Mẹnu Wẹ Jehovah?

JEHOVAH dọna dopo to sinsẹ̀n-basitọ nugbonọ etọn lẹ mẹ dọmọ: “Gbẹtọ mọ mi ma na nọgbẹ̀ gba.” (Eksọdusi 33:20) “Gbigbọ wẹ Jiwheyẹwhe,” podọ gbẹtọ lẹ ma sọgan mọ ẹn po nukun agbasa tọn yetọn lẹ po gba. (Johanu 4:24) Kẹdẹdile pinpọn owhè tlọlọ to owhè ṣadada mẹ na yin awugblenamẹnu de na nukun mítọn lẹ do, mọwẹ e na yin mẹvasudonu de na mí nado mọ Asisa daho huhlọn he dá e mayin owhè sisẹ́ mítọn kẹdẹ gba ṣigba susu owhè madosọha devo he tin to wẹkẹ mẹ lẹ tọn.

Po homẹhunhun po, mí ma dona mọ Jiwheyẹwhe nado sọgan yọ́n onú lẹ gando ewọ go gba. Biblu basi zẹẹmẹ Omẹ lọ he wleawuna nunina jiawu heyin núbudo ehe, yèdọ aigba lọ, na mí bosọ do gbẹtọ-yinyin etọn hia. Enẹwutu nuhe sọgbe wẹ e yin nado pọ́n Biblu mẹ nado yọnẹn dogbọn Otọ́ lọ mẹhe na ogbẹ̀ mí bosọ wleawu owhé ayajẹ tọn de he mẹ mí na duvivi ogbẹ̀ enẹ tọn te.

Zẹẹmẹ Oyín Etọn Tọn

Oyín lẹpo tindo zẹẹmẹ lẹ, dile etlẹ yindọ mẹsusu sọgan nọ ma yọ́n yé to egbehe. Di apajlẹ, oyín gbayipe Glẹnsigbe tọn lọ David wá sọn hogbe Heblu tọn he zẹẹmẹdo “Mẹyiwanna” mẹ. Oyín Mẹdatọ lọ tọn, yèdọ Jehovah, lọsu tindo zẹẹmẹ de ga. Etẹwẹ e yin? To ogbè Biblu tọn dowhenu tọn Heblu mẹ, oyín sọn olọn mẹ wá lọ nọ yin kinkan po wekun ẹnẹ po, yèdọ YHWH, bosọ sọawuhia na nudi whla 7 000 to adà Biblu Heblu tọn lọ mẹ. Oyín sọn olọn mẹ wá lọ yin nukunnumọjẹemẹ nado zẹẹmẹdo “E Hẹn Nado Lẹzun.” E zẹẹmẹdo dọ Jehovah gbọn nuyọnẹn dali hẹn ede nado lẹzun nudepope he ewọ dona yin nado sọgan basi wadotana lẹndai etọn lẹ tọn. Ewọ yin Mẹdatọ, Whẹdatọ, Mẹwhlẹngantọ, Ogbẹ̀ Hẹndotetọ, podọ na enẹwutu ewọ sọgan hẹn opagbe etọn lẹ di. Dehe tlẹ hugan lọ, to Heblugbe mẹ oyín Jehovah tọn to aliho de mẹ dlẹnalọdo nuyiwa he to yinyin wiwadotana de. Mọwẹ, Jehovah gbẹsọ to ede hẹn zun hẹnditọ lẹndai etọn lẹ tọn. Jiwheyẹwhe he tin to ogbẹ̀ de wẹ ewọ!

Jẹhẹnu Yiaga Jehovah Tọn Lẹ

Biblu basi zẹẹmẹ Mẹdatọ lọ tọn taidi “Jiwheyẹwhe he gọna akọndonanu podọ dagbewanyinọ, awuwhletọ nado sadi, podọ susunọ to lẹblanu po nugbo po mẹ; he nọ yí lẹblanu whlá na fọtọ́n fọtọ́n lẹ, he nọ jona oylankan po oylanwiwa po po oylando po.” (Eksọdusi 34:6, 7) Hogbe lọ “dagbewanyinọ” yin lẹdogbedevomẹ hogbe Heblu tọn he gọna zẹẹmẹ taun de tọn. E nọtena homẹdagbe de he gbọn owanyi dali tẹ́ ede do nude go kakajẹ whenuena lẹndai etọn na onú enẹ lọ yin wiwadotana. E sọgan sọ yin lilẹdogbedevomẹ do “owanyi nugbo” tọn. Homẹdagbe Jehovah tọn gbọn owanyi dali tẹ́ ede do nudida etọn lẹ go bosọ basi wadotana lẹndai jiawu etọn tọn. Be hiẹ ma na wlebòna owanyi mọnkọtọn sọn Omẹ lọ he ko na we ogbẹ̀ dè ya?

Jehovah nọ whleawu nado gblehomẹ bosọ nọ yawu nado jo nuṣiwa mítọn lẹ na mí. Homẹmiọnnamẹnu de wẹ e yin nado dọnsẹpọ omẹ mọnkọtọn. Ṣogan, enẹ ma zẹẹmẹdo dọ ewọ nọ yí nukun pẹvi do pọ́n ylanwiwa gba. E lá dọmọ: “Yẹn [Jehovah, NW ] yiwanna whẹdida, yẹn gbẹwanna ajojẹ to mawadodo mẹ.” (Isaia 61:8) Taidi Jiwheyẹwhe whẹdida dodo tọn, ewọ ma na kẹalọyi ylanwatọ tasinyẹntọ lẹ he gbọṣi kanyinylan yetọn mẹ lẹ kakadoi gba. Gbọnmọ dali, mí sọgan deji dọ to ojlẹ sisọ etọn mẹ, Jehovah na basi vọjlado whẹdida agọ̀ he tin to aihọn mẹ lẹ tọn. Ewọ ma na gbẹkọ mẹhe yin yasana lẹ go gba.

E ma bọawu nado hẹn jlẹkaji-ninọ pipé de go to owanyi po whẹdida dodo po ṣẹnṣẹn gba. Eyin hiẹ yin mẹjitọ de, be hiẹ nọ mọ ẹn taidi nuhe vẹawu nado de to whetẹnu, lehe, podọ jẹ obá he mẹ hiẹ na na mẹplọnlọ ovi towe lẹ jẹ to whenuena yé ṣinuwa wẹ ya? Nado hẹn whẹdida dodo po owanyi awuvẹmẹ tọn po do jlẹkaji biọ nuyọnẹn tlala. Jẹhẹnu enẹ wẹ Jehovah dohia to susugege mẹ to whenuena e to nuyiwa hẹ gbẹtọvi lẹ. (Lomunu lẹ 11:33-36) Na nugbo tọn, nuyọnẹn Mẹdatọ lọ tọn sọgan yin mimọ to filẹpo, di apajlẹ to nujiawu nudida he lẹdo mí pé lẹ tọn mẹ.—Psalm 104:24; Howhinwhẹn lẹ 3:19.

Etomọṣo, nuyọnẹn tintindo poun ma ko pé gba. Nado basi wadotana ojlo etọn tọn, Mẹdatọ lọ sọ dona tindo huhlọn ga, podọ Biblu dehia dọ ewọ yin huhlọnnọ taun dọmọ: “Ze nukun mìtọn daga, bo pọ́n, mẹnu wẹ dá onú helẹ, bosọ hẹn awhàn sọhasọha yetọn jẹgbonu: e nọ ylọ oyín yetọn dopodopo gbọn kiklo huhlọn etọn tọn dali, na ewọ sinyẹn to huhlọn mẹ; depope ma pò.” (Isaia 40:26) Po “kiklo huhlọn etọn tọn” po, Jehovah nọ hẹn onú lẹ yin wiwà. Be jẹhẹnu mọnkọtọn ma na dọ̀n we sẹpọ ewọ ya?

Jiwheyẹwhe Akọta Lẹpo Tọn

‘Ṣigba be Jehovah mayin Jiwheyẹwhe “Alẹnu Hoho” tọn, yèdọ Jiwheyẹwhe Islaeli hohowhenu tọn ya?’ wẹ hiẹ sọgan kanse. Nugbo wẹ dọ Jehovah do ede hia Islaelivi lẹ. Ṣogan, gbọn jijọ dagbe didá asu po asi po tintan tọn dali, Jehovah yin Jiwheyẹwhe “mẹhe mẹ yè ylọ oyín whédo . . . aihọn mẹ tọn lẹpo tọn te.” (Efesunu lẹ 3:15) Eyin hiẹ yise dọ e yin nuhe sọgbe nado na sisi tọgbo towe lẹ, be e ma na yin nuhe sọgbe nado gbògbéna Omẹ lọ he na ogbẹ̀ hlan sunnu tintan lọ, yèdọ tọgbo paa mítọn lọ, mẹhe yin dodonu kúnkan lẹpo he tin to aigba ji to egbehe tọn ya?

Mẹdatọ gbẹtọvi lẹ tọn mayin mẹhe ma tindo awuvẹmẹ gba. Nugbo wẹ dọ, to ojlẹ de mẹ wayi ewọ tindo haṣinṣan vonọtaun hẹ akọta Islaeli tọn. Ṣigba etlẹ yin to whenẹnu, ewọ kẹalọyi mẹlẹpo he ylọ oyín etọn lẹ. Ahọlu nuyọnẹntọ Islaeli tọn de dọ to odẹ̀ mẹ hlan Jehovah dọmọ: “Gbọn ojonọ lọ tọn dali, he ma tin sọn Islaeli omẹ towe lẹ mẹ gba, whenuena e na tọ́n sọn otò dindẹn de mẹ wá na oyín towe tọn wutu . . . hiẹ ni sè to olọn otẹn fininọ towe mẹ, bo wà kẹdẹdi ehe ojonọ lọ ylọ hlan we na lẹpo; na akọta aigba tọn lẹpo nido yọ́n oyín towe.” (1 Ahọlu lẹ 8:41-43) Kakajẹ egbehe, gbẹtọ akọta lẹpo tọn sọgan wá yọ́n Jehovah bo tindo haṣinṣan he tindo zẹẹmẹ de hẹ ewọ. Ṣigba nawẹ enẹ yinuwa do hiẹ ji gbọn?

Alemọyi Jehovah Yinyọnẹn Tọn Lẹ

Nado lẹkọwa apajlẹ he tin to hosọ he jẹnukọn lọ mẹ ji, eyin hiẹ mọ nunina heyin núbudo he dọnmẹdogo de yí, to jọwamọ liho hiẹ na jlo nado yọ́n nuhe nunina lọ tin na. Nawẹ e dona yin yiyizan bo yin nukunpedego gbọn? Mọdopolọ, mí jlo na yọ́n nuhe Jiwheyẹwhe tindo to ayiha mẹ to whenuena e wleawu aigba lọ tọn na mí. Biblu dọ dọ ewọ “ma dá ẹ tata gba,” ṣigba e “do e na mí nido nọnọ̀ e mẹ,” enẹ wẹ yin, gbọn gbẹtọvi lẹ dali.—Isaia 45:18.

Nalete, suhugan gbẹtọvi lẹ tọn ma penukundo nunina Mẹdatọ lọ tọn go gba. Yé to nuyiwa nado và aigba lọ sudo, he hẹn homẹgble Jehovah taun. Ṣogan, sọgbe hẹ nuhe oyín etọn nọtena lọ, Jehovah magbe nado hẹn lẹndai dowhenu tọn etọn na gbẹtọ po aigba po di. (Psalm 115:16; Osọhia 11:18) Ewọ na jla aigba lọ do bosọ yí ì taidi ogú de hlan mẹhe jlo nado nọgbẹ̀ taidi ovi tonusetọ etọn lẹ.—Matiu 5:5.

Owe godo tọn Biblu tọn basi zẹẹmẹ lehe ninọmẹ onú lẹ tọn na tin te to whenuena enẹ na jọ dọmọ: “Doayi e go, gohọ Jiwheyẹwhe tọn tin to gbẹtọ lẹ dè, ewọ nasọ nọhẹ yé, yé na yin omẹ etọn, . . . Jiwheyẹwhe nasọ súnsún dasin lẹpo sẹ̀ sọn nukun yetọn mẹ; okú ma nasọ tin bà, kavi awubla, kavi avi, mọ awufiẹsa ma na tin bà: na onú tintan lẹ ko juwayi.” (Osọhia 21:3, 4) To whenẹnu mẹdepope ma na kùn dasin awubla tọn kavi viavi na hẹnbu mẹyiwanna de tọn wutu bà. Mẹdepope ma na dawhá jẹgbonu na alọgọ todido matindo tọn kavi jiya awufiẹsa azọ̀n mẹhusudo tọn lẹ bà. Yèdọ ‘okú na yin vivasudo.’ (1 Kọlintinu lẹ 15:26; Isaia 25:8; 33:24) Ehe basi zẹẹmẹ wunmẹ ogbẹ̀ he Jehovah jlo dọ mí ni duvivi etọn to dowhenu to whenuena e dá tọgbo mítọn tintan lẹ.

Na nugbo tọn, hiẹ sọgan tindo pọndohlan ninọmẹ taidi paladisi tọn mọnkọtọn lẹ todin to sinsẹ̀n-basitọ Jehovah tọn lẹ ṣẹnṣẹn. Ewọ dọna yé dọmọ: “Yẹn [Jehovah, NW ] Jiwheyẹwhe towe, he plọn we na alè, he plan we gbọn aliho he ji hiẹ na gbọ̀n.” (Isaia 48:17) Jehovah yin Otọ́ he jọmẹ de he nọ plọn mí, yèdọ ovi etọn lẹ, aliho gbẹninọ tọn he yọ́n hugan lọ. Anadenamẹnu etọn lẹ na gbẹtọvi lẹ wleawu, e mayin aliglọnnamẹnu he ma sọgbe lẹ gba, ṣigba hihọ́ owanyinọ. Hihodo yé na dekọtọn do mẹdekannujẹ po ayajẹ nugbo po mẹ, kẹdẹdile e yin winwlan do dọmọ: “Dinvie Jehovah lọ wẹ gbigbọ lọ; podọ fie gbigbọ Jehovah tọn tin te, mẹdekannujẹ tin to finẹ.” (2 Kọlintinu lẹ 3:17, NW ) Gbọn hihodo anadenamẹnu heyin tito do hukanji to Biblu mẹ lẹ dali, mẹhe kẹalọyi gandudu etọn lẹ to numimọ jijọho ayiha mẹ tọn de tindo todin he na gbayipe to aihọn gbẹtọvi tọn lẹpo mẹ to gbedopo.—Filippinu lẹ 4:7.

Otọ́ dagbewatọ nankọ die Jehovah yin! Be hiẹ jlo nado plọnnu susu dogọ dogbọn Omẹ lọ he tin to godo na nujiawu nudida tọn lẹpo dali ya? Na mẹhe jlo lẹ, alemọyi lọ lẹ yin nuhọakuẹ tlala yèdọ etlẹ yin todin. Podọ to sọgodo dona lẹ na yin mavọmavọ.

[Yẹdide to weda 5]

Oyín sọn olọn mẹ wá lọ heyin kinkan po wekun Heblu tọn ẹnẹ lẹ po sọgan yin mimọ to adó ṣọṣi hoho susu tọn go