Jehovah Nọ Hẹn Opagbe Etọn lẹ Na Nugbonọ lẹ Di
“Nugbonọ wẹ ewọ he dopagbe.”—HEBLU LẸ 10:23.
1, 2. Naegbọn mí sọgan tindo jide mlẹnmlẹn to opagbe Jehovah tọn lẹ mẹ?
JEHOVAH biọ dọ devizọnwatọ etọn lẹ ni wleawuna bo hẹn yise he lodo de go to ewọ po opagbe etọn lẹ po mẹ. Po yise mọnkọtọn po mẹde sọgan dejido Jehovah go mlẹnmlẹn nado wà nuhe e dopagbe nado wà. Ohó gbọdo etọn lá dọmọ: “OKLUNỌ awhànpa lẹ tọn ko whle, dọmọ, Nugbo, dile yẹn lẹn do, mọkẹdẹ wẹ e na yin; podọ dile ayiha ṣie te, mọkẹdẹ wẹ e na nọte do.”—Isaia 14:24.
2 Hodidọ lọ, “OKLUNỌ awhànpa lẹ tọn ko whle,” dohia dọ e nọ whle sinsinyẹn nado hẹn opagbe etọn lẹ di. Enẹwutu wẹ Ohó etọn sọgan dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo. Yọnẹn to aliho towe lẹpo ji, ewọ nasọ jlọ omọ́ towe.” (Howhinwhẹn lẹ 3:5, 6) To whenuena mí dejido Jehovah go bo na dotẹnmẹ mídelẹ nado yin anadena gbọn nuyọnẹn etọn dali, aliho mítọn matin awugbopo na planmẹ jẹ ogbẹ̀ madopodo kọ̀n, na nuyọnẹn Jiwheyẹwhe tọn wẹ “atin ogbẹ̀ tọn hlan yé he hẹn e go.”—Howhinwhẹn lẹ 3:18; Johanu 17:3.
Yise Nugbo to Ojlẹ Hohowhenu Tọn lẹ Mẹ
3. Nawẹ Noa do yise hia to Jehovah mẹ gbọn?
3 Kandai nuyiwa Jehovah tọn lẹ dohlan mẹhe tindo yise nugbo lẹ dohia dọ e sọgan yin jide-dego. Di apajlẹ, hugan owhe 4 400 lẹ die wayi, Jiwheyẹwhe dọna Noa dọ aihọn azán etọn gbè tọn na yin vivasudo gbọn Osìngigọ globu tọn de dali. E na ayinamẹ Noa nado gbá aki blibata de na whlẹngán ogbẹ̀ gbẹtọ po kanlin po tọn. Etẹwẹ Noa basi? Heblu lẹ 11:7 dọ na mí dọmọ: “Gbọn yise dali Noa, whenuena yè dohia onú he yè ma ko mọ lẹ tọn na ẹn sọn Jiwheyẹwhe dè, le obu di i, e wleawu ohún (aki) tọn dai na whlẹngán owhé etọn tọn.” Naegbọn Noa do tindo yise to nude he ma ko jọ pọ́n gbede mẹ, yèdọ nude he “yè ma ko mọ lẹ tọn”? Na e tindo oyọnẹn nuyiwahẹmẹ Jiwheyẹwhe tọn he wayi hẹ whẹndo gbẹtọ tọn wutu bo yọnẹn dọ nudepope he Jiwheyẹwhe dọ nọ yin nugbo. Enẹwutu Noa deji dọ Osìngigọ lọ nasọ yin nugbo ga.—Gẹnẹsisi 6:9-22.
4, 5. Naegbọn Ablaham do dotudo Jehovah go mlẹnmlẹn?
4 Apajlẹ yise nugbo tọn devo wẹ Ablaham. Nudi owhe 3 900 lẹ die wayi, Jiwheyẹwhe dọ na ẹn nado yí Isaki do sanvọ́, yèdọ visunnu dopo gee etọn gbọn Sala, asi etọn dali. (Gẹnẹsisi 22:1-10) Nawẹ Ablaham yigbe gbọn? Heblu lẹ 11:17 dọmọ: “Gbọn yise dali Ablaham, whenuena yè whle e pọ́n, e yí Isaki do sanvọ́.” Ṣigba, to ojlẹ godo tọn mẹ, angẹli Jehovah tọn doalọtena Ablaham. (Gẹnẹsisi 22:11, 12) Etomọṣo, naegbọn Ablaham na tlẹ do lẹnnupọndo onú mọnkọtọn wiwà ji? Na, dile Heblu lẹ 11:19 dọ do, “e hia dọ, Jiwheyẹwhe tlẹ sọgan fọ́n [Isaki] dote sọn oṣiọ mẹ.” Ṣigba nawẹ Ablaham sọgan tindo yise to fọnsọnku mẹ gbọn to whenuena e ma ko mọ de pọ́n podọ kandai dehe wayi tọn depope matin?
5 Flin, Sala yin owhe 89 mẹvi to whenuena Jiwheyẹwhe dopagbe visunnu de tọn na yé. Vidọ Sala tọn ko zẹ̀ vijiji go—kú, dile e nọ yin didọ do. (Gẹnẹsisi 18:9-14) Jiwheyẹwhe hẹn vidọ Sala tọn gọwa ogbẹ̀, bọ ewọ sọ ji Isaki. (Gẹnẹsisi 21:1-3) Ablaham yọnẹn dọ to whenuena e yindọ Jiwheyẹwhe hẹn vidọ Sala tọn he ko kú gọwa ogbẹ̀, to whelọnu lo e sọgan hẹn Isaki lọsu gọwa ogbẹ̀ ga eyin nuhudo etọn tin. Lomunu lẹ 4:20, 21 dọ gando Ablaham go dọmọ: “Pinpọ́n hlan opagbe Jiwheyẹwhe tọn, e ma hòkọ̀ gbọn mayise mẹ gba; ṣigba e sinyẹn gbọn yise mẹ, bo to gigona Jiwheyẹwhe: podọ yè hẹn ẹn lodo to ayiha mẹ, dọ onú he ewọ dopagbe etọn, e tin sọgan nado yí basi ga.”
6. Nawẹ Jọṣua do jidide do Jehovah go hia gbọn?
6 Hugan owhe 3 400 lẹ die wayi to whenuena Jọṣua ko hugan owhe kanweko mẹvi bo ko tindo numimọ gbẹ̀mẹ tọn do lehe Jiwheyẹwhe jẹ na jide-dego do godo, e na whẹwhinwhẹ́n ehe na adọgbigbo etọn dọmọ: “Mìwlẹ sọ yọnẹn to ayiha mìtọn lẹpo mẹ podọ to gbigbọ mìtọn lẹpo mẹ, dọ onú dopo ma gbòpò sọn onú dagbe he OKLUNỌ Jiwheyẹwhe mìtọn dọ gbọn mì dali lẹ de mẹ; popolẹpo wẹ ṣẹ hlan mì, onú dopo ma gbòpò to e mẹ gba.”—Jọṣua 23:14.
7, 8. Afọdide ogbẹ̀ whlẹngán tọn tẹwẹ Klistiani nugbonọ lẹ ze to owhe kanweko tintan lọ mẹ, podọ etẹwutu?
7 To nudi owhe 1 900 lẹ die wayi, gbẹtọ huwhẹnọ susu do yise nugbo hia. Yé yọnẹn sọn hẹndi dọdai Biblu tọn lẹ mẹ dọ Jesu wẹ Mẹssia lọ bo kẹalọyi nuplọnmẹ etọn lẹ. Tintindo dodonu dolido de to nugbo lẹ mẹ podọ to Owe Wiwe Heblu tọn lẹ mẹ, yé tindo yise to nuhe Jesu plọnmẹ mẹ. Gbọnmọ dali, to whenuena Jesu dọ dọ whẹdida Jiwheyẹwhe tọn ja jẹagọdo Jude po Jelusalẹm po na nugbonọ mayin wutu, yé yí ì sè. Podọ to whenuena e dọ na yé nuhe yé dona wà nado whlẹn ogbẹ̀ yetọn lẹ gán, yé basi i.
8 Jesu dọna yisenọ lẹ dọ to whenuena Jelusalẹm yin lilẹdo gbọn awhànpa lẹ dali, yé dona họ̀n. Awhànpa Lomu tọn lẹ wá sọta Jelusalẹm to owhe 66 W.M. Ṣigba to enẹgodo Lomunu lẹ lẹkọ na whẹwhinwhẹ́n delẹ he mayin zẹẹmẹ etọn basi wutu. Enẹ yin avase na Klistiani lẹ nado họ̀n sọn tòdaho lọ mẹ, na Jesu ko dọmọ: “Whenuena mìwlẹ mọ yè yí awhàn lẹdo Jelusalẹm, whenẹnu mì ni yọnẹn dọ ovọ́jẹ etọn sẹpọ. Whenẹnu mì gbọ mẹhe tin to Jude lẹ ni họnyi osó lẹ ji; bosọ gbọ yé he tin to gblagbla etọn mẹ lẹ ni fọ́n tọ́n yì; mì sọ dike yé he sọ tin to tòpẹvi mẹ lẹ biọ e mẹ blo.” (Luku 21:20, 21) Mẹhe tindo yise nugbo lẹ họnyi sọn Jelusalẹm po lẹdo etọn lẹ po mẹ bo họnyi na whlẹngán.
Kọdetọn Yise Matindo Tọn Lẹ
9, 10. (a) Nawẹ nukọntọ sinsẹ̀nnọ lẹ do yise matindo yetọn hia to Jesu mẹ gbọn? (b) Etẹwẹ yin kọdetọn lọ lẹ na yise matindo?
9 Etẹwẹ mẹhe ma tindo yise nugbo lẹ wà? Yé ma họnyi to whenuena yé tindo dotẹnmẹ hundote lọ gba. Yé lẹndọ nukọntọ yetọn lẹ sọgan whlẹn yé. Ṣogan, nukọntọ enẹlẹ po hodotọ yetọn lẹ po tindo kunnudenu Mẹssia-yinyin Jesu tọn ga. Enẹwutu naegbọn yé ma do kẹalọyi nuhe e dọ? Na ninọmẹ ylankan ahunmẹ tọn yetọn wutu wẹ. Ehe yin gòhunna domẹwhenu to whenuena yé mọ susu gbẹtọ paa lẹ wọ̀ wá Jesu dè to whenuena e fọ́n Lazalọsi sọnku godo. Johanu 11:47, 48 dọmọ: “Ogán yẹwhenọ lẹ tọn, po Falesi lẹ po, ylọpli [whẹdọtẹn daho Juvi lẹ tọn], bo dọmọ, Etẹ wà wẹ mí te? Na dawe he [Jesu] to ohia susu basi. Eyin mí jo e do, omẹ pó wẹ na yí ì sè: Lomutọ lẹ nasọ wá yí otẹn po akọta mítọn po ga.” Wefọ 53 dọmọ: “Mọwẹ sọn azán lọ gbè wẹ yé ko yí hónamẹ na yé nido hù i.”
10 Nujiawu nankọ die he Jesu ko basi—yèdọ hinhẹn Lazalọsi gọwa sọn oṣiọ lẹ mẹ! Ṣigba sinsẹ̀ngan lẹ jlo dọ Jesu ni yin hùhù na enẹ wiwà wutu. Kanyinylan sinsinyẹn yetọn yin gòhunna dogọ to whenuena “Ogán yẹwhenọ lẹ tọn, yí hónamẹ na yé nido hù Lazalọsi ga; na ewọ tọn wutu wẹ Ju susu do yì, bosọ yí Jesu sè.” (Johanu 12:10, 11) Lazalọsi ṣẹṣẹ yin finfọnsọnku wẹ, podọ yẹwhenọ enẹlẹ jlo nado hù i whladopo dogọ! Yé mayin ahunmẹduna dogbọn ojlo Jiwheyẹwhe tọn kavi dagbemẹ-ninọ gbẹtọ lẹ tọn dali gba. Yé yin ṣejannabinọ, bo yin ahunmẹduna dogbọn tẹnmẹ po alemọyi yetọn po dali. “Yé yiwanna gigo gbẹtọ tọn hú gigo Jiwheyẹwhe tọn.” (Johanu 12:43) Ṣigba yé suahọ yise matindo yetọn tọn. To owhe 70 W.M., awhànpa Lomu tọn lẹ lẹkọwa bo và nọtẹn yetọn po akọta yetọn po sudo, gọna susu yetọn lẹ.
Yise Didohia to Ojlẹ Mítọn Mẹ
11. To bẹjẹeji owhe kanweko ehe tọn, nawẹ yise nugbo yin didohia gbọn?
11 To owhe kanweko ehe mẹ, sunnu po yọnnu po susu he tindo yise wẹ tin ga. Di dohia, yigodo jẹ fliflimẹ 1900 lẹ tọn, gbẹtọ lẹ to paa mẹ to nukundo jijọho, yèdọ sọgodo dagbe de. To ojlẹ enẹ dopolọ mẹ, mẹhe tindo yise to Jehovah mẹ lẹ to lilá dọ gbẹtọvi ko dibla biọ ojlẹ he na mọ tukla hugan etọn mẹ. Enẹ wẹ yin nuhe Ohó Jiwheyẹwhe tọn ko dọ dọdai etọn to Matiu weta 24, 2 Timoti weta 3, po fidevo lẹ po. Nuhe omẹ he tindo yise lẹ dọ na taun tọn jọ, bo bẹjẹeji to 1914 po Wẹkẹ-whàn I po. Aihọn na nugbo tọn biọ dọdai ‘azán godo tọn’ mẹ gọna “ojlẹ awusinyẹn tọn lẹ.” (2 Timoti 3:1) Naegbọn devizọnwatọ Jehovah tọn lẹ penugo nado yọ́n nugbo lọ dogbọn ninọmẹ aihọn tọn dali to whenẹnu to whenuena mẹdevo lẹ ma yọnẹn? Na, taidi Jọṣua, yé tindo yise dọ dopo tata to ohó Jehovah tọn lẹ mẹ ma na gboawupo wutu.
12. To egbehe, opagbe Jehovah tọn tẹ go wẹ devizọnwatọ etọn lẹ dejido mlẹnmlẹn?
12 To egbehe, devizọnwatọ Jehovah tọn, he dotudo e go lẹ, diblayi nudi livi ṣidopo lẹdo aihọn pé. Yé yọnẹn sọn kunnudenu hẹndi ohó dọdai Jiwheyẹwhe tọn mẹ dọ to madẹnmẹ e na hẹn titonu danuwiwa, mawe tọn ehe wá opodo. Enẹwutu yé deji dọ ojlẹ lọ ko sẹpọ to whenuena yé na mọ hẹndi 1 Johanu 2:17 tọn to gigọ́mẹ, he dọmọ: “Aihọn sọ to juju jei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.” Devizọnwatọ etọn lẹ deji mlẹnmlẹn dọ Jehovah na hẹn opagbe ehe di.
13. Obá tẹ mẹ wẹ hiẹ sọgan dejido Jehovah go jẹ?
13 Obá tẹ mẹ wẹ hiẹ sọgan dejido Jehovah go jẹ? Hiẹ sọgan ze ogbẹ̀ towe do owù mẹ na ẹn! Eyin hiẹ tlẹ hẹn ogbẹ̀ towe bú todin na sinsẹ̀n ẹn wutu, e na na we ogbẹ̀ he yọnwhanpẹ taun hugan de to fọnsọnku mẹ. Jesu na mí jide dọmọ: “Ojlẹ lọ ja, to ehe mẹ omẹ he tin to yọdo mẹ lẹpo [enẹ wẹ, to oflin Jiwheyẹwhe tọn mẹ lẹ] na sè ogbè etọn, bo na tọ́njẹgbonu.” (Johanu 5:28, 29) Be hiẹ yọ́n doto, nukọntọ tonudidọ tọn, lẹnunnuyọnẹntọ, ajọwatọ depope, kavi gbẹtọ devo depope he sọgan wà enẹ ya? Kandai yetọn he ko wayi dohia dọ yé ma penugo. Jehovah penugo, podọ e na wàmọ!
Sọgodo Jiawu de na Nugbonọ Lẹ
14. Sọgodo jiawu tẹwẹ Ohó Jiwheyẹwhe tọn dopagbe etọn na nugbonọ lẹ?
14 Jesu do jidide aihọn yọyọ de tọn to Ahọluduta olọn mẹ tọn Jiwheyẹwhe tọn glọ hia, dọmọ: “Donanọ wẹ homẹmimiọnnọ lẹ; na yé na dugu aigba tọn.” (Matiu 5:5) Opagbe mẹhẹnlodo Jiwheyẹwhe tọn enẹ yin mimọ to Psalm 37:29 mẹ dọmọ: “Dodonọ wẹ na dugu aigba tọn, bo nasọ nọnọ̀ e mẹ kakadoi.” Podọ tlolo jẹnukọnna okú Jesu tọn to whenuena ylandonọ de do yise hia to ewọ mẹ, Jesu dọ hlan dawe lọ dọmọ: “Hiẹ na nọ̀ hẹ mi to paladisi mẹ.” (Luku 23:43) Mọwẹ, taidi Ahọlu Ahọluduta Jiwheyẹwhe tọn, Jesu na mọ dọ dawe ehe yin finfọn do ogbẹ̀ to aigba ji po dotẹnmẹ hundote lọ po nado nọgbẹ̀ kakadoi to Paladisi enẹ mẹ. To egbehe, mẹhe tindo yise to Ahọluduta Jehovah tọn mẹ lẹ sọgan sọ pọ́n nukọn hlan nado nọgbẹ̀ to Paladisi mẹ to whenuena “Jiwheyẹwhe nasọ súnsún dasìn lẹpo sẹ̀ sọn nukun yetọn mẹ; okú ma nasọ tin bà, kavi awubla, kavi avi, mọ awufiẹsa ma na tin bà.”—Osọhia 21:4.
15, 16. Naegbọn ogbẹ̀ na gọna jijọho sọmọ to aihọn yọyọ lọ mẹ?
15 Mì gbọ mí ni lẹnnupọn do aihọn yọyọ enẹ ji. Mí ni dọ dọ mí ko to gbẹ̀nọ to e mẹ. To afọdopolọji, mí doayi gbẹtọ ayajẹnọ he to nuyiwa to pọmẹ to jijọho pipé mẹ to filẹpo go. Yé to vivi ninọmẹ lẹ tọn dù he taidi dehe yin zẹẹmẹ etọn basi to Isaia 14:7 mẹ dọmọ: “Aihọn lẹpo gbọjẹ, bosọ nabọẹ: yé sọ dabobo to hànjiji mẹ.” Naegbọn yé do tin to ninọmẹ enẹ mẹ? Na onú dopo, doayi e go dọ ohọ̀n ohọ lọ lẹ tọn ma tindo agasagodo bà. Nuhudo depope matin na yé, to whenuena e yindọ sẹ́nhẹngba kavi danuwiwa matin bà. E tin kẹdẹdile Ohó Jiwheyẹwhe tọn dọ e na nọ do dọmọ: “Yé na sinai omẹ dopodopo to vẹntin etọn glọ podọ to ovotin etọn glọ; podọ mẹde ma nasọ hẹn yé savò gba.”—Mika 4:4.
16 Awhàn ma tlẹ na tin bà, na to aihọn yọyọ ehe mẹ, awhàn ko yin alọhẹndotena. Awhànfunnu lẹpo ko yin didiọ zun anawanu jijọho tọn. To linlẹn gigọ́ mẹ, Isaia 2:4 ko yin hinhẹndi dọmọ: “Yé nasọ yí ohi yetọn do tùn agbogọdọẹ: akọta ma to na ze ohi do akọta ji bà, mọ yé ma to na plọn awhànfun bà.” Ṣigba, to whenẹnu, enẹ wẹ nuhe mí donukun! Etẹwutu? Na tòmẹnu aihọn yọyọ lọ tọn lẹ plọn nado wà enẹ to whenuena yé to Jiwheyẹwhe sẹ̀n to aihọn hoho lọ mẹ.
17. Ninọmẹ gbẹninọ tọn tẹlẹ wẹ na gbayipe to Ahọluduta Jiwheyẹwhe tọn glọ?
17 Onú devo he go hiẹ doayi wẹ yindọ ohẹ́n masọ tin bà. Mẹdepope ma na to gbẹnọ to ohọ̀-kija dihonọ de mẹ kavi nọ do avọkija lẹ kavi ma tindo adọtẹn bà. Mẹlẹpo na tindo owhé dagbe po nutindo heyin jijlado ganji po gọna atin lẹ po vounvoun whanpẹnọ lẹ po. (Isaia 35:1, 2; 65:21, 22; Ezekiẹli 34:27) Podọ huvẹ ma tin bà na Jiwheyẹwhe ko hẹn opagbe etọn dọ núdùdù susugege na tin na mẹlẹpo di dọmọ: “Gbado susugege na tin finẹ to osó lẹ ji.” (Psalm 72:16) Na nugbo tọn, to anademẹ Ahọluduta Jiwheyẹwhe tọn glọ, paladisi gigonọ de na yin kandlẹnna lẹdo aigba pé, dile Jiwheyẹwhe ko lẹndo wayi to Edẹni mẹ.—Gẹnẹsisi 2:8.
18. To aihọn yọyọ lọ mẹ onú tẹlẹ wẹ ma na gbleawuna gbẹtọ lẹ bà?
18 Podọ ga huhlọn he mẹlẹpo tindo na paṣawe. Ehe yin mọ na yé ko wá tindo agbasa po ayiha pipé de po todin wutu. Azọ̀njijẹ, awufiẹsa, kavi okú matin bà. Mẹdepope matin to kẹkẹ sẹkunọ lẹ tọn mẹ kavi to akanma dotowhé tọn lẹ ji. Enẹ lẹpo ko yì petepete. (Isaia 33:24; 35:5, 6) Etẹ, etlẹ yin depope to kanlin lẹ mẹ mayin awugblenamẹnu, na yé ko yin hinhẹn zun jijọhonọ gbọn huhlọn Jiwheyẹwhe tọn dali!—Isaia 11:6-8; 65:25; Ezekiẹli 34:25.
19. Naegbọn azán lẹpo to aihọn yọyọ lọ mẹ na yin ‘homẹhunnu’?
19 Nukunhunhun jiawu nankọ die to yinyin awuwlena gbọn tomẹnu nugbonọ aihọn yọyọ ehe tọn lẹ dali! Huhlọn po azọ́nyinyọnẹn yetọn lẹ po gọna adọkun aigba lọ tọn yin jijodona yanwle dagbe lẹ, e mayin na awugblenamẹ tọn gba; nado kọngbedopọ hẹ mẹdevo lẹ, e mayin nado to agbàwhlẹn hẹ yé gba. Podọ mẹdepope he hiẹ dukosọ hẹ na yin mẹhe go hiẹ sọgan dejido na, dile Jiwheyẹwhe ko dopagbe do, mẹlẹpo yin “pinplọn sọn OKLUNỌ dè.” (Isaia 54:13) To whenuena e yindọ mẹlẹpo yin anadena gbọn osẹ́n Jiwheyẹwhe tọn dali, aihọn yin ‘gigọ́ na nuyọnẹn OKLUNỌ tọn, dile osìn ṣinyọ́n ohù ji do.’ (Isaia 11:9) Na nugbo tọn, azán lẹpo to aihọn yọyọ ehe mẹ wẹ na yin nuhe Psalm 37:11 dọ e na yin, yé na “hẹn homẹhun yede.”
Sọgodo Ayajẹnọ de Na Wá Dandan
20. Etẹwẹ mí dona wà nado duvivi sọgodo jijọho tọn de?
20 Etẹwẹ mí dona wà nado yin apadewhe sọgodo ayajẹnọ enẹ tọn? Isaia 55:6 dọ na mí dọmọ: “Mì din OKLUNỌ, whenu yè sọgan mọ ẹn do, mì ylọ ẹ, whenuena e tin to yakẹ.” Podọ dile mí to dodinnanu, walọyizan mítọn dona yin dile e yin zẹẹmẹ etọn basi do to Psalm 143:10 mẹ dọmọ: “Plọn mi nado wà ojlo towe: na hiẹ wẹ Jiwheyẹwhe ṣie.” Mẹhe to ehe wà lẹ sọgan zinzọnlin matin whẹgbledo to Jehovah nukọn to azán godo tọn ehelẹ mẹ bo sọgan pọ́n nukọn hlan na sọgodo dagbe de. “Doayi mẹpipe go, bosọ payi tenọgliglinọ go: ale de tin hlan dawe jijọho tọn. Ṣigba tasinyẹntọ lẹ wẹ yè na sudo: yè nasọ sán ale mẹylankan lẹ tọn sẹ̀.—Psalm 37:37, 38.
21, 22. Etẹwẹ Jiwheyẹwhe to awuwlena to egbehe, podọ nawẹ mẹpinplọn lọ yin wiwadotana gbọn?
21 To alọnu din Jehovah to oylọ basinamẹ sọn akọta lẹpo mẹ mẹhe jlo nado wà ojlo etọn. E to awuwlena yé biọ pipli ogbẹ́ yọyọ aigba ji tọn etọn mẹ, dile dọdai Biblu tọn dọdai do dọmọ: “To azán podo gbè [ojlẹ he mẹ mí to gbẹ̀nọ te todin] . . . , Gbẹtọ susu wẹ na yì bo na dọmọ, mì wá na mí ni yì osó OKLUNỌ tọn ji, [sinsẹ̀n-bibasi nugbo etọn] . . . Ewọ nasọ plọn ali etọn mí, mí nasọ zinzọnlin to omọ́ etọn mẹ.”—Isaia 2:2, 3.
22 Osọhia 7:9 basi zẹẹmẹ ehelẹ tọn taidi “gbẹtọ susugege . . . sọn akọta lẹpo mẹ, sọn ohẹnnu lẹpo mẹ, sọn gbẹtọ lẹpo mẹ podọ sọn ogbè lẹpo mẹ.” Wefọ 14 dọmọ: “Ehelẹ wẹ yé he tọ́n sọn nukunbibia daho mẹ,” yèdọ lùn vivọnu titonu lọ tọn tọ́n. Pipli ehe na aihọn yọyọ lọ ko diblayi livi ṣidopo todin, gọna omẹ yọyọ susu lẹ he to lilẹzun apadewhe etọn to owhe dopodopo mẹ. Devizọnwatọ nugbonọ Jehovah tọn ehe lẹpo to yinyin pinplọn todin na ogbẹ̀ madopodo to aihọn yọyọ etọn mẹ. Yé to pinplọn onú gbigbọmẹ tọn po azọ́nyinyọnẹn devo lẹ po heyin nuhudo nado diọ aigba ehe zun paladisi de. Podọ yé tindo jidide mlẹnmlẹn dọ Paladisi na lẹzun nugbo na “nugbonọ wẹ ewọ he dopagbe” wutu.—Heblu lẹ 10:23.
Nuagokun lẹ Na Dogbapọn
● Kọdetọn tẹlẹ wẹ yise matindo hẹnwa to owhe kanweko tintan whenu?
● Obá tẹ mẹ wẹ devizọnwatọ Jiwheyẹwhe tọn lẹ sọgan deji-dego jẹ?
● Sọgodo tẹwẹ tin to sẹdotẹnmẹ na nugbonọ lẹ?
● Etẹwẹ mí dona wà nado hẹn sọgodo ayajẹ tọn de diun na mídelẹ to aihọn yọyọ Jiwheyẹwhe tọn mẹ?
[Yẹdide to weda 18]
To alọnu din Jehovah to awuwlena pipli ogbẹ́ aigba yọyọ lọ tọn