Mì Ji Ohàn Pipà Tọn lẹ Hlan Jehovah
“Yẹn na jihàn hlan Oklunọ, na e ko yí gigo do gbawhàn.”—EKSỌDUSI 15:1.
1. Jijọ dagbe po jẹhẹnu Jehovah tọn tẹlẹ po wẹ na mí whẹwhinwhẹn nado pà ẹ?
WHLA wiatọ̀n wẹ Psalm 150 na gbedide lọ nado pà Jehovah kavi Jah. Wefọ godo tọn lọ lá dọmọ: “Mì gbọ onú he tindo gbọfufu lẹpo ni pa Oklunọ. Hallelujah.” Taidi Kunnudetọ Jehovah tọn lẹ, mí yọnẹn dọ Jehovah jẹ na pipà mítọn. Ewọ wẹ Nupojipetọ Wẹkẹ tọn, Mẹhe Yiaga Hugan, Ahọlu madopodo, Mẹdatọ mítọn, Alehẹnwanamẹtọ mítọn. E ma tindo mẹhe sọzẹn hẹ ẹ gba, e gbọnvo, e mayọnjlẹ, ma tindo tejlẹhẹmẹtọ to ninọmẹ susu lẹ mẹ gba. Ewọ yin onu lẹpo yọnẹntọ, huhlọnnọ hugan, pipe to whẹdida mẹ, podọ he tindo jẹhẹnu owanyi tọn hugan. Ewọ wẹ yọn hugan mẹlẹpo; nugbonọ wẹ ewọ. (Luku 18:19; Osọhia 15:3, 4) Be ewọ jẹ na pipà mítọn ya? Na nugbo tọn e jẹ na tlala!
2. Whẹwhinwhẹn tẹlẹ wẹ mí tindo nado dopẹna Jehovah?
2 E ma yin dọ Jehovah jẹ na sinsẹ̀n-bibasi po pipà mítọn po kẹdẹ gba ṣigba é jẹ na pinpẹn nutọn yinyọnẹn mítọn po pẹdido po na nuhe e ko wà na mí lẹpo wutu. Ewọ wẹ Nunamẹtọ “nunina dagbedagbe po nunina he sọgbe lẹpo po” tọn. (Jakobu 1:17) Ewọ wẹ Agbado, yedọ Asisa, ogbẹ̀ lẹpo tọn. (Psalm 36:9) Onu lẹpo he mí nọ duvivi etọn taidi hagbẹ akọ̀ gbẹtọvi lẹ tọn tin sọn e de, na ewọ wẹ yin Mẹdatọ Daho mítọn. (Isaia 42:5) Ewọ sọ wẹ Nunamẹtọ dona gbigbọmẹ tọn lẹpo he nọ wá míde gbọn gbigbọ etọn, titobasinanu etọn, po Ohó etọn po gblamẹ ga. Mí tindo jona ylando tọn to dodonu awuwlena Visunnu etọn taidi ofligọ mítọn tọn ji. (Johanu 3:16) Mí tindo todido Ahọluduta lọ tọn heyin ‘olọn yọyọ lẹ po aigba yọyọ de po fihe dódó nọnọ.’ (2 Pita 3:13) Mí ko mọ gbẹdohẹmẹ hẹ Klistiani hatọ mítọn lẹ yí. (Lomunu lẹ 1:11, 12) Mí tindo yẹyi po dona yinyin Kunnudetọ etọn tọn lẹ po. (Isaia 43:10-12) Podọ mí tindo lẹblanulọkẹyi họakuẹ odẹ̀ tọn. (Matiu 6:9-13) Na nugbo tọn, mí tindo whẹwhinwhẹn susu nado dopẹna Jehovah!
Aliho he mẹ Mí Sọgan Pà Jehovah te Lẹ
3. To aliho voovo tẹlẹ mẹ wẹ mí sọgan pà Jehovah bo dopẹ na ẹn te?
3 Nawẹ mí sọgan, taidi devizọnwatọ mẹdezejotọ Jehovah tọn lẹ, pà ẹ bo do pinpẹn nutọn yinyọnẹn mítọn hia gbọn? Mí sọgan wà mọ gbọn mahẹ tintindo to lizọnyizọn Klistiani tọn mẹ dali—yèdọ kunnudide sọn whedegbe jẹ whedegbe, gọyìpọn lẹ bibasi, anadena plọnmẹ Biblu lẹ, podọ mahẹ tintindo to kunnudide alihogboji tọn mẹ. Mí sọgan sọ pà ẹ gbọn kunnudide mayin aṣa dali to whedepopenu he dotẹnmẹ hundote lọ sọawuhia. Enẹgodo ga, mí sọgan pà Jehovah gbọn walọ he sọgbe mítọn dali, yèdọ to aliho wiwe po jlẹkaji tọn po he mẹ mí nọ doaṣọ bo sọ nọ penukundo awusọhia mídetiti lẹ tọn go te. Kunnudetọ Jehovah tọn lẹ nọ saba yin pipà na yinyin apajlẹ dagbenọ to ninọmẹ ehelẹ mẹ. Humọ, mí sọgan pà Jehovah bo dopẹ na ẹn gbọn odẹ̀ gblamẹ.—Pọ́n 1 Otannugbo lẹ 29:10-13.
4. Detẹ wẹ yin dopo to aliho he yọnwhanpẹ hugan lẹ mẹ he mí sọgan pà Otọ́ owanyinọ olọn mẹ tọn mítọn te?
4 To yidogọ mẹ, dopo to aliho he yọ́n hugan lẹ mẹ he mí sọgan pà Otọ́ owanyinọ mítọn olọn mẹ tọn te wẹ gbọn zize e daga po walọ dagbe etọn lẹ po gbọn hangbevivi ohàn Ahọluduta lọ tọn lẹ dali. Susu hansinọ lẹ tọn po hanpatọ lẹ po yigbe dọ nuyizan yọnwhanpẹ hugan hànjiji tọn wẹ ogbè gbẹtọ tọn. Ogán ohàn dagbe tọn lẹ tindo ojlo sinsinyẹn nado wlan hogbe he tin to ohàn lẹ mẹ na pekọ susu tin to ogbè gbẹtọ tọn sisè to hànjiji mẹ wutu.
5. Na whẹwhinwhẹn tẹlẹ wutu wẹ mí dona yí nukun nujọnu tọn do pọ́n ohàn Ahọluduta lọ tọn mítọn lẹ?
5 Lehe Jehovah dona duvivi sisè hànjiji gbẹtọvi lẹ tọn, titengbe to whenuena yé to ohàn pipà tọn po opẹdido tọn lẹ po jì do sọ! To whelọnu lò po jide po, mí dona yí nukun nujọnu tọn do pọ́n jìjì ohàn Ahọluduta lọ tọn lẹ mítọn to pipli mítọn voovo lẹ whenu—yèdọ to opli agun tọn lẹ, plidopọ lẹdo tọn lẹ, azán plidopọ vonọtaun tọn lẹ, plidopọ agbegbe tọn lẹ, po plidopọ akọjọpli tọn lẹ po. Ohànwé mítọn lẹ gọna ohàn mẹhẹnjaya nugbo tọn lẹ, whanpẹ ehe tọn ko nọ saba yin pipà gbọn gbonutọ lẹ dali. Lehe mí tindo mahẹ to ohàn Ahọluduta lọ lẹ jìjì mẹ do sọ, mọwẹ mí na hẹn awuvivi wá na mẹdevo lẹ bo mọaleyi na mídelẹ sù sọ niyẹn.
Ohàn Pipà tọn lẹ Jìjì Hlan Jehovah to Ojlẹ Biblu tọn lẹ Mẹ
6. Nawẹ Islaelivi lẹ do pinpẹn nutọn yinyọnẹn hia na whlẹngan yetọn to Ohù Vẹẹ mẹ gbọn?
6 Ohó Jiwheyẹwhe tọn dọ na mí dọ Moṣe po pipotọ Islaelivi lẹ tọn po jihan awhangbigba tọn na yinyin whinwhlẹngan sọn awhanpa Falo tọn si to Ohù Vẹẹ mẹ. Ohàn yetọn bẹjẹeji po hogbe ehelẹ po dọmọ: “Yẹn na jihan hlan Oklunọ, na e ko yí gigo do gbawhàn: osọ́ po hihẹtọ etọn po wẹ e takiti na do ohù mẹ. Oklunọ wẹ huhlọn po ohàn ṣie po, ewọ sọ lẹzun whlẹngan ṣie: ehe wẹ Jiwheyẹwhe ṣie, yẹn na sọ to pipa ẹ.” (Eksọdusi 15:1, 2) Mí sọgan lẹ̀n zohunhun po ayajẹ lọ po pọ́n ganji heyin Islaelivi lẹ tọn dile yé jihan hogbe enẹlẹ tọn to whlẹngan jiawu yetọn godo!
7. Ninọmẹ ayidego tọn devo tẹlẹ wẹ Owe wiwe Heblu tọn lẹ basi kandai etọn heyin pipà Jehovah to hànjiji Islaelivi lẹ tọn mẹ?
7 To 1 Otannugbo lẹ 16:1, 4-36 mẹ, mí hia dọ Jehovah yin pipà gbọn hànjiji dali podọ gbọn ajalẹn lẹ hiho dali to whenuena Davidi hẹn Alki lọ wá Jelusalẹm. Enẹ yin ojlẹ ayajẹ tọn de nugbo nugbo. Ohàn pipa tọn lẹ jiji hlan Jehovah tin ga heyin hihodo gbọn hanjinu nuhiho tọn lẹ dali to ojlẹ he mẹ Ahọlu Sọlọmọni klan tẹmpli lọ do wiwé to Jelusalẹm. Mí hia to 2 Otannugbo lẹ 5:13, 14 po mẹ dọmọ: “Yèdọ e sọ wá jọ, whenuena opẹ̀nkúntọ lẹ po hànjitọ lẹ po tin di mẹdopo, nado kún zẹnzẹn nado yin sisè to pipà po pẹdidona Oklunọ po mẹ; whenuena yé ze ogbè yetọn daga po opẹ̀n lẹ lọ po, po ajògan lẹ lọ po, po nuzinzan hàngbè tọn lẹ po, bo to Oklunọ pà, dọmọ, na ewọ yin yinyọ́n: na lẹblanu etọn to ote doidoi: dọ whenẹnu wẹ yè yí aslọ do gọ́ ohọ̀ lọ, yèdọ ohọ̀ Oklunọ tọn lọ, sọmọ bọ yẹwhenọ lẹ lọ ma sọ sọgan ṣite nado wadevizọn gbọn aslọ lọ tọn dali: na gigo oklunọ tọn gọ́ ohọ̀ Jiwheyẹwhe tọn lọ.” Etẹwẹ enẹ dohia? Dọ Jehovah to todoai hlan pipà hangbevivinọ ehe bo sọ yin homẹhunhunnọ po e po, dile e yin didohia gbọn aslọ hugan jọwamọ tọn lọ dali do. To nukọnmẹ, hànjiji tin gbọn pipli hansinọ awe dali to ojlẹ hùnhùn adó Jelusalẹm tọn whenu to azán Nẹhemia tọn lẹ gbè.—Nẹhemia 12:27-42.
8. Etẹwẹ dohia dọ hànjiji yin yíyí nukun nujọnu tọn do pọ́n gbọn Islaelivi lẹ dali?
8 Na nugbo tọn, hànjiji yin ada sinsẹ̀n-bibasi tọn titengbe de to tẹmpli mẹ sọmọ bọ Levinu 4 000 yin dide dovo na sinsẹnzọn hànjiji tọn. (1 Otannugbo lẹ 23:4, 5) Ehelẹ wẹ nọ jihan hẹ hanjitọ lẹ. Ohunhiho, titengbe hanjitọ lẹ, tindo otẹ̀n titengbe de to sinsẹ̀n-bibasi mẹ, e ma yin dandan nado plọnmẹ whẹho he pẹnzin Osẹ́n tọn lẹ gba, ṣigba nado wleawuna gbigbọ he sọgbe na sinsẹ̀n-bibasi. E nọ gọalọna Islaelivi lẹ nado sẹ̀n Jehovah po gbigbọ zohunhun tọn po. Doayi awuwle po ayidonugo lọ po go hlan zẹẹmẹ he yin awuwlena hlan ada ehe he dọmọ: “Osọha yetọn, po mẹmẹsunnu yetọn he yè naplọ́n to hànjiji mẹ hlan Oklunọ, yèdọ ehe yin zinzintọ lẹpo po, yin fọdekanweṣinatọ̀n.” (1 Otannugbo lẹ 25:7) Doayi lehe yé yí nukun nujọnu tọn do pọ́n ohàn pipà tọn jìjì hlan Jehovah go do. Yé yin pinplọn to hanjìjì mẹ bo yin hansinọ azọ́nyọnẹntọ lẹ!
9. Nuzindonuji tẹwẹ yin nina hlan hànjiji to Owe wiwe Glẹki Klistiani tọn lẹ mẹ?
9 Wiwá owhe kanweko tintan whenu mítọn tọn mẹ, etẹwẹ mí mọ? Jesu, to ozán dide e hia tọn mẹ, po whẹho pinpẹn tlala he tin to ayiha etọn mẹ po, gbẹsọ tindo numọtolanmẹ nuhudo lọ tọn nado dotana hunwhẹ Juwayi tọn lọ po zedai Oflin okú etọn tọn po gbọn ohàn pipà tọn lẹ jìjì hlan Jehovah dali. (Matiu 26:30) Dogọ, mí hia dọ to “ozanhomẹ,” Paulu po Sila po, to yinyin hihò bo yin zize do ganmẹ po godo, “hodẹ̀, bo sọ jihan pipa tọn hlan Jiwheyẹwhe: ogàntọ lẹ sọ sè ogbè yetọn.”—Owalọ lẹ 16:25.
Ohàn Pipà tọn lẹ Jìjì—Ada Titengbe Sinsẹ̀n-bibasi Mítọn tọn De
10. Gbedide tẹwẹ Ohó Jiwheyẹwhe tọn namẹ na pipà ẹ to hànjiji mẹ?
10 Be hiẹ nọ tindo numọtolanmẹ lọ vlavo dọ jìjì ohàn Ahọluduta lọ tọn lẹ ma yin nujọnu sọmọ nawe nado na ẹn ayidonugo sọn ahunmẹ wá towe ya? Eyin mọwẹ, be e ma na jẹ na hiẹ ni sọ vọ zé whẹho lọ pọ́n, to pọndohlan mẹ na nujọnu-yinyin he Jehovah Jiwheyẹwhe po Jesu Klisti po zedo jìjì ohàn pipà tọn lẹ ji ya? Etẹ nkọ, Ohó Jiwheyẹwhe tọn gọna gbedide lẹ nado pà Jehovah podọ nado jì ohàn pipà tọn lẹ hlan ẹn! Di apajlẹ, to Isaia 42:10 mẹ, mí hia dọmọ: “Mì jihan yọyọ hlan Oklunọ, pipa etọn sọn pòdo aigba tọn, mì mẹhe to tejẹ jei ohù mẹ lẹ, po onú he tin to e mẹ lẹ po: olopo po mẹhe to é mẹ lẹ po.”—Pọ́n Psalm 96:1; 98:1 ga.
11. Tudohomẹnamẹ tẹwẹ apọsteli Paulu na gando hànjiji go?
11 Apọsteli Paulu yọnẹn dọ hànjiji sọgan hẹn gbigbọ mítọn lẹ jaya, enẹwutu wẹ e dotuhomẹna mí whlaawe do whẹho lọ ji. Mí hia to Efesunu lẹ 5:18, 19 po mẹ dọmọ: “Mì gọ́ na gbigbọ. Mì nọ dọhó hẹ mìnọzo to ohàn wiwe mẹ, to ohàn pipa tọn mẹ, podọ to ohàn gbigbọnọ mẹ, mì nọ kehàn, bo sọ nọ jihan gbèpli to ayiha mìtọn mẹ hlan Oklunọ.” Podọ to Kọlọsinu lẹ 3:16 mẹ, mí hia dọmọ: “Mì gbọ ohó Klisti tọn ni nọ nọ̀ mì mẹ susugege to nuyọnẹn popo mẹ; mì nọ plọ́n, bo sọ nọ kọhóna mínọzo to ohàn wiwe mẹ, to ohàn pipa tọn mẹ, podọ to ohàn gbigbọnọ mẹ, mí nọ yí ojomiọn do jihàn to ayiha mìtọn mẹ hlan Oklunọ.”
12. Apajlẹ tẹlẹ wẹ mí tindo gando ohàn mítọn lẹ go na gigọalọna mí nado plọnmẹ bo dotuhomẹna ode awetọ?
12 Doayi e go dọ to ninọmẹ dopodopo mẹ Paulu nọ dlẹnalọ pludopludo hlan hànjiji, to whenuena e donù ‘Psalm lẹ, ohàn pipà tọn hlan Jiwheyẹwhe, ohàn gbigbọnọ lẹ, jihàn gbèpli tọn to ayiha mìtọn mẹ’ go. Humọ, e bẹ ayidonugo etọn lẹ jẹeji hlan Kọlọsinu lẹ gbọn didohia dọ gbọn ehe dali mí sọgan nọ “plọn bo sọ nọ kọhóna [mínọzo.]” Podọ mí nọ wà enẹ pẹpẹ, dile e sọgan yin mimọ do gbọn hosọ ohàn mítọn tọn lẹpo dali—“Nudida lẹpo, Pà Jehovah!” (sọha 5), “Yin Tenọglinọ, Masẹafọ!” (sọha 10), “Yin Ayajẹnọ na Todido Ahọluduta lọ Tọn!” (sọha 16), “Mì Dibú na Yé Blo!” (Sọha 27), “Mì Pagigona Jehovah Jiwheyẹwhe mítọn!” (sọha 100), ehelẹ yin nado donù apajlẹ vude poun go.
13. Nawẹ “afanumẹ nugbonọ nuyọnẹntọ lọ” do nujọnu-yinyin hànjiji tọn hia taidi apadewhe sinsẹ̀n-bibasi mítọn tọn gbọn?
13 To kọndopọmẹ hẹ gbedide ehelẹ, “afanumẹ nugbonọ nuyọnẹntọ lọ” ko basi tito dọ pipli mítọn lẹ—yèdọ opli agun tọn lẹ, plidopọ lẹdo tọn lẹ, azán plidopọ vonọtaun tọn lẹ, plidopọ agbegbe tọn lẹ, po plidopọ akọjọpli tọn lẹ po—nọ yin bibẹjẹeji bo nọ yin tadona po jìjì ohàn Ahọluduta lọ tọn lẹ po. (Matiu 24:45) To yidogọmẹ, ohàn lẹ nọ yin titobasina nado yin jìjì to ojlẹ devo lẹ mẹ to pipli ehelẹ whenu. To whenuena e yindọ opli mítọn lẹ nọ saba bẹjẹeji po jìjì ohàn Ahọluduta lọ tọn de po, be mí ma dona yido basi yanwle nado nọ yawu wá do mẹwhenu nado má to ada sinsẹ̀n-bibasi mítọn enẹ tọn mẹ ya? Podọ to whenuena e yindọ opli lẹ nọ yin tadona po ohànjiji po, be mí ma dona nọte kaka jẹ ohàn tadona tọn po odẹ̀ he nọ bọdego tlolo po whenu ya?
14. Apajlẹ tẹlẹ wẹ mí tindo na ohàn he jẹ dide na tito-to-whinnu mítọn lẹ?
14 Ohàn lẹ to opli mítọn lẹ whenu nọ yin didè po sọwhiwhe po nado sọgbe hẹ tito-to-whinnu lọ. Di apajlẹ, to Plidopọ Agbegbe “Mẹpinplọn Sọn Olọn Mẹ Wá” 1993 tọn whenu, ohàn sọha 191, “Yí Nugbo lọ Do Basi Towe,” he na tuli Klistiani lẹ nado nọavunte sọta Satani, aihọn lọ, po agbasa mape lọ po, bọdo hodidọ atọ̀n he yinuwa hẹ kẹntọ ehelẹ go tlolo. Mọdopolọ, ohàn sọha 164, “Ovi lẹ—Nunina Họakuẹ Sọn Jiwheyẹwhe Dè,” he gọna tuli hlan mẹjitọ lẹ, bọdego to hodidọ de he zinnudo dandannu mẹjitọ tọn lẹ ji nado plọn ovi yetọn lẹ go tlolo. Ohàn sọha 70, “Tin Taidi Jẹlemia,” jẹnukọnna hodidọ debọdo-dego lẹ he sinai do dọdai Jẹlemia tọn lẹ ji. Podọ to hómimadọ de do ada voovo lizọnyizọn Ahọluduta mítọn tọn ji godo wẹ ohàn sọha 156, “Yẹn Jlo” yin jiji, yedọ ohàn mẹwhantọ hlan sinsẹnzọn lọ taun de. Onu zedo lẹnpọn mẹ dopolọ nọ yin yiyizan to ohàn lẹ didè mẹ na Oplọn Atọ̀họ̀-Nuhihọ́ Lọ Tọn, Opli Sinsẹ̀nzọn tọn, po Wehọmẹ Lizọnyizọn Yẹwhehọluduta tọn po. To whelọnu lò e dohia dọ to whenuena mẹho lẹ na hodidọ gbangba tọn lẹ bo dè ohàn he na yin jìjì nado hùn tito-to-whinnu lọ, yé dona dè ohàn de he sọgbe hẹ hosọ hodidọ yetọn tọn.
15. Nawẹ azinponọ opli lọ tọn sọgan do pinpẹn nutọn yinyọnẹn hia na ohàn he na yin jìjì gbọn?
15 To yiylọ ohàn he na yin jìjì whenu, azinponọ lọ sọgan do pinpẹn nutọn yinyọnẹn hia na ohàn lọ gbọn didọ hogo lọ kavi hosọ lọ dali. Mí ma nọ jì sọha lẹ gba ṣigba hosọ Owe wiwe lẹ tọn wẹ mí nọ jì. Dogọ e na gọalọna agun lọ nado yọn pinpẹn ohàn lọ tọn dogọ eyin wefọ heyin dide do hogo lọ glọ yin didọ. Enẹgodo whladopo dogọ, ayidonugo vude lẹ sọgan yin nuhe jẹ, taidi mì gbọ na mí ni kọnawudopọ to jìjì ohàn lọ tọn mẹ po zohunhun po.
Do Pinpẹn Nutọn Yinyọnẹn hia Na Dagbewa Jehovah tọn Gbọn Hànjiji Dali
16. Nawẹ mí sọgan joawuna ohàn mítọn lẹ jìjì gbọn?
16 To whenuena e yindọ hogbe ohàn Ahọluduta lọ tọn mítọn lẹ gọna zẹẹmẹ lẹ, mí dona nọ doayi hogbe lọ lẹ go dile mí to yé jì. Mí jlo nado joawuna jìjì ohàn dopodopo tọn. Delẹ, taidi enẹlẹ he nọ yinuwa hẹ owanyi, yedọ sinsẹ́n gbigbọ tọn, yin ahunjlọdote tọn. (Galatianu lẹ 5:22) Mí nọ jì ehelẹ po ogbè lele po gọna zohunhun. Devo lẹ yin ayajẹ tọn, podọ mí dona tẹnpọn nado jì yé po ayajẹ po. Mọjanwẹ devo lẹ yin ohàn awhànfọ-dide sinsinyẹn tọn lẹ, podọ ehelẹ dona yin jìjì po zohunhun po gọna jide sinsinyẹn. To Wehọmẹ Lizọnyizọn Yẹwhehọluduta Tọn mítọn whenu, mí nọ yin ayinamẹ na nado do lanmẹyiya po numọtolanmẹ mítọn po gọna zohunhun hia to nuzedonukọnnamẹ mítọn lẹ mẹ. Nado do lanmẹyiya, numọtolanmẹ, po zohunhun po hia to whenuena mí to ohàn mítọn lẹ jì tlẹ sọ yin onu titengbe hugan.
17. (a) Whẹgbledomẹ tẹwẹ yin nina Islaelivi he ma yin nugbonọ lẹ he mí ma na jlo nado yizan na hànjiji mítọn? (b) Etẹwẹ nọ dekọtọn to whenuena mí yí nukun nujọnu tọn do pọ́n tudohomẹnamẹ he ohàn mítọn lẹ bẹhẹn?
17 Eyin mí na jì ohàn Ahọluduta lọ tọn mítọn lẹ bọ ayiha mítọn lẹ tin to nudevo lẹ ji, bo ma to yinyọn pinpẹn zẹẹmẹ hogbe lọ lẹ tọn to gigọmẹ, be to ninọmẹ de mẹ mí ma na taidi Islaelivi he ma yin nugbonọ heyin wiwọhẹ na, whenuena yé pà Jiwheyẹwhe po nùflo yetọn lẹ po, ayiha yetọn lẹ dẹn do e ya? (Matiu 15:8) Mí ma na jlo dọ whẹgbledomẹ enẹ ni gando aliho ohàn Ahọluduta lọ tọn jìjì mítọn lẹ go gba, kavi mí na jlo wẹ? Gbọn pinpẹn nutọn didohia na jìjì ohàn Ahọluduta lọ tọn mítọn lẹ dali, mí ma na whàn míde lẹ kẹdẹ gba ṣigba mẹhe lẹdo mí lẹ ga, gọna yọpọvu lẹ. Mọwẹ, eyin mẹlẹpo he nọ jihàn to Plitẹnhọ Ahọluduta mítọn mẹ lẹ yí nukun nujọnu tọn do pọ́n tudohomẹnamẹ he ohàn ehelẹ bẹhẹn, ehe na yin tuli huhlọnnọ de nado yin zohunhunnọ to lizọnyizọn lọ mẹ bo dapana omọ̀ ylanwiwa tọn.
18. Nuyiwadomẹji tẹwẹ jìjì ohàn Ahọluduta lọ tọn tindo do yọnnu de ji?
18 Gbonutọ lẹ nọ yin whinwhan, gbọzangbọzan, gbọn ohàn Ahọluduta lọ tọn lẹ jìjì mítọn dali. Atọ̀họ̀-Nuhihọ́ Lọ Tọn to ojlẹ de mẹ wayì dọho do hogo ehe ji dọmọ: “Dọ ohànjiji [mítọn] sọgan yinuwa ga nado hẹn gbẹtọ lẹ nado tindo oyọnẹn he pegan Jehovah Jiwheyẹwhe tọn yin didohia gbọn numimọ yọnnu de tọn dali he yin bibaptizi to 1973 to Plidopọ ‘Awhangbigba Sọn Olọn Mẹ Wá’ whenu, to Yankee Stadium, New York city. Ewọ ko basi dlapọn etọn tintan sọyì Plitẹnhọ Ahọluduta Lọ Tọn he tin to lẹdo lọ mẹ na ede bo nọte na opli awe lẹ. Dile agun lọ to ohàn ... ‘Ze Nukun Towe do Alè lọ Ji!’ ji, ewọ yin whinwhan gbọn hogbe lọ lẹ po lehe yé to yinyin jìjì do po dali sọmọ bọ e basi dide dọ fie emi jlo nado tin te die. To enẹgodo e dọnsẹpọ dopo to Kunnudetọ lẹ mẹ bo biọ plọnmẹ Biblu tọn de, podọ [e] basi nukọnyiyi tlọlọ nado lẹzun Klistiani kunnudetọ Jehovah tọn de.”
19. Tulinamẹ godo tọn tẹwẹ yin nina hlan jìjì ohàn Ahọluduta lọ tọn mítọn lẹ po ahun lẹpo po?
19 To suhugan opli mítọn lẹ tọn tẹnmẹ, dotẹnmẹ hundote vude poun lẹ wẹ nọ tin na mẹplidopọ lẹ nado do numọtolanmẹ po pinpẹn nutọn yinyọnẹn yetọn lẹ po hia. Ṣigba mímẹpo sọgan do numọtolanmẹ mítọn hia dogbọn dagbewa Jehovah tọn dali gbọn yíyí ahun lẹpo do kọnawudopọ to ohàn Ahọluduta lọ tọn lẹ jìjì mẹ dali. Gbọnvona enẹ, to whenuena mí plidopọ, be homẹ ma dona nọ hùn mí ya? Enẹwutu mí dona jlo nado nọ jihàn! (Jakobu 5:13) Na nugbo tọn, oba he mẹ mí yọn pinpẹn dagbewa Jehovah tọn po ojọmiọn etọn po jẹ, mí na jì ohàn pipà tọn lẹ hlan ẹn po alindọn lẹpo po.
Nawẹ Hiẹ Na Na Gblọndo Gbọn?
◻ Etẹwẹ yin whẹwhinwhẹn titengbe awe lẹ na Jehovah pipà?
◻ To aliho voovo tẹlẹ mẹ wẹ mí sọgan pà Jehovah te?
◻ Detẹ wẹ yin dopo to aliho he yọnwhanpẹ hugan lẹ mẹ he mí sọgan pà Jehovah te?
◻ Apajlẹ Owe wiwe lẹ tọn tẹ wẹ mí tindo na pipà Jehovah to hànjiji mẹ?
◻ Nawẹ mí sọgan basi nuhe jẹ dogbọn aliho he mẹ mí nọ jì ohàn Ahọluduta lọ tọn lẹ gbọn?
[Apotin to weda 11]
Duvivi Ohàn Enẹlẹ Tọn!
E sọawuhia dọ mẹdelẹ ko tindo nuhahun vude to pinplọn ohàn sọha delẹ mẹ. Nalete, agun delẹ ma tindo nuhahun daho depope po jìjì suhugan ohàn ehelẹ tọn po gba. Vlavo vivẹnudido vude poun dogọ nado plọn nuhe to tintan whenu sọawuhia taidi nuhe yè ma jẹakọhẹ sọgan yin onu he yè tindo nuhudo etọn lẹpo. To whenuena yè jẹakọhẹ ohàn mọnkọtọn lẹ, agun lọ nọ saba yọn pinpẹn yetọn hugan enẹlẹ he ma biọ vivẹnudido nado plọn. Enẹgodo mẹlẹpo to agun lọ mẹ sọgan jì yé po jide po. Mọwẹ, yé sọgan duvivi ohàn enẹlẹ tọn!
[Apotin to weda 12]
Mì Jì Ohàn Ahọluduta lọ tọn lẹ to Pipli Pọmẹ tọn lẹ Whenu
Jìjì ohàn Ahọluduta lọ tọn mítọn ma tindo nuhudo nado nọte do Plitẹnhọ Ahọluduta lọ tọn kẹdẹ ji gba. Paulu po Sila po jì ohàn pipà tọn lẹ hlan Jehovah to whenuena yé e tin to ganpamẹ. (Owalọ lẹ 16:25) Podọ devi lọ Jakobu dọmọ: “Be homẹ mẹde tọn vivi? Mì gbọ e ni jihan pipà tọn lẹ hlan Jiwheyẹwhe.” (Jakobu 5:13, nudọnamẹ odò tọn) To pipli pọmẹ tọn lẹ whenu homẹ mẹlẹpo tọn wẹ nọ vivi. Enẹwutu naegbọn yè ma nado jì ohàn Ahọluduta tọn lẹ? Ehe sọgan yin ayajẹnu titengbe eyin hànjiji lọ tindo piano kavi gita to e mẹ. Eyin e ma yinmọ, kasẹti piano tọn lẹ heyin ohàn Ahọluduta lọ tọn mítọn lẹ tin; susu whẹndo Kunnudetọ lẹ tọn tindo bladopọ kasẹti ehelẹ tọn. Yé ma nọ yinuwa ganji nado nọgodona hànjiji kẹdẹ gba ṣigba sọ yin dehe yọ́n na ohunhiho ogbemilomilo whanpẹnọ ga.
[Yẹdide to weda 8, 9]
To whlẹngan yetọn godo to Ohù Vẹẹ mẹ, Islaelivi lẹ do ayajẹ yetọn hia to hànjiji mẹ
[Yẹdide to weda 10]
Hànjiji ayajẹ tọn yin apadewhe sinsẹ̀n-bibasi Klistiani tọn to egbehe