Lilatọ Ahọluduta Tọn lẹ Na Linlin

Jiwheyẹwhe Hẹn Ẹn Whẹ́n Deji to Alaska

TO OSIN-AGÓ po glase po glọ, okún pẹvi tiún-tiún de to ote pọ́n dotẹnmẹ hundote lọ nado wú bo whẹ́n. To osun atọ̀n kleun he alunlun Alaska tọn bẹhẹn lẹ gblamẹ, okún tiún-tiún omá chou tọn de heyin 3 mm to nujijlẹ mẹ sọgan whẹ́n jẹ nudi kilo 40! Mọwẹ, aigba ehe heyin pinpọndohlan gbọn mẹsusu dali to ojlẹ de mẹ taidi dehe ma sọgan dè sinsẹ́n tọ́n, yèdọ aigba gbọgbé glase tọn de sọgan dè sinsẹ́n susugege tọ́n.

Ehe na titengbe tọn yin nugbo na aigba gbigbọmẹ tọn to Alaska. To finẹ, to aigba ojlẹ avivọ-whenu he dite tọn lọ ji, Kunnudetọ Jehovah Tọn lẹ to nukọnzindo nado to okún Ahọluduta tọn do. Taidi to adà aigba tọn devo lẹ ji, Jiwheyẹwhe hẹn okún lọ nado whẹ́n to ahun he dojo lẹ mẹ.—1 Kọlintinu lẹ 3:6, 7.

● To whenuena e tin to mọto wehọmẹ tọn de mẹ, Kunnudetọ jọja de he yinkọ etọn yin Vanessa doayi wehọmẹvi gbẹ́ de go, yèdọ Ann, he nọ saba sinai ede ṣokẹdẹ. Ann sọawuhia taidi mẹhe to awubla, enẹwutu Vanessa basi oylọ na Ann nado sinai do apa etọn. Abajọ Ann to awubla! Onọ̀ etọn ko kú sọn ahun-zọ̀n mẹ, podọ ojlẹ vude to godo mẹ, otọ́ etọn kú sọn azọ̀n agbasa wiwọ̀ tọn mẹ. Enẹwutu wẹ Ann to ninọ hẹ hẹnnumẹ lẹ to Alaska.

Vanessa nọte to owhé họntọn etọn yọyọ lọ tọn gbè to whenuena e tin to sinsẹ̀nzọn kunnudegbe tọn mẹ to Samedi dopo bo jo alọnuwe lọ Be Jiwheyẹwhe Nọ Hò Mítọn Pọ́n Nugbo Nugbo Ya? dai. To Lundi he bọdego to wehọmẹ, Ann dín Kunnudetọ jọja lọ mọ. Ann tindo kanbiọ Biblu tọn susu lẹ, ehe Vanessa penugo nado na gblọndo na. “Fie wẹ mì nọ pli te na sinsẹ̀n-bibasi?” wẹ e kanbiọ. To whèjai enẹ Ann yì opli tintan etọn to Plitẹnhọ Ahọluduta Tọn mẹ.

E ma yí ojlẹ susu to tọṣiọvi owhe-17-mẹvi ehe si gba nado mọ ‘otọ́’ po ‘onọ̀’ po susu lẹ, kẹdẹdile Jesu ko dopagbe etọn do. (Matiu 19:29) Podọ nujijọ ayajẹ tọn tẹ die e yin nado mọ Ann he gọna homẹhunhun po nukiko yẹsẹ po basi dohia yẹhiadonu klandowiwe etọn tọn hlan Jehovah gbọn baptẹm osin tọn dali to Plidopọ Agbegbe “Wẹnsagun Jijọho Jiwheyẹwhe Tọn Lẹ” tẹnmẹ.

● To lẹdo he tin to olá he gblo bo fá hugan Alaska tọn mẹ—fihe gbetato lẹ dẹn do yede na kilomẹtlu 100 zungbo tọn lẹ te—agahun zomọ-awenọ Ogbẹ́ Watch Tower Tọn ko yin yiyizan nado do okún Ahọluduta tọn to gbetato hugan 150 lẹ mẹ. Ṣigba whinwhẹ́n gbigbọmẹ tọn gbọn Biblu pinplọn gbesisọ mẹ tọn de dali sinai do wekanhlanmẹ ji. To whenuena e yindọ wekanhlanmẹ nọ yin avùnnukundiọsọmẹnu de na mẹsusu, Biblu plọnmẹtọ de dona yin azọ́n sinsinyẹn-watọ nado sọgan hẹn ojlo nuplọntọ lọ tọn dogbẹ̀. Nawẹ ehe sọgan yin wiwadotana gbọn?

Kathy deanana plọnmẹ Biblu he to nukọnyi de hẹ Edna, dile etlẹ yindọ yé nọ nọ̀ nuhe hugan kilomẹtlu 600 do yedelẹ! Kakati nado nọ basi vọkan kanbiọ lẹ tọn sọn owe oplọn tọn lọ mẹ, Kathy nọ wleawuna azọnwema de po kanbiọ lẹ po bosọ nọ wleawuna otẹn he mẹ yè na wlan gblọndo lẹ do. To whenuena Edna ko wlan gblọndo lẹ do otẹn ehe mẹ godo, Kathy nọ na zẹẹmẹ bosọ nọ yí nudọnamẹ lẹ do e mẹ dile e jẹ do nado hẹn nuagokun de họnwun. Kathy dọmọ: “Yẹn de Mercredi whèjai lẹ dovo na ‘oplọn’ mítọn, podọ yẹn nọ tẹnpọn nado tẹdo tito ehe go dile yẹn na basi do na dope plọnmẹ Biblu tọn devo depope. Yẹn sọ nọ do wepò adlẹsi-mẹdetiti tọn, heyin hiadogona de hlan Edna. To whenuena e nọ yí osẹ awe na wekanhlanmẹ nado jẹ mẹ dè, oplọn de gbọn wekanhlanmẹ dali taidi nude he nọ dọngban.”

Lẹnnupọn do ayajẹ lọ ji to whenuena Kathy po Edna po pé nukun-sọ-nukun to plidopọ agbegbe ji to Anchorage to osun ao oplọn bibasi gbọn wekanhlanmẹ dali tọn godo! Kunnudetọ lẹ sọ yin homẹhunnọ ga nado tindo Biblu plọntọ lẹ po jlodotọ devo lẹ po to mẹplidopọ lẹ mẹ sọn gbetato susu he tin to ovò Alaska tọn lẹ mẹ.

Dile etlẹ yindọ jideji sọgan taidi dọ e dọngban to whedelẹnu, “atinvú” delẹ nọ wú po awuyiya po to whenuena yè dè hinhọ́n nugbo lọ tọn hia yé. To madozẹnzẹn mẹ, hugan gigopana Jehovah tọ́ yọyọ kanweko wẹ nọ yin bibaptizi to owhe dopodopo mẹ to Alaska! Mí dọmọ, “A basi, Jehovah,” na hinhẹn ẹn whẹ́n wutu!