Ṣọṣi lẹ Yigbe Ylando Tọn

“Papa Ze Ṣọṣi lọ do Whlepọn Mẹ.” “Dodinnanu Oka Tọn po Wangbẹna Juvi lẹ po—Ṣọṣi lọ To Awuwlena Gbeyina Ylanwiwa Etọn.”* “Gbeyina Ylanwiwa na Nuvasudo Sinsinyẹn.” “Méthodiste lẹ Vẹvẹ na Omẹ Inde Whèyihọ États-Unis Tọn Lẹ.”

BE HIẸ ko hia hosọ taidi ehelẹ ya? E taidi dọ po jideji pludopludo po, ṣọṣi lẹ to alọkẹyi whẹgbledo bosọ to vẹvẹ na nuhe yé ko wà to owhe kanweko lẹ gblamẹ. Linlinnamẹnu lẹ to nùzindo gbeyina ylanwiwa mẹdetiti tọn yọyọ gbọn papa dali ji pludopludo.

To Whenuena Papa Biọ Jona

To 1980 po 1996 po gblamẹ, Jean Paul II ‘yọ́n nuṣiwa whenuho Ṣọṣi lọ tọn kavi biọ jona’ e whè gbau whla 94, wẹ linlinnatọ Vatican tọn Luigi Accattoli dọ to owe etọn Quando il papa chiede perdono (To Whenuena Papa Biọ Jona) mẹ. Sọgbe hẹ Accattoli, “to Ṣọṣi Katholiki tọn mẹ, papa kẹdẹ wẹ sọgan gbọn jlọjẹ dali basi gbeyina ylanwiwa mẹdetiti tọn de.” Podọ ehe wẹ ewọ ko wà, to alọdlẹndo nudindọn sinsinyẹn whenuho Katholiki tọn lẹ—yèdọ Awhàn sinsẹ̀n tọn lẹ, awhàn lẹ, godoninọna gandudu aṣẹ-glanglan-panamẹ tọn lẹ, kinklan to ṣọṣi lẹ mẹ, wangbẹna Juvi lẹ, Dodinnanu Oka Tọn, Ogbẹ́ Aṣli tọn, po akọta ṣinṣinyan po. To wekanhlanmẹ anademẹ 1994 tọn he yin didohlan yẹwhenọ lẹ mẹ (ehe yin pinpọnhlan gbọn mẹdelẹ dali nado yin owe titengbe nudọnamẹ papa tọn), Jean Paul II basi tito na “gbeyina ylando he yin wiwà to owhe fọtọ́n awetọ Klistiani tọn whenu lẹpo.”

Yẹwhenọ susu wẹ ko hodo apajlẹ papa tọn. To décembre 1994 linlinwe Italie tọn lọ Il Giornale na linlin dọmọ: “Yẹwhenọ Amelika tọn susu lẹ nọ sọawuhia to televiziọn mẹ bo nọ biọ jona to gbangba.” Na etẹ? Na nukunpẹvi yí do pọ́n nuhahun yẹwhenọ he nọ zanhẹ ovivu lẹ, he nọ hẹn awugble wá na jọja susu he go onú jọ do lẹ. To janvier 1995 linlinwe La Repubblica na linlin do “nuwiwa he ma tindo apajlẹ to whenuho nujijọ Katholiki tọn mẹ” ji—yèdọ nuhahun abọẹninọ Papa Pius XII tọn to kọndopọmẹ hẹ Nuvasudo sinsinyẹn lọ yin alọdlẹndo. To janvier 1995 linlinwe dopolọ na linlin dọ pipli yẹwhenọ Allemagne tọn biọ jona na “nuṣiwa susu” Katholiki Lomu tọn he nọgodona sẹ́nhẹngba Nazi tọn lẹ. Ṣọṣi Plọtẹstant tọn voovo lẹ ko sọ mọhodọ do yedelẹ go.

Etẹwutu?

Biblu na tuli mí nado biọ jona to whenuena mí ṣinuwa, podọ mẹsusu doabobo na ṣọṣi lẹ to whenuena yé mọhodọ do yedelẹ go. (Jakobu 5:16) Ṣigba naegbọn ṣọṣi lẹ to ehe wà? Nawẹ e dona yinuwa do aliho he mẹ mí nọ pọ́n yé hlan gbọn ji?

[Nudọnamẹ Odò Tọn]

Hogbe Latin tọn na “nuṣiwa ṣie titi,” yin apadewhe odẹ̀ Katholiki tọn (Confiteor kavi, “yẹn yigbe ylando tọn”), ehe whenu dodonọ lẹ nọ basi dọvọdọ hodidọ ehe tọn.