Oyọnẹn Jiwheyẹwhe Tọn Tintindo—Gbọnna?
Mẹdelẹ sọgan tindo ayihaawe eyin Jiwheyẹwhe jlo nugbonugbo nado do ede hia gbẹtọvi lẹ. Eyin ewọ wàmọ, nawẹ e ko do ede hia gbọn?
JOHN CALVIN he hẹn vọjlado susu wá Plọtẹstant mẹ to owhe kanweko 16tọ mẹ dọ po gbesisọ po dọ gbẹtọ lẹ ma sọgan yọ́n Jiwheyẹwhe na yede adavo dile ewọ ko do ede hia gbẹtọvi lẹ do. Ṣigba, mẹdelẹ sọgan tindo ayihaawe eyin Jiwheyẹwhe jlo nugbonugbo nado do ede hia gbẹtọvi lẹ. Podọ eyin ewọ wàmọ, nawẹ e ko do ede hia gbọn?
Jehovah, ‘Mẹdatọ Daho’ lọ, ma nọ wà nude matin whẹwhinwhẹ́n. Humọ, taidi “Jiwheyẹwhe Ganhunupo,” ewọ penugo nado hẹn lẹndai etọn lẹ di mlẹnmlẹn. (Yẹwhehodọtọ 12:1; Eksọdusi 6:3) Mí sọgan kudeji dọ ewọ tindo ojlo nado de lẹndai etọn lẹ hia gbẹtọvi lẹ, na yẹwhegán Amọsi yin gbigbọdo nado wlan dọmọ: “Nugbonugbo Oklunọ JIWHEYẸWHE ma na wà nude, adavo ewọ de aṣli etọn hia hlan devi etọn yẹwhegán lẹ.” Nalete, doayi e go dọ Jiwheyẹwhe yin alọdlẹndo taidi mẹhe ko de lẹndai etọn lẹ hia devizọnwatọ etọn lẹ, yèdọ mẹhe yiwanna ẹn sọn ahun mẹ wá lẹ kẹdẹ. Be enẹ ma sọgbe hẹ lẹnpọn dagbe ya? Mẹnu wẹ hiẹ nọ dọ aṣli towe lẹ na? Na mẹdepope poun wẹ ya kavi na họntọn vivẹ towe lẹ?—Amọsi 3:7; Isaia 40:13, 25, 26.
Nuyọnẹn po oyọnẹn Jiwheyẹwhe tọn po nọ hẹn awuji whiwhẹnọ lẹ, podọ nuhe sọgbe wẹ ehe yin. Ṣogan, alemimọyi sọn nuyọnẹn po oyọnẹn Jiwheyẹwhe tọn po mẹ bẹ nususu hẹn hugan numọtolanmẹ mọnkọtọn tintindo. Biblu zinnudeji dọ nado sọgan yọ́n linlẹn Jiwheyẹwhe tọn, mí dona whiwhẹ míde: ‘Bẹ gbedide ṣie pli do dè we. Lẹ́ otó towe hlan nuyọnẹn go. Jlẹ ayiha towe hlan ayitùnnugo. Dawhá hodo nuyọnẹn bosọ ze ogbè towe daga na ayitùnnugo. Dín in di fataka.’—Howhinwhẹn lẹ 2:1-4.
Na nugbo tọn, gbẹtọ whiwhẹnọ he dovivẹnu domọ na penugo nado yọ́n Jiwheyẹwhe. Wefọ Howhinwhẹn lẹ tọn enẹ zindonukọn dọmọ: ‘OKLUNỌ wẹ nọ na nuyọnẹn omẹ: onù etọn mẹ wẹ oyọnẹn po ayitùnnugo po nọ sọn.’ Mọwẹ, ahundoponọ he to nugbo dín lẹ sọgan “tunwun dodo, po whẹdida po, po kunnumahu po; yèdọ omọ́ dagbe lẹpo.”—Howhinwhẹn lẹ 2:6-9.
Vivẹnudido Nado Dín Nugbo
Otanwe sinsẹ̀n tọn de dọmọ: “Nuhudo lọ nado basi vogbingbọn to nujọnu po nuvọ́ po, huhlọn po madogán po, onú jọnun po oklọ po, wiwe po mawé po, nuhe họnwun po nuhe dózin po ṣẹnṣẹn, podọ nado yọ́n obá he mẹ nususu gbloada jẹ ko dohiagona gbẹzan gbẹtọvi tọn.” (The Encyclopedia of Religion) Nado mọ pekọ na nuhudo ehe, gbẹtọ lẹ ko dín nugbo lọ sọn ojlẹ dindẹn die. Mẹhe ganjẹ Jehovah, he psalm-kàntọ lọ ylọ dọ “Jiwheyẹwhe nugbo tọn” go to vivẹnudido nado dín nugbo lọ mẹ lẹ to kọdetọn dagbe tindo.—Psalm 31:5.
Yinkọ lọ Jehovah to Heblugbe dowhenu tọn mẹ zẹẹmẹdo “E Nọ Hẹn Nado Lẹzun.” (Gẹnẹsisi 2:4, nudọnamẹ odò tọn to NW mẹ) Gbọnmọ dali, zẹẹmẹ yinkọ Jiwheyẹwhe tọn dohia dọ ewọ wẹ Mẹdatọ lọ bosọ dọ̀n ayidonugo mítọn wá lẹndai etọn ji. Na nugbo tọn, yinkọ lọ Jehovah yinyọnẹn po yizan etọn po wẹ nọ dohiagona sinsẹ̀n nugbo. E họnwun dọ Jesu kọngbedopọ po enẹ po. To whenuena e to hodọ gando devi etọn lẹ go to odẹ̀ mẹ, e dọna Jiwheyẹwhe dọmọ: “Yẹn sọ hẹn oyín towe zun yinyọnẹn hlan yé, bo nasọ hẹn ẹn zun yinyọnẹn: na owanyi ehe hiẹ do yiwanna mi, nido tin to yé mẹ, podọ yẹn to yé mẹ.”—Johanu 17:26.
Heblu hohowhenu tọn de he nọ yin Josẹfu ganjẹ họntọnjiji etọn hẹ Jiwheyẹwhe go to whenuena azọ́n sinsinyẹn lọ yin nina ẹn nado basi tadena odlọ lẹ tọn bo dọ po jidide po dọmọ: “E ma yin Jiwheyẹwhe tọn wẹ tadena?”—Gẹnẹsisi 40:8; 41:15, 16.
To owhe kanweko susu godo, Ahọlu Nẹbukadnẹzali Babilọni tọn kúdlọ de he sunnu nuyọnẹntọ etọn lẹ ma penugo nado detana. Yẹwhegán Daniẹli dọna ahọlu lọ dọmọ: “Jiwheyẹwhe de tin to olọn mẹ he nọ de aṣli lẹ hia, podọ ewọ ko sọ hẹn nuhe na tin to azán godo tọn lẹ mẹ zun yinyọnẹn hlan Nẹbukadnẹzali.”—Daniẹli 2:28.
Apajlẹ Josẹfu po Daniẹli po tọn dohia dọ mẹhe to Jehovah Jiwheyẹwhe sẹ̀n lẹ kẹdẹ wẹ sọgan tindo nuyọnẹn po oyọnẹn Jiwheyẹwhe tọn po. Na nugbo tọn, nukundagbe Jiwheyẹwhe tọn tintindo sọgan biọ dọ mí ni jo pọndohlan he mí tindo dai lẹ do. Nuhe Ju owhe kanweko tintan whenu tọn he lẹzun Klistiani lẹ dona wà niyẹn. Na yé ko yin pinplọn nado nọ na sisi bo setonuna osẹ́n he ko yin didoai na Juvi lẹ wutu, yé tindo nuhudo whenu susu tọn nado kẹalọyi Jesu taidi Mẹssia lọ. Ewọ wá nado hẹn Osẹ́n Mose tọn, he yin “oyẹ̀ onú dagbe he ja lẹ tọn” di. (Heblu lẹ 10:1; Matiu 5:17; Luku 24:44, 45) “Osẹ́n Klisti tọn” he yiaga hugan lọ gbọnmọ dali diọtẹnna Osẹ́n Mose tọn.—Galatianu lẹ 6:2; Lomunu lẹ 13:10; Jakobu 2:8.
Mímẹpo ko yin jiji do aihọn he jẹla sọn Jiwheyẹwhe dè de mẹ. Na ylando he mí dugu etọn sọn mẹjitọ mítọn tintan lẹ dè wutu, mí yin jiji taidi kẹntọ Jiwheyẹwhe tọn, bo gbọagba oyọnẹn he pegan lẹndai etọn lẹ tọn. Mí ko sọ dugu ayiha oklenọ tọn. (Jẹlemia 17:9; Efesunu lẹ 2:12; 4:18; Kọlọsinu lẹ 1:21) Nado lẹzun họntọn Jiwheyẹwhe tọn, mí dona plọn nado hẹn nulẹnpọn mítọn sọgbe hẹ Jiwheyẹwhe tọn. Mọwiwà ma bọawu.
E sọgan vẹawu nado gbẹ́ linlẹn po aṣa sinsẹ̀n lalo tọn lẹ po dai, titengbe eyin ehelẹ ko yin pinplọn mí sọn ovu whenu. Ṣigba be nukọnzinzindo to aliho agọ̀ lọ ji wẹ sọgbe hugan ya? Paali! Na nugbo tọn, nuyọnẹnnu wẹ e yin nado diọ nulẹnpọn mítọn nado sọgan tindo nukundagbe Jiwheyẹwhe tọn.
Yinyọ́n Aliho He Jiwheyẹwhe Nọ Yizan Nado Plọnnu Gbẹtọ Lẹ
Fie wẹ mí sọgan mọ alọgọ te nado mọnukunnujẹ Ohó nugbo lọ mẹ podọ nado nọgbẹ̀ sọgbe hẹ ẹ? To Islaeli hohowhenu tọn mẹ, Jiwheyẹwhe de sunnu dejidego podọ nugbonọ lẹ do otẹn azọngban tọn lẹ mẹ nado deanana akọta lọ. Mọdopolọ, Klisti, he yin Ota agun Klistiani tọn to egbehe nọ deanana mẹhe to nugbo lọ dín po ahundopo po lẹ. Aliho he e nọ yizan wẹ hodotọ dejidego podọ nugbonọ etọn lẹ, he tindo azọngban lọ nado deanana bo basi hihọ́na mẹhe to nugbo lọ dín vẹkuvẹku lẹ. (Matiu 24:45-47; Kọlọsinu lẹ 1:18) Ṣigba nawẹ mẹde sọgan yọ́n aliho he Jiwheyẹwhe nọ yizan nado plọnnu gbẹtọ lẹ gbọn?
Hodotọ nugbo Jesu Klisti tọn lẹ nọ dovivẹnu nado do jẹhẹnu dopolọ he Jesu dohia to aigba ji lẹ hia. To aihọn he to yinylan deji ehe mẹ, e bọawu nado yọ́n hodotọ ehelẹ dile yé to jẹhẹnu gbigbọmẹ tọn ayidego tọn mọnkọtọn lẹ dohia. (Pọ́n apotin he tin to weda 6.) Be jẹhẹnu ehelẹ nọ sọawuhia to sinsẹ̀n he mẹ a tin te kavi to sinsẹ̀n he mẹ kọmẹnu towe lẹ tin te ya? Hiẹ na mọ ale susu yí eyin a gbadopọnna whẹho ehe to Biblu mẹ.
Mí basi oylọna we nado wàmọ gbọn tito Biblu pinplọn tọn de dali. To owhe he wayi, madozẹnzẹn gbẹtọ he hugan 6 000 000 to aigba 235 ji wẹ mọaleyi sọn tito Biblu pinplọn tọn ehe mẹ hẹ Kunnudetọ Jehovah tọn lẹ. Nuyọnẹn po oyọnẹn Jiwheyẹwhe tọn po mimọyi yin nuwiwa he to nukọnzindo bo nọ hẹn pekọ po ale po wá de. Naegbọn hiẹ ma na kẹalọyi oylọ-basinamẹ lọ nado jẹ Biblu plọn ji? Afọdide enẹ zize ma na vẹ́ na we gbede. Mọwẹ, mí sọgan yọ́n Jiwheyẹwhe nugbo!
[Apotin to weda 6]
MẸHE TO NUYIWA TO KỌNDOPỌ MẸ HẸ JIWHEYẸWHE LẸ
nọ nọ̀ kada to awhàn tonudidọ tọn lẹ mẹ. —Isaia 2:4.
nọ de sinsẹ́n dagbe tọ́n gbọn ojlo Jiwheyẹwhe tọn wiwà dali.—Matiu 7:13-23.
nọ do owanyi nugbo hia to yedelẹ ṣẹnṣẹn. —Johanu 13:35; 1 Johanu 4:20.
nọ dọ nudopolọ to filẹpo.—Mika 2:12.
ma nọ hodo apajlẹ nuyiwa kavi walọ ylankan mẹhe lẹdo yé to aihọn lọ mẹ lẹ tọn gba. —Johanu 17:16.
nọ dekunnu na nugbo lọ bo nọ hẹn gbẹtọ lẹ zun devi.—Matiu 24:14; 28:19, 20.
nọ hùnhomẹ nado pli to gbesisọ mẹ nado na tuli ode awetọ yetọn.—Heblu lẹ 10:25.
nọ pagigona Jiwheyẹwhe taidi pipli akọjọpli tọn de.—Osọhia 7:9, 10.
[Yẹdide to weda 7]
Mẹdopodopo, whẹndo, kavi agun blebu sọgan mọ oyọnẹn Jiwheyẹwhe tọn yí