Lehe Hiẹ Sọgan Plọn Ayihadawhẹnamẹnu Towe Do

“AYIHADAWHẸNAMẸNU wiwe de nọ hẹnmẹ damlọn yì toji.” Howhinwhẹn ehe do nugbo nujọnu tọn de hia: Whenuena mí setonuna ayihadawhẹnamẹnu mítọn, mí nọ duvivi jijọho homẹ tọn po kọndopọ tọn po.

Ṣigba, e mayin mẹlẹpo wẹ nọ dè nado wàmọ gba. Adolf Hitler lá ede nado tin to gbejizọnlin ji nado hẹn gbẹtọ lẹ jẹ yedekannu sọn lẹnpọn ovọ́ winyandomẹ tọn kavi bẹwlu, he yin yinyọnẹn taidi ayihadawhẹnamẹnu si. Gandudu budonamẹ tọn etọn wleawuna numọdohlan mẹhẹnsavò tọn kleun de poun na lehe gbẹtọ sọgan yin kanylantọ do sọ to whenuena yé gbẹ́ nado setonuna ayihadawhẹnamẹnu yetọn. Nalete, kanylantọ to aliho dopolọ mẹ wẹ suhugan sẹnhẹngbatọ egbezangbe tọn lẹ—mẹhe nọ zanhẹmẹ gánnugánnu lẹ bo nọ hùmẹ matin numọtolanmẹ oylan tọn lẹ. Sọha yiaga hugan danuwatọ ehelẹ tọn wẹ yin jọja aflanmẹ lẹ. Gbọnmọ dali owe de he to dodinna nujijọ ehe tindo hovila lọ Ovivu Matin Ayihadawhẹnamẹnu De.

Ṣigba to whenuena suhugan gbẹtọ lẹ tọn ma na tindo linlẹn sẹ́nhẹngba danuwiwa tọn pọ́n gbede, mẹsusu ma tindo numọtolanmẹ ayihadawhẹnamẹnu tọn depope dogbọn mahẹ tintindo to fẹnnuwiwa zanhẹmẹ tọn mẹ, lalodido, kavi mẹhihodu dali gba. Walọ dagbe lẹ to doyi lẹdo aihọn pe. To alọdlẹndo atẹṣiṣi daho lọ sọn sinsẹ̀n-bibasi nugbo mẹ, apọsteli Paulu wlan dọ Klistiani delẹ na jogbe na nuyiwadomẹji aihọn tọn bo gbọnmọ dali do lẹzun “mẹhe yè yí ogàn miyọnawu do si ayiha na.” (1 Timoti 4:2) Budonamẹ hẹnflu tọn lẹ ko tlẹ yiaga gbau to egbehe to “azán godo tọn” ehelẹ whenu. (2 Timoti 3:1) Enẹwutu, Klistiani lẹ dona dovivẹnu sinsinyẹn nado basi hihọ́na ayihadawhẹnamẹnu yetọn. Mí sọgan wà ehe gbọn pinplọn podọ gbọn awuwiwlena ẹn dali.

Ayiha, Ahun, po Ayihadawhẹnamẹnu Towe Po

Apọsteli Paulu dọmọ: “Nugbo dọ wẹ yẹn te to Klisti mẹ, yẹn ma to lalodo gba, [ayihadawhẹnamẹnu, NW ] ṣie to kunnu ṣie de to gbigbọ wiwe mẹ.” (Lomunu lẹ 9:1) Enẹwutu ayihadawhẹnamẹnu sọgan yin kunnudenamẹtọ. E sọgan gbadopọnna nuwiwa walọyizan tọn de bo kẹalọyi kavi gblewhẹdo e. Suhugan numọtolanmẹ jijlọ po yinylan po tọn mítọn ko yin zize do mí mẹ gbọn Mẹdatọ mítọn dali. Ṣogan, ayihadawhẹnamẹnu mítọn sọgan yin awuwlena podọ yin pinplọn. Gbọnna? Gbọn yíyí oyọnẹn he pegan Jiwheyẹwhe tọn sọn Ohó etọn mẹ dali mítọn. “Ṣigba mì ni yin mẹdiọadana gbọn hinhẹnjẹ yọyọ ayiha mìtọn tọn dali, na mì nido mọdona nuhe ojlo Jiwheyẹwhe tọn he yọ́n, alọkẹyi, bosọ sọgbe nẹ yin,” wẹ apọsteli Paulu dọ (Lomunu lẹ 12:2) Dile hiẹ to linlẹn po ojlo Jiwheyẹwhe tọn po zín do ayiha towe mẹ, ayihadawhẹnamẹnu towe bẹ azọ́nwiwa to aliho jijọ-di-Jiwheyẹwhe tọn mẹ hugan.

Kunnudetọ Jehovah Tọn lẹ ko gọalọna livi lẹ lẹdo aihọn pe nado ‘tindo oyọnẹn Jehovah Jiwheyẹwhe po Jesu Klisti tọn po.’ (Johanu 17:3) Gbọn tito plọnmẹ Biblu whégbè tọn vọnu yetọn tọn dali, yé nọ plọn ahunjijlọnọ lẹ nujinọtedo Jehovah Jiwheyẹwhe tọn lẹ do zanhẹmẹ, ahàn sinsinyẹn nùnùmú, alọwle, nuyiwa ajọwiwa tọn lẹ, po hosọ susu devo lẹ po ji.a (Howhinwhẹn lẹ 11:1; Malku 10:6-12; 1 Kọlintinu lẹ 6:9, 10; Efesunu lẹ 5:28-33) “Oyọnẹn he pegan” ehe tintindo yin afọdide nujọnu tọn de to awuwiwlena ayihadawhẹnamẹnu jijọ-di-Jiwheyẹwhe tọn mẹ. (Filippinu lẹ 1:9) Nugbo wẹ dọ to godo he Klistiani de ko tlẹ tindo nukunnumọjẹnumẹ he whẹ́n Biblu tọn, e dona to nukọnyi nado to núdùdù na ayiha etọn to Ohó Jiwheyẹwhe Tọn mẹ gbọzangbọzan eyin ayihadawhẹnamẹnu etọn na nọ gángán.—Psalm 1:1-3.

Biblu sọ yí ayihadawhẹnamẹnu blado ahun yẹhiadonu tọn go, ehe bẹ numọtolanmẹ mítọn lẹ hẹn. (Lomunu lẹ 2:15) Ayiha po ahun po dona wazọ́n dopọ pẹkipẹki eyin ayihadawhẹnamẹnu dona wazọ́n ganji. Ehe zẹẹmẹdo hugan bibẹ nudọnamẹ kọ̀ndo ayiha towe mẹ poun. Hiẹ sọ dona wleawuna ahun towe—numọtolanmẹ homẹ tọn towe lẹ, ojlo lẹ, po nujlomẹ lẹ po. Enẹwutu owe Howhinwhẹn lẹ tọn zan hogbe lọ lẹ taidi “jlẹ ayiha towe,” “do ayiha towe,” podọ ‘plan ayiha towe.’ (Howhinwhẹn lẹ 2:2; 23:19; 27:23) Aliho dopo nado wà ehe wẹ gbọn ayihamẹlinlẹnpọn po nulẹnpọn do Owe wiwe lẹ ji po dali. “Yẹn na kàn ayiha azọ́n towe lẹpo tọn ga, bọ nasọ nọ lẹn azọ́n towe lẹ pọ́n” wẹ Psalm 77:12 dọ. Ayihamẹlinlẹnpọn nọ gọalọna mí nado jẹ numọtolanmẹ sisosiso homẹ tọn po linlẹn tọn mítọn lẹ po kọ̀n.

Di apajlẹ, mí ni dọ dọ, hiẹ tindo walọ mawé de taidi pipeve to taba zinzan mẹ. Taidi suhugan mẹdevo lẹ tọn, matin ayihaawe hiẹ yọ́n nugandomẹgo agbasalilo tọn etọn ganji. Ṣogan, mahopọnna mẹwhinwhan họntọn lẹ po whẹndo tọn po, hiẹ mọ ẹn taidi nuhe sinyẹn nado doalọtena. Nawẹ ayihamẹlinlẹnpọn do owẹ̀n Biblu tọn ji sọgan na huhlọn ayihadawhẹnamẹnu towe to aliho ehe mẹ gbọn?

Di apajlẹ, tẹ́n ayihamẹlinlẹnpọn do ohó apọsteli Paulu tọn lẹ he yin mimọ to 2 Kọlintinu lẹ 7:1 mẹ pọ́n: “Enẹwutu, le mí tindo opagbe helẹ, mẹyiwanna vivẹ emi, mì gbọ mí ni klọ́ míde sọn dihó agbasalan po gbigbọ tọn lẹpo po mẹ, bosọ hẹn wiwe sọgbe to osi Jiwheyẹwhe tọn mẹ.” Tindo nukunnumọjẹnumẹ hogbe ehelẹ tọn. Kanse dewe, ‘Etẹwẹ yin “opagbe ehelẹ” he Paulu dlẹnalọdo lẹ na taun tọn?’ Gbọn lẹdo hodidọ lọ tọn hihia dali, hiẹ na doayi e go dọ wefọ he jẹnukọn lẹ dọmọ: “Mì tọ́n sọn ṣẹnṣẹn yetọn, bo nọ olá,” wẹ Jehovah dọ “mì gando onú mawé go blo;” “yẹn nasọ yí mì, bo na yin Otọ́ de hlan mì, mìwlẹ nasọ yin ovisunnu ṣie lẹ, podọ oviyọnnu ṣie lẹ, wẹ Oklunọ Ganhunupo dọ.”—2 Kọlintinu lẹ 6:17, 18.

Gbedide Paulu tọn nado ‘klọ́ míde sọn dihó lẹpo mẹ’ tindo huhlọn hugan todin! Taidi zodolanmẹnamẹnu huhlọnnọ de na mọwiwà, Jiwheyẹwhe dopagbe nado ‘yí mí,’ enẹ wẹ yin, ze mí do nukunpedomẹgo hihọ́ tọn etọn glọ. Hiẹ sọgan kanse dewe dọ ‘Be yẹn na duvivi haṣinṣan pẹkipẹki de tọn hẹ ewọ—taidi enẹ he yin visunnu po viyọnnu de tọn hẹ otọ́ de ya?’ Be linlẹn nado yin ‘yíyí’ kavi yin owanyina dogbọn Jiwheyẹwhe nuyọnẹntọ, owanyinọ de dali mayin nudọ̀nmẹdogo de ya? Eyin linlẹn enẹ di nuhe ma sọgan yọnbasi de na we, doayi aliho he mẹ otọ́ owanyinọ de nọ do owanyi po owanyi zogbe po hia hlan ovi etọn lẹ go gbọn. Todin lẹnnupọn do kanṣiṣa mọnkọtọn de ji he tin to aimẹ to hiẹ po Jehovah po ṣẹnṣẹn! Dile e na dẹnsọ bọ hiẹ na to ayihamẹlẹnpọn do e ji, mọwẹ ojlo na haṣinṣan mọnkọtọn na to whinwhẹ́n do.

Ṣigba doayi e go: Dindọn sẹpọ Jehovah pẹkipẹki yọnbasi kẹdẹ eyin hiẹ ‘ma gando onú mawé de go.’ Kanse dewe: ‘Be pipeve to taba zinzan mẹ matin to “onú mawé” he Jiwheyẹwhe gblewhẹdo lẹ mẹ ya? Be zinzan ẹn na yin “dihó agbasa tọn,” hùnhùn dee do nùvo na owù agbasalilo tọn lẹpo wẹ? Whenuena Jehovah yin Jiwheyẹwhe madodihonọ de, kavi “wiwe,” be ewọ na kẹalọyi hinhẹn dee kudiho sọn ojlomẹ wá to aliho ehe mẹ ya?’ (1 Pita 1:15, 16) Sọ doayi e go ga dọ Paulu na avase gando ‘dihó gbigbọmẹ tọn mẹde tọn go,’ kavi linlẹn apọnmẹ tọn. Kanse dewe: ‘Be walọyizan ehe dugán do lẹnpọn ṣie ji wẹ? Be yẹn na yì jẹ obá he siso de mẹ nado hẹn pekọ wá na nujlomẹnu ṣie lẹ, vlavo to zize agbasalilo ṣie, whẹndo ṣie, yèdọ etlẹ yin teninọ ṣie po Jiwheyẹwhe po do owù mẹ wẹ ya? Jẹ obá tẹ mẹ wẹ yẹn ko na dotẹnmẹ pipeve to taba zinzan mẹ nado hẹn gbẹzan ṣie gble jẹ?’ Pinpannukọn kanbiọ mẹhẹnjọsi tọn ehelẹ sọgan na adọgbigbo lọ we ganji nado doalọte!

Na nugbo tọn, hiẹ sọgan tindo nuhudo alọgọ po godonọnamẹ tọn po sọn mẹdevo lẹ dè nado du to taba ji. Ṣogan, ayihamẹlinlẹnpọn do Biblu ji sọgan wà onú susu nado plọ́n podọ na huhlọn ayihadawhẹnamẹnu towe nado hẹn dewe jẹ mẹdekannu sọn walọyizan enẹ mẹ.

Whenuena Mí Ṣinuwa

Mahopọnna vivẹnudido yọnhugan mítọn lẹ nado wà nuhe yọ́n, mape mítọn lẹ nọ du to mí ji bọ mí nọ ṣinuwa to whedelẹnu. To whenẹnu ayihadawhẹnamẹnu mítọn na dotukla mí, ṣigba whlepọnnu de wẹ e yin nado tẹnpọn nado gbẹkọ e go. Kavi mí sọgan gbọjọ sọmọ bọ mí na jlo nado jo vivẹnudido lẹpo nado sẹ̀n Jiwheyẹwhe do. Ṣigba, flin whẹho Ahọlu Davidi tọn. To whenuena e ko deayọ hẹ Bati-ṣeba po godo, ayihadawhẹnamẹnu etọn sayana ẹn. E basi zẹẹmẹ yasanamẹ he e mọ lọ tọn dọ: “Na okle po ozan po alọ towe pẹn do ojí e: Osin awutu ṣie tọn sọ di akú alunlun mẹ tọn.” (Psalm 32:4) Awufiẹsanu de? Mọwẹ! Ṣogan awubla jijọ-di-Jiwheyẹwhe tọn ehe whàn Davidi nado lẹnvọjọ bosọ yin whẹgbọna hlan Jiwheyẹwhe. (Yijlẹdo 2 Kọlintinu lẹ 7:10 go.) Ovẹvivẹ awubla tọn Davidi tọn na jona do whẹwhinwhẹ́n lẹnvọjọ nujọnu tọn he pe lẹ hia. Na e yigbe hlan ayihadawhẹnamẹnu etọn wutu, Davidi yin alọgọna nado diọ podọ to agọgbọnẹnmẹ vọ́ ayajẹ etọn mọyi.—Psalm 51.

Onú dopolọ sọgan jọ to egbehe. Mẹdelẹ ko plọ́n Biblu hẹ Kunnudetọ Jehovah Tọn lẹ to ojlẹ he wayi lẹ mẹ ṣigba doalọte whenuena yé plọ́n dọ gbẹzan yetọn lẹ ma tin to kọndopọmẹ hẹ nujinọtedo yiaga Jiwheyẹwhe tọn lẹ. Vlavo yé to ninọ hẹ hagbẹ vijinu awetọnọ de matin alè alọwle tọn kavi yin afanumẹ hlan walọyizan mawé lẹ. Ayihadawhẹnamẹnu yetọn dotukla yé!

Eyin hiẹ tin to ninọmẹ mọnkọtọn mẹ, gbadopọnna ohó apọsteli Pita tọn lẹ to azán Pẹntikọsti tọn gbè. To whenuena e hùngona ylando tomẹnu etọn Juvi lẹ tọn, “ayiha yetọn hoapa.” Kakati nado gbọjọ, yé setonuna ayinamẹ Pita tọn nado lẹnvọjọ, podọ yé mọ nukundagbe Jiwheyẹwhe tọn. (Owalọ lẹ 2:37-41) Hiẹ sọgan wà onú dopolọ! Kakati nado gbẹ́ nugbo lọ dai na ayihadawhẹnamẹnu towe dotukla we wutu, gbọ ayihadawhẹnamẹnu towe ni whàn we nado ‘lẹnvọjọ bo yin didiọ.’ (Owalọ lẹ 3:19) Po nujikudo po gọna vivẹnudido, hiẹ sọgan basi vọjlado he nuhudo tin na lẹ nado mọ nukundagbe Jiwheyẹwhe tọn.

‘Hẹn Ayihadawhẹnamẹnu Dagbe de Go’

Vlavo hiẹ ṣẹṣẹ bẹjẹeji nado plọn aliho Jehovah tọn lẹ kavi ko tindo numimọ owhe susu tọn lẹ taidi Klistiani he ko whẹ́n de, ayinamẹ Pita tọn yin nuhe sọgbe: ‘Hẹn ayihadawhẹnamẹnu dagbe de go.’ (1 Pita 3:16) Nuhọakuẹ de wẹ e yin, e mayin nupẹnagbanmẹ de gba. Plọ́n ẹn gbọn núdùdù nina ayiha po ahun towe po do nuyọnẹn he tin to Ohó Jiwheyẹwhe Tọn, yèdọ Biblu mẹ dali. Tuntóai hlan ayihadawhẹnamẹnu towe whenuena e na avase we. Duvivi jijọho homẹ tọn he tonusisena ayihadawhẹnamẹnu mẹtọn sọgan hẹnwa.

Nugbo wẹ dọ, pinplọn po awuwiwlena ayihadawhẹnamẹnu towe po mayin azọngban he bọawu de gba. Ṣigba, hiẹ sọgan hodẹ̀ hlan Jehovah Jiwheyẹwhe nado gọalọna we. Po alọgọ etọn po, hiẹ na penugo nado sẹ̀n Jiwheyẹwhe “sọn ayiha wiwe mẹ, sọn homẹdagbe mẹ, podọ sọn yise he madoklọ mẹ.”—1 Timoti 1:5.

[Nudọnamẹ Odò Tọn]

[Yẹdide to weda 6]

Hihia po ayihamẹlinlẹnpọn do Ohó Jiwheyẹwhe Tọn ji po nọ gọalọna mí nado plọ́n ayihadawhẹnamẹnu mítọn