Wepinplọn—Yí I Zan Nado Pagigona Jehovah
“Mẹhe to ohó ede tọn dọ to gigo ede tọn din; ṣigba mẹhe din gigo mẹhe do e hlan tọn, dopolọ wẹ nugbo, mawadodo de ma tin to ewọ mẹ.”—JOHANU 7:18.
1. Whetẹnu podọ nawẹ aliho wepinplọn tọn bẹjẹeji gbọn?
WEPINPLỌN ko bẹjẹeji sọn whenu dindẹn taun die gbọ́n. Tlolo to whenuena Jehovah Jiwheyẹwhe, Weplọnmẹtọ po Mẹplọntọ Daho lọ po, dá Visunnu plọnji etọn tintan gbọ́n wẹ tito-to-whinnu wepinplọn tọn ko bẹjẹeji. (Isaia 30:20; Kọlọsinu lẹ 1:15) Ewọ wẹ omẹ lọ he sọgan plọnnu tlọlọ sọn Weplọnmẹtọ Daho lọ si! To owhe fọtọ́n madosọha susu whenu to gbẹdido pẹkipẹki mẹ hẹ Otọ́ lọ, Visunnu enẹ—he wá yin yinyọnẹn di Jesu Klisti—mọ wepinplọn he họakuẹ taun de yí gando jẹhẹnu, azọ́n, po lẹndai Jehovah Jiwheyẹwhe tọn lẹ po go. To nukọnmẹ, taidi dawe de to aigba ji, Jesu sọgan dọmọ: “Yẹn ma wà núde na dee; ṣigba le Otọ́ plọ́n mi do, wẹ yẹn to onú helẹ dọ.”—Johanu 8:28.
2-4. (a) Sọgbe hẹ Johanu weta 7, ninọmẹ tẹlẹ wẹ lẹdo tintin to Hùnwhẹ Gòhọtúntún tọn tẹnmẹ Jesu tọn to owhe 32 W.M.? (b) Naegbọn nugopipe mẹpinplọn Jesu tọn do paṣa Ju lẹ?
2 Nawẹ Jesu yí wepinplọn he e mọyi lọ zan gbọn? To owhe atọ̀n daa, to lizọnyizọn aigba ji etọn tọn whenu, e gbọn numaṣikọ dali do má nuhe e ko plọn lọ hẹ mẹdevo lẹ. Ehe, nalete, yin wiwà nado hẹn lẹndai titengbe de di. Podọ Lẹndai tẹ niyẹn? Mì gbọ mì ni gbadopọnna hogbe Jesu tọn lẹ to Johanu weta 7, fie e basi zẹẹmẹ asisa po lẹndai mẹpinplọn etọn tọn po te.
3 Gbadopọnna todohukanji lọ. Ojlẹ amàkikọ tọn whenu heyin 32 W.M. tọn wẹ, diblayi owhe atọ̀n to baptẹm Jesu tọn godo. Ju lẹ plidopọ to Jelusalẹm na Hùnwhẹ Gòhọtúntún tọn. Ohó susu wẹ ko to yinyin didọ pe dogbọn Jesu dali to azán vude tintan hùnwhẹ lọ tọn lẹ whenu. To daglamẹ hùnwhẹ lọ tọn, Jesu yì tẹmpli mẹ bo jẹ mẹplọn ji. (Johanu 7:2, 10-14) Dile e ko nọ saba te do, e do ede hia nado yin Mẹplọntọ daho de.—Matiu 13:54; Luku 4:22.
4 Wefọ 15 Johanu weta 7 tọn dọmọ: “Enẹwutu Ju lẹ vivó, dọmọ, nawẹ dawe he wà yọ́n owe, mẹhe ma plọn nude gbede?” Be hiẹ sọgan mọnukunnujẹ nuhewutu avò do vò yé mẹ ya? Jesu ma ko yì wehọmẹ Labbi lẹ tọn depope gba, enẹwutu agblinọ wẹ e yin—wẹ yin nuhe yé lẹn! Ṣogan, Jesu sọgan din bosọ hia ada lẹ sọn Wekinkan Wiwe lẹ mẹ po awubibọ po. (Luku 4:16-21) Yèdọ, whlẹpatọ Galilinu tọn ehe tlẹ sọ plọnnu yé to Osẹ́n Mose tọn mẹ! (Johanu 7:19-23) Nawẹ ehe yọnbasi gbọn?
5, 6. (a) Nawẹ Jesu basi zẹẹmẹ asisa mẹpinplọn etọn tọn gbọn? (b) Nawẹ Jesu yí wepinplọn etọn zan gbọn?
5 Dile mí hia to wefọ 16 po 17 po mẹ do, Jesu basi zẹẹmẹ dọmọ: “Nuplọnmẹ ṣie ma yin ṣie gba, ṣigba mẹhe do mi hlan tọn wẹ. Eyin mẹde jlo na wà ojlo etọn, ewọ na yọ́n nuplọnmẹ lọ, eyin Jiwheyẹwhe tọn wẹ e yin, kavi eyin yẹn to ohó dee tọn dọ wẹ.” Yé jlo nado yọ́n mẹhe plọnwe Jesu, podọ e dọ na yé gbangba ma do adú-dẹji dọ Jiwheyẹwhe de wẹ wepinplọn emitọn wá sọn!—Johanu 12:49; 14:10.
6 Nawẹ Jesu yí wepinplọn etọn zan gbọn? E na gblọndo, dile e yin kinkandai do to Johanu 7:18 mẹ do, Jesu dọmọ: “Mẹhe to ohó ede tọn dọ to gigo ede tọn din; ṣigba mẹhe din gigo mẹhe do e hlan tọn, dopolọ wẹ nugbo, mawadodo de ma tin to ewọ mẹ.” Lehe e sọgbe do sọ dọ Jesu yí weyinyọnẹn etọn zan nado hẹn gigo wá na Jehovah, yèdọ “ewọ mẹhe yin mẹpipe tọn to oyọnẹn mẹ”!—Job 37:16.
7, 8. (a) Nawẹ wepinplọn dona yin yiyizan gbọn? (b) Etẹwẹ yin yanwle ẹnẹ wepinplọn jlẹkaji tọn lẹ?
7 Gbọnmọ dali mí mọ oplọn họakuẹ yí sọn Jesu si—wepinplọn dona yin yiyizan, e ma yin nado pagigona míde gba, ṣigba nado hẹn gigo wá na Jehovah. Aliho he yọ́n hugan devo depope matin nado yí wepinplọn zan gba. Ṣigba nawẹ mí sọgan yí wepinplọn zan nado hẹn gigo wá na Jehovah gbọn?
8 Nado plọnwe zẹẹmẹdo “nado plọn azọ́n gbọn nuplọnmẹ aṣa tọn po nuyiwa he yin anadena tọn po dali titengbe to nude yinyọnẹn, ajọ́, kavi azọ́n de mẹ.” Mí gbọ mí ni gbadopọnna yanwle dodonu tọn ẹnẹ delẹ todin heyin wepinplọn jlẹkaji tọn po lehe dopodopo ehelẹ tọn sọgan yin yiyizan nado pagigona Jehovah do. Wepinplọn jlẹkaji tọn dona gọalọna mí (1) nado hiawe ganji, (2) nado kanwe ni họnwun, (3) nado whẹ́n to apọnmẹ podọ to walọyizan mẹ, podọ (4) nado tindo azọ́nplọnmẹ yọn-na-yizan he nuhudo tin na na gbẹninọ egbesọegbesọ tọn.
Pinplọn Nado Hiawe Ganji
9. Naegbọn e do yin nujọnu nado yin wehiatọ he didẹ́ de?
9 Dehe yin titodohukan ji jẹnukọn wẹ yin pinplọn nado hiawe ganji. Naegbọn e do yin onú titengbe sọmọ nado yin wehiatọ he didẹ́ de? Otanwe aihọn tọn lọ The World Book Encyclopedia basi zẹẹmẹ dọmọ: “Wehihia . . . wẹ dodonu nupinplọn tọn podọ dopo to nugopipe titengbe hugan lẹ mẹ to gbẹzan egbesọegbesọ tọn mẹ. . . . Wehiatọ azọ́nyọnẹntọ lẹ nọ yidogọna awuwlena ogbẹ́ kọdetọn dagbenọ, sinsẹ́nnọ de. To ojlẹ dopolọ mẹ, yelọsu nọ duvivi gbẹzan họakuẹ, pekọhẹnwanamẹ taun tọn de.”
10. Nawẹ Ohó Jiwheyẹwhe tọn hihia nọ gọalọna mí nado duvivi gbẹzan gigọ́, he tindo pekọ hugan tọn gbọn?
10 Eyin wehihia paa tọn sọgan gọalọna mí nado duvivi “gbẹzan họakuẹ, pekọhẹnwanamẹ tọn lẹ,” nẹmunẹmu wẹ ehe yin nugbo gando Ohó Jiwheyẹwhe tọn hihia go! Wehihia mọnkọtọn lẹ nọ hun ayiha po ahun mítọn lẹ po donuvo hlan linlẹn po lẹndai Jehovah tọn lẹ po, podọ nukunnumọjẹnumẹ he họnwun ehelẹ tọn nọ hẹn gbẹzan mítọn lẹ tindo zẹẹmẹ. To yidogọ mẹ, “ohó Jiwheyẹwhe tọn tin to ogbẹ̀, e do huhlọn,” wẹ Heblu lẹ 4:12 dọ. Dile mí hia Ohó Jiwheyẹwhe tọn bosọ lẹnayihamẹpọn do e ji, mí nọ yin dindọn pẹkipẹki hlan Dowatọ etọn, podọ mí nọ yin whinwhan nado basi vọjlado lẹ to gbẹzan mítọn mẹ nado hẹn homẹ etọn hun. (Galatianu lẹ 5:22, 23; Efesunu lẹ 4:22-24) Mí sọ nọ yin tudohomẹna ga nado má nugbo họakuẹ he mí hia lọ po mẹdevo lẹ po. Ehe lẹpo nọ hẹn pipa wá na Weplọnmẹtọ Daho lọ, yèdọ Jehovah Jiwheyẹwhe. Na nugbo tọn aliho he yọ́n hugan mọ de matin gba nado yí nugopipe mítọn zan nado hiawe!
11. Etẹwẹ dona yin yiyi dogọ na tito-to-whinnu jlẹkaji oplọn mẹdetiti tọn de?
11 Vlavo mí yin yọpọ wẹo kavi mẹho, mí yin tulina nado plọn nado hiawe ganji, na wehihia nọ hẹn azọngban titengbe de di to gbẹzan Klistiani tọn mítọn mẹ. To yidogọmẹ na Ohó Jiwheyẹwhe tọn hihia to gbesisọmẹ, tito-to-whinnu jlẹkaji oplọn mẹdetiti tọn de dona bẹ́ dogbapọnna wefọ Biblu tọn lẹ sọn Dogbapọnna Owe Wiwe lẹ Egbesọegbesọ mẹ, Atọ̀họ̀-Nuhihọ́ Lọ Tọn po Réveillez-vous! po pinplọn, awuwlena opli Klistiani tọn lẹ po hẹn. Podọ etẹwẹ dogbọn lizọnyizọn Klistiani tọn mítọn dali? E họnwun dọ, yẹwhehodidọ to gbangba, gọyìpọn bibasi sọyì jlodotọ lẹ dè, po anadena plọnmẹ Biblu whégbè tọn po popolẹpo biọ nuhudo nugopipe wehihia dagbe de tọn.
Pinplọn Nado Kanwe Ni Họnwun
12. (a) Naegbọn e do yin onú titengbe nado plọn wekinkan to aliho he họnwun mẹ? (b) Wekinkan daho hugan he ma ko wá aimẹ pọ́n gbede tẹwẹ yin bibasi?
12 Yanwle awetọ wẹ yindọ wepinplọn jlẹkaji tọn dona gọalọna mí nado plọn nado kanwe ni họnwun. Wekinkan ma nọ hẹn hogbe po linlẹn mítọn lẹ po zun yinyọnẹn na mẹdevo lẹ kẹdẹ gba ṣigba e sọ nọ hẹn yé dote ga. To owhe kanweko susu tlala lẹ die wayi, sunnu Juvi 40 delẹ basi kandai hogbe lẹ tọn do papyrus kavi ayú kanlin tọn ji he wá lẹzun Owe wiwe gbọdo lẹ. (2 Timoti 3:16) Na jide tọn ehe wẹ wekinkan daho hugan to ehe ko yin kinkan pọ́n lẹ mẹ! Jehovah matin ayihaawe deanana vọkan po vọkan bibasi sọn vọkan lẹ mẹ po heyin hogbe wiwe enẹlẹ tọn gbọn owhe kanweko lẹ gblamẹ, sọmọ bọ yé ko jẹ mí si to ninọmẹ jidedonugo tọn de mẹ. Be mí ma gọna pẹdido dọ Jehovah hẹn ohó etọn nado yin kinkan, kakati nado ganjẹ wẹndomẹ gbọn hogbe nùmẹ tọn lẹ go dali ya?—Yijlẹdo Eksọdusi 34:27, 28 go.
13. Etẹwẹ dohia dọ Islaelivi lẹ yọ́nwekan?
13 To ojlẹ hohowhenu tọn lẹ mẹ, hagbẹ he tindo wunmẹ lẹblanulọkẹyi delẹ tọn kẹdẹ wẹ yọnwe, taidi wekantọ lẹ to Mẹsopotamia po Egipti po. To vogbingbọn mlẹnmlẹn de mẹ po akọta lẹ po, mẹlẹpo wẹ yin tulina to Islaeli nado yọnwe. Gbedide he tin to Deutelonomi 6:8, 9 na Islaelivi lẹ nado kanwe do dotin họngbo owhé yetọn lẹ tọn go, dile etlẹ yindọ e họnwun nado yin hogbe yẹhiadonu tọn de, dohia dọ yé yọ́n wekan. To ovu pete, ovi lẹ nọ yin pinplọn lehe yè nọ kanwe do. Sunzanhiawe Gezer tọn, yèdọ dopo to apajlẹ he dohó hugan wekinkan Heblu hohowhenu tọn lẹ mẹ, yin pinplọnmẹ gbọn weyọnẹntọ delẹ dali nado yin awuwlena oflin apọnmẹ tọn wehọmẹvi de tọn.
14, 15. Aliho kọdetọn dagbe he sọgbe tẹlẹ mẹ wẹ yè sọgan yí nugopipe wekinkan tọn zan te?
14 Ṣigba nawẹ mí sọgan yí nugopipe wekinkan tọn zan to aliho kọdetọn dagbe tọn po ehe sọgbe po mẹ gbọn? Po nujikudo po gbọn kandai lẹ bibasi to opli Klistiani tọn lẹ, plidopọ pẹvi lẹ, po plidopọ daho lẹ po whenu dali wẹ. Wekanhlanmẹ de, eyin etlẹ yin kinkan to “hogbe vude lẹ mẹ,” sọgan na tuli mẹhe to azọ̀n jẹ kavi do pinpẹn nutọn yinyọnẹn hia mẹmẹsunnu kavi mẹmẹyọnnu de he jọmẹ kavi hẹjó mí. (1 Pita 5:12) Eyin mẹde to agun lọ mẹ ko hẹn mẹyiwanna de bu to okú mẹ, wekanhlanmẹ kleun kavi kalti de sọgan “dọho homẹmiọnnamẹ” tọn do otẹn mítọn mẹ. (1 Tẹsalonikanu lẹ 5:14) Mẹmẹyọnnu de he hẹn onọ̀ etọn bu na awutu agbasa wiwọ̀ tọn wutu basi zẹẹmẹ dọmọ: “Họntọn de kàn wekanhlanmẹ dagbedagbe de hlan mi. Enẹ gọalọna mi taun na yẹn nọ hia ẹ sọn ojlẹ de mẹ jẹ devo mẹ.”
15 Aliho he yọ́n taun he mẹ yè sọgan yí nugopipe wekinkan tọn zan te nado hẹn pipa wá na Jehovah wẹ gbọn wekanhlanmẹ de kinkan nado dekunnu na Ahọluduta lọ dali. E sọgan yin dandannu nado dọnsẹpọ jlodotọ yọyọ he nọ nọ aigba denamẹ he tin to olá tọn lẹ ji. To ojlẹ delẹ mẹ, azọ̀n sọgan hẹn ẹn zun nuhe vẹawu de na we na whenu-gli de nado yì sọn whédegbè jẹ whédegbè. Vlavo wekanhlanmẹ de sọgan dọ nuhe hiẹ lọsu na dewe titi na dọ.
16, 17. (a) Numimọ tẹwẹ do nuhọakuẹ-yinyin wekanhlanmẹ nado dekunnu Ahọluduta lọ tọn hia? (b) Be hiẹ sọgan na numimọ dopolọ ya?
16 Lẹnnupọn do numimọ ehe ji. To owhe susu die wayi Kunnudetọ de kanwe do dekunnu dogbọn Ahọluduta lọ dali na asuṣiọsi dawe de tọn mẹhe okú etọn yin lila to linlinwe lẹdo lọ tọn mẹ. Gblọndo depope mayin mimọyi gba. Enẹgodo, to novembre 1994, yèdọ nuhugan owhe 21 to nukọnmẹ, Kunnudetọ lọ mọ wekanhlanmẹ de yí sọn viyọnnu yọnnu lọ tọn si. Viyọnnu lọ wlan dọmọ:
17 “To avril 1973, hiẹ kanwe hlan onọ̀ ṣie nado miọnhomẹna ẹn to okú otọ́ ṣie tọn godo. Yẹn yin owhe ṣinẹnẹ mẹvi de to ojlẹ lọ mẹ. Onọ̀ ṣie plọn Biblu, ṣigba kakajẹ dinvie ewọ ma yin devizọnwatọ Jehovah tọn gba. Ṣigba, oplọn etọn to agọgbọnẹnmẹ dekọtọn do gbẹdido ṣie hẹ nugbo lọ mẹ. To 1988, yẹn bẹ oplọn Biblu tọn ṣie jẹeji—yèdọ owhe 15 to wekanhlanmẹ towe mimọyi godo. To 9 mars 1990, yẹn yin bibaptizi. Yẹn gọna pẹdido taun na wekanhlanmẹ towe owhe susu die wayi tọn bọ homẹ ṣie sọ hun sọmọ nado dọna we dọ okún enẹlẹ he hiẹ do whẹ́n, po alọgọ Jehovah tọn po. Onọ̀ ṣie yí wekanhlanmẹ towe na mi nado sẹdo, podọ yẹn na jlo nado yọ́n mẹhe hiẹ yin. Yẹn tindo todido dọ hiẹ mọ wekanhlanmẹ ehe yí.” Na nugbo tọn, wekanhlanmẹ viyọnnu lọ tọn, he bẹ adlẹsi po sọha alokan etọn tọn po hẹn, jẹ Kunnudetọ lọ si he ko kanwe to owhe susu die wayi. Saa lẹnnupọn do nupaṣa yọnnu jọja lọ tọn ji to whenuena e mọ oylọ alokan tọn yí sọn Kunnudetọ lọ si—yèdọ mẹhe gbẹsọ nọ wlan wekanhlanmẹ lẹ nado má todido Ahọluduta lọ tọn hẹ mẹdevo lẹ!
Whinwhẹ́n to Apọnmẹ, Walọyizan, po Gbigbọ po Liho
18. To ojlẹ Biblu tọn lẹ mẹ, nawẹ mẹjitọ lẹ penukundo wepinplọn apọ̀nmẹ po walọyizan ovi yetọn lẹ tọn go gbọn?
18 Yanwle atọ̀ntọ wẹ yindọ wepinplọn jlẹkaji tọn dona gọalọna mí nado whẹ́n to apọnmẹ podọ to walọyizan mẹ. To ojlẹ Biblu tọn lẹ mẹ wepinplọn apọnmẹ tọn po walọyizan tọn po heyin ovi lẹ tọn yin pinpọnhlan taidi dopo to azọngban tintan mẹjitọ lẹ tọn mẹ. Ovi lẹ ma nọ yin pinplọn lehe yè sọgan hiawe bo kanwe do kẹdẹ gba ṣigba, titengbe hugan, yin pinplọn to Osẹ́n Jiwheyẹwhe tọn mẹ, he bẹ nuwiwa gbẹzan tọn yetọn lẹpo hẹn. Gbọnmọ dali, wepinplọn bẹ nuplọnmẹ dogbọn dandannu sinsẹ̀n yetọn tọn lẹ dali hẹn po nunọwhinnusẹ́n he nọ deanana alọwle, haṣinṣan whẹndo tọn lẹ, po walọyizan zanhẹmẹ tọn lẹ po, gọna dandannu yetọn lẹ gando gbẹtọ hatọ yetọn lẹ go. Wepinplọn mọnkọtọn gọalọna yé nado whẹ́n e mayin to apọnmẹ po walọyizan kẹdẹ po liho gba ṣigba to gbigbọmẹ ga.—Deutelonomi 6:4-9, 20, 21; 11:18-21.
19. Fie wẹ mí sọgan mọ wepinplọn he nọ do nuhọakuẹ walọ dagbe ganji tọn lẹ hia nado nọgbẹ sọgbe hẹ podọ he nọ gọalọna mí nado whẹ́n to gbigbọ liho yí te?
19 Etẹwẹ dogbọn egbehe dali? Wepinplọn aihọn tọn dagbe de yin onú titengbe. E nọ gọalọna mí nado tindo whinwhẹ́n apọnmẹ tọn. Ṣigba fie wẹ mí sọgan lẹhlan nado mọ weplọnmẹ he na do nuhọakuẹ he yọ́n hugan lẹ hia nado nọgbẹ̀ to gbesisọmẹ hẹ ẹ podọ he na gọalọna mí nado tindo whinwhẹ́n to gbigbọmẹ? To gblagbla agun Klistiani tọn mẹ, mí tindo dotẹnmẹ hundote lọ nado tindo mahẹ to tito-to-whinnu wepinplọn yẹwhehọluduta tọn mẹ he ma tin to fidevo depope to aigba ji. Gbọn oplọn Biblu tọn mẹdetiti tọn mítọn po owe he sinai do Biblu ji lẹ po gọna nudọnamẹ he nọ yin awuwlena to opli agun tọn lẹ, plidopọ pẹvi lẹ, po plidopọ daho lẹ po dali, mí sọgan mọ wepinplọn zọnmii he yè ma sọgan họ̀ po akuẹ po ehe—yèdọ wepinplọn sọn olọn mẹ wá—vọnu ma ná tanga! Etẹwẹ e nọ plọn mí?
20. Etẹwẹ mẹpinplọn sọn olọn mẹ wá nọ plọn mí, podọ kọdetọn tẹlẹ wẹ nọ wá sọn e mẹ?
20 To whenuena mí jẹ Biblu plọn ji, mí nọ plọn dodonu nuplọnmẹ Owe wiwe tọn lẹ, yèdọ ‘sinsẹ̀n-nuplọnmẹ dodonu tọn lẹ.’ (Heblu lẹ 6:1) Dile mí zindonukọn, mí nọ jẹ “núdùdù sinsinyẹn” dù ji—enẹ wẹ yin, nugbo he siso tlala lẹ. (Heblu lẹ 5:14) Nalete, hugan mọ, mí nọ plọn nunọwhinnusẹ́n jijọ-di-Jiwheyẹwhe tọn lẹ he nọ plọn mí lehe yè sọgan nọgbẹ̀ dile Jiwheyẹwhe jlo dọ mí ni nọgbẹ̀ do. Taidi apajlẹ, mí plọn nado dapana walọyizan po nuyiwa he nọ hẹn ‘agbasa kudiho’ lẹ po podọ nado tindo sisi na aṣẹpipa podọ na gbẹtọ lẹ po nutindo mẹdevo lẹ tọn po. (2 Kọlintinu lẹ 7:1; Titu 3:1, 2; Heblu lẹ 13:4) To yidogọmẹ, mí wá yọ́n pinpẹn nujọnu-yinyin nugbonọ-yinyin po azọ́n sinsinyẹn wiwà to azọ́n mítọn mẹ po podọ nuhọakuẹ gbẹninọ sọgbe hẹ gbedide Biblu tọn lẹ gando walọyizan zanhẹmẹ tọn go. (1 Kọlintinu lẹ 6:9, 10; Efesunu lẹ 4:28) Dile mí to nukọnzindo to nunọwhinnusẹ́n ehelẹ yiyizan to gbẹzan mítọn mẹ, mí nọ whẹ́n to gbigbọmẹ, podọ haṣinṣan mítọn hẹ Jiwheyẹwhe nọ siso. Humọ, walọyizan jijọ-di-Jiwheyẹwhe tọn mítọn nọ hẹn mí zun tòvi dagbe lẹ, mahopọnna fidepope he mí nọ nọ. Podọ ehe sọgan whàn mẹdevo lẹ nado pagigona Asisa wepinplọn sọn olọn mẹ wá tọn lọ—yèdọ Jehovah Jiwheyẹwhe.—1 Pita 2:12.
Azọ́nplọnmẹ Yọn-na-Yizan na Gbẹninọ Egbesọegbesọ Tọn
21. Azọ́nplọnmẹ yọn-na-yizan tẹwẹ ovi lẹ mọyi to ojlẹ Biblu tọn lẹ mẹ?
21 Yanwle ẹnẹtọ wepinplọn jlẹkaji tọn wẹ nado wleawuna mẹde po azọ́n plọnmẹ yọn-na-yizan he nuhudo tin na po na gbẹninọ egbesọegbesọ tọn. Weplọnmẹ mẹjitọ lẹ tọn to ojlẹ Biblu tọn mẹ bẹ azọ́nplọnmẹ yọn-na-yizan hẹn. Yọnnu lẹ nọ yin pinplọn whégbèzọ́n lẹ. Weta he gbọngodo Howhinwhẹn lẹ tọn dohia dọ ehelẹ dona ko sù bosọ tin to wunmẹ voovo ji. Gbọnmọ dali, yọnnu lẹ lẹzun mẹhe penugo nado nọ do ahóavọ, avọlinlọn, po nudida po nado penukundo whégbèzọ́n paa lẹ go, ajọwiwa, po ahiwhiwhle lẹ po. Visunnu lẹ nọ saba yin pinplọn agbasazọ́n otọ́ yetọn lẹ tọn, vlavo glepipọ kavi alọnuzọ́n delẹ kavi anazọnwiwa. Jesu plọn whlẹpipa sọn otọ́ mẹgopọntọ etọn, Josẹfu de; gbọnmọ dali, e yin yiylọ e mayin “visunnu whlẹpatọ tọn” kẹdẹ gba ṣigba “whlẹpatọ” lọsu ga.—Matiu 13:55; Malku 6:3.
22, 23. (a) Etẹwẹ wepinplọn dona wleawu ovi lẹ tọn na? (b) Etẹwẹ dona yin mẹwhinwhan mítọn to nudide wepinplọn dogọ tọn bibasi mẹ to whenuena enẹ sọgan sọawuhia nado yin dandannu?
22 To egbehe ga, wepinplọn he tin to jlẹkaji ganji de bẹ awuwle nado penukundo nuhudo whẹndo de tọn go hẹn to azán dopodopo gbe. Hogbe apọsteli Paulu tọn lẹ he yin mimọ to 1 Timoti 5:8 dohia dọ awuwiwlena whẹndo mẹde tọn yin azọngban wiwe de. E wlan dọmọ: “Ṣigba eyin mẹde ma wleawu dai na etọn titi lẹ, humọ na owhédo etọn lọsu lẹ, e mọ́n yise lọ, e sọ ylan hú mayisenọ.” To whelọnu lo, wepinplọn, dona wleawuna ovi lẹ na azọngban he yé na didá to gbẹzan mẹ gọna awuwiwlena yé nado lẹzun hagbẹ azọ́n sinsinyẹnwatọ lẹ to lẹdo lọ mẹ.
23 Fie wẹ e jẹ dọ mí ni plọnwe jẹ? Ehe sọgan gbọnvo sọn otò de mẹ jẹ devo mẹ. Ṣigba eyin azọ́nwatẹn lẹ biọ wehọmẹ-yìyì dogọna dehe yin bibiọ gbọn osẹ́n dali, e pò to mẹjitọ lẹ si nado deanana ovi yetọn lẹ to dide bibasi dogbọn dide wehihia dogọ kavi azọnpinplọn dogọ tọn bibasi mẹ, to alemọyi he sọgan dekọtọn po owù nupinplọn mọnkọtọn lẹ zize pọ́n dali. Nalete, etẹwẹ dona yin mẹwhinwhan mẹde tọn nado basi dide wepinplọn dogọ tọn to whenuena enẹ sọgan sọawuhia nado yin dandannu? Na nugbo tọn e ma yin adọkunnọ-yinyin, gigo mẹdetiti tọn, kavi pipa gba. (Howhinwhẹn lẹ 15:25; 1 Timoti 6:17) Flin oplọn he mí plọn sọn apajlẹ Jesu tọn mẹ—wepinplọn dona yin yiyizan nado hẹn gigo wá na Jehovah. Eyin mí de wepinplọn yinukọn dogọ, mẹwhinwhan mítọn dona yin ojlo lọ nado hẹn míde to akuẹ-zinzan liho ganji na mí nido sọgan sẹ̀n Jehovah to gigọ mẹ dile e sọgan yọnbasi do to lizọnyizọn Klistiani tọn mẹ.—Kọlọsinu lẹ 3:23, 24.
24. Nuhe yin pinplọn sọn Jesu de tẹwẹ mí ma dona wọnji e go pọ́n gbede?
24 Enẹwutu, mì gbọ mí ni vánkan to vivẹnudido mítọn lẹ mẹ nado tindo wepinplọn jlẹkaji tọn. Na mí ni yí dotẹnmẹ tito-to-whinnu mẹpinplọn sọn olọn mẹ wá he to yìyì to alọnu he zan do gigọ́ mẹ he nọ yin awuwlena to gblagbla titobasinanu Jehovah tọn mẹ. Podọ mí ni ma wọnji nuplọnmẹ họakuẹ he mí plọn sọn Jesu Klisti, yèdọ sunnu wesetọ ganji he ko nọ aigba ehe ji pọ́n si—wepinplọn dona yin yiyizan, e ma yin nado pagigona mídelẹ gba, ṣigba nado hẹn pipa wá na Mẹplọntọ mẹlẹpo tọn lọ, yèdọ Jehovah Jiwheyẹwhe!
Etẹwẹ Yin Gblọndo Towe?
◻ Nawẹ Jesu yí wepinplọn etọn zan gbọn?
◻ Naegbọn e do yin nujọnu nado plọn lehe yè nọ hiawe ganji do?
◻ Nawẹ mí sọgan yí nugopipe wekinkan tọn zan nado hẹn pipa wá na Jehovah gbọn?
◻ Nawẹ wepinplọn sọn olọn mẹ wá nọ gọalọna mí nado whẹ́n to walọyizan po to gbigbọ po liho gbọn?
◻ Azọ́nplọnmẹ yọn-na-yizan tẹwẹ wepinplọn jlẹkaji tọn de dona bẹhẹn?
lọ, yèdọ Jehovah Jiwheyẹwhe!
[Apotin to weda 18]
Alọgọ Yọn-na-Yizan na Weplọnmẹtọ Lẹ
To Plidopọ Agbegbe “Gigopanamẹtọ Ayajẹnọ Lẹ” to 1995/96 tọn whenu, Ogbẹ́ Watch Tower tọn dè alọnuwe yọyọ de jẹgbonu he hosọ etọn yin Kunnudetọ Jehovah Tọn lẹ po Wepinplọn Po. Alọnuwe weda 32, sinmẹ whanpẹnọ ehe ko yin zinzinjẹgbonu titengbe na weplọnmẹtọ lẹ. To alọnu din lẹdogbedevomẹ etọn ko yin bibasi do ogbè 58 mẹ.
Naegbọn alọnuwe de dona tin na weplọnmẹtọ lẹ? Nado gọalọna yé nado mọnukunnujẹ yise wehọmẹvi he yin Kunnudetọ Jehovah Tọn lẹ tọn mẹ. Etẹwẹ alọnuwe ehe bẹhẹn? To hogbe dopo mẹ, e basi zẹẹmẹ pọndohlan mítọn lẹ do whẹho mọnkọtọn lẹ ji taidi wepinplọn yinukọn dogọ, jijizan lẹ po Noẹli po, gọna nudọdo asia. Alọnuwe lọ sọ vọ́ jide na weplọnmẹtọ lẹ dọ mí jlo dọ ovi mítọn lẹ ni yí dotẹnmẹ wehọmẹ-yiyi yetọn tọn zan ganji podọ mí na kọngbedopọ po ahun lẹpo po hẹ weplọnmẹtọ lẹ, bo na tindo ojlo zohunhun tọn to wepinplọn ovi mítọn lẹ tọn mẹ.
Nawẹ alọnuwe Wepinplọn tọn lọ na yin yiyizan gbọn? To whenuena e yin awu etọn wle na weplọnmẹtọ lẹ, mì gbọ mí ni má nudọnamẹ etọn lẹ hẹ mẹplọntọ lẹ, wehọmẹ-gán lẹ, po azọnwatọ wehọmẹ tọn devo lẹ po. Na alọnuwe yọyọ ehe ni gọalọna weplọnmẹtọ mọnkọtọn lẹpo nado mọnukunnujẹ pọndohlan po yise mítọn lẹ po mẹ podọ nuhewutu mí do nọ sọalọakọn nado gbọnvo po jlọjẹ po to whedelẹnu. Mẹjitọ lẹ yin tulina nado yí alọnuwe lọ zan taidi dodonu de na hodọdopọ mẹdetiti tọn hẹ weplọnmẹtọ ovi yetọn lẹ tọn.
[Yẹdide to weda 15]
To Islaeli hohowhenu tọn mẹ wepinplọn wẹ yè yí nukun nuhọakuẹ taun tọn do pọn