Be Sọgodo Mítọn Yin Kinkan Dai Jẹnukọn Wẹ?
KLISTIANI, Malenu, Ju, Hindu, kavi mẹhe tindo yise to sinsẹ̀n devo mẹ—yèdọ gbẹtọ he tindo yise voovo lẹ nọ tindo numimọ nugbajẹmẹji tọn bosọ nọ blawu do onú mọnkọtọn ji.
Di apajlẹ, to 6 décembre 1997, nugbajẹmẹji dobu de wá aimẹ to todaho Sibérie tọn mẹ to Irkutsk. Agahun daho ahisinọ lọ AN-124 ṣẹṣẹ fọ́n yiaga wẹ to whenuena awe to zomọ etọn lẹ mẹ gbẹ́ azọ́n. Agahun lọ, he amì gọ́, gbà biọ owhé susu ṣẹnṣẹn. Ohọ̀ susu wẹ yí miyọ́n, bo hẹn okú po awugble po wá na mẹsusu he ma tindo alọgọtọ, gọna ovi homẹvọnọ lẹ.
To lẹdo Sibérie tọn mẹ fie nujijọ ajiji enẹ wá aimẹ te, e yọnbasi dọ gbẹtọ he tindo pọndohlan voovo sinsẹ̀n tọn lẹ wẹ tin to finẹ. Mẹdelẹ sọgan do yise hia to sinsẹ̀n Klistiani tọn mẹ, ṣogan yé sọgan gbẹ́ lẹndọ nugbajẹmẹji lọ yin kọdetọn sẹ́gbè tọn. Yewlẹ po mẹdevo lẹ po sọgan tindo numọtolanmẹ lọ dọ, ‘Ojlo Jiwheyẹwhe tọn wẹ, podọ eyin mẹhe yin hùhù lẹ ma kú to aliho ehe mẹ, yé dona kú to aliho devo mẹ—sẹ́gbè yetọn wẹ.’
Linlẹn mọnkọtọn, vlavo e yin didọtọ́n kavi lala, do linlẹn he gbayipe to sinsẹ̀n susu mẹ lẹdo aihọn pé hia—yèdọ sẹ́gbè. Mẹsusu yise dọ sọgodo mítọn, sọn azán he gbè yè ji mí jẹ kuzán mítọn gbè, to aliho de mẹ yin kinkan dai jẹnukọn.
Yise to sẹ́gbè mẹ tin to wunmẹ susu mẹ, bo hẹn zẹẹmẹ bibasi gigọ́ etọn yin nuhe vẹawu. Sẹ́gbè to paa mẹ do linlẹn lọ hia dọ nulẹpo he jọ, nuwiwa lẹpo, nujijọ lẹpo—vlavo yọ́n kavi ylan—ma sọgan yin alọhẹndotena gba; e ko yin linlẹn nado wá aimẹ na e ko yin dide basina jẹnukọn gbọn huhlọn he yiaga hugan de dali, yèdọ hugan dehe gbẹtọ sọgan deanana. Linlẹn mọnkọtọn sọgan yin mimọ to lẹnunnuyọnẹn sunwhlẹvu pinpọn tọn mẹ, to karma sinsẹ̀n Hindu po Buddhiste tọn po mẹ, podọ to sinsẹ̀n-nuplọnmẹ sẹ́gbè Mẹylọhodotọklisti tọn mẹ. Yigodo jẹ Babilọni hohowhenu tọn mẹ, gbẹtọ lẹ yise dọ yẹwhe lẹ nọ deanana sẹ́gbè po sọgodo po gbọn owe kinkan de dali. E yin yiyise dọ, yẹwhe depope he deanana “nukinkan jọgbe tọn” ehelẹ sọgan basi nudide sẹ́gbè gbẹtọ tọn lẹ, ahọluduta lẹ tọn, yèdọ etlẹ yin yẹwhe lọ lẹ lọsu titi tọn.
Yisenọ susu yise dọ gbọn gbedide sọn olọn mẹ wá dali jẹnukọnna jìjì gbẹtọvi lẹ tọn, Jiwheyẹwhe ko nọ yọ́n nulẹpo he na jọ do gbẹtọ lẹ go, gọna tedidi gbẹzan yetọn tọn, vlavo yé na yin sunnu kavi yọnnu, adọkunnọ kavi wamọnọ, tapònọ kavi ayajẹnọ. Ehe lẹpo yin didọ nado tin to ayiha Jiwheyẹwhe tọn mẹ kavi yin kinkan do owe de mẹ whẹpo e do wá jọ. Gbọnmọ dali e mayin nuyọyọ na yisenọ de nado dọ to whenuena nugbajẹmẹji wá aimẹ dọ, “mektoub,”—e ko yin kinkan dai gbọn Jiwheyẹwhe dali!
Humọ, e nọ yin linlẹn dọ to whenuena e yindọ Jiwheyẹwhe yọ́n onú lẹpo jẹnukọn, e dona ko sọ magbe mẹhe na setonuna ẹn po mẹhe na vẹtoli po tọn. Gbọnmọ dali susu mẹhe nọ tẹdego lẹ tọn yise dọ etlẹ yin whẹpo mẹde nido yin jìjì, Jiwheyẹwhe ko nọ yọnẹn jẹnukọn vlavo ewọ yin linlẹn jẹna ayajẹ madopodo to Paladisi mẹ kavi ewọ na mọ whẹgbledo madopodo yí.
Hiẹ sọgan tindo numọtolanmẹ dọ ehe diblayin nudopolọ po sinsẹ̀n-nuplọnmẹ sẹ́gbè tọn he nọ yin pinplọn to ṣọṣi Mẹylọhodotọklisti tọn delẹ mẹ po. Hagbẹ Plọtẹstant tọn tintan he jẹnukọn nado yiavunlọ na sẹ́gbè wẹ Flansenu owhe kanweko 16tọ Vọjlado-basitọ John Calvin. E basi zẹẹmẹ sẹ́gbè tọn nado yin “gbedide mavọmavọ Jiwheyẹwhe tọn, gbọn ehe dali ewọ nọ magbe nuhe ewọ jlo nado yí omẹ dopodopo do wà tọn. E mayin mẹlẹpo wẹ yin didá to ninọmẹ dopolọ mẹ gba, ṣigba ogbẹ̀ mavọmavọ yin dide jẹnukọn na mẹdelẹ podọ whẹgbledo mavọmavọ na mẹdevo lẹ.” Calvin sọ vọ́ lá dọmọ: “E mayin dọ Jiwheyẹwhe mọ aijijẹ sunnu tintan lọ tọn hlan jẹnukọn, po vasudo kúnkan etọn tọn po kẹdẹ wẹ gba; ṣigba to homẹhunhun ewọ lọsu tọn mẹ e basi tito na ẹn.”
Ṣogan, e mayin hagbẹ sinsẹ̀n he nọ plọnmẹ sẹ́gbè kavi jọgbe lẹpo wẹ yí ì sè na yede titi gba. Mẹdelẹ gbọn jlọjẹ dali dlẹnalọdo dọ nukinkan sinsẹ̀nnọ lẹ tọn donu ojlo mẹdekannujẹ gbẹtọ tọn go. Na nugbo tọn, nudindọn daho ko tin gando nuyiwa gbẹtọvi lẹ tọn go, vlavo yé yin kọdetọn nudide mẹdekannujẹ gbẹtọvi lẹ tọn kavi yé yin kandai etọn basi jẹnukọn gbọn Jiwheyẹwhe dali. Di apajlẹ, mẹdelẹ, ko dọnnu dọ gbẹtọ dona vò nado basi dide bo yinuwa, to whenuena e yindọ Jiwheyẹwhe, mẹhe yin dodonọ de, nọ hẹn gbẹtọ yin azọngbannọ podọ mẹhe na dogbe nuyiwa etọn lẹ tọn. Mẹdevo lẹ dọ dọ Jiwheyẹwhe dá nuyiwa gbẹtọ tọn lẹ ṣigba gbẹtọ to aliho de mẹ “nọ wleawu” yetọn bosọ nọ lẹzun azọngbannọ na yé. Ṣigba, na paa tọn, mẹsusu yise dọ nujijọ lẹpo, daho kavi pẹvi, to gbẹninọ egbesọegbesọ tọn mítọn mẹ ko yin kinkandai gbọn Jiwheyẹwhe dali.
Etẹwẹ hiẹ yise? Be Jiwheyẹwhe ko yọ́n nuhe sọgodo towe na yin jẹnukọn wẹ? Be gbẹtọvi lẹ na nugbo tọn tindo ojlo mẹdekannujẹ tọn, yèdọ nugopipe lọ nado basi nudide nujọnu tọn lẹ dogbọn sọgodo yetọn dali ya? Jẹ obá tẹ mẹ wẹ sọgodo mítọn sinai do nuyiwa mítọn titi lẹ ji te? Hosọ he bọdego na tẹnpọn nado na gblọndo hlan kanbiọ ehelẹ.
[Asisa Yẹdide Tọn to weda 3]
SEL/Sipa Press