ wẹ gbẹsọ yin lẹndai etọn.
7 E ma yindọ Jehovah dá aigba lọ nado yin ninọ e mẹ kẹdẹ gba ṣigba e sọ basi lẹndai etọn dọ e na lẹzun paladisi de nado yin vivi etọn du gbọn gbẹtọvi pipe, ayajẹnọ lẹ dali. Enẹwutu wẹ Biblu dọdai dọ “aigba yọyọ,” yedọ ogbẹ́ gbẹtọvi lẹ tọn yọyọ de na tin, to ehe mẹ “dodo nọnọ.” (2 Pita 3:13) Podọ to Osọhia 21:4 mẹ, Ohó Jiwheyẹwhe tọn dọ na mí dọ to aihọn yọyọ etọn mẹ, e “nasọ sunsun dasin lẹpo sẹ́ sọn nukun [gbẹtọvi lẹ tọn] mẹ; oku ma nasọ tin ba, kavi awubla, kavi avi, mọ awufiẹsa ma na tin ba.” Na whẹwhinwhẹn mọnkọtọn lẹ wutu wẹ Jesu sọgan dọho aihọn yọyọ he ja aigba ji enẹ tọn taidi “Paladisi.”—Luku 23:43.
8. Naegbọn mí sọgan do deji dọ Jehovah na hẹn lẹndai etọn di?
8 To whenuena e yindọ Jehovah wẹ Mẹdatọ huhlọnnọ hugan po nuyọnẹntọ hugan po to wẹkẹ lọ mẹ, mẹdepope ma sọgan diọ lẹndai etọn gba. “Oklunọ awhanpa lẹ tọn ko whle, dọmọ, ‘Nugbo dile yẹn lẹn do, mọkẹdẹ wẹ e na yin; podọ dile ayiha ṣie te, mọkẹdẹ wẹ e na nọte do.’ ” (Isaia 14:24) Gbọnmọ dali, to whenuena Jiwheyẹwhe dọ dọ emi na hẹn aigba ehe zun paladisi de he na yin ninọ e mẹ gbọn gbẹtọ pipe lẹ dali, enẹ lọ wẹ yin nuhe na jọ. Jesu dọmọ: “Donanọ wẹ homẹmimiọnnọ lẹ; na yé na dugu aigba tọn.” (Matiu 5:5; yijlẹdo Psalm 37:29 go.) Mí sọgan deji do hẹndi opagbe enẹ tọn go. Na nugbo tọn, mí sọgan zé ogbẹ̀ mítọn lẹ do owù mẹ na ẹn.
Yé Dotudo Jehovah Go
9. Etẹwẹ Ablaham wà he do tudido etọn do Jehovah go hia?
9 Susu gbẹtọ budisi Jiwheyẹwhe tọ́ lẹ to whenuho gblamẹ zé ogbẹ̀ yetọn lẹ do owù mẹ na lẹndai Jiwheyẹwhe tọn na aigba lọ na yé tindo nujikudo dọ e na hẹn ẹn di wutu. Dile e tlẹ yindọ oyọnẹn yetọn sọgan ko tindo dogbo, yé dotudo Jiwheyẹwhe go bo wleawuna ogbẹ̀ yetọn do ojlo etọn wiwa ji. Di dohia, Ablaham, he nọgbẹ̀ na nudi owhe 2 000 lẹ whẹpo Jesu do zinzọnlin to aigba ji—yedọ na ojlẹ dindẹn whẹpo Biblu do jẹ yinyin kinkan ji. E dotudo Jehovah go nado hẹn opagbe Etọn lẹ di. Vlavo, Ablaham na ko plọ́n dogbọn Mẹdatọ lọ dali sọn tọgbo etọn nugbonọ Ṣẹm dè, he yin pinplọn gbọn Noa dali. Enẹwutu to whenuena Jiwheyẹwhe dọ na Ablaham nado tọ́nyì sọn Uli Kaldeanu he yin otò adọkun tọn mẹ sọyì aigba Kanani tọn he e ma jẹakọ hẹ he gọna owù tọn mẹ, tọgbo enẹ yọnẹn dọ e sọgan dotudo Jehovah go, podọ enẹgodo e tọ́nyì. (Heblu lẹ 11:8) To nukọnmẹ, Jehovah dọ na ẹn dọmọ: “Yẹn nasọ yí we do basi akọta daho de.”—Gẹnẹsisi 12:2.
10, 11. Naegbọn Ablaham do tindo ojlo nado yí visunnu etọn dopo akan, Isaki do sanvọ?
10 Etẹwẹ jọ to whenuena Isaki yin jiji hlan Ablaham godo? Jehovah dohia Ablaham dọ gbọn Isaki gblamẹ wẹ okún etọn lẹ na sù bo na lẹzun akọta daho de te. (Gẹnẹsisi 21:12) Gbọnmọ dali, e dona ko taidi agọjẹdonu taun to whenuena Jehovah dọ na Ablaham, taidi whlepọn yise etọn tọn, nado yí visunnu etọn Isaki do sanvọ. (Gẹnẹsisi 22:2) Ṣogan, po tudido gigọ po to Jehovah mẹ, Ablaham de afọdide lẹ nado wà mọ, na nugbo tọn bo zé ohi etọn nado gbògbèna Isaki. To ojlẹ godo tọn mẹ, Jiwheyẹwhe do angẹli de hlan nado hẹnalọdotena Ablaham.—Gẹnẹsisi 22:9-14.
11 Naegbọn Ablaham do yin tonusetọ sọmọ? Heblu lẹ 11:17-19 do e hia dọmọ: “Gbọn yise dali Ablaham, whenuena yè whle e pọ́n, e yí Isaki do sanvọ: ewọ he sọ yí opagbe lẹ yí Ovi detọn etọn dopo akan lọ do sanvọ, na ewọ he tọn mẹ yè dọ, dọmọ, to Isaki mẹ wẹ yè na nọ ylọ “okun towe” te: ehe e hia dọ, Jiwheyẹwhe tlẹ sọgan fọ́n ẹn dote sọn oṣiọ mẹ; sọn ehe mẹ e yi i to opajlẹ mẹ.” Lomunu lẹ 4:20, 21 mọdopolọ dọmọ: “Mọwẹ pinpọn hlan opagbe Jiwheyẹwhe tọn, [Ablaham] ma hòkọ̀ gbọn mayise mẹ gba, . . . dọ onú he [Jiwheyẹwhe] dopagbe etọn, é tin sọgan nado yibasi ga.”
12. Nawẹ Ablaham yin didona na yise etọn gbọn?
12 Ablaham yin didona na yise etọn e ma yin gbọn hinhẹn Isaki dogbẹ podọ gbọn tintindo “akọta daho” de he wá gbọn ewọ gblamẹ kẹdẹ gba ṣigba to aliho devo mẹ ga. Jiwheyẹwhe dọ na Ablaham dọmọ: “To okun towe mẹ wẹ yé na dona akọta aigba ji tọn lẹpo: na hiẹ yí ogbè ṣie sè wutu.” (Gẹnẹsisi 22:18) Gbọnna? Ahọlu Ahọluduta olọn mẹ Jiwheyẹwhe tọn na wá gbọn hukan okun Ablaham tọn gblamẹ. Ahọluduta enẹ na gbidi aihọn ylankan he tin to Satani glọ ehe sẹ̀ sọn aimẹ. (Daniẹli 2:44; Lomunu lẹ 16:20; Osọhia 19:11-21.) Enẹgodo, to aigba klọwe de ji to gandudu Ahọluduta tọn glọ, Paladisi na yin awuwlena lẹdo globu pé, podọ sọn “akọta aigba ji tọn lẹpo” mẹ gbẹtọ he nọ wà ojlo Jiwheyẹwhe tọn lẹ na duvivi agbasalilo pipe tọn bo na nọgbẹ̀ kakadoi. (1 Johanu 2:15-17) Podọ dile e tlẹ yindọ Ablaham tindo oyọnẹn vude poun gando Ahọluduta lọ go, e dotudo Jiwheyẹwhe go bo pọn nukọn hlan na zizedai etọn.—Heblu lẹ 11:10.
13, 14. Naegbọn Job dotudo Jiwheyẹwhe go?
13 To owhe kanweko susu lẹ godo, wẹ Job, he nọgbẹ̀ to owhe kanweko 17 po 16 J.W.M. tọn po gblamẹ to fie nọ yin yiylọ todin dọ Arabia. Ewọ lọsu nọgbẹ̀ whẹpo Biblu do jẹ yinyin kinkan ji. Job “yin pipe jlọjlọ, podọ omẹ he dibusi Jiwheyẹwhe, bo sọ họnsi oylan.” (Job 1:1) To whenuena Satani kọ̀n azọ̀n winyandomẹ, awufiẹsa tọn do Job ji, dawe nugbonọ enẹ “ma dọ ohó ylando tọn depope” to awufiẹsa etọn mẹ gba. (Job 2:10, The New English Bible) Job dotudo Jiwheyẹwhe go. Podọ to whenuena e ma yọ́n nuhewutu e do to oyaji susu sọmọ, e zé ogbẹ̀ etọn do Jiwheyẹwhe po opagbe Etọn lẹ po ji.
14 Job yọnẹn dọ eyin emi tlẹ kú, Jiwheyẹwhe sọgan fọ́n emi wá ogbẹ̀ to gbedopo gbọn yizan fọ́nsọnku tọn dali, E do todido ehe hia to whenuena e dọ hlan Jehovah Jiwheyẹwhe dọmọ: “Ṣó dọ hiẹ do whla mi do oyọdo mẹ dọ hiẹ do do mi nuglọ, ... dọ hiẹ do dè ojlẹ de na mi, bo nọ flin mi! Eyin omẹ de kú, be ewọ na sọ nọgbẹ̀ ba? . . . Hiẹ na ylọ yẹn na sọ siọ we.” (Job 14:13-15) Dile etlẹ tin to awufiẹsa sinsinyẹn mẹ do sọ, Job do yise hia to nupojipetọ-yinyin Jehovah tọn mẹ, dọmọ: “Kaka yẹn kú yẹn ma na dè walọpipe ṣie sọn dee gba.”—Job 27:5.
15. Nawẹ Davidi do jide etọn to lẹndai Jehovah tọn mẹ hia gbọn?
15 To owhe kanweko ṣidopo delẹ to Job godo podọ nudi owhe fọtọ́n dopo whẹpo Jesu do wá aigba ji, Davidi do jide etọn hia to aihọn yọyọ de mẹ. E dọ to psalm lẹ mẹ dọmọ: “Yé he nọtepọn Oklunọ lẹ wẹ na dugu aigba tọn. Na whenu pẹẹde, mẹylankan lẹ ma na tin ba ... Ṣigba homẹmimiọnnọ lẹ na dugu aigba tọn, yé na hẹnhomẹhun yede to jijọ susu mẹ. Dodonọ wẹ na dugu aigba tọn, bo nasọ nọnọ e mẹ kakadoi.” Na todido masẹafọ etọn wutu, Davidi dotuhomẹnamẹ dọmọ: “dotudo Oklunọ go, . . . hẹn homẹ towe hùn susu to Oklunọ mẹ; ewọ nasọ yí ovẹ ayiha towe mẹ tọn na we.”—Psalm 37:3, 4, 9-11, 29.
16. Todido tẹwẹ ‘agun daho kunnudetọ lẹ tọn’ tindo?
16 To owhe kanweko lẹ gblamẹ, sunnu po yọnnu nugbonọ lẹ po ko tindo todido ehe dopolọ heyin ogbẹ̀ mavọmavọ to aigba ji tọn. Na nugbo tọn, yé nọpọ do yin ‘agun daho kunnudetọ lẹ tọn’ ehe to agbasa liho taun yí ogbẹ̀ yetọn lẹ do ganjẹ opagbe Jehovah tọn lẹ go. Susu kunnudetọ Jehovah tọn hohowhenu tọn enẹlẹ yin yasana bo yin hùhù na yise yetọn lẹ wutu, “na yé nido mọ fọnsọnku he yọnwhanpẹ hú yí.” Gbọnna? To aihọn yọyọ lọ mẹ, Jiwheyẹwhe na dona yé po fọnsọnku yọwhanpẹ hú de po gọna nukundido ogbẹ̀ madopodo tọn po.—Johanu 5:28, 29; Heblu lẹ 11:35; 12:1.
Kunnudetọ Klistiani lẹ Dotudo Jiwheyẹwhe Go
17. Nawẹ Klistiani owhe kanweko tintan tọn lẹ dotudo Jehovah go gligli gbọn?
17 To owhe kanweko tintan W.M. tọn whenu, Jehovah do zẹẹmẹ dogọ lẹ dogbọn Ahọluduta lọ po gandudu etọn po do aigba ji hia agun Klistiani tọn heyin didoai yọyọ lẹ. Di apajlẹ, gbigbọ etọn gbọdo apọsteli Johanu nado kanwe dọ sọha he na dogbẹ́ hẹ Jesu Klisti to Ahọluduta olọn tọn mẹ na yin 144 000. Omẹ ehelẹ na yin devizọnwatọ nugbonọ Jiwheyẹwhe tọn lẹ he “yè fligọ sọn gbẹtọ lẹ mẹ.” (Osọhia 7:4; 14:1-4) Yé na dugan do aigba ji ‘taidi ahọlu lẹ’ po Klisti po to olọn mẹ. (Osọhia 20:4-6) Klistiani owhe kanweko tintan whenu enẹlẹ dotudo Jehovah go gligli nado hẹn lẹndai etọn di na Ahọluduta olọn mẹ tọn po fidugando aigba tọn etọn po bọ yé tindo ojlo nado kú na yise yetọn. Susu yetọn basi mọ pẹpẹ.
18. Nawẹ Kunnudetọ Jehovah tọn lẹ to egbehe nọ hodo apajlẹ hagbẹ yetọn hohowhenu tọn lẹ gbọn?
18 To egbehe, nudi Kunnudetọ Jehovah tọn livi atọ́n tindo tudido dopolọ dile ogbẹ́ yetọn he nọgbẹ̀ to owhe kanweko lẹ jẹnukọnna yé basi do. Kunnudetọ egbezangbe tọn ehelẹ ko zé ogbẹ̀ yetọn lẹ do owù mẹ na opagbe Jiwheyẹwhe tọn lẹ wutu ga. Yé ko klan ogbẹ̀ yetọn do wiwe hlan ẹn podọ tindo Biblu blebu nado hẹn yise yetọn lodo. (2 Timoti 3:14-17) Kunnudetọ Jehovah tọn egbezangbe tọn lẹ nọ hodo apajlẹ hodotọ owhe kanweko tintan Jesu tọn lẹ he dohia dọ yé “ma ha nọ ma setonuna Jiwheyẹwhe hú gbẹtọ.” (Owalọ lẹ 5:29) To owhe kanweko ehe mẹ susu Klistiani Kunnudetọ ehelẹ tọn ko yin homẹkẹndo sinsinyẹn. Mẹdelẹ tlẹ ko yin hùhù na yise yetọn wutu. Mẹdelẹ ko kú na azọ̀n, nujijọ ajiji, kavi yọnhopipo. Nalete, taidi kunnudetọ nugbonọ hohowhenu tọn lẹ, yé ko dotudo Jiwheyẹwhe go na yé yọnẹn dọ e na fọ́n yé dogbẹ̀ to aihọn yọyọ etọn mẹ gbọn yizan fọnsọnku tọn dali.—Johanu 5:28, 29; Owalọ lẹ 24:15; Osọhia 20:12, 13.
19, 20. Etẹwẹ mí yọnẹn dogbọn dọdai Biblu tọn dali na azán mítọn?
19 Kunnudetọ Jehovah tọn lẹ yọn pinpẹn etọn dọ yinyin fifligọ sọn akọta lẹpo mẹ biọ mẹmẹsunnu-yinyin globu tọn mẹ yetọn yin didọdai whenu dindẹn to dọdai Biblu tọn mẹ. (Isaia 2:2-4; Osọhia 7:4, 9-17) Podọ Jehovah to yé yizan nado wà azọ́n yẹwhehodidọ lẹdo aihọn pé tọn de nado bẹ omẹ ahundoponọ devo pli do nukun dagbe po hihọ etọn po glọ. (Howhinwhẹn lẹ 18:10; Matiu 24:14; Lomunu lẹ 10:13) Omẹ ehe lẹpo zé tudido gigọ yetọn do Jehovah mẹ, bo yọnẹn dọ ewọ to madẹnmẹ na hẹn aihọn yọyọ jiawu etọn wá.—Yijlẹdo 1 Kọlintinu lẹ 15:58; Heblu lẹ 6:10 go.
20 Dọdai Biblu tọn lẹ dohia dọ aihọn Satani tọn ko tin to azán godo tọn etọn lẹ mẹ na nudi owhe 80 lẹ todin, sọn owhe agọlilẹ 1914 tọn whenu gbọ́n. Aihọn ehe to sisẹpọ opodo etọn. (Lomunu lẹ 16:20; 2 Kọlintinu lẹ 4:4; 2 Timoti 3:1-5) Kunnudetọ Jehovah tọn lẹ gbọnmọ dali tindo tugbigbo po nujikudo po na yé yọnẹn dọ to madẹnmẹ Ahọluduta Jiwheyẹwhe tọn na deanana whẹho aigba tọn lẹpo pete. Gbọn hinhẹn aihọn ylankan dinwhenu tọn ehe wá vivọnu po hinhẹn aihọn yọyọ dodo etọn tọn po wá dali, Jiwheyẹwhe na súnsún ninọmẹ ylankan he ko tin to aigba ji na owhe kanweko susu lẹ sẹ̀ mlẹnmlẹn.—Howhinwhẹn lẹ 2:21, 22.
21. Naegbọn mí do sọgan jaya mahopọnna nuhahun dinvie tọn lẹ?
21 To whelọnu lò, na mavọmavọ, Jiwheyẹwhe na do mẹtọnhopọn daho etọn hia mí gbọn kinkọ̀n dona nukunpedomẹgo lẹ he na diọtẹn pete na awugble depope he mí ko tindo wayi dali. Enẹwutu susu onu dagbe lẹ tọn na jọ do mí go to aihọn yọyọ lọ mẹ bọ nuhahun mítọn dai tọn lẹ na busẹ sọn apọ̀n mẹ. Lehe e yin kọfanamẹnu nado yọnẹn dọ Jehovah to whelọnu na ‘kẹ alọ etọn bo na hẹn pekọ wá na ojlo nutẹgbẹ lẹpo tọn.’—Psalm 145:16; Isaia 65:17, 18.
22. Naegbọn mí dona zé tudido mítọn do Jehovah mẹ?
22 To aihọn yọyọ lọ mẹ, gbẹtọvi nugbonọ lẹ na mọ hẹndi Lomunu lẹ 8:21 tọn he dọmọ: “Na yè na whlẹn nudida lọsu sọn mẹglọnọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ.” Yé na mọ hẹndi odẹ̀ ehe tọn he Jesu plọn hodotọ etọn lẹ dọmọ: “Ahọluduta towe ni wá. Ojlo towe ni yin wiwa to aigba go, dile e te to olọn mẹ.” (Matiu 6:10) Enẹwutu zé tudido towe pete do Jehovah mẹ na opagbe he ma na gbla etọn etọn wẹ yin: “Dodonọ wẹ na dugu aigba tọn, bo nasọ nọnọ e mẹ kakadoi.”—Psalm 37:29. (Pọ́n w-F 15/3/94, weda 15.)
Nawẹ Hiẹ Na Na Gblọndo Gbọn?
◻ Etẹwẹ yin lẹndai Jehovah tọn na gbẹtọvi lẹ podọ na aigba ehe?
◻ Naegbọn Jiwheyẹwhe do jotẹnna ninọmẹ ylankan lẹ to aigba ji?
◻ Nawẹ omẹ nugbonọ hohowhenu tọn lẹ do tudido yetọn hia to Jehovah mẹ gbọn?
◻ Naegbọn devizọnwatọ Jiwheyẹwhe tọn lẹ to egbehe tindo tudido to Jehovah mẹ?
[Yẹdide to weda 26]
Jiwheyẹwhe da gbẹtọvi lẹ nado nọgbẹ kakadoi to ayajẹ mẹ to aigba paladisi tọn de ji
[Yẹdide to weda 28]
Ablaham zé tudido etọn do nugopipe Jehovah tọn mẹ nado fọ́n oṣiọ lẹ