‘Zọnlinzinzin Gbọn Yise Dali, E Mayin Gbọn Mimọ Dali Gba’

“Yise dali wẹ mí to zọnlinzin gbọn, e mayin gbọn mimọ dali gba.”—2 KỌLINTINU LẸ 5:7.

1. Etẹwẹ ‘zọnlinzinzin gbọn yise dali’ zẹẹmẹdo?

OJLẸ lẹpo mẹ he mí to dẹ̀ho to kọndopọmẹ hẹ anademẹ heyin didọ to Ohó Jiwheyẹwhe Tọn mẹ, mí nọ dohia dọ e whè gbau mí tindo yise jẹ obá de mẹ. To whenuena mí bẹ kunnudide hlan mẹdevo lẹ jẹeji dogbọn Ahọluduta Jiwheyẹwhe tọn dali, ehe ga nọ do yise hia. Podọ to whenuena mí klan gbẹzan mítọn lẹ do wiwe hlan Jehovah, mí to kunnudenu na dọ ojlo mítọn wẹ nado ‘zinzọnlin gbọn yise dali,’ enẹ wẹ yindọ, nado doafọna aliho ogbẹ̀ tọn he yin anadena gbọn yise dali.—2 Kọlintinu lẹ 5:7; Kọlọsinu lẹ 1:9, 10.

2. Naegbọn mahẹ tintindo to nuwiwa agun tọn lẹ mẹ mayin kunnudenu dandan tọn dọ mẹde tindo yise?

² Na nugbo tọn eyin mí jlo nado nọgbẹ̀ to aliho mọnkọtọn mẹ, mí tindo nuhudo yise he dolido taun tọn. (Heblu lẹ 11:1, 6) Mẹsusu nọ yin dindọn hlan Kunnudetọ Jehovah Tọn lẹ na nujinọtedo yiaga walọdagbe tọn po owanyi he yé mọ to Kunnudetọ lẹ ṣẹnṣẹn po wutu. Enẹ yin bẹjẹeji dagbe de, ṣigba e ma zẹẹmẹdo dọ omẹ mọnkọtọn lẹ tindo yise gba. Mẹdevo lẹ sọgan tindo alọwlemẹ kavi mẹjitọ de he lodo to yise mẹ, podọ yé sọgan tindo mahẹ to nuwiwa he mẹhe yé yiwanna lọ to wiwà delẹ mẹ. Nuyiwadomẹji mọnkọtọn tintindo to owhé mẹde tọn gbè na taun tọn yin dona de, ṣigba ehe ga ma sọgan diọtẹn na owanyi mẹdetiti tọn na Jiwheyẹwhe po yise mẹdetiti tọn po gba.—Luku 10:27, 28.

3. (a) Na mí nido tindo yise he dolido taun, nujikudo tẹwẹ mí dona tindo na mídetiti gando Biblu go? (b) Naegbọn mẹdelẹ nọ yin dududeji po awubibọ po do gbọdo-yinyin Biblu tọn ji hugan lehe mẹdevo lẹ nọ wà do?

³ Mẹhe nọ zinzọnlin gbọn yise dali nugbonugbo lẹ nọ yin dududeji to gigọ́mẹ dọ Ohó Jiwheyẹwhe tọn wẹ Biblu yin. Na nugbo tọn, kunnudenu susugege tin dọ Owe wiwe lẹ yin “gbingbọ́n sọn Jiwheyẹwhe mẹ.”a (2 Timoti 3:16) Kunnudenu ehe nẹmu wẹ dona yin dogbapọnna whẹpo mẹde nado yin dududeji? Enẹ sọgan sinai do dodonu etọn ji. Nuhe duto mẹde ji mlẹnmlẹn sọgan nọ ma whàn mẹdevo. To whẹho delẹ mẹ, dile etlẹ yindọ kunnudenu he mayọn gbẹ́ susugege sọgan yin didohia mẹde, ewọ sọgan gbẹ́ tadona lẹnpọn dagbe tọn lọ. Etẹwutu? Na ojlo he ko yin dido sisosiso do ahun etọn mẹ wutu. (Jẹlemia 17:9) Gbọnmọ dali, dile etlẹ yindọ mẹde sọgan do ojlo to lẹndai Jiwheyẹwhe tọn mẹ hia, ahun etọn sọgan jlo vẹkuvẹku nado yin alọkẹyi gbọn aihọn lọ dali. Ewọ sọgan nọ ma jlo nado gbẹ́ aliho gbẹzan tọn he jẹagọdo nujinọtedo Biblu tọn lẹ dai. Ṣigba, eyin huvẹ na nugbo to mẹde hù na taun tọn, eyin ewọ yin nugbonọ hlan ede, bo tindo whiwhẹ, ewọ to madẹnmẹ na yọnẹn dọ Ohó Jiwheyẹwhe Tọn wẹ Biblu yin.

4. Etẹwẹ yin bibiọ to adà mẹdopodopo tọn mẹ nado sọgan tindo yise?

⁴ Whlasusu to osun vude poun mẹ, gbẹtọ lẹ he to yinyin alọgọna nado plọn Biblu lọ nọ mọnukunnujẹemẹ dọ yé ko mọ whẹwhinwhẹ́n he pé lẹ dọ Ohó Jiwheyẹwhe Tọn wẹ e yin. Eyin ehe whàn yé nado hùn ahun yetọn do nùvo nado yin pinplọn gbọn Jehovah dali, to whelọnu lo lẹnpọn homẹ tọn yetọn lẹ, ojlo yetọn lẹ, po mẹwhinwhan yetọn lẹ po nọ yin awuwlena vudevude gbọn nuhe yé plọn dali. (Psalm 143:10) Lomunu lẹ 10:10 dọ dọ ‘ahun’ wẹ gbẹtọ de do nọ yí yise zan. Yise mọnkọtọn nọ do lehe mẹdopodopo nọ tindo numọtolanmẹ do hia, podọ e na sọawuhia to aliho gbẹzan tọn etọn mẹ.

Noa Yinuwa do Yise he Dolido Taun Ji

5, 6. Do etẹ ji wẹ yise Noa tọn sinai do?

⁵ Noa yin dopo to mẹhe tindo yise he dolido taun lẹ mẹ. (Heblu lẹ 11:7) Dodonu tẹwẹ e tindo na ẹn? Noa tindo ohó Jiwheyẹwhe tọn, e mayin to ninọmẹ kinkan tọn mẹ gba, ṣigba dile eyin didọ hlan ẹn do. Gẹnẹsisi 6:13 dọmọ: ‘Jiwheyẹwhe sọ dọ hlan Noa, dọmọ, Opodo nutẹgbẹ lẹpo tọn ko wá nukọn ṣie; na aigba gọ́ na adìngbàndido gbọn dali yetọn.’ Jehovah deanana Noa nado gbá aki de bo wleawuna nudọnamẹ gigọ́ gando gbigbá etọn go. Enẹgodo Jiwheyẹwhe yidogọ dọmọ: “Podọ yẹn, doayi e go, yẹn hẹn gigọ́ osìn lẹ tọn lọ ja aigba ji, nado gbidi nutẹgbẹ lẹpo, ehe mẹ gbọfufu ogbẹ̀ tọn te lẹ sọn olọn glọ; onú he sọ tin to aigba ji lẹpo wẹ na kú.”—Gẹnẹsisi 6:14-17.

⁶ Be jikun ko ja pọ́n jẹnukọnna ehe wẹ ya? Biblu ma dọ gba. Gẹnẹsisi 2:5 dọmọ: “OKLUNỌ Jiwheyẹwhe ma ko hẹn jikun ja do aigba ji gba.” Ṣigba, ehe wẹ lehe Mose, he nọgbẹ̀ owhe kanweko susu to godo mẹ, dọ whẹho lọ lẹ do to hodidọ mẹ e mayin azán Noa tọn gba ṣigba ojlẹ dindẹn jẹnukọnna enẹ. Dile e yin didohia to Gẹnẹsisi 7:4 mẹ do, Jehovah dlẹnalọdo jikun to whenuena e to hodọ hlan Noa, podọ e họnwun dọ Noa mọnukunnujẹ nuhe dọ e te mẹ. Etomọṣo, yise Noa tọn ma tin to nuhe e sọgan mọ mẹ gba. Apọsteli Paulu wlan dọ Noa yin ‘nina avase nuhe ma ko yin mimọ lẹ tọn sọn olọn mẹ wá.’ Jiwheyẹwhe dọna Noa dọ Ewọ jlo nado hẹn wá aigba ji “gigọ́ osìn lẹ tọn,” kavi “ohù olọn mẹ tọn,” dile nudọnamẹ odò tọn to Traduction du monde nouveau mẹ dọ ẹ do to Gẹnẹsisi 6:17 mẹ. Kakajẹ ojlẹ enẹ mẹ, onú mọnkọtọn de ma ko jọ pọ́n gbede. Ṣigba nudida lẹpo heyin mimọ gbọn Noa dali nọte taidi kunnudenu wadohia tọn dọ Jiwheyẹwhe na nugbo tọn sọgan hẹn osingigọ nuvasudotọ tọn mọnkọtọn wá. Yin whinwhan gbọn yise dali, Noa gbá aki lọ.

7. (a) Etẹwẹ Noa matindo nuhudo etọn nado sọgan wà nuhe Jiwheyẹwhe ko degbena ẹn? (b) Nawẹ mí nọ mọaleyi gbọn dogbapọnna yise Noa tọn dali, podọ nawẹ yise mítọn sọgan yin dona de na mẹdevo lẹ gbọn?

⁷ Jiwheyẹwhe ma ko na Noa azán de whenuena Osingigọ lọ na bẹjẹeji gba. Ṣigba Noa ma yí enẹ zan taidi whẹwhinwhẹ́n de na awuwiwlena walọ nọte-bo-mọ tọn de, bo ze aki gbigbá po yẹwhehodidọ po do otẹn awetọ mẹ to gbẹzan etọn mẹ gba. To ojlẹ sisọ mẹ, Jiwheyẹwhe dọna Noa whenuena e na biọ aki lọ mẹ. To ojlẹ dopolọ mẹ, “Noa sọ basi; kẹdẹdi enẹ he Jiwheyẹwhe ko degbena ẹn lẹpo; mọwẹ e basi do.” (Gẹnẹsisi 6:22) Noa zinzọnlin gbọn yise dali, e mayin gbọn mimọ dali gba. Lehe mí yin homẹhunnọ do sọ dọ ewọ wà mọ! Na yise etọn tọn wutu, mí tin to ogbẹ̀ to egbehe. To whẹho mítọn mẹ ga, yise he mí dohia sọgan tindo nugandomẹgo sisosiso do nuhe sọgodo bẹhẹn ji e mayin na míwlẹ kẹdẹ gba ṣigba na ovi mítọn lẹ podọ na gbẹtọ devo he lẹdo mí lẹ ga.

Yise Ablaham Tọn

8, 9. (a) Do etẹ ji wẹ Ablaham ze yise etọn sinai do? (b) To aliho tẹ mẹ wẹ Jehovah “sọawuhia” Ablaham te?

⁸ Lẹnnupọndo apajlẹ devo—enẹ heyin Ablaham tọn ji. (Heblu lẹ 11:8-10) Do etẹ ji wẹ Ablaham ze yise etọn sinai do? Lẹdo he mẹ e whẹ́n te to Uli Kaldeanu lẹ tọn yin boṣiọ-sinsẹ̀n po agbasanu bibẹpli tọn lẹ po. Ṣigba nuyiwadomẹji devo lẹ wleawuna pọndohlan Ablaham tọn. Abajọ ewọ sọgan kọnawudopọ hẹ Ṣẹm visunnu Noa tọn, gbẹzan mẹhe tọn zẹ̀ etọn go na owhe 150. Ablaham lẹzun nujikudonọ dọ Jehovah wẹ “Jiwheyẹwhe Gigogan didatọ olọn po wẹkẹ po tọn.”—Gẹnẹsisi 14:22.

⁹ Onú devo tindo nuyiwadomẹji he siso do Ablaham ji. Jehovah “sọawuhia Ablaham . . . whenuena e tin to Mẹsopotamia, whẹpo e do yin wáṣinu to [Halani], bosọ dọ hlan ẹn, dọ, Yì sọn aigba towe ji, podọ sọn hẹnnumẹ towe lẹ mẹ, bo wá aigba he yẹn na dohia we ji.” (Owalọ lẹ 7:2, 3) To aliho tẹ mẹ wẹ Jehovah “sọawuhia” Ablaham te? Ablaham ma mọ Jiwheyẹwhe tlọlọ gba. (Eksọdusi 33:20) Etomọṣo, e yọnbasi dọ Jehovah ni sọawuhia Ablaham to odlọ de mẹ, po gigo hugan jọwamọ didohia po, kavi gbọn wẹnsagun angẹli tọn, kavi nukunmọnu de gblamẹ. (Yijlẹdo Gẹnẹsisi 18:1-3; 28:10-15; Levitiku 9:4, 6, 23, 24 go.) Nudepope he gblamẹ Jehovah sọawuhia hlan Ablaham te, dawe dodonọ enẹ tindo adọgbigbo dọ Jehovah to zize lẹblanulọkẹyi họakuẹ de donukọnna emi. Ablaham yinuwa to yise mẹ.

10. Nawẹ Jehovah hẹn yise Ablaham tọn lodo gbọn?

¹⁰ Yise Ablaham tọn ma sinai do tintindo zẹẹmẹ gigọ́ dogbọn aigba lọ he Jiwheyẹwhe to anadena ẹn hlan ji gba. E ma sinai do yinyọ́n whenuena aigba enẹ na yin nina ẹn ji gba. E tindo yise na e yọ́n Jehovah taidi Jiwheyẹwhe Ganhunupotọ. (Eksọdusi 6:3) Jehovah dọna Ablaham dọ e na tindo ovi, ṣigba to whedelẹnu e nọ paṣa Ablaham lehe enẹ sọgan yin mọ do. Ewọ ko to yọnhopo jei. (Gẹnẹsisi 15:3, 4) Jehovah hẹn yise Ablaham tọn lodo gbọn didọ na ẹn nado pọ́n aga hlan sunwhlẹvu lẹ bo hia sọha yetọn eyin e sọgan wà mọ dali. “Mọwẹ okún towe na yin,” wẹ Jiwheyẹwhe dọ. Ablaham yin whinwhan sisosiso. E họnwun dọ Didatọ pipli nugonu dobu olọn tọn lẹ sọgan hẹn nuhe ewọ ko dopagbe etọn di. Ablaham “yise to OKLUNỌ mẹ.” (Gẹnẹsisi 15:5, 6) E ma yindọ Ablaham yise na e yiwanna nuhe e to sisè poun wutu wẹ gba; e tindo yise he dolido taun.

11. (a) Dile e sẹpọ owhe 100 mẹvi, nawẹ Ablaham yinuwa hlan opagbe Jiwheyẹwhe tọn dọ Sala yọnhonọ na ji visunnu de gbọn? (b) Po yise wunmẹ tẹ po wẹ Ablaham pannukọn mẹtẹnpọn he bẹ zize visunnu etọn yì Osó Molia tọn ji nado yí ì do sanvọ́ hẹn?

¹¹ To whenuena Ablaham sẹpọ owhe 100 mẹvi bọ asi etọn, Sala, sẹpọ owhe 90 mẹvi, Jehovah whladopo dogọ sọ vọ́ opagbe etọn do dọ Ablaham na tindo visunnu de podọ Sala wẹ na yin onọ̀ lọ. Ablaham po lẹnpọn dagbe po lẹnnupọndo ninọmẹ yetọn ji. “Mọwẹ pinpọn hlan opagbe Jiwheyẹwhe tọn, e ma hòkọ̀ gbọn mayise mẹ gba; ṣigba e sinyẹn gbọn yise mẹ, bo to gigona Jiwheyẹwhe: podọ yè hẹn ẹn lodo to ayiha mẹ, dọ onú he ewọ dopagbe etọn, e tin sọgan nado yibasi ga.” (Lomunu lẹ 4:19-21) Ablaham yọnẹn dọ opagbe Jiwheyẹwhe tọn ma sọgan gboawupo gba. To agọgbọnẹnmẹ, na yise etọn wutu, Ablaham setonu to whenuena Jiwheyẹwhe dọ na ẹn nado ze visunnu etọn Isaki yì aigba Molia tọn ji bo yí ì do basi avọ́sinsan de. (Gẹnẹsisi 22:1-12) Ablaham tindo jidide gigọ́ dọ Jiwheyẹwhe lọ he ko gbọn azọ́njiawu dali hẹn visunnu enẹ nado yin jiji sọ sọgan hẹn ẹn gọwa ogbẹ̀ nado sọgan hẹn opagbe dogọ́ lẹ di he E ko do to kọndopọmẹ hẹ ewọ.—Heblu lẹ 11:17-19.

12. Nawẹ e dẹnsọ bọ Ablaham do to zọnlinzin gbọn yise dali, podọ alè tẹwẹ to tenọpọn ewọ po hagbẹ whẹndo tọn etọn he do yise he lodo hia lẹ po?

¹² Ablaham dohia dọ ewọ yin anadena gbọn yise dali e mayin to ninọmẹ delẹ mẹ poun gba ṣigba to gbẹzan etọn lẹpo mẹ. To gbẹwhenu etọn mẹ Ablaham ma mọ adà Aigba Pagbe Tọn lọ depope yí sọn Jiwheyẹwhe dè taidi ogú de gba. (Owalọ lẹ 7:5) Ṣogan, Ablaham ma gbọjọ bo lẹkọyì Uli Kaldeanu lẹ tọn gba. Na owhe 100, kakajẹ whenuena e kú, e nọ nọ̀ gohọ lẹ mẹ to aigba he Jiwheyẹwhe ko deanana ẹn hlan ji. (Gẹnẹsisi 25:7) Gando ewọ po asi etọn Sala po, visunnu yetọn Isaki, po ovivi yetọn Jakobu po go, Heblu lẹ 11:16 dọmọ: “Jiwheyẹwhe ma kuwinyan dọ yè ni ylọ ẹ dọ Jiwheyẹwhe yetọn gba: na e ko jla otò de do dai na yé wutu.” Mọwẹ, Jehovah tindo nọtẹn de na yé to agblò aigba tọn Ahọluduta Mẹssia tọn etọn mẹ.

13. Mẹnu to devizọnwatọ Jehovah tọn lẹ mẹ to egbehe wẹ na kunnudenu yise tintindo taidi enẹ he yin Ablaham tọn?

¹³ Mẹhe taidi Ablaham lẹ tin to egbehe to devizọnwatọ Jehovah tọn lẹ ṣẹnṣẹn. Yé ko zinzọnlin gbọn yise dali na owhe susu. Po huhlọn he Jiwheyẹwhe nọ namẹ po, yé ko dù to aliglọnnamẹnu he taidi osó lẹ ji. (Matiu 17:20) Yé ma hòkọ̀ to yise mẹ na yé ma yọ́n whenuena Jiwheyẹwhe na na yé ogú he ewọ ko dopagbe etọn poun wutu gba. Yé yọnẹn dọ ohó Jiwheyẹwhe tọn ma sọgan gboawupo, podọ yé hia ẹ di lẹblanulọkẹyi he mayọn jlẹ nado tin to sọha Kunnudetọ etọn tọn lẹ mẹ. Be numọtolanmẹ enẹ wẹ hiẹ tindo ya?

Yise he Whàn Mose

14. Nawẹ dodonu na yise Mose tọn yin didoai gbọn?

¹⁴ Apajlẹ yise tọn devo wẹ Mose. Etẹwẹ yin dodonu lọ na yise etọn? E yin didoai to ovuwhenu. Dile etlẹ yindọ viyọnnu Falo tọn mọ Mose to aki owóko tọn de mẹ to Otọ̀ Nile tọn tó bo ze e taidi visunnu etọn, onọ̀ Heblu Mose tọn titi, yèdọ Jokebẹdi, pọ́n visunnu lọ go bo tindo e to nukunpedomẹgo etọn glọ to owhe fliflimẹ tọn etọn lẹ whenu. Kunnudenu dohia dọ Jokebẹdi plọn ẹn ganji, bo zín owanyi na Jehovah po pinpẹn-nutọn-yinyọnẹn po na opagbe Etọn lẹ hlan Ablaham do ahun etọn mẹ. To nukọnmẹ, taidi hagbẹ whédo Falo tọn de, Mose yin ‘pinplọn nuyọnẹn Egiptitọ tọn lẹpo.’ (Owalọ lẹ 7:20-22; Eksọdusi 2:1-10; 6:20; Heblu lẹ 11:23) Etomọṣo, mahopọnna otẹn nukundagbe Mose tọn, ahun etọn tin po omẹ Jiwheyẹwhe tọn heyin afanumẹ lẹ po.

15. Etẹwẹ ede didohia po omẹ Jehovah tọn lẹ po zẹẹmẹdo na Mose?

¹⁵ To owhe 40tọ etọn mẹ, Mose linu Egiptinu de hù nado whlẹn Islaelivi de he to yinyin nuyiwahẹ jẹagọ. Nujijọ ehe do lehe Mose pọ́n omẹ Jiwheyẹwhe tọn lẹ hlan gbọn hia. Na nugbo tọn, “gbọn yise dali Mose, whenuena e whẹ́n, e kọ́ nado yín yiylọ ovi viyọnnu Falo tọn lọ tọn.” Kakati nado tẹdo ‘gbẹdudu ojlẹ vude ylando tọn’ go taidi hagbẹ osla Egiptinu tọn de, e ko yin whinwhan gbọn yise dali nado do ede hia po omẹ Jiwheyẹwhe tọn he to yinyin yasana lẹ po.—Heblu lẹ 11:24, 25; Owalọ lẹ 7:23-25.

16. (a) Azọ́ndenamẹ tẹwẹ Jehovah na Mose, podọ nawẹ Jiwheyẹwhe gọalọna ẹn gbọn? (b) To nukunpipedo azọ́ndenamẹ etọn go, nawẹ Mose do yise hia gbọn?

¹⁶ Mose tin to plaplaji nado yinuwa nado hẹn pọngbọ wá na omẹ etọn lẹ, ṣigba ojlẹ Jiwheyẹwhe tọn na whlẹngán yetọn ma ko wá todin gba. Mose dona họ̀n sọn Egipti. E nọte kakajẹ nudi owhe 40 lẹ to nukọnmẹ whẹpo Jehovah gbọn angẹli de dali deazọnna Mose nado lẹkọyi Egipti nado plan Islaelivi lẹ tọ́n sọn aigba enẹ ji. (Eksọdusi 3:2-10) Nawẹ Mose yinuwa gbọn? E ma do ayihaawe hia do nugopipe Jehovah tọn nado whlẹn Islaeli ji gba, ṣigba e tindo numọtolanmẹ dọ emi ma pegan na azọngban he Jiwheyẹwhe zedonukọnna ẹn. Po owanyi po, Jehovah wleawuna tulinamẹ he Mose tindo nuhudo etọn. (Eksọdusi 3:11–4:17) Yise Mose tọn whẹ́n bo lẹzun huhlọnnọ. E lẹkọwa Egipti bo na avase pludopludo Falo nukun-sọ-nukun do azọ̀nylankan he na wá Egipti ji na awugbopo ogán enẹ tọn nado dike na Islaeli ni yì nado basi sinsẹ̀n hlan Jehovah. Mose ma tindo huhlọn mẹdetiti tọn depope nado hẹn azọ̀nylankan enẹlẹ wá gba. E zinzọnlin gbọn yise dali, e mayin gbọn mimọ dali gba. Yise etọn tin to Jehovah po ohó etọn po mẹ. Falo vannukundo Mose. Ṣigba Mose sinyẹnlin. “Gbọn yise dali e gbẹ́ Egipti dai, bo ma sọ dibuna homẹgble ahọlu tọn: e doakọn na ẹn taidi e mọ ewọ he yín mamọ lọ.” (Heblu lẹ 11:27) Mose mayin mẹpipe gba. E nọ ṣinuwa. (Osọha lẹ 20:7-12) Ṣigba to yinyin azọ́ndena gbọn Jiwheyẹwhe dali godo, aliho gbẹzan tọn etọn lẹpo yin anadena gbọn yise dali.

17. Zọnlinzinzin gbọn yise dali dekọtọn do etẹ mẹ na Noa, Ablaham, po Mose po, dile etlẹ yindọ yé ma nọgbẹ̀ nado mọ aihọn yọyọ Jiwheyẹwhe tọn?

¹⁷ Na yise towe ni sọawuhia nado taidi enẹ heyin Noa, Ablaham, po Mose tọn po. Nugbo wẹ dọ yé ma mọ aihọn yọyọ Jiwheyẹwhe tọn to azán yetọn mẹ. (Heblu lẹ 11:39) E ma ko yin ojlẹ dide Jiwheyẹwhe tọn todin; adà lẹndai etọn tọn devo lẹ pò he dona yin wiwadotana ga. Etomọṣo, yise yetọn to ohó Jiwheyẹwhe tọn mẹ ma hòkọ̀ gba, podọ oyín yetọn lẹ tin to owe ogbẹ̀ tọn Jiwheyẹwhe tọn mẹ.

18. Na mẹhe yin yiylọ hlan ogbẹ̀ olọn mẹ tọn lẹ, naegbọn e do yin dandannu nado zinzọnlin gbọn yise dali?

¹⁸ “Jiwheyẹwhe ko sọ wleawu onú he yọnwhanpẹ humọ tọn dai na mí,” wẹ apọsteli Paulu wlan. Enẹ wẹ yindọ, Jiwheyẹwhe mọ onú he yọnwhanpẹ na mẹhe, taidi Paulu, ko yin yiylọ hlan ogbẹ̀ olọn mẹ tọn hẹ Klisti lẹ. (Heblu lẹ 11:40) Na taun tọn omẹ ehelẹ wẹ Paulu tindo to ayiha mẹ to whenuena e wlan hogbe heyin kinkandai to 2 Kọlintinu lẹ 5:7 mẹ lẹ dọmọ: “Yise dali wẹ mí to zọnlinzin gbọn, e mayin gbọn mimọ dali gba.” To ojlẹ he mẹ enẹ yin kinkan te, depope to yé mẹ ma ko mọ alè olọn mẹ tọn yetọn yí gba. Yé ma sọgan mọ ẹn po nukun agbasalan tọn yetọn lẹ po gba, ṣigba yise yetọn to e mẹ dolido taun. Klisti ko yin finfọn sọn oṣiọ lẹ mẹ, sinsẹ́n tintan mẹhe na yin didona po ogbẹ̀ olọn mẹ tọn po lẹ tọn. Podọ hugan kunnudetọ 500 wẹ mọ ẹn jẹnukọnna agayiyi yì olọn mẹ tọn etọn. (1 Kọlintinu lẹ 15:3-8) Yé tindo whẹwhinwhẹ́n susugege nado deanana aliho ogbẹ̀ tọn yetọn blebu gbọn yise enẹ dali. Mí lọsu tindo whẹwhinwhẹ́n dagbe na zọnlinzinzin gbọn yise dali.

19. Dile eyin didohia do to Heblu lẹ 1:1, 2 mẹ, gbọn mẹnu dali wẹ Jiwheyẹwhe ko dọho hlan mí?

¹⁹ To egbehe, Jehovah ma to hodọ na omẹ etọn lẹ gbọn angẹli de dali bà, dile e wà do na Mose to nukan he to jìjì lọ mẹ. Jiwheyẹwhe ko dọho gbọn Visunnu etọn gblamẹ. (Heblu lẹ 1:1, 2) Nuhe Jiwheyẹwhe dọ gbọn dali etọn, E ko basi kandai etọn to Biblu mẹ, ehe ko yin didiọ do ogbè gbẹtọ lẹ tọn mẹ lẹdo aihọn pé.

20. Nawẹ ninọmẹ mítọn lẹ yin dehe pọnte taun hugan Noa, Ablaham, po Mose po tọn gbọn?

²⁰ Mí tindo susu hugan ehe Noa, Ablaham, po Mose po tindo. Mí tindo Ohó Jiwheyẹwhe tọn blebu—podọ suhugan etọn ko mọ hẹndi. To pọndohlan mẹ na nuhe Biblu dọ lẹpo dogbọn sunnu po yọnnu lẹ po he do yede hia di kunnudetọ nugbonọ Jehovah tọn lẹ to whlepọn wunmẹ lẹpo nukọn dali, Heblu lẹ 12:1 dotuhomẹnamẹ dọmọ: “Mì gbọ mí ni dè onú pinpẹn lẹpo do apadopo, po ylando he ma sinyẹnawu nado tẹ́ do omẹ go po, bosọ gbọ mí ni nọ yí homẹfa do họ̀n alewezun he yè ze do mí nukọn.” Yise mítọn mayin nuhe mí na yí do gbẹ̀n asaji-kàn gba. “Ylando he ma sinyẹnawu nado tẹ́ do omẹ go” wẹ yise matindo. Avunhiho sinsinyẹn yin bibiọ eyin mí na gbọṣi ‘zọnlinzinzin gbọn yise dali’ mẹ.

[Nudọnamẹ Odò Tọn]

Etẹwẹ Yin Gblọndo Towe?

● Etẹwẹ ‘zọnlinzinzin gbọn yise dali’ bẹhẹn?

● Nawẹ mí sọgan mọaleyi sọn aliho he mẹ Noa do yise hia te mẹ gbọn?

● Nawẹ aliho he mẹ Ablaham yí yise zan te gọalọna mí gbọn?

● Naegbọn Biblu do dlẹnalọdo Mose taidi apajlẹ yise tọn?

[Yẹdide to weda 10]

Ablaham zinzọnlin gbọn yise dali

[Yẹdide to weda 10]

Mose po Aalọn po do yise hia to whenuena yé to Falo nukọn