Jọja lẹ Emi—Mì Hẹn Ojlo Mìtọn Nado Sẹ̀n Jehovah Sinyẹn Deji
“Flin Mẹdatọ towe to azán ovu whenu towe tọn.”—YẸWH. 12:1.
1. Oylọ-basinamẹ tẹwẹ dlẹnkan kakajẹ yọpọvu lẹ ji to Islaeli?
TO NUDI owhe 3500 die, yẹwhegán Jehovah tọn Mose degbena yẹwhenọ lẹ po mẹho Islaeli tọn lẹ po dọmọ: “Bẹ gbẹtọ lẹ lọ pli, sunnusi lẹ po yọnnusi lẹ po po omẹ flinflin lẹ lọ po, . . . , na yé nido sè, podọ na yé nido plọnnu, bo nọ dibusi OKLUNỌ lọ Jiwheyẹwhe mìtọn, bosọ nọ payi nado basi ohó osẹ́n he tọn lẹ lọ lẹpo.” (Deut. 31:12) Doayi mẹhe yin gbedena nado pli dopọ na sinsẹ̀n-bibasi lẹ go, yèdọ sunnusi lẹ, yọnnusi lẹ po omẹ flinflin lẹ po. Mọwẹ, jọja lẹ lọsu tlẹ tin to mẹhe yin oylọ-basina nado sè, plọnnu, bo hodo anademẹ Jehovah tọn lẹ mẹ.
2. Nawẹ Jehovah do mẹtọnhopọn hia jọja lẹ to agun Klistiani dowhenu tọn mẹ gbọn?
2 To owhe kanweko tintan whenu, Jehovah zindonukọn nado to mẹtọnhopọn dohia jọja he tin to omẹ etọn lẹ ṣẹnṣẹn lẹ. Di apajlẹ, e gbọdo apọsteli Paulu nado yí ayinamẹ he gando jọja lẹ go tlọlọ dogọ delẹ to wekanhlanmẹ he e dohlan agun lẹ mẹ. (Hia Efesunu lẹ 6:1; Kọlọsinu lẹ 3:20.) Jọja Klistiani he nọ yí ayinamẹ mọnkọtọn lẹ do yizan mẹ lẹ nọ do pinpẹn-nutọn-yinyọnẹn hia Otọ́ owanyinọ olọn mẹ tọn yetọn bo nọ mọ dona etọn yí.
3. To egbehe, nawẹ jọja lẹ nọ dohia dọ yé tindo ojlo nado sẹ̀n Jiwheyẹwhe gbọn?
3 To egbehe, be jọja lẹ yin oylọ-basina nado nọ pli dopọ nado sọgan basi sinsẹ̀n hlan Jehovah ya? Gbau! Enẹwutu, ayajẹnu wẹ e yin na omẹ Jiwheyẹwhe tọn lẹpo nado yọnẹn dọ jọja susu he nọ sẹ̀n Jiwheyẹwhe lẹdo aihọn pé lẹ nọ hẹn tudohomẹnamẹ Paulu tọn do ayiha mẹ dọmọ: “Mì gbọ mí ni nọ lẹn ode awetọ tọn pọ́n nado nọ whàn mídelẹ hlan owanyi po azọ́n dagbe lẹ po kọ̀n, e ma yin nado nọ gbẹkọ pipli dopọ mítọn lẹ go, dile mẹdelẹ tindo aṣa lọ do gba, ṣigba nado nọ na tuli ode awetọ, podọ humọ dile mì mọdọ azán lọ to dindọnsẹpọ.” (Heb. 10:24, 25) Humọ, susu ovi lẹ tọn wẹ nọ lá wẹndagbe Ahọluduta Jiwheyẹwhe tọn to pọmẹ hẹ mẹjitọ yetọn lẹ. (Mat. 24:14) Podọ taidi dohia owanyi ahundopo tọn yetọn na Jehovah, fọtọ́n susu jọja lẹ tọn wẹ nọ ze yede jo nado yí baptẹm to whemẹwhemẹ bo nọ duvivi dona he nọ wá sọn devi Klisti tọn yinyin mẹ lẹ tọn.—Mat. 16:24; Malku 10:29, 30.
Kẹalọyi Oylọ-Basinamẹ lọ Todin
4. Whetẹnu wẹ jọja lẹ sọgan kẹalọyi oylọ-basinamẹ Jiwheyẹwhe tọn nado sẹ̀n ẹn?
4 Yẹwhehodọtọ 12:1 dọmọ: “Flin Mẹdatọ towe to azán ovu whenu towe tọn.” Owhe nẹmu wẹ mì jọja lẹ dona tindo whẹpo do sọgan kẹalọyi oylọ-basinamẹ zohunhunnọ enẹ nado sẹ̀n Jehovah bo wadevizọn na ẹn? Biblu ma dọ owhe de gba. Enẹwutu, ma dọ̀n yonu do godo po linlẹn lọ po dọ a whè gbau nado setonuna Jehovah bo sẹ̀n ẹn blo. Mahopọnna owhe depope he a tindo, hiẹ yin tulina nado kẹalọyi oylọ-basinamẹ lọ to niyaniya mẹ.
5. Nawẹ mẹjitọ lẹ sọgan gọalọna ovi yetọn lẹ nado yinukọn to gbigbọ-liho gbọn?
5 Susu mìtọn wẹ dopo to mẹjitọ mìtọn lẹ mẹ kavi yé omẹ awe lẹpo ko gọalọna nado yinukọn to gbigbọ-liho. Gbọnmọ dali, mì taidi Timoti hohowhenu tọn. To whenue e gbẹ́ pò to ovu, onọ̀ etọn Euniki po onọ̀-daho etọn Loisi po plọn ẹn kandai wiwe lẹ. (2 Tim. 3:14, 15) Vlavo mẹjitọ mìtọn lẹ nọ plọn mì to aliho mọnkọtọn mẹ bo nọ plọn Biblu hẹ mì, hodẹ̀ hẹ mì, plan mì yì opli agun tọn lẹ po plidopọ omẹ Jiwheyẹwhe tọn lẹ tọn po ji bosọ nọ tindo mahẹ to lizọnyizọn lọ mẹ hẹ mì. Na nugbo tọn, azọngban nujọnu tọn de wẹ mẹjitọ mìtọn lẹ mọyi sọn Jehovah dè tlọlọ nado nọ plọn mì aliho etọn lẹ. Be mì yọ́n pinpẹn owanyi po mẹtọnhopọn he yé nọ dohia mì po tọn ya?—Howh. 23:22.
6. (a) Sọgbe hẹ Psalm 110:3, sinsẹ̀n-bibasi wunmẹ tẹwẹ nọ hẹn homẹ hùn Jehovah? (b) Etẹwẹ mí na gbadopọnna todin?
6 Ṣigba dile mì jọja lẹ to whinwhẹ́n, Jehovah jlo dọ mì ni ‘mọdona ojlo etọn he yọ́n, bo yin alọkẹyi bosọ yin pipé lọ,’ kẹdẹdile Timoti wà do. (Lom. 12:2) Eyin mì wàmọ, mì na tindo mahẹ to nuwiwa agun tọn lẹ mẹ, e ma yin na mẹjitọ mìtọn lẹ jlo dọ mì ni wàmọ wẹ gba, ṣigba na mì jlo na wà ojlo Jiwheyẹwhe tọn wutu wẹ. Eyin mì sẹ̀n Jehovah sọn ojlo mẹ wá, e na hẹn homẹ etọn hùn. (Ps. 110:3) To whelọnu lo, nawẹ mì sọgan dohia dọ mì jlo na hẹn ojlo mìtọn nado setonuna Jehovah bo hodo anademẹ etọn lẹ sinyẹn deji gbọn? Mì gbọ mí ni gbadopọnna aliho titengbe atọ̀n he mẹ mì sọgan wàmọ te lẹ. Yé bẹ nupinplọn, odẹ̀, po walọyizan po hẹn. Mì gbọ mí ni gbadopọnna yé debọdo-dego.
Yọ́n Jehovah Taidi Omẹ Nujọnu Tọn De
7. Nawẹ Jesu ze apajlẹ dai gando Biblu pinplọn go gbọn, podọ etẹwẹ gọalọna ẹn nado wàmọ?
7 Biblu hihia egbesọegbesọ wẹ aliho tintan he mẹ mì sọgan dohia te dọ mì jlo na hẹn ojlo mìtọn nado sẹ̀n Jehovah sinyẹn deji. Mì sọgan hẹn pekọwana nuhudo gbigbọmẹ tọn mìtọn bo tindo oyọnẹn họakuẹ Biblu tọn eyin mì nọ hia Ohó Jiwheyẹwhe tọn to gbesisọ mẹ. (Mat. 5:3) Jesu ze apajlẹ enẹ dai. To whenuena e tindo owhe 12, mẹjitọ etọn lẹ mọ ẹn to tẹmpli mẹ to gbèdopo ‘bọ e to aisinsin to mẹplọntọ lẹ ṣẹnṣẹn bo to todoaina yé bosọ to ohó kanse yé.’ (Luku 2:44-46) Sọn ovu gbọ́n wẹ Jesu ko wleawuna ojlo vẹkuvẹku na Owe-wiwe podọ nado mọnukunnujẹemẹ. Etẹwẹ gọalọna ẹn nado wàmọ? Matin ayihaawe Onọ̀ etọn Malia, po otọ́ mẹgopọntọ etọn, Josẹfu po wẹ yí adà titengbe de wà. Na yé yin devizọnwatọ Jiwheyẹwhe tọn wutu, yé plọnnu Jesu gando Jiwheyẹwhe go sọn ovu whenu etọn gbọ́n.—Mat. 1:18-20; Luku 2:41, 51.
8. (a) Whetẹnu wẹ e jẹ dọ mẹjitọ lẹ ni jẹ owanyi na Ohó Jiwheyẹwhe tọn dó do ahun mẹ na ovi yetọn lẹ ji? (b) Dọ numimọ de he dohia dọ nujọnu wẹ e yin nado plọn ovi lẹ sọn ovu whenu.
8 Mọdopolọ to egbehe, mẹjitọ he nọ dibusi Jiwheyẹwhe lẹ yọnẹn dọ nujọnu wẹ e yin nado dó ojlo nugbo Biblu tọn do ahun ovi yetọn lẹ tọn mẹ sọn ovu whenu. (Deut. 6:6-9) Nuhe mẹmẹyọnnu de he nọ yin Rubi wà tlolo he e ji visunnu etọn tintan, Joseph niyẹn. Egbesọegbesọ wẹ e nọ hia Owe Ṣie heyin Otan Biblu Tọn na ẹn. Dile ovi lọ to whinwhẹ́n, e gọalọna ẹn nado hẹn wefọ susu do tamẹ. Be Joseph mọaleyi sọn mẹpinplọn mọnkọtọn mẹ ya? Tlolo he e yọ́n hodọ godo, e penugo nado pìntàn Biblu tọn susu to hogbe etọn titi lẹ mẹ. Podọ to whenue e tindo owhe atọ́n, e wazọ́n etọn tintan to Wehọmẹ Lizọnyizọn Yẹwhehọluduta tọn mẹ.
9. Naegbọn Biblu hihia po ayihamẹlinlẹnpọn do nuhe a hia lẹ ji po do yin nujọnu?
9 Nado zindonukọn to gbigbọ-liho, mì jọja lẹ dona hẹn ẹn zun aṣa nado nọ hia Biblu egbesọegbesọ to owhe aflanmẹ tọn mìtọn lẹpo gblamẹ kaka biọ mẹhowhe mẹ. (Ps. 71:17) Nawẹ Biblu hihia na gọalọna mì nado yinukọn to gbigbọ-liho gbọn? Doayi nuhe Jesu dọ to odẹ̀ mẹ hlan Otọ́ etọn go dọmọ: “Ehe wẹ ogbẹ̀ madopodo, dọ yé ni to vivẹnudo zọnmii nado yọ́n hiẹ Jiwheyẹwhe nugbo dopo kẹdẹ lọ.” (Joh. 17:3) Na nugbo tọn, dile mì to tintẹnpọn nado yọ́n Jehovah dogọ do, mọ wẹ mì na mọ ẹn hezeheze taidi Omẹ nujọnu tọn de do niyẹn podọ owanyi he mì tindo na ẹn na sinyẹn deji. (Heb. 11:27) Enẹwutu, whedepopenu he hiẹ to adà Biblu tọn de hia, yí dotẹnmẹ hundote enẹ zan nado plọnnu gando Jehovah go dogọ. Kanse dewe dọ: ‘Etẹwẹ Kandai ehe plọn mi gando Jehovah go? Nawẹ adà Biblu tọn ehe do owanyi po mẹtọnhopọn he Jiwheyẹwhe tindo na mi po hia gbọn?’ Whenu yiyizan nado lẹnayihamẹpọn do kanbiọ mọnkọtọn lẹ ji na gọalọna we nado yọ́n linlẹn po numọtolanmẹ Jehovah tọn lẹ po gọna nubiọtomẹsi etọn lẹ. (Hia Howhinwhẹn lẹ 2:1-5.) Taidi jọja Timoti, hiẹ na “yin linlẹndiọna nado yise” to nuhe a plọn sọn Owe-wiwe mẹ lẹ mẹ, podọ e na whàn we nado sẹ̀n Jehovah sọn ojlo mẹ wá.—2 Tim. 3:14.
Lehe Odẹ̀ Nọ Gọalọ Nado Hẹn Owanyi Towe Na Jehovah Sinyẹn Deji Do
10, 11. Nawẹ odẹ̀ na gọalọna we nado hẹn ojlo towe nado sẹ̀n Jiwheyẹwhe sinyẹn deji gbọn?
10 Dẹ̀hiho wẹ aliho awetọ he mẹ mì sọgan hẹn ojlo mìtọn nado sẹ̀n Jehovah po ahun lẹpo po sinyẹn deji te. Mí hia to Psalm 65:2 mẹ dọmọ: “Hiẹ he nọ sè odẹ̀, dè we wẹ gbẹtọ lẹpo ja.” Etlẹ yin to whenue Islaelivi lẹ yin omẹ dide Jiwheyẹwhe tọn, jonọ he wá tẹmpli Jehovah tọn mẹ lẹ sọgan dọnsẹpọ ẹ to odẹ̀ mẹ. (1 Ahọ. 8:41, 42) Jiwheyẹwhe ma nọ hò mẹnukuntapọn gba. Mẹhe nọ yìn gbedide etọn lẹ tindo jide dọ ewọ na sè odẹ̀ yetọn. (Howh. 15:8) Na jide tọn, hogbe lọ “gbẹtọ lẹpo” bẹ mì jọja lẹ hẹn ga.
11 Mìlọsu yọnẹn dọ hodọdopọ dagbe wẹ nọ hẹn họntọnjiji nujọnu tọn yọnbasi. Vlavo hiẹ yiwanna nado nọ dọ linlẹn, ahunmẹdunamẹnu, po numọtolanmẹ towe lẹ po na họntọn vivẹ de. Mọdopolọ, odẹ̀ ahundopo tọn lẹ hihò nọ dohia dọ a to hodọdopọ hẹ Mẹdatọ Daho towe. (Flp. 4:6, 7) Nọ dọ nuhe to ahunmẹduna we lẹ na Jehovah dile a na dọna mẹjitọ owanyinọ de kavi họntọn vivẹ de do. Na nugbo tọn, kanṣiṣa pẹkipẹki de tin to odẹ̀ towe po numọtolanmẹ towe na Jehovah po ṣẹnṣẹn. Hiẹ na mọdọ dile haṣinṣan towe hẹ Jehovah to sinsinyẹn deji sọ, mọ wẹ odẹ̀ towe lẹ na tindo zẹẹmẹ dogọ do niyẹn.
12. (a) Naegbọn odẹ̀ he tindo zẹẹmẹ lẹ hihò bẹ nususu hẹn hugan hodidọ poun? (b) Etẹwẹ na gọalọna we nado wá yọnẹn dọ Jehovah ma dẹn do we?
12 Ṣigba hẹn do ayiha mẹ dọ odẹ̀ he tindo zẹẹmẹ de hihò bẹ nususu hẹn hugan hodidọ poun. E sọ bẹ numọtolanmẹ sisosiso towe lẹ hẹn. Nọ do owanyi ahundopo tọn, sisi sisosiso, po jide mlẹnmlẹn he a tindo to Jehovah mẹ po hia to odẹ̀ towe lẹ mẹ. Dile hiẹ to ayido lehe Jehovah nọ na gblọndo odẹ̀ towe lẹ do go, a na wá yọnẹn hezeheze dọ “OKLUNỌ ma dẹn do yé he to awhádo ylọ ẹ lẹ” gba. (Ps. 145:18) Mọwẹ, Jehovah na dọnsẹpọ we bosọ na we huhlọn nado diọnukunsọ Lẹgba podọ nado basi nudide he sọgbe lẹ to gbẹ̀mẹ.—Hia Jakọbu 4:7, 8.
13. (a) Nawẹ họntọnjiji hẹ Jiwheyẹwhe gọalọna mẹmẹyọnnu de gbọn? (b) Nawẹ họntọnjiji hẹ Jiwheyẹwhe na gọalọna we nado duto kọgbidinamẹ hagbẹ tọn ji gbọn?
13 Lẹnnupọndo lehe haṣinṣan pẹkipẹki tintindo hẹ Jehovah na huhlọn Cherie do ji. To whenuena e tin to wehọmẹ daho, e mọ nunina lẹ yí na e wazọ́n ganji to wehọmẹ bosọ wà dagbe to aihundida lanmẹyiya tọn mẹ wutu. To whenuena e fó wehọmẹ, e mọ gbedewema de yí he na hẹn ẹn penugo nado doafọna wepinplọn dahodaho lẹ vọnu. Cherie dọ dọ, “Nuzedonukọnnamẹ lọ dọnmẹdogo podọ mẹplọntọ aihundida lanmẹyiya tọn lẹ po wehọmẹvigbẹ́ lẹ po gbidikọna mi taun nado kẹalọyi i.” Ṣigba, e mọdọ afọdidona wepinplọn yinukọn dogọ na biọ whenu susu to e si nado nọ plọnnu bo wleawudaina aihundida lanmẹyiya tọn voovo lẹ—bọ whenu vude janwẹ na pò na ẹn nado sẹ̀n Jehovah. Etẹwẹ Cherie wà? E dọmọ: “To whenue n’hodẹ̀ hlan Jehovah godo, n’gbẹ́ nunina lọ dai bo bẹ sinsẹ̀nzọn gbehosọnalitọ whepoponu tọn jẹeji.” E ko yì owhe atọ́n todin he e to sinsẹ̀n taidi gbehosọnalitọ. E dọmọ: “Nudepope ma vẹna mi gba. N’tindo ayajẹ na n’yọnẹn dọ nudide ṣie hẹn homẹ Jehovah tọn hùn. Na nugbo tọn, eyin a ze Ahọluduta Jiwheyẹwhe tọn do otẹn tintan mẹ, onú devo lẹpo wẹ na yin yiyidogọ na we.”—Mat. 6:33.
Walọ Dagbe Towe Na Dohia Dọ Hiẹ Tindo “Ayiha Wiwe”
14. Naegbọn walọ dagbe towe yin nujọnu to nukun Jehovah tọn mẹ?
14 Walọ towe wẹ yin aliho atọ̀ntọ he mẹ hiẹ sọgan dohia te dọ a to Jehovah sẹ̀n sọn ojlo mẹ wá. Jehovah nọ dona jọja he gbọṣi wiwe ji to walọyizan-liho lẹ. (Hia Psalm 24:3-5.) Jọja Samuẹli gbẹ́ nado hodo apajlẹ walọ ylankan ovi Yẹwhenọ Daho Eli tọn lẹ tọn. Gbẹtọ lẹ doayi walọ dagbe Samuẹli tọn go. Kandai Biblu tọn dọmọ: “Ovi lọ Samuẹli sọ to whinwhẹ́n, bosọ tin to nukundagbe mẹ to OKLUNỌ dè podọ to gbẹtọ lẹ dè ga.”—1 Sam. 2:26.
15. Etẹwẹ yin delẹ to whẹwhinwhẹ́n he wutu hiẹ nọ hẹn walọ dagbe go lẹ mẹ?
15 Mí to gbẹnọ to aihọn de mẹ he bẹ gbẹtọ wanyina mẹdetiti tọ́, saklanọ, tolivẹtọ do mẹjitọ go, mayọndagbenọ, nugbomadọtọ, kanylantọ, mẹhe nọ gbọn kikla dali yigo, wanyina gbẹdudu tọ́ kakati nido yin wanyina Jiwheyẹwhe tọ́ lẹ hẹn—ehelẹ yin vude poun to jijọ he Paulu donù e go lẹ mẹ. (2 Tim. 3:1-5) Enẹwutu, e sọgan vẹawuna we nado hẹn walọ dagbe go to aihọn ylankan ehe mẹ. Etomọṣo, whedepopenu he a wà nuhe sọgbe bo gbẹ́ nado tindo mahẹ to walọ ylankan mẹ, hiẹ na dohia dọ a tin to adà Jehovah tọn mẹ to whẹho nupojipetọ-yinyin wẹkẹ tọn lọ mẹ. (Job 2:3, 4) Hiẹ nasọ tindo pekọ na a yọnẹn dọ a to nuyiwa sọgbe hẹ tudohomẹnamẹ owanyinọ Jehovah tọn dọmọ: “Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi.” (Howh. 27:11) Humọ, yinyọnẹn dọ a tindo nukundagbe Jehovah tọn na hẹn ojlo towe sinyẹn deji nado sẹ̀n ẹn.
16. Nawẹ mẹmẹyọnnu de hẹn homẹ Jehovah tọn hùn gbọn?
16 Mẹmẹyọnnu de he nọ yin Carol tẹdo nunọwhinnusẹ́n Biblu tọn lẹ go to whenue e gbẹ́ pò to aflanmẹ bo to wehọmẹ yì, podọ ehe hẹn gbẹtọ lẹ nado doayi walọ dagbe etọn go. Etẹwẹ jọ? Carol pehẹ mẹṣanko sọn klasigbẹ́ etọn lẹ dè na ayihadawhẹnamẹnu etọn he yin pinplọn gbọn Biblu dali ma na ẹn dotẹnmẹ nado tindo mahẹ to hùnwhẹ whedudu tọn lẹ po nuyiwa owanyi na akọta mẹtọn tọn lẹ po mẹ wutu. To nujijọ enẹlẹ whenu, e nọ mọ dotẹnmẹ hundote to whedelẹnu nado basi zẹẹmẹ nuyise etọn lẹ tọn na mẹdevo lẹ. To owhe susu godo, Carol mọ wekanhlanmẹ de yí sọn klasigbẹ́ etọn dai tọn de dè, mẹhe wlan dọmọ: “N’ko to dindin nado mọ we bo dọnudo we. Mẹsusu wẹ doayi walọ dagbe po apajlẹ dagbe he a zedai taidi jọja Klistiani de go gọna teninọ adọgbigbo tọn he a ze gando hùnwhẹ whedudu tọn lẹ go. Hiẹ wẹ Kunnudetọ Jehovah tọn tintan he n’dukosọ hẹ.” Apajlẹ Carol tọn yinuwa do klasigbẹ́ etọn ji sisosiso sọmọ bọ e wá jẹ Biblu plọn ji to nukọn mẹ. E dọ to owe he e kàn hlan Carol mẹ dọ e ko hugan owhe 40 he emi yí baptẹm bo lẹzun Kunnudetọ! Taidi Carol, mì jọja he nọ yí adọgbigbo do tẹdo nunọwhinnusẹ́n Biblu tọn go to egbehe lẹ sọgan whàn ahunjijlọnọ lẹ nado wá yọ́n Jehovah.
Jọja lẹ Nọ Pà Jehovah
17, 18. (a) Etẹwẹ nọ yin numọtolanmẹ towe gando jọja he tin to agun mìtọn mẹ lẹ go? (b) Sọgodo tẹwẹ to tepọn jọja he nọ dibusi Jiwheyẹwhe lẹ?
17 Mí mẹhe tin to titobasinanu Jehovah tọn mẹ lẹdo aihọn pé lẹpo wẹ nọ jaya nado mọ fọtọ́n susu jọja zohunhunnọ he to mahẹ tindo to sinsẹ̀n-bibasi nugbo mẹ lẹ tọn! Jọja ehelẹ nọ hẹn ojlo yetọn nado sẹ̀n Jehovah sinyẹn deji gbọn Biblu hihia, dẹ̀hiho, po nuyiwa to kọndopọ mẹ hẹ ojlo Jiwheyẹwhe tọn po dali. Jọja apajlẹ dagbenọ mọnkọtọn lẹ nọ hẹn ayajẹ wá na mẹjitọ yetọn lẹ po omẹ Jehovah tọn lẹpo po.—Howh. 23:24, 25.
18 To sọgodo, jọja nugbonọ lẹ na tin to mẹhe na luntọ́n biọ aihọn yọyọ dopagbe Jiwheyẹwhe tọn mẹ lẹ mẹ. (Osọ. 7:9, 14) To finẹ, yé na duvivi dona susu lẹ tọn dile yé na to pinpẹn-nutọn-yinyọnẹn dohia Jehovah zọnmii, bo nasọ penugo nado to pipà ẹ kakadoi.—Ps. 148:12, 13.
Be Hiẹ Sọgan Na Gblọndo Ya?
• Nawẹ jọja lẹ sọgan tindo mahẹ to sinsẹ̀n-bibasi nugbo mẹ to egbehe gbọn?
• Naegbọn ayihamẹlinlẹnpọn do yin dandannu, eyin hiẹ na mọaleyi sọn Biblu hihia mẹ?
• Nawẹ odẹ̀ sọgan gọalọna we nado dọnsẹpọ Jehovah gbọn?
• Kọdetọn tẹwẹ walọ dagbe Klistiani tọn sọgan hẹnwa?
[Yẹdide to weda 5]
Be a yí Biblu hihia egbesọegbesọ do do aṣa ya?