Jehovah—Jiwheyẹwhe de He Nọ De Aṣli lẹ hia
“Jiwheyẹwhe de tin to olọn mẹ he nọ de aṣli lẹ hia.”—DANIẸLI 2:28.
1, 2. (a) Nawẹ Jehovah gbọnvona Kẹntọ daho etọn gbọn? (b) Nawẹ gbẹtọvi lẹ do vogbingbọn ehe hia gbọn?
JEHOVAH, Jiwheyẹwhe owanyinọ nupojipetọ wẹkẹ lọ tọn, Mẹdatọ dopo akàn lọ, yin Jiwheyẹwhe nuyọnẹn po whẹdida dodo po tọn. Ewọ ma tindo nuhudo nado ze nuhe e yin, azọ́n etọn lẹ, kavi lẹndai etọn lẹ whlá gba. To ojlẹ etọn mẹ podọ to nuyọnẹn etọn titi mẹ, e nọ do ede hia. To aliho ehe mẹ e gbọnvona Kẹntọ etọn, Satani Lẹgba, mẹhe nọ tẹnpọn nado ze nuhe e yin po linlẹn etọn lẹ po whlá.
2 Yèdọ dile Jehovah po Satani po gbọnvo do, mọdopolọ wẹ sinsẹ̀n-basitọ yetọn lẹ ga. Mẹhe nọ hodo anademẹ Satani tọn lẹ yin hiadogona gbọn mẹhodu po oklọ po dali. Yé nọ tẹnpọn nado do yede hia taidi mẹjọmẹ, to whenuena yé to azọ́n zinvlu tọn lẹ wà. Klistiani Kọlinti tọn lẹ yin didọna ma nado yin pipaṣa dogbọn nugbo ehe lọ dali gba. “Na apọsteli lalonọ wẹ omẹ mọntọnnkọ lẹ, azọ́nwatọ oklọnọ, he nọ diọadana yede biọ apọsteli Klisti tọn lẹ mẹ. E ma sọ yin nujiawu de; na Satani lọsu nọ diọadazun angẹli hinhọ́n tọn.” (2 Kọlintinu lẹ 11:13, 14) To alọ devo mẹ, Klistiani lẹ nọ ganjẹ Klisti go taidi Nukọntọ yetọn. To whenuena e tin to aigba ji e do gbẹtọ-yinyin Otọ́ etọn tọn hia to aliho pipé mẹ, yèdọ Jehovah Jiwheyẹwhe. (Heblu lẹ 1:1-3) Enẹwutu, gbọn hihodo Klisti dali, Klistiani lẹ to hihodo apajlẹ Jehovah tọn, Jiwheyẹwhe nugbo, he do ede hia, podọ hinhọ́n tọn. Yé lọsu ma tindo nuhudo nado ze nuhe yé yin whlá, yèdọ azọ́n yetọn lẹ, kavi lẹndai yetọn lẹ gba.—Efesunu lẹ 4:17-19; 5:1, 2.
3. Nawẹ mí sọgan gbẹ́ whẹsadokọnamẹ lọ dai dọ mẹhe lẹzun Kunnudetọ Jehovah Tọn lẹ yin hinhẹn po huhlọn po nado kọnawudopọ hẹ “hagbẹ klandovo nuglọ tọn de” nado yin lalo gbọn?
3 To ojlẹ he e yọnẹn nado sọgbe hugan mẹ, Jehovah nọ hẹn lẹndai etọn lẹ dogbọn sọgodo he to dai ma ko yin yinyọnẹn podọ dogbọn gbẹtọvi lẹ dali zun yinyọnẹn to gigọ́ mẹ. To pọndohlan ehe mẹ Jiwheyẹwhe he nọ dè aṣli lẹ hia de wẹ ewọ yin. Enẹwutu, mẹhe jlo nado sẹ̀n ẹn lẹ yin oylọ basina—mọwẹ yin tudohomẹna—nado plọ́n nudọnamẹ he yin didehia mọnkọtọn lẹ. Dodinnanu hugan 145 000 Kunnudetọ lẹ tọn to dopo to otò Europe tọn lẹ mẹ to 1994 dohia dọ, to madozẹnzẹn mẹ, dopodopo yetọn na yedetiti dindona nuplọnmẹ Kunnudetọ Jehovah Tọn lẹ tọn na owhe atọ̀n lẹ jẹnukọnna dide bibasi nado lẹzun Kunnudetọ de. Yé basi nudide lọ sọgbe hẹ ojlo mẹdekannujẹ tọn mẹdetiti tọn matin huhlọn yido hẹnmẹ basi. Podọ yé zindonukọn nado tindo mẹdekannujẹ ojlo tọn po nuyiwa tọn po. Di apajlẹ, na omẹ vude lẹ wá jẹagọdo nujinọtedo walọ dagbe Klistiani tọn lẹ wutu, omẹ ehelẹ to godo mẹ basi dide dọ yé ma jlo nado to nukọnzindo taidi Kunnudetọ lẹ ba. Nalete, eyin awuvivinu, dọ to owhe atọ́n he wayi lẹ gblamẹ, adà daho Kunnudetọ dai tọn lẹ ze afọdide lẹ nado vọ́ gbẹdido po nuwiwa taidi Kunnudetọ lẹ po bẹjẹeji.
4. Etẹwẹ ma dona dotukla Klistiani nugbo lẹ, podọ etẹwutu?
4 Na nugbo tọn, e mayin Kunnudetọ dai tọn lẹpo wẹ lẹkọ gba, podọ to yé mẹ wẹ mẹhe ko tindo otẹn azọngban tọn lẹ to gblagbla agun Klistiani tọn mẹ tin te. Ehe ma dona yin nupaṣamẹ, na yèdọ etlẹ yin dopo to hodotọ sẹpọmẹ Jesu tọn lẹ mẹ, apọsteli Juda, joagọyi godo. (Matiu 26:14-16, 20-25) Ṣigba be whẹwhinwhẹ́n de wẹ ehe yin nado tindo ayihaawe dogbọn sinsẹ̀n Klistiani tọn lọsu go ya? Be ehe hẹn kọdetọn dagbe he Kunnudetọ Jehovah Tọn lẹ nọ tindo to nuwiwa mẹpinplọn yetọn tọn mẹ zùn ovọ́ wẹ ya? Paali, dile walọyizan mẹdehia Juda Iskaliọti lọsu tọn ma hẹnalọdotena lẹndai Jiwheyẹwhe tọn lẹ do.
Ganhunupotọ Ṣogan Owanyinọ
5. Nawẹ mí yọnẹn gbọn dọ Jehovah po Jesu po yiwanna gbẹtọvi lẹ, podọ nawẹ yé ko basi dohia owanyi ehe tọn gbọn?
5 Jehovah yin Jiwheyẹwhe owanyi tọn de. E nọ hò gbẹtọ lẹ tọn pọ́n. (1 Johanu 4:7-11) Mahopọnna otẹn yiaga etọn, e nọ duvivi yíyí gbẹtọvi lẹ do basi họntọn etọn lẹ tọn. Mí hia gando dopo to devi hohowhenu etọn lẹ tọn go dọmọ: “Ablaham yí Jiwheyẹwhe se, yè sọ hia ẹ hlan ẹn na dodo: yé sọ ylọ ẹ dọ Họntọn Jiwheyẹwhe tọn.” (Jakobu 2:23; 2 Otannugbo lẹ 20:7; Isaia 41:8) Dile họntọn-họntọn lẹ nọ má whẹho nuglọ tọn lẹ, kavi aṣli lẹ, mọdopolọ wẹ Jehovah nọ basi do po họntọn etọn lẹ po. To pọndohlan ehe mẹ Jesu hodo apajlẹ Otọ́ etọn tọn, na e jì họntọn hẹ devi etọn lẹ bo má aṣli lẹ po yé po. “Sọn dinvie yẹn ma ylọ mì afanumẹ lẹ ba;” wẹ e dọ na yé, “na afanumẹ ma yọ́n onú he oklunọ etọn to wiwà: ṣigba yẹn ylọ mì họntọn, na onú he yẹn ko se sọn Otọ́ ṣie de lẹpo, yẹn ko hẹn zùn yinyọnẹn hlan mì.” (Johanu 15:15) Nudọnamẹ nuglọ tọn, kavi “aṣli lẹ,” he yin tintindo dopọ gbọn Jehovah, Visunnu etọn, po họntọn yetọn lẹ po dali nọ kọ̀n yé dopọ to kanṣiṣa owanyi po mẹdezejo he ma yọ́n klan tọn de po mẹ.—Kọlọsinu lẹ 3:14.
6. Naegbọn Jehovah ma do tindo nuhudo nado ze linlẹn etọn lẹ whlá?
6 Zẹẹmẹ yinkọ lọ tọn Jehovah, “E Hẹn Nado Lẹzun,” do nugopipe etọn hia nado lẹzun nudepope he e jlo nado lẹzun nado sọgan dotana lẹndai etọn. To vogbingbọn mẹ na gbẹtọvi lẹ, Jehovah ma tindo nuhudo nado ze linlẹn etọn lẹ whlá na obu lọ dọ mẹdevo lẹ sọgan penugo nado hẹnalọdotena ẹn sọn hinhẹn yé dì mẹ gba. Ewọ na taun tọn ma sọgan gboawupo gba, enẹwutu e dehia to gbangba to Ohó etọn, yèdọ Biblu lọ mẹ, suhugan nuhe e ko tindo lẹndai etọn nado wà. E dopagbe dọmọ: “Ohó ṣie . . . ma na lẹgọ wá dee agba, ṣigba e na dotana onú he yẹn jlo, e na wadagbe to onú he mẹ yẹn do e hlan te.”—Isaia 55:11.
7. (a) Etẹwẹ Jehovah dọ dọdai etọn to Edẹni mẹ, podọ nawẹ Satani do Jiwheyẹwhe hia nado yin nugbonọ gbọn? (b) Nawẹ nunọwhinnusẹ́n lọ to 2 Kọlintinu lẹ 13:8 nọ yin nugbo to whepoponu gbọn?
7 Tlolo to atẹṣiṣi Edẹni tọn mẹ godo, Jehovah dehia to aliho debọdo-dego tọn mẹ kọdetọn godo tọn heyin nudindọn he to yìyì to ewọ po Kẹntọ etọn, Satani po ṣẹnṣẹn. Okún dopagbe Jiwheyẹwhe tọn na yin afọgbẹn só na vivẹ́, ṣigba ma na yin hùhù gba, whenuena Satani na jiya ota sónamẹ okú tọn to godo mẹ. (Gẹnẹsisi 3:15) To owhe 33 W.M., Lẹgba na nugbo tọn gbleawuna Okún lọ, yèdọ Jesu Klisti, gbọn hinhẹn okú etọn wá dali. To aliho ehe mẹ, Satani hẹn Owe wiwe di podọ do Jehovah hia to ojlẹ dopolọ mẹ nado yin Jiwheyẹwhe nugbonọ, dile etlẹ yindọ ehe ma yin linlẹn Satani tọn. Wangbẹna etọn na nugbo po dodowiwa po, to pọmẹ po goyiyi, walọyizan lẹnvọjọ matindo tọn etọn po, plan ẹn biọ wiwà nuhe Jehovah ko dọ dọdai dọ ewọ na basi lọ pẹpẹ mẹ. Mọwẹ, na agọjẹdo nugbo tọ lẹpo, yèdọ na Satani lọsu, nunọwhinnusẹ́n lọ yin nugbo he dọmọ: “Na míwlẹ ma sọgan wà nude do nugbo go, adavo na nugbo.”—2 Kọlintinu lẹ 13:8.
8, 9. (a) Etẹwẹ Satani yọnẹn, ṣigba be oyọnẹn ehe yin owùnu de na hẹndi lẹndai Jehovah tọn lẹ wẹ ya? (b) Avase họnwun tẹwẹ agọjẹdo Jehovah tọ lẹ gbẹkọ e go, podọ etẹwutu?
8 Sọn whenu he Ahọluduta Jiwheyẹwhe Tọn ko yin zizedai to aliho mayọnmọ mẹ to 1914 gbọ́n, Osọhia 12:12 ko yin hinhẹndi: “Enẹwutu mì to ayajẹ, mì olọn lẹ emi, po mì he nọnọ yé mẹ lẹ po. Dindọn hlan aihọnmẹnu lẹ, podọ hlan yé he tin to ohù mẹ lẹ, na Lẹgba lọ ko jẹte wá mì dè, po homẹgble daho po wutu, na e yọnẹn dọ whenugli de wẹ e tindo.” Etomọṣo, be oyọnẹn lọ dọ ojlẹ etọn ko whègli hẹn Satani nado diọ aliho nuyiwa etọn tọn ya? Enẹ na yin gbeyiyi to adà Satani tọn mẹ dọ Jehovah yin Jiwheyẹwhe nugbonọ podọ taidi Gandutọ Nupojipetọ lọ, ewọ kẹdẹ wẹ jẹ nado yin sinsẹ̀n-basina. Nalete, Lẹgba ma to jijlo nado yigbe awhànṣíṣí tọn gba, dile etlẹ yindọ e yọ́n nugbo ehelẹ.
9 Jehovah dohia nuhe na jọ to whenuena Klisti wá nado hẹn whẹdida ṣẹ do titonu aihọn Satani tọn ji to gbangba. (Matiu 24:29-31; 25:31-46) To pọndohlan ehe tọn mẹ, Ohó etọn lá gando aṣẹpatọ aihọn tọn lẹ go dọmọ: “Na whenuena yé to didọmọ, Jijọho po gingán po; whenẹnu wẹ dindọn ajiji wá ota yetọn, kẹdẹdi ajlù to yọnnu he mọho ji.” (1 Tẹsalonikanu lẹ 5:3) Mẹhe hodo anademẹ Satani tọn lẹ gbẹkọ avase họnwun ehe go. Yé yin nukuntọ́nna na ahún ylankan yetọn lẹ tọn wutu, podọ ehe glọnalina yé sọn linlẹnvọjọ sọn aliho ylankan yetọn mẹ podọ sọn didiọ tito po ayihakinkan yetọn lẹ po he to tintẹnpọn nado jẹagọdo lẹndai Jehovah tọn lẹ.
10. (a) Jẹ obá tẹ mẹ wẹ 1 Tẹsalonikanu lẹ 5:3 ko tindo hẹndi jẹ, ṣigba nawẹ omẹ Jehovah tọn lẹ dona yinuwa gbọn? (b) Naegbọn mẹhe ma tindo yise lẹ na to nukundiọsọmẹtọ yin to sọgodo to agọjẹdo omẹ Jiwheyẹwhe tọn lẹ mẹ?
10 Titengbe sọn 1986, whenuena Owhe Jijọho Akọjọpli Tọn yin lila gbọn Plidopọ Akọta lẹ tọn dali, aihọn lọ ko gọ́ na hodidọ dogbọn jijọho po gingán po dali. Afọdide tangan lẹ ko yin zize to vivẹnudido mẹ nado hẹn jijọho aihọn tọn wá, podọ ehe ko tindo kọdetọn dagbe delẹ. Be ehe wẹ yin hẹndi dọdai ehe tọn lẹpo, kavi be mí na donukun nulila paṣamẹ mọnkọtọn de to sọgodo wẹ ya? Jehovah na hẹn whẹho enẹ họnwun to ojlẹ sisọ etọn mẹ. Enẹwutu, mì gbọ mí ni gbọṣi nukle to gbigbọmẹ, “na mí ni to nukundo, bosọ to mizọnmizọnji hlan wiwá azán Jiwheyẹwhe tọn tọn.” (2 Pita 3:12) Dile ojlẹ lẹ to jujuyi zọnmii po hodidọ jijọho po gingán tọn lẹ po, dopodopo mẹhe yọnẹn dogbọn avase ehe dali, ṣigba he de nado gbẹkọ e go lẹ, sọgan lẹzun avunnukundiọsọmẹtọ hugan to linlẹn mẹ dọ Jehovah ma to na, kavi ma sọgan, hẹn ohó etọn di gba. (Yijlẹdo Yẹwhehodọtọ 8:11-13; 2 Pita 3:3, 4 go.) Ṣigba Klistiani nugbo lẹ yọnẹn dọ Jehovah na hẹn lẹndai etọn lẹ di!
Sisi he Jẹ na Nuyizan he Jehovah nọ Yizan Lẹ
11. Etẹwẹ Daniẹli po Josẹfu po plọ́n dogbọn Jehovah dali?
11 To whenuena Nẹbukadnẹzali, togan yọyọ Ahọluigba Babilọni tọn, kú odlọ tukladomẹ tọn he e ma sọgan flin, e biọ alọgọ. Yẹwhenọ etọn lẹ, nujlẹtọ lẹ, po afinyọnnọnuwatọ etọn lẹ po ma sọgan dọ nuhe odlọ etọn yín kavi nuhe e zẹẹmẹdo gba. Nalete, devi Jiwheyẹwhe tọn Daniẹli, penugo nado wàmọ, dile etlẹ yindọ e yawu yigbe dọ didehia odlọ lọ tọn po zẹẹmẹ etọn po mayin kọdetọn nuyọnẹn etọn tọn gba. Daniẹli dọmọ: “Ṣigba Jiwheyẹwhe de tin to olọn mẹ he nọ de aṣli lẹ hia, podọ ewọ ko sọ hẹn nuhe na tin to azán godotọn lẹ mẹ zùn yinyọnẹn hlan Nẹbukadnẹzali.” (Daniẹli 2:1-30) Owhe kanweko susu lẹ jẹnukọn, Josẹfu, yẹwhegan Jiwheyẹwhe tọn devo, ko tindo numimọ dopolọ dọ Jiwheyẹwhe yin Didehiatọ aṣli lẹ tọn.—Gẹnẹsisi 40:8-22; Amọsi 3:7, 8.
12, 13. (a) Mẹnu wẹ yín yẹwhegan klo hugan Jiwheyẹwhe tọn, podọ naegbọn hiẹ do na gblọndo domọ? (b) Mẹnu lẹ to egbehe wẹ to sinsẹ̀nzọnwà taidi “họ̀nkọnsi nudabla Jiwheyẹwhe tọn lẹ tọn,” podọ nawẹ mí na pọ́n yé hlan gbọn?
12 Yẹwhegan klo hugan Jehovah tọn he wà sinsẹ̀nzọn to aigba ji pọ́n wẹ Jesu. (Owalọ lẹ 3:19-24) Paulu basi zẹẹmẹ dọmọ: “Jiwheyẹwhe, mẹhe sọn ojlẹ hoho mẹ, podọ to jijọ hunkọhunkọ mẹ ko gbọn yẹwhegan lẹ mẹ dọho hlan otọ́ lẹ to whenẹnu, to opodo azán helẹ tọn ko dọho hlan mí to ovi etọn mẹ, mẹhe e do dè whédutọ onú popo tọn, gbọn mẹhe mẹ ga e basi aihọn lẹ.”—Heblu lẹ 1:1, 2.
13 Jehovah dọho na Klistiani fliflimẹ tọn lẹ gbọn Ovi etọn gblamẹ, Jesu, mẹhe hẹn aṣli sọn olọn mẹ wá lẹ zun yinyọnẹn hlan yé. Jesu dọna yé dọmọ: “Mìwlẹ wẹ yè na hlan nado yọ́n nudabla ahọludu Jiwheyẹwhe tọn tọn.” (Luku 8:10) Enẹgodo Paulu dọho dogbọn Klistiani yiamisisadode lẹ dali nado yin “devizọnwatọ Klisti tọn lẹ, podọ họ̀nkọnsi nudabla Jiwheyẹwhe tọn lẹ tọn.” (1 Kọlintinu lẹ 4:1) To egbehe, Klistiani yiamisisadode lẹ to nukọnzindo nado to sinsẹ̀nzọnwà domọ, bo wleawuna hagbẹ afanumẹ nugbonọ nuyọnẹntọ lọ he nọ wleawuna núdùdù gbigbọmẹ tọn to osaa sisọ mẹ gbọn Hagbẹ Anademẹtọ etọn gblamẹ. (Matiu 24:45-47) Eyin mí na sisi he siso yẹwhegan gbọdo Jiwheyẹwhe tọn hohowhenu tọn lẹ, podọ na titengbe tọn Visunnu Jiwheyẹwhe tọn, be mí ma sọ dona na sisi nuyizan gbẹtọ tọn ehe Jehovah to yiyizan to egbehe nado dè nudọnamẹ Biblu tọn lẹ hia he yin nujọnu sọmọ na omẹ etọn lẹ to ojlẹ awusinyẹn tọn ehelẹ mẹ ya?—2 Timoti 3:1-5, 13.
Hunhundonuvo Kavi Aṣlinu?
14. Whetẹnu wẹ Klistiani lẹ nọ yinuwa to nuglọ, bo gbọnmọ dali do to apajlẹ mẹnu tọn hodo?
14 Be hunhundonuvo Jehovah tọn to onú lẹ didehia mẹ zẹẹmẹdo dọ Klistiani lẹ to whelẹponu dona podọ to ninọmẹ lẹpo mẹ de nuhe yé yọnẹn lẹpo hia wẹ ya? Eyọn, Klistiani lẹ nọ hodo ayinamẹ Jesu tọn hlan apọsteli etọn lẹ nado “yọnnuin di odàn, bosọ do jijọmimiọn di apoe.” (Matiu 10:16) Eyin yé yin didọna ma nado sẹ̀n Jiwheyẹwhe dile ayihadawhẹnamẹnu yetọn lẹ biọ do, Klistiani lẹ nọ to nukọnzindo nado “setonuna Jiwheyẹwhe,” na yé yọnẹn dọ nuyizan gbẹtọ tọn depope ma tindo jlọjẹ de nado hẹnalọdotena sinsẹ̀n-bibasi Jehovah tọn gba. (Owalọ lẹ 5:29) Jesu lọsu do gbesisọ-yinyin ehe tọn hia. Mí hia dọmọ: “To onú helẹ godo, Jesu zinzọnlin to Galili: na e ma jlo na zinzọnlin to Judé gba, na Ju lẹ to dindin nado hù i wutu. Hùnwhẹ Ju lẹ tọn, hùnwhẹ gòhọtúntún lẹ tọn sẹpọ dinvie. Enẹwutu Jesu dọ hlan yé [mẹmẹsunnu agbasa tọn mayisenọ etọn lẹ]: . . . Mì hẹji yì hùnwhẹ he: yẹn ma ko to na hẹji yì hùnwhẹ he gba: na ojlẹ ṣie ma ko wá. Le e dọho helẹ hlan yé, ewọ nọte to Galili. Ṣigba whenuena nọvisunnu etọn lẹ ko hẹji yì hùnwhẹ lọ kọ̀n, whenẹnu wẹ ewlọsu hẹji yì ga, e mayin to gbangba, ṣigba taidi to nuglọ.”—Johanu 7:1, 2, 6, 8-10.
Nado Dọ Kavi Ma Nado Dọ?
15. Nawẹ Josẹfu dohia gbọn dọ hinhẹn aṣli lẹ go to whedelẹnu yín owanyinu de nado wà?
15 To nujijọ delẹ mẹ, hinhẹn whẹho de yin aṣlinu mayin nuyọnẹnnu kẹdẹ gba ṣigba sọ yin owanyi tọn ga. Di apajlẹ, nawẹ Josẹfu, otọ́ mẹgopọntọ Jesu tọn, yinuwa do to whenuena e yọnẹn dọ asi mọdo-aliji etọn, Malia, mọho? Mí hia: “Whenẹnu wẹ Josẹfu asu etọn he basi gbẹtọ dodonọ ma jlo na do e hia do gbangba gba, e jlo na gbẹ́ ẹ dai abọẹ.” (Matiu 1:18, 19, wekun flinflin lẹ yin mítọn) Lehe e na ko yin lẹblanu-matindo do sọ nado do e hia to gbangba!
16. Azọngban tẹwẹ mẹho lẹ, to pọmẹ po hagbẹ agun lọ tọn devo lẹ po, tindo gando whẹho aṣli tọn lẹ go?
16 Whẹho aṣli tọn he sọgan dowinyan mẹ kavi hẹn awufiẹsa wá lẹ ma dona yin didehia mẹhe go e ma gando lẹ gba. Mẹho Klistiani lẹ nọ hẹn ehe do ayiha mẹ whenuena yé dona na ayinamẹ mẹdetiti tọn kavi homẹmimiọn tọn hlan hagbẹ Klistiani lẹ kavi vlavo tlẹ do mẹplọnlọ yé go na ylanwiwa sinsinyẹn do Jehovah go wutu. Nukunpipedo whẹho ehelẹ go to aliho Owe wiwe lẹ tọn mẹ yin dandannu; dide aṣli lẹ hia to gigọ́ mẹ hlan mẹhe go e ma gando lẹ mayin dandannu podọ mayin owanyinu. Na nugbo tọn, hagbẹ agun Klistiani tọn lẹ ma na tẹnpọn nado ṣinyan nudọnamẹ aṣli tọn lẹ sọn mẹho lẹ mẹ gba ṣigba na na sisi azọngban mẹho lẹ tọn nado hẹn aṣlinu lẹ go. Howhinwhẹn lẹ 25:9 doayi e go dọmọ: “Hoavun kọmẹnu towe tọn hẹ ẹ, ṣigba aṣli mẹdevo tọn hiẹ dehia blo.”
17. Naegbọn Klistiani lẹ to whẹho susu lẹ mẹ nọ hẹn whẹho aṣli tọn lẹ do nuglọ, ṣigba naegbọn yé ma sọgan nọ wàmọ to whepoponu?
17 Nunọwhinnusẹ́n ehe sọ yin nugbo to lẹdo whẹndo tọn mẹ kavi to họntọn pẹkipẹki lẹ ṣẹnṣẹn. Hinhẹn whẹho aṣli tọn delẹ go yin nujọnu nado dapana nukunnumamọjẹnumẹ po haṣinṣan gbèmanọpọ tọn lẹ po. “Jẹhọn agewaji tọn hẹn jikun wá: mọwẹ odẹ́ mẹnudọtọ tọn nọ hẹn nukunmẹ yinylọ́n wá.” (Howhinwhẹn lẹ 25:23) Na nugbo tọn, nugbonọ-yinyin dohlan Jehovah po nunọwhinnusẹ́n dodonọ etọn lẹ po, podọ ga owanyi na mẹhe ṣinuwà lẹ, to whedelẹnu sọgan biọ nado dọ na mẹjitọ lẹ, mẹho Klistiani lẹ, kavi mẹdevo lẹ he dona se yèdọ etlẹ yin whẹho aṣli tọn lẹ.a Ṣigba to whẹho susu lẹ mẹ, Klistiani lẹ nọ hẹn aṣli mẹdevo lẹ tọn do nuglọ, basi hihọ́ na yé dile e nọ basi hihọ́ na etọn titi lẹ do.
18. Jẹhẹnu atọ̀n Klistiani tọn tẹlẹ wẹ sọgan gọalọna mí nado yọ́n nuhe mí dona dọ po nuhe mí ma dona dọ lẹ po?
18 To tadona mẹ, Klistiani de nọ hodo apajlẹ Jehovah tọn gbọn hinhẹn whẹho delẹ yin aṣlinu to whenuena e biọ domọ, bo nọ de yé hia to whenuena e jẹ domọ kẹdẹ. To bibasi nudide nuhe e dona podọ he e ma dona dọtọ́n mẹ, e nọ yin anadena gbọn whiwhẹ, yise, po owanyi po dali. Whiwhẹ nọ glọnalina ẹn sọn nuzindo nujọnu-yinyin edetiti tọn ji zẹjlẹgo, tintẹnpọn nado yinuwado mẹdevo lẹ ji vlavo gbọn didọna yé nuhe e yọnẹn lẹpo kavi gbọn yẹdoklọ yé po aṣli he ewọ ma sọgan dọ lẹ po dali. Yise to Ohó Jehovah Tọn po agun Klistiani tọn lọ po mẹ nọ whàn ẹn nado dọyẹwheho nudọnamẹ wleawuna sọn olọn mẹ wá lọ tọn to yinyin aṣejinọtọ nado dapana didọ onú lẹ he sọgan gbleawuna mẹdevo lẹ to bẹjẹeji. Mọwẹ, owanyi nọ whàn ẹn to gbangba nado dọ onú he nọ pagigona Jiwheyẹwhe lẹ ehe gbẹtọ lẹ dona yọnẹn nado mọ ogbẹ̀ yí. Whẹho aṣli mẹdevo lẹ tọn, to alọ devo mẹ, wẹ e nọ basi hihọ́na, to yinyọnẹn mẹ dọ to whẹho susu lẹ mẹ dide yé hia na yin dohia owanyi matindo tọn.
19. Aliho nuyiwa tọn tẹwẹ nọ gọalọ nado dohiagona Klistiani nugbo lẹ, podọ etẹ mẹ wẹ e nọ dekọtọn do?
19 Mẹdọnsẹpọ jlẹkaji tọn ehe nọ gọalọ nado yọ́n Klistiani nugbo lẹ. Yé ma nọ ze nuhe Jiwheyẹwhe yin whlá do nukunmẹṣiọnnu he ma tindo yinkọ de godo kavi do nudabla, sinsẹ́n-nuplọnmẹ Atọ̀n-to-dopomẹ he ma sọgan yin zẹẹmẹ basina tọn de glọ gba. Yẹwhe mayọnẹn lẹ yin ohia sinsẹ̀n lalo tọn, e mayin nugbo lọ tọn gba. (Pọ́n Owalọ lẹ 17:22, 23.) Na nugbo tọn Kunnudetọ yiamisisadode Jehovah tọn lẹ yọ́n pinpẹn lẹblanulọkẹyi “họ̀nkọnsi nudabla Jiwheyẹwhe tọn lẹ tọn” yinyin. Gbọn aṣli ehelẹ didehia jẹ gbangba hlan mẹdevo lẹ dali, yé nọ gọalọ nado dọ̀n ahunjijlọnọ lẹ dogo nado dín họntọnjihẹmẹ Jehovah tọn.—1 Kọlintinu lẹ 4:1; 14:22-25; Zekalia 8:23; Malaki 3:18.
[Nudọnamẹ Odò Tọn]
a Pọ́n “Ne participez pas aux péchés d’autrui” to Atọ̀họ̀ Nuhihọ́ Lọ Tọn, (Flansegbe) 15 novembre, 1985 tọn mẹ.
Nawẹ Hiẹ Na Na Gblọndo Gbọn?
◻Naegbọn Jehovah ma tindo nuhudo nado ze linlẹn etọn lẹ whlá?
◻Mẹnu lẹ wẹ Jehovah nọ de aṣli etọn lẹ hia hlan?
◻Azọngban tẹwẹ Klistiani lẹ tindo gando whẹho aṣli tọn lẹ go?
◻Jẹhẹnu atọ̀n tẹlẹ wẹ na gọalọna Klistiani lẹ nado yọ́n nuhe yé na dọ po nuhe yé ma dona dọ lẹ po?
[Yẹdide to weda 20]
Jehovah nọ de aṣli lẹ hia gbọn Ohó etọn gblamẹ