Yin Pinplọn Nado Wà Ojlo Jehovah tọn
“Plọn mi nado wà ojlo towe: na hiẹ wẹ Jiwheyẹwhe ṣie.”—PSALM 143:10.
1, 2. (a) Whetẹnu wẹ mí dona yin pinplọn, podọ po pọndohlan lẹnpọn dagbe tọn tẹ́ po? (b) Naegbọn yinyin pinplọn gbọn Jehovah dali do yin onú titengbe sọmọ?
AZÁN lẹpo gbè he mẹde to ogbẹ̀ bo to nuyiwa, e sọgan yin pinplọn nuhe tindo alemọyinu de. Enẹ yin nugbo to whẹho towe mẹ, podọ eyin nugbo na mẹdevo lẹ. Ṣigba etẹwẹ nọ jọ to okú whenu? E ma yọnbasi nado yin pinplọn nudepope kavi nado plọnnu to ninọmẹ enẹ mẹ gba. Biblu dọ hezeheze dọ oṣiọ lẹ “ma yọ́n núde.” Oyọnẹn de ma tin to Ṣeol, yọdo paa gbẹtọvi lẹ tọn mẹ gba. (Yẹwhehodọtọ 9:5, 10) Be ehe zẹẹmẹdo dọ yinyin pinplọn mítọn, bibẹ oyọnẹn pli, yin to ovọ́ mẹ wẹ ya? Enẹ sinai do nuhe mí yin pinplọn podọ do lehe mí yí oyọnẹn enẹ zán do po ji.
2 Eyin mí yin pinplọn nuhe yin aihọn mẹ tọn lẹ kẹdẹ, mí ma tindo sọgodo dẹn-to-aimẹ de gba. Nalete, po ayajẹ po, livi susu gbẹtọ lẹ tọn to akọta lẹpo mẹ to yinyin pinplọn ojlo sọn olọn mẹ wá po pọndohlan ogbẹ̀ madopodo tọn de po. Dodonu todido ehe tọn sinai do yinyin pinplọn gbọn Jehovah dali ji, yèdọ Asisa oyọnẹn he nọ namẹ ogbẹ̀ tọn.—Psalm 94:9-12.
3. (a) Naegbọn e sọgan yin didọ dọ Jesu wẹ nuplọntọ tintan Jiwheyẹwhe tọn? (b) Jide tẹwẹ mí tindo dọ gbẹtọvi lẹ na yin pinplọn gbọn Jehovah dali, podọ po kọdetọn tẹ́ po?
3 Visunnu plọnji Jiwheyẹwhe tọn, taidi nuplọntọ Etọn tintan, yin pinplọn nado wà ojlo Otọ́ etọn tọn. (Howhinwhẹn lẹ 8:22-30; Johanu 8:28) To godo mẹ, Jesu dohia dọ fọtọ́n susu gbẹtọvi lẹ tọn na yin pinplọn gbọn Otọ́ etọn dali. Etẹwẹ yin nukundido lọ na mí mẹhe plọnnu sọn Jiwheyẹwhe dè lẹ? Jesu dọmọ: “Yè sọ wlan to owé yẹwhegan lẹ tọn mẹ dọ, yè na plọ́n yé omẹ pó gbọn Jiwheyẹwhe dè. Enẹwutu mẹdepope he sè, bọ yè sọ plọ́n gbọn Otọ́ de, ewọ wẹ to dee wá. . . . Nugbo, nugbo, wẹ yẹn dọ hlan mì, mẹhe yí mi se tindo ogbẹ̀ madopodo.”—Johanu 6:45-47.
4. Nawẹ livi susu gbẹtọ lẹ tọn yin gingandego gbọn mẹpinplọn sọn olọn mẹ wá dali do, podọ nukundido tẹwẹ yé tindo?
4 Jesu to hoyidọ sọn Isaia 54:13 mẹ, he to alọdlẹndo yọnnu yẹhiadonu Jiwheyẹwhe tọn, yèdọ Ziọni olọn mẹ tọn. Dọdai enẹ gando visunnu etọn lẹ go tlọlọ, yèdọ devi yí gbigbọ do ji 144 000 Jesu Klisti tọn lẹ. Pipotọ visunnu yí gbigbọ do ji enẹlẹ to nuyiwa egbehe, to nukọntọ yin na tito-to-whinnu mẹpinplọn globu tọn de. Taidi kọdetọn de, livi susu mẹdevo lẹ tọn he wleawuna “gbẹtọ susugege” mọaleyi sọn yinyin pinplọn gbọn Jehovah dali mẹ ga. Yé tindo nukundido matin awetọ lọ nado plọnnu bo ma na tindo numimọ okú tọn gbede. Naegbọn e do yin mọ? Eyọn, yé tin to hukanji nado lùn “nukunbibia daho” he to dindọnsẹpọ niyaniya lọ tọ́n podọ nado duvivi ogbẹ̀ madopodo tọn to paladisi aigba ji tọn de mẹ.—Osọhia 7:9, 10, 13-17.
Nuzindonuji Klo Hugan do Ojlo Jiwheyẹwhe Tọn Wiwà Ji
5. (a) Etẹwẹ yin hosọ owhe 1997 tọn? (b) Nawẹ mí dona tindo numọtolanmẹ dogbọn opli Klistiani tọn lẹ yìyì dali gbọn?
5 To 1997 whenu, to hugan agun 80 000 lẹ lẹdo aihọn pe mẹ, Kunnudetọ Jehovah Tọn lẹ na hẹn do ayiha mẹ pẹkipẹki ohó bẹjẹeji Psalm 143:10 tọn lẹ dọmọ: “Plọ́n mi nado wà ojlo towe.” Enẹ na yin hosọ owhe 1997 tọn. Hogbe enẹlẹ, he na sọawuhia gbangba to Plitẹnhọ Ahọluduta Tọn lẹ mẹ, na yinuwa taidi nuflinmẹ de dọ nọtẹn nukundeji tọn nado mọ nuplọnmẹ sọn olọn mẹ wá yí wẹ yin to opli agun tọn lẹ, fie mí sọgan tindo mahẹ to tito-to-whinnu mẹpinplọn tọn he to yìyì mẹ te. To whenuena mí to awukọndopọ hẹ mẹmẹsunnu mítọn lẹ nado yin pinplọn gbọn Mẹplọntọ Daho mítọn dali, mí sọgan tindo numọtolanmẹ taidi psalmkantọ lọ tọn, mẹhe wlan dọmọ: “Yẹn yín homẹhunnọ whenuena yé dọ hlan mi, dọ, mì gbọ mí ni yì ohọ̀ Oklunọ tọn mẹ.”—Psalm 122:1; Isaia 30:20.
6. To hogbe Davidi tọn lẹ mẹ, etẹwẹ mí kẹalọyi?
6 Mọwẹ, mí jlo nado yin pinplọn nado wà ojlo Jiwheyẹwhe tọn kakati nido yin ojlo kẹntọ mítọn Lẹgba tọn kavi ojlo gbẹtọvi mapenọ lẹ tọn. Enẹwutu, taidi Davidi, mí kẹalọyi Jiwheyẹwhe mẹhe mí to sinsẹ̀n-basina bo to devizọnwa hlan lọ dọmọ: “Na hiẹ wẹ Jiwheyẹwhe ṣie: Yinyọ́n wẹ gbigbọ towe; plan mi yì aigba tenọgligli tọn ji.” (Psalm 143:10) Kakati nado jlo bo kọnawudopọ hẹ gbẹtọ mawadodonọ lẹ, Davidi dè nado tin to fie sinsẹ̀n-bibasi Jehovah tọn nọ yin bibasi te. (Psalm 26:4-6) Po gbigbọ Jiwheyẹwhe tọn nado deanana afọdide etọn lẹ po, Davidi sọgan zinzọnlin to aliho dodowiwa tọn lẹ ji.—Psalm 17:5; 23:3.
7. Nawẹ gbigbọ Jiwheyẹwhe tọn wazọ́n do agun Klistiani tọn ji gbọn?
7 Davidi Daho lọ, Jesu Klisti, na jide apọsteli lẹ dọ gbigbọ wiwe na plọ́n yé onú lẹpo bo na hẹn wá oflin yetọn mẹ onú he e ko dọna yé lẹpo. (Johanu 14:26) Sọn pẹntikọsti sọyi, Jehovah ko to “onú sisosiso Jiwheyẹwhe tọn lẹ” he tin to Ohó winwlan etọn mẹ dohia to aliho debọ-do-dego tọn mẹ. (1 Kọlintinu lẹ 2:10-13) Ehe wẹ e ko wà gbọn asisa yinukundomọ de dali he Jesu ylọ dọ “afanumẹ nugbonọ, nuyọnẹntọ.” E nọ wleawuna núdùdù gbigbọmẹ tọn he nọ yin dogbapọnna to tito-to-whinnu mẹpinplọn tọn mẹ na agun omẹ Jiwheyẹwhe tọn lẹ lẹdo aihọn pe.—Matiu 24:45-47.
Pinplọn Ojlo Jehovah Tọn to Opli Mítọn lẹ Tẹnmẹ
8. Naegbọn mahẹ tintindo to Oplọn Atọ̀họ̀-Nuhihọ́ Lọ Tọn mẹ yin nuhọakuẹ sọmọ?
8 Owe Oplọn sẹmẹsẹmẹ agun tọn heyin Atọ̀họ̀-Nuhihọ́ Lọ Tọn nọ dọhodo nunọwhinnusẹ́n Biblu tọn lẹ yíyí do yizan mẹ ji whẹwhẹ. Na jide tọn ehe nọ gọalọna mí nado pehẹ magbọjẹ gbẹ̀mẹ tọn lẹ. To oplọn devo lẹ tẹnmẹ nugbo gbigbọmẹ tọn he siso lẹ kavi dọdai Biblu tọn lẹ nọ yin dogbapọnna. Lehe mí nọ yin pinplọn to oplọn mọnkọtọn lẹ whenu do sọ! To otò susu mẹ Plitẹnhọ Ahọluduta Tọn lẹ nọ yin gigọ́ pete na opli ehelẹ. Etomọṣo to sọha otò delẹ tọn mẹ, sọha pliwatọ lẹ tọn ko yìdo. Naegbọn, ehe do yinmọ? Be e sọgan yindọ mẹdelẹ to dotẹnmẹ na agbasazọ́n nado glọnalina pipli to pọmẹ gbesisọ tọn yetọn “nado nọ jlahomẹdona to owanyi po azọ́n dagbe lẹ po mẹ wẹ ya”? Kavi be e sọgan yindọ ganmẹ susu lẹ nọ yin yiyizan to nuwiwa pọmẹ tọn lẹ mẹ kavi to televiziọn pinpọn mẹ, bo nọ hẹn todohukanji lọ ján tlala nado yì opli lẹpo wẹ ya? Flin gbedide gbọdo lọ to Heblu lẹ 10:23-25 mẹ. Be e mayin pipli to pọmẹ na mẹpinplọn sọn olọn mẹ wá wẹ tlẹ sọ yin nujọnu hugan todin dile mí “mọ dọ azán lọ to sisẹpọ” ya?
9. (a) Nawẹ Opli Sinsẹ̀nzọn Tọn sọgan wleawu na mí na lizọnyizọn lọ gbọn? (b) Etẹwẹ dona yin walọyizan mítọn dogbọn kunnudide dali?
9 Dopo to azọngban tintan mítọn lẹ mẹ wẹ yin enẹ heyin sinsẹ̀nzọ́nwiwà taidi lizọnyizọnwatọ Jiwheyẹwhe tọn lẹ. Opli Sinsẹnzọn Tọn yin awuwlena nado plọn mí lehe mí sọgan basi wadotana ehe tọn po kọdetọn dagbe po do. Mí nọ plọn lehe yè na dọnsẹpọ gbẹtọ lẹ do, nuhe mí na dọ, aliho lọ nado yinuwa to whenuena gbeyiyi dagbe de tin, podọ nuhe na tlẹ yin wiwà to whenuena gbẹtọ lẹ gbẹ́ owẹ̀n mítọn. (Luku 10:1-11) Dile aliho yọn-na-yizan lẹ yin hodọdeji bo nọ yin dohia basina to opli sẹmẹsẹmẹ tọn ehe mẹ, mí nọ yin awuwlena to aliho dagbe mẹ nado jẹ gbẹtọ lẹ dè e mayin to whenuena mí to yìyì sọn whédegbè-jẹ-whédegbè kẹdẹ gba ṣigba mọdopolọ to whenuena mí to yẹwhehodọ to tòhomẹ-liho lẹ ji, to nọtẹn ayidedai tọn lẹ, ahihun mẹ, to agahun-jlẹtẹn lẹ, to ajọwatẹn lẹ, kavi to wehọ lẹ mẹ. To pọmẹ hẹ obiọ mítọn heyin, “Plọ́n mi nado wà ojlo towe,” mí na jlo nado yí alè dotẹnmẹ hundote lẹpo tọn zan nado wà dile Ogán mítọn dotuhomẹnamẹ do dọmọ: “Mì ni gbọ hinhọ́n mìtọn ni họnwun to gbẹtọ lẹ nukọn . . , na yé nido . . . pagigona Otọ́ mìtọn he tin to olọn mẹ.”—Matiu 5:16.
10. Nawẹ mí sọgan gọalọna ‘mẹhe jẹ lẹ’ nugbo nugbo gbọn?
10 To opli agun tọn mọnkọtọn lẹ tẹnmẹ, mí sọ nọ yin pinplọn nado basi devi mẹdevo lẹ tọn ga. Tlolo he ojlo yin mimọ kavi owé yin didogbonu, yanwle mítọn to whenuena mí to gọyìpọn lẹ basi wẹ nado bẹ plọnmẹ Biblu whégbè tọn lẹ jẹeji. To aliho de mẹ, ehe yin onú dopolọ na devi lẹ ‘ni nọ̀ po mẹhe jẹ lẹ po’ nado sọgan plọn yé onú lọ lẹ he Jesu ko degbe etọn. (Matiu 10:11; 28:19, 20) Tintindo alọgọ dagbe hugan mọnkọtọn lẹ, taidi owé lọ Oyọnẹn He Nọ Planmẹ Sọyi Ogbẹ̀ Madopodo Mẹ, na nugbo tọn mí yin awuwlena ganji nado dotana lizọnyizọn mítọn mlẹnmlẹn. (2 Timoti 4:5) To osẹ dopodopo mẹ dile hiẹ to Opli Sinsẹnzọn Tọn po Wehọmẹ Lizọnyizọn Yẹwhehọluduta Tọn po yì, dovivẹnu nado tindo nukunnumọjẹnumẹ bo gbọnmọ dali do yí onú agokun alọgọnamẹ tọn lẹ zan he na hẹn we taidi dopo to lizọnyizọnwatọ he pegan mlẹnmlẹn Jiwheyẹwhe tọn lẹ mẹ, he to ojlo etọn wà.—2 Kọlintinu lẹ 3:3, 5; 4:1, 2.
11. Nawẹ mẹdelẹ ko do yise hia to hogbe lẹ heyin mimọ to Matiu 6:33 mẹ gbọn?
11 Ojlo Jiwheyẹwhe tọn wẹ dọ mí ni “din ahọluduta Jiwheyẹwhe tọn, po dódó etọn po whẹ́.” (Matiu 6:33) Kanse dewe, ‘Nawẹ yẹn na yí nunọwhinnusẹ́n ehe zan do eyin obiọ lẹ to agbasazọ́n ṣie mẹ [kavi alọwlemẹ ṣie si] jantẹnna opli yìyì?’ Susu mẹhe whẹ́n to gbigbọmẹ lẹ tọn na ze afọdide nado dọhó hẹ azọ́nmẹyimẹdotọ yetọn lẹ dogbọn whẹho lọ dali. Lizọnyizọnwatọ whenu-gigọ́ tọn dopo dike na azọ́nmẹyimẹdotọ etọn ni yọnẹn dọ e dona tindo ojlẹ gbọjẹ tọn to osẹ dopodopo mẹ nado sọgan yì opli agun tọn lẹ. E kẹalọyi obiọ lọ. Ṣigba na tlintlindo dindin dogbọn nuhe nọ yin wiwà to opli lẹ tẹnmẹ dali, e biọ nado yì. To finẹ e sè nulila de gando plidopọ agbegbe tọn he ja de go. Taidi kọdetọn de, azọ́nmẹyimẹdotọ lọ basi tito nado zan azán blebu dopo to plidopọ lọ ji. Nupinplọn tẹwẹ hiẹ mọyi sọn apajlẹ ehe mẹ?
Plọn Ojlo Jehovah Tọn Gbọn Mẹjitọ Jijọ-di-Jiwheyẹwhe Tọn lẹ Dali
12. Na ovi lẹ nido yin pinplọn ojlo Jiwheyẹwhe tọn, etẹwẹ mẹjitọ Klistiani lẹ dona wà po sọwhiwhe po gọna nujikudo?
12 Ṣigba opli agun tọn lẹ po plidopọ lẹ po mayin awuwledainanu kẹdẹ lọ nado yin pinplọn nado wà ojlo sọn olọn mẹ gba. Mẹjitọ jijọ-di-Jiwheyẹwhe tọn lẹ yin gbedena nado plọn, na mẹplọnlọ, bo plọn ovi yetọn lẹ whẹ́n nado pà Jehovah bo wà ojlo etọn. (Psalm 148:12, 13; Howhinwhẹn lẹ 22:6, 15) Mọwiwà biọ dọ mí ni hẹn ‘ovi flinflin’ mítọn lẹ wá opli lẹ fie yé sọgan ‘dotoai bo plọnnu’ te, ṣigba etẹwẹ dogbọn pinplọn yé sọn nukinkan wiwe lẹ mẹ to whégbè dali? (Deutelonomi 31:12; 2 Timoti 3:15) Po ayiha dopo po whẹndo susu ko bẹ tito-to-whinnu plọnmẹ Biblu whẹndo tọn gbesisọ tọn jẹeji, nado dike na ehelẹ ni gboawupo kavi yin alọdotena to ojlẹ pẹẹde godo poun. Be hiẹ ko tindo numimọ mọnkọtọn de ya? Be hiẹ na dotana dọ ayinamẹ lọ nado tindo oplọn gbesisọ tọn mọnkọtọn de ma sọgbe kavi dọ ninọmẹ whẹndo towe tọn gbọnvo taun dọ e ma na wazọ́n to whẹho towe mẹ poun wẹ ya? Depope he ninọmẹ lọ na yin, mì mẹjitọ lẹ ni jaale bo gbadopọnna hosọ dagbe lọ lẹ “Un Riche Héritage Spirituel” po “La Persévérance est récompensée” po to Atọ̀họ̀-Nuhihọ́ Lọ Tọn [flansegbe] 1er août 1995 mẹ.
13. Nawẹ whẹndo lẹ sọgan mọaleyi sọn dogbapọnna wefọ egbesọ tọn mẹ gbọn?
13 Whẹndo lẹ yin tulina nado hẹn dogbapọnna wefọ egbesọ tọn bibasi sọn Dogbapọnna Owe Wiwe lẹ Egbesọegbesọ mẹ zùn aṣa. Hihia wefọ lọ po zẹẹmẹ lẹ po poun yin dagbe, ṣigba hodọdo wefọ lọ ji gọna yiyí ì do yizan mẹ yin alemọyinu tlala. Di apajlẹ, eyin mì to dogbapọnna Efesunu lẹ 5:15-17, hagbẹ whẹndo tọn lẹ sọgan lẹnnupọn do lehe yè sọgan ‘fli ojlẹ lẹ’ do ji na oplọn mẹdetiti tọn, nado tindo mahẹ to adà lizọnyizọn whenu-gigọ tọn delẹ mẹ, podọ nado penukundo azọ́ndenamẹ yẹwhehọluduta tọn devo lẹ go. Mọwẹ, hodọdopọ wefọ egbesọ tọn whẹndo de tọn sọgan plan mẹde kavi mẹsusu nado “tunwun [to aliho gigọ́mẹ] onú he ojlo Oklunọ tọn yín go.”
14. Wunmẹ mẹplọntọ tọn tẹlẹ wẹ Deutelonomi 6:6, 7 dohia dọ mẹjitọ lẹ dona yin, etẹwẹ ehe biọ?
14 Mẹjitọ lẹ dona yin mẹplọntọ vivẹnunọ ovi yetọn lẹ tọn. (Deutelonomi 6:6, 7) Ṣigba e mayin whẹho mẹpinplọn aṣa tọn kavi gbedide nina ovi yetọn lẹ poun tọn de gba. Otọ́ po onọ̀ po sọ dona dotoai, to aliho enẹ mẹ nado yin mẹhe penugo ganji nado yọ́n nuhe dona yin zẹẹmẹ-basina, hinhẹn họnwun, dohia basina, kavi dọvọdọ tọn. To whẹndo Klistiani tọn dopo mẹ, mẹjitọ lẹ fọ́n hodọdopọ dote gbọn tulinina ovi yetọn lẹ dali nado kàn kanbiọ lẹ sè dogbọn onú he mẹ yé ma mọnukunnujẹ lẹ dali kavi he biọ nulẹnpọn deji. Gbọnmọ dali yé mọ dọ visunnu aflanmẹ de tindo nuhahun nado mọnukunnujẹemẹ dọ Jehovah ma tindo bẹjẹeji de gba. Mẹjitọ lọ lẹ penugo nado yí nudọnamẹ sọn owe Ogbẹ́ Watch Tower tọn lẹ mẹ bo dohia dọ ojlẹ po dovlomẹ po yin alọkẹyi taidi nuhe madopodo. Enẹ yinuwa nado basi zẹẹmẹ whẹho lọ tọn, podọ e hẹn pekọwana visunnu yetọn. Enẹwutu yí whenu zan nado na gblọndo họnwun podọ sọn Owe wiwe lẹ mẹ kanbiọ ovi towe lẹ tọn, bo gọalọna yé nado mọ dọ pinplọn nado wà ojlo Jiwheyẹwhe tọn sọgan yin pekọhẹnwanamẹnu taun. Onú devo tẹwẹ omẹ Jiwheyẹwhe tọn lẹ—jọja po mẹho po—to yinyin pinplọn to egbehe?
Yin Pinplọn Nado Yiwanna Podọ Nado Nọavunte
15. Whetẹnu wẹ nujọnu-yinyin owanyi mẹmẹsunnu mítọn tọn sọgan yin whiwhlepọn te?
15 To kọndopọmẹ hẹ gbedide yọyọ Jesu tọn, mí yin ‘pinplọn gbọn Jiwheyẹwhe dali nado yiwanna ode awetọ mítọn.’ (1 Tẹsalonikanu lẹ 4:9) To whenuena onú lẹ to blẹo bo to yìyì linsinlinsin, mí sọgan tindo numọtolanmẹ dọ mí yiwanna mẹmẹsunnu mítọn lẹpo. Ṣogan etẹwẹ nọ jọ to whenuena gbèmanọpọ mẹdetiti tọn lẹ fọ́n kavi mí yin nuṣiwa do na nuhe Klistiani devo dọ kavi wà wutu? To whẹho ehe mẹ nujọnu-yinyin owanyi mítọn tọn sọgan yin zizedo whlepọn mẹ. (Yijlẹdo 2 Kọlintinu lẹ 8:8 go.) Etẹwẹ Biblu plọn mí nado wà to ninọmẹ mọnkọtọn lẹ mẹ? Onú dopo wẹ nado dovivẹnu nado do owanyi hia jẹ obá gigọ́mẹ. (1 Pita 4:8) Kakati nado to dindin alè mídetiti tọn lẹ, bo nọ gblehomẹ do awugbopo flinflin lẹ ji, kavi nọ hẹnmẹdohomẹ, mí dona wazọ́n to didikena owanyi ni ṣinyọnnudo ylando susu lẹ. (1 Kọlintinu lẹ 13:5) Mí yọnẹn dọ ehe yin ojlo Jiwheyẹwhe tọn, na eyin nuhe Ohó etọn plọnmẹ.
16. (a) Wunmẹ awhànfunfun tẹ́ tọn mẹ wẹ Klistiani lẹ yin pinplọn nado tindo mahẹ te? (b) Nawẹ mí yin awuwlena gbọn?
16 To whenuena mẹsusu ma na kọ̀n owanyi po awhànfunfun po dopọ, dehe gbọngodo lọ wẹ yin onú devo de he mí to yinyin pinplọn, ṣigba e gbọnvo pete na awhànfunfun dinwhenu tọn. Davidi yọ́n ginganjẹ Jehovah go etọn nado plọn ẹn lehe yè sọgan funawhàn do, dile etlẹ yindọ to ojlẹ etọn mẹ enẹ bẹ awhànfunfun paa sọta kẹntọ Islaeli tọn lẹ hẹn. (1 Samuẹli 17:45-51; 19:8; 1 Ahọlu lẹ 5:3; Psalm 144:1) Etẹwẹ dogbọn avunhiho mítọn to egbehe dali? Awhànfunnu mítọn lẹ mayin agbasalan tọn gba. (2 Kọlintinu lẹ 10:4) Avunhiho gbigbọmẹ tọn de wẹ mítọn, na ehe mí dona yin awuwlena po gbaja gbigbọmẹ tọn po. (Efesunu lẹ 6:10-13) Gbọn Ohó etọn po omẹ etọn heyin bibẹpli lẹ po dali, Jehovah nọ plọn mí nado hoavun gbigbọmẹ tọn kọdetọn dagbe tọn de.
17. (a) Ayiha wintinwintin tẹlẹ wẹ Lẹgba nọ yizan nado fẹayihasẹ na mí? (b) Etẹwẹ mí dona dapana po nuyọnẹn po?
17 To mẹkiklọ, po aliho wintinwintin lẹ po mẹ, Lẹgba nọ saba yí nugonu aihọn mẹ tọn lẹ zan, atẹṣitọ lẹ, po agọjẹdo nugbo tọ́ devo lẹ po to vivẹnudido mẹ nado lẹ́ mí hlan whẹho he mayin nujọnu tọn lẹ kọ̀n. (1 Timoti 6:3-5, 11; Titu 3:9-11) E taidi dọ e mọ dọ dotẹnmẹ vude wẹ emi tindo nado dù to mí ji gbọn mẹgbeyinyan nukun-sọ-nukun tlọlọ dali, enẹwutu e nọ tẹnpọn nado hẹn mí ṣinuwa gbọn hinhẹn mí nado to lewuwu mítọn lẹ po kanbiọ nulunọ tọn lẹ po dọ tọ́n dali, he ma tindo nujọnu gbigbọmẹ tọn depope gba. Taidi awhànfuntọ he to aṣeji lẹ, mí dona tin to nukle na owù mọnkọtọn lẹ dile mí na to pinpannukọn mẹgbeyinyan lẹ.—1 Timoti 1:3, 4.
18. Etẹwẹ gbẹninọ e ma sọ yin na mídelẹ gba bẹhẹn na taun tọn?
18 Mí ma nọ ze ojlo gbẹtọ lẹ tọn kavi ojlo akọta lẹ tọn daga gba. Jehovah ko plọn mí gbọn apajlẹ Jesu tọn dali dọ mí ma dona nọgbẹ̀ na mídelẹ ba gba; kakatimọ, mí dona yin gbajablana po ninọmẹ apọn mẹ tọn dopolọ po he Klisti Jesu tindo bo nọgbẹ̀ na ojlo Jiwheyẹwhe tọn. (2 Kọlintinu lẹ 5:14, 15) To ojlẹ he wayi mẹ, mí sọgan ko zan gbẹzan mawé tọn taun, gbẹzan wantuntun tọn, hinhẹn ojlẹ họakuẹ lẹ gú. Paṣadudu, ahangbẹ́dido, po fẹnnuwiwa po ko dohiagona aihọn ylankan ehe. Todin he mí to yinyin pinplọn nado wà ojlo Jiwheyẹwhe tọn, be mí ma dopẹ́ nado yin kinklandovo sọn aihọn nugbomadọ tọn ehe mẹ ya? Enẹwutu mì gbọ mí ni hoavun sinsinyẹn gbigbọmẹ tọn nado dapana yinyin bibẹpla po walọyizan mẹdèpo aihọn mẹ tọn lẹ po.—1 Pita 4:1-3.
Pinplọn Mí Nado Mọaleyi
19. Yinyin pinplọn ojlo Jehovah tọn podọ to enẹgodo wiwà ẹ na planmẹ jẹ alemọyinu tẹlẹ kọ̀n?
19 Eyin dandannu nado yọnẹn dọ yinyin pinplọn nado wà ojlo Jehovah tọn nọ na mí alè daho taun. Po nukunnumọjẹnumẹ po, mí dona yí adà mítọn basi gbọn todoai po sọwhiwhe po dali nado sọgan plọn podọ to whelọnu lo hodo nuplọnmẹ lẹ he wá míde gbọn Ovi etọn dali mọdopolọ gbọn Ohó po gbẹtọ bẹpli etọn lẹ po dali. (Isaia 48:17, 18; Heblu lẹ 2:1) Gbọn mọwiwà mítọn dali, mí na yin huhlọn na nado nọte gli to ojlẹ awufiẹsa tọn ehelẹ mẹ bo pehẹ nugbajẹmẹji he to nukọn ja lẹ. (Matiu 7:24-27) Etlẹ yin todin, mí na to homẹ Jiwheyẹwhe tọn hẹn hùn gbọn wiwà ojlo etọn dali podọ na yin nujikudonọ dọ odẹ̀ mítọn lẹ mọ gblọndo yí. (Johanu 9:31; 1 Johanu 3:22) Podọ mí na tindo numimọ ayajẹ nujọnu tọn.—Johanu 13:17.
20. Do etẹ ji wẹ e na yin dagbenu nado lẹnayihamẹpọn do dile hiẹ mọ hosọ owhe tọn lọ to 1997 gblamẹ?
20 To nuwiwa 1997 tọn whenu, mí na tindo dotẹnmẹ hundote pludopludo nado hia bo gbadopọnna hosọ owhe tọn lọ, Psalm 143:10 dọmọ: “Plọ́n mi nado wà ojlo towe.” Dile mí to ehe wà, mì gbọ mí ni yí dotẹnmẹ hundote delẹ zan nado lẹnnupọn do awuwledainanu lọ lẹ he Jiwheyẹwhe ko basi na mí nado yin pinplọn ji, dile e yin kinkan to aga do. Podọ mì gbọ mí ni yí ayihamẹlẹnpọn mọnkọtọn zan do hogbe enẹlẹ ji taidi zodolanmẹnamẹnu de nado yinuwa to gbesisọmẹ hẹ ovẹvivẹ enẹ, to yinyọnẹn dọ “ewọ he to ojlo Jiwheyẹwhe tọn wà wẹ na nọte kakadoi.”—1 Johanu 2:17.
Nawẹ Hiẹ Na Na Gblọndo Gbọn?
◻ Mẹnu lẹ to egbehe wẹ to yinyin pinplọn nado wà ojlo Jehovah tọn?
◻ Nawẹ Psalm 143:10 dona yinuwa do mí ji to 1997 whenu gbọn?
◻ Nawẹ mí to yinyin pinplọn nado wà ojlo Jehovah tọn gbọn?
◻ Etẹwẹ yin bibiọ to mẹjitọ Klistiani lẹ si to pinplọn ovi yetọn lẹ mẹ?