“Dopo Poun to Susu Ogbẹ̀ He ji Hiẹ Yinuwado lẹ Tọn”
YIGODO jẹ janvier 1996, Carol to apọnzọ̀n jẹ. E tin to owhe 60 etọn lẹ mẹ podọ kakajẹ whenẹnu ko yin ayajẹnọ to whepoponu, yọnnu agbasalilo dagbenọ po hogbe tuli tọn lẹ po na mẹlẹpo. Ṣigba todin doto lẹ to vivẹnudo nado duto azọ̀n mẹhutọ lọ ji. To gblagbla vivẹnudido sinsinyẹn etọn tọn mẹ, Carol mọ wekanhlanmẹ he bọdego ehe lọ yí:
“Mẹyiwanna Carol:
“Yẹn yin awublanọ dogbọn awugbopo agbasalilo towe tọn dali. Na nugbo tọn, mí tindo todido nujọnu tọn he Biblu gọalọna mí nado yọnẹn bo yiwanna lọ. Todido ehe wẹ yin na Ahọluduta Jehovah Tọn ni dugán do aihọn lọ ji na mí nido sọgan nọgbẹ to ninọmẹ paladisi tọn de mẹ, ojlẹ de he mímẹpo to nukọn pọndohlan na.
“Yẹn jlo dọ hiẹ ni yọnẹn dọ azọ́n yẹwhehodidọ mẹdetiti tọn towe whlẹn mẹsusu gán sọn okú madopodo mẹ. Yẹn yin dopo to omẹ ehelẹ mẹ. Yẹn ma yọnẹn eyin hiẹ flin whenuena mí pé to tintan whenu gba. To whenẹnu yẹn yin owhe 20 mẹvi. Yẹn tindo oda gaa, nọ sa amasin adínọ lẹ, bo nọ do ogbẹ́ ylankan hẹ sẹ́nhẹngbatọ lẹ. Mímẹpo nọ hẹn osò lẹ bo ma tindo owanyi nujọnu tọn na mẹdepope adavo na míde titi lẹ.
“Hiẹ húhú ohọ̀n ṣie po Kunnudetọ devo po bo ze Atọ̀họ̀-Nuhihọ́ Lọ Tọn po Réveillez-vous! po donukọnna mi. Yẹn tẹnpọn nado na we dọla dopo bo dọ dọ yẹn ma jlo linlinnamẹwe lọ lẹ gba. Hiẹ dike yẹn ni yọnẹn dọ hiẹ ma to yẹwhehodọ nado mọ nunina lẹ yí poun gba. Hiẹ dọ na mi dọ hiẹ to azọ́nwa nado gọalọna gbẹtọ lẹ nado hia Biblu. Yẹn ma doayi e go eyin yẹn yí linlinnamẹwe lẹ kavi hia yé gba. Ṣigba, hiẹ do okún nugbo lọ tọn do gbẹzan ṣie mẹ.
“To owhe delẹ godo, Gary Kunnudetọ devo, wá owhé onọ̀ ṣie tọn gbe whenuena yẹn tin to finẹ. Yẹn dọna ẹn dogbọn dlapọn he hiẹ ko basi to owhe delẹ die jẹnukọn dali. Gary plọn Biblu lọ hẹ mi na whenu dindẹn kaka yẹn do yin bibaptizi to godo mẹ to 1984. Todin yẹn to pinplọn ovi ṣie lẹ nugbo Ahọluduta Jiwheyẹwhe Tọn tọn.
“Yẹn yin nujikudonọ dọ yẹn yin dopo gee to susu ogbẹ̀ he ji hiẹ yinuwado to owhe devizọnwiwa nugbonọ towe tọn lẹ whenu mẹ. Nalete, gbọn dagbewanyi ehe dali, hiẹ ko hẹn yẹn po whẹndo ṣie po penugo nado wá yọ́n Jiwheyẹwhe Nupojipetọ lọ, Jehovah, po Visunnu etọn Klisti Jesu po. Yẹn to nukọn pọndohlan na azán lọ whenuena yẹn sọgan mọ we to titonu yọyọ lọ mẹ whenuena Jehovah na súnsún dasin lẹpo sẹ sọn nukun mítọn lẹ mẹ, bọ okú ma nasọ tin ba.—Osọhia 21:4.
“Na yẹn tọn po whẹndo ṣie po, mí yin homẹhunnọ dọ mí tindo dotẹnmẹ lọ nado yọ́n we podọ nado yin apadewhe azọ́n kunnudide towe tọn. A basi.
“Po owanyi mẹmẹsunnu tọn po,
Peter”
To awutujijẹ osun ṣidopo tọn godo, Carol kú to mars 1996, to okún nugbo lọ tọn susu dido godo to owhe 35 lẹ gblamẹ taidi yẹwhehodọtọ zohunhunnọ de. E plọn dọ mẹde ma nọ yọnẹn whenuena okun de na dè sinsẹ́n tọ́n gba, etlẹ yin to owhe lẹ godo.—Matiu 13:23.