Lilatọ Ahọluduta Tọn lẹ Na Linlin
‘Omẹ Towe lẹ Na Ze Yedelẹ Jó po Ojlo Po’
AWHÀNGAN awhànpa huhlọnnọ Silia tọn Naamani to pòzọ̀n jẹ. Eyin dọ e mayin nukunpedego, azọ̀n ylankan ehe sọgan dekọtọn do agbasa hinhẹngble po okú po mẹ. Etẹwẹ Naamani na wà? To mẹhe tin to whédo Naamani tọn mẹ lẹ wẹ viyọnnu pẹvi de tin te, heyin ‘hinhẹn wá mẹglọnọ sọn aigba Islaeli tọn ji.’ Ewọ dọho po adọgbigbo po bo do yẹwhegan Eliṣa hia taidi mẹhe sọgan hẹnazọ̀ngbọna Naamani.—2 Ahọlu lẹ 5:1-3.
Na tugbigbo etọn wutu, Naamani dín Eliṣa bo yin azọ̀nhẹngbọna. Humọ, Naamani lẹzun sinsẹ̀n-basitọ Jehovah tọn! Numimọ ehe, heyin kinkandai to Biblu mẹ, wá aimẹ to owhe kanweko aotọ J.W.M. (2 Ahọlu lẹ 5:4-15) To egbehe, jọja susu do tugbigbo dopolọ hia to hodidọ po adọgbigbo po do dagbenu Ahọluduta tọn lẹ ji mẹ. Numimọ he bọdego sọn Mozambique do ehe hia.
Nuno owhe-ṣidopo-mẹvi yin wẹnlatọ he ma ko yí baptẹm wẹndagbe lọ tọn de. Etlẹ yin whẹpo e do lẹzun wẹnlatọ he ma ko yi baptẹm de, Nuno nọ bẹ ovi he tin to lẹdo etọn mẹ lẹ pli, nọ hodẹ̀, bo nọ plọn yé Biblu, to yíyí owe lọ Owe Ṣie heyin Otan Biblu Tọn zan.
Whlasusu Nuno nọ yawu fọ́n to samedi afọnnu lẹ bo nọ flin whẹndo etọn dọ: “To egbehe mí na tọ́nyi lizọnyizọn kunnudegbe tọn mẹ.” Zohunhun etọn na lizọnyizọn lọ yin didohia to aliho devo lẹ mẹ. To whenuena e to zinzọnhẹ mẹjitọ etọn lẹ to lizọnyizọn tòhomẹ-liho tọn mẹ to Maputo, Nuno nọ saba dọnsẹpọ gbẹtọ lẹ na edetiti. To nujijọ mọnkọtọn dopo whenu, dawe ajọwatọ de dọnsẹpọ ẹ bo kanse dọmọ: “Naegbọn hiẹ do to linlinnamẹwe ehelẹ sà?” Nuno dọmọ: “Yẹn ma to linlinnamẹwe lọ lẹ sà gba, ṣigba yẹn nọ kẹalọyi nunina lẹ nado gọalọna azọ́n yẹwhehodidọ lọ tọn to akuẹzinzan liho.” Dawe ajọwatọ lọ yigbe dọmọ: “Dile etlẹ yindọ yẹn ma tindo ojlo, yẹn yin whinwhan na walọ po nugopipe towe po. Yẹn na jlo nado basi nunina hlan azọ́n ehe.”
To nujijọ devo whenu, Nuno dọnsẹpọ dawe de to tòhomẹ-liho ji bo ze owe La paix et la sécurité véritables: comment est-ce possible ? donukọnna ẹn. Dawe lọ kanse dọmọ: “Be e mayin hiẹ wẹ nọ yì wehọmẹ he tin to nukọn enẹ ya?” “Mọwẹ,” wẹ Nuno yigbe dọ, “Yẹn nọ yì wehọmẹ enẹ, ṣigba to egbehe yẹn to owẹ̀n titengbe de zedonukọnnamẹ sọn owe ehe mẹ. E dohia we dọ hiẹ sọgan nọgbẹ̀ to aihọn yọyọ lọ mẹ he Jiwheyẹwhe na hẹnwá, dile e yin didohia do to yẹdide lọ mẹ to owe ehe mẹ.” Nuno ma yọnẹn dọ dawe he e to hodọ na lọ yin mẹplọntọ de to wehọ etọn mẹ gba. E mayin dọ mẹplọntọ lọ kẹalọyi owe lọ kẹdẹ wẹ gba ṣigba todin e sọ nọ yí Atọ̀họ̀-Nuhihọ́ Lọ Tọn po Réveillez-vous! po sọn Nuno dè to gbesisọmẹ.
To whenuena Nuno yin kinkanse nuhewutu e nọ jlo nado tindo mahẹ to azọ́n yẹwhehodidọ lọ tọn mẹ, e dọmọ: “Yẹn jlo nado dọho hlan gbẹtọ lẹ bo plọn yé dogbọn Jehovah po Visunnu etọn po, yèdọ Jesu Klisti dali.” E yidogọ dọmọ: “Podọ eyin gbẹtọ lẹ ma jlo nado dotoai, whẹwhinwhẹ́n depope matin nado gblehomẹ gba.”
Lẹdo aihọn pé, fọtọ́n susu jọja lẹ tọn taidi Nuno ‘ze yedelẹ jó po ojlo po’ nado plọnmẹ bo dọyẹwheho dogbọn Ahọluduta Jiwheyẹwhe tọn dali. (Psalm 110:3) Ṣigba ehe ma nọ jọ gbọn kosọ dali gba. Mẹjitọ he plọn ovi yetọn lẹ dogbọn Jehovah dali sọn ovuwhenu, bo ze apajlẹ dagbe de dai to lizọnyizọn lọ mẹ, bo doafọna dagbenu Ahọluduta lọ tọn lẹ po zohunhun po na yin didona susugege.