WESẸDOTẸN INTẸNẸT JI TỌN Watchtower Tọn
WESẸDOTẸN INTẸNẸT JI TỌN
Watchtower Tọn
Gungbe
ẹ,ọ,ṣ
  • á
  • à
  • é
  • è
  • Ẹ
  • ẹ
  • ẹ́
  • ẹ̀
  • í
  • ì
  • ó
  • ò
  • Ọ
  • ọ
  • ọ́
  • ọ̀
  • Ṣ
  • ṣ
  • ú
  • ù
  • BIBLU
  • OWE LẸ
  • OPLI LẸ
  • w98 1/8 w. 3-4
  • Be Whẹdida Mawadodo Ma Sọgan Yin Didapana Wẹ?

Video de ma tin na adà ehe

Jaale, nuhahun de wá aimẹ gando video lọ go.

  • Be Whẹdida Mawadodo Ma Sọgan Yin Didapana Wẹ?
  • Atọ̀họ̀-Nuhihọ́ lọ Tọn He To Ahọluduta Jehovah Tọn Lá—1998
  • Hóvila Lẹ
  • Hosọ Mọnkọtọn
  • Adà Ylankan Whẹdida Mawadodo Tọn Lẹ
  • Be Whẹdida Mawadodo Yin Nujọnu Wẹ Ya?
  • Be Whẹdida Dodo Na Wá Tin to Aihọn mẹ Gbede Ya?
    Hosọ Devo Lẹ
  • Aliho Dagbe Hugan lọ Nado Yinuwa Sọta Mawadodo
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá (Oplọn)—2025
  • Hiẹ Sọgan Doakọnna Whẹdida Mawadodo!
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2007
  • Kanbiọ Sinai Do Biblu Ji
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2014
Pọ́n Nudevo Lẹ
Atọ̀họ̀-Nuhihọ́ lọ Tọn He To Ahọluduta Jehovah Tọn Lá—1998
w98 1/8 w. 3-4

Be Whẹdida Mawadodo Ma Sọgan Yin Didapana Wẹ?

“Mahopọnna nulẹpo yẹn gbẹsọ yise dọ gbẹtọ lẹ yọ́n to ahun mẹ na nugbo tọn. Yẹn ma sọgan wleawuna todido ṣie lẹ do dodonu he bẹ bẹwlu, yajiji, po okú po hẹn ji poun gba.”—Anne Frank.

ANNE FRANK, Juvi viyọnnu jọja owhe 15 mẹvi de, kàn hogbe awubla tọn enẹlẹ dai to kandaiwema etọn mẹ ojlẹ kleun de jẹnukọnna okú etọn. Na hugan owhe awe, whẹndo etọn ko yin whiwhla, bo yin bibẹ do adó-gbọgbé de mẹ to Amsterdam. Todido etọn lẹ na aihọn he pọnte de yin hinhẹn jẹvọ́ to whenuena mẹdehiatọ de tún aṣli fie yé tin te tọn na Nazi lẹ. To owhe he bọdego mẹ, 1945, ovà asu hù Anne to opá yasanamẹ Bergen-Belsen tọn mẹ. Juvi livi ṣidopo devo lẹ jiya nugbajẹmẹji dopolọ tọn.

Tito ylankan Hitler tọn nado và gbẹtọ blebu delẹ sudo sọgan yin whẹho whẹdida mawadodo sinmẹ agbasa tọn he ylan hugan he owhe kanweko mítọn ko mọ, ṣigba e mayin enẹ kẹdẹ gba. To 1994 hugan madawe livi dopo Tutsi lẹ tọn wẹ yin hùhù matin awubla to Rwanda, na yé tọ́n sọn akọ̀ “he gbọnvo” mẹ poun wutu. Podọ to wẹkẹ-whàn tintan whenu, nudi omẹ Armenia tọn livi dopo wẹ kú to mẹhuhu akọ̀ tọn de mẹ.

Adà Ylankan Whẹdida Mawadodo Tọn Lẹ

Akọ̀ vivasudo mayin adà dopo kẹdẹ whẹdida mawadodo tọn gba. Whẹdida mawadodo ogbẹ́ tọn ko hẹn nudi madoatọ́n akọ̀ gbẹtọ tọn biọ gbẹzan ohẹ́n mlẹnmlẹn tọn mẹ. Dehe tlẹ ylan hugan, pipli jlọjẹ gbẹtọ tọn na Agọjijẹdo Kanlinmọ Akọjọpli tọn yí-sọha na dọ hugan gbẹtọ 200 000 000 wẹ tin to kanlinmọgbenu. Etlẹ yọnbasi dọ kanlinmọ susu ni tin to aihọn lọ mẹ to egbehe hugan ojlẹ devo depope to whenuho mẹ. Yé sọgan nọ mayin sisà to ahi ahidenanu paa tọn lẹ mẹ, ṣigba ninọmẹ azọ́nwiwa tọn yetọn lẹ nọ saba ylan hugan suhugan kanlinmọ ojlẹ dai tọn lẹ tọn.

Whẹdida mawadodo whẹho osẹ́n tọn nọ fin jlọjẹ tangan livi susu lẹ tọn yí sọn yé si. “Danuwiwa sọta jlọjẹ gbẹtọvi tọn lẹ nọ yin bibasi diblayin to egbesọegbesọ, to fide to aihọn lọ mẹ,” wẹ Ogbẹ́ Avùnlọyitọ Akọjọpli tọn dọ to linlin 1996 tọn etọn mẹ. “Mẹhe nọ saba tin to owù mẹ lẹ wẹ wamọnọ po madogánnọ lẹ po, titengbe yọnnu lẹ, ovi lẹ, mẹhomẹ gọna fibẹtado dintọ lẹ.” Linlin lọ doayi e go dọmọ: “To otò delẹ mẹ, ninọmẹ dolilo akọta lẹ tọn ko dibla gbakija, matin aṣẹpipa sọgbe hẹ osẹ́n depope nado basi hihọ́na madogánnọ lẹ sọn huhlọnnọ lẹ si.”

To 1996 gblamẹ omẹ fọtọ́n donu ao lẹ wẹ yin wiwle bo yin yasana to otò hugan kanweko lẹ mẹ. Podọ to owhe agọe tọn lẹ mẹ, fọtọ́n donu kanweko gbẹtọ lẹ tọn wẹ ko bú poun, e họnwun dọ yé yin wiwle po huhlọn po gbọn vlavo hagbẹ hihọ́-basinamẹtọ lẹ kavi pipli nukunbianamẹtọ lẹ tọn dali. Susu yetọn wẹ yin nukundo nado ko kú.

Na nugbo tọn, awhàn lẹ yin nujijọ ylankan he yè ma sọgan dapana, ṣigba yé to yinylan deji. Awhàn egbezangbe tọn nọ yangbe omẹ paa lẹ tọn, gọna yọnnu lẹ po ovi lẹ po. Podọ ehe mayin bọmbu didà matin mẹtọnhopọn do otò lẹ mẹ wutu poun gba. Yọnnu lẹ po awhli lẹ po nọ yin huhlọn-yido-zanhẹ gbọzangbọzan taidi apadewhe nuwiwa awhànfuntọ lẹ tọn, podọ pipli gufọntọ lẹ tọn nọ yí huhlọn do wle ovi lẹ nado plọn-azọ́n yé nado lẹzun mẹhutọ lẹ. To hodidọ do nuyiwa mọnkọtọn lẹ ji mẹ, linlin Plidopọ Akọta lẹ tọn heyin “Nuyiwadomẹji Nudindọn tọn do Ovi lẹ Ji” dọmọ: “Adà aihọn lọ tọn he to susu deji to lilẹzun mẹhe ma tindo walọ dagbe lẹ.”

Ayihaawe depope matin dọ walọ dagbe matindo ehe ko hẹnmẹ jẹ aihọn he yin gigọ́ po whẹdida mawadodo po kọ̀n—vlavo sinmẹ agbasa tọn, ogbẹ́ tọn, osẹ́n tọn, kavi awhànfunfun tọn. Nugbo wẹ dọ, ehe mayin onú yọyọ de. Hugan owhe fọtọ́n awe e lan fowe kanweko die wayi, yẹwhegan Heblu tọn de doavigbe dọmọ: “Osẹ́n yin madogánnọ bo ma yọ́n-na-yizan, podọ owhẹ̀ dodo ma nọ yin didá gbede. Mẹylankan lẹ nọ duale dodonọ lẹ tọn, enẹwutu wẹ whẹdida dodo yin kọslona.” (Habakkuk 1:4, Today’s English Version) Dile whẹdida mawadodo tlẹ ko gbayipe to whepoponu sọ, owhe kanweko 20tọ mítọn dona yin owhe lọ he mẹ whẹdida mawadodo jẹ agayiyi yọyọ lẹ kọ̀n.

Be Whẹdida Mawadodo Yin Nujọnu Wẹ Ya?

E yin nujọnu to whenuena hiẹ lọsu jiya taidi kọdetọn whẹdida mawadodo tọn. E yin nujọnu na e nọ fin jlọjẹ suhugan akọ̀ gbẹtọvi tọn na ayajẹ yí sọn yé si. Podọ e sọ yin nujọnu na whẹdida mawadodo nọ saba fọ́n nudindọn hùnsọndai tọn lẹ dote, ehe to godo mẹ, nọ hẹn miyọ́n whẹdida mawadodo tọn nado to jiji zọnmii.

Jijọho po ayajẹ po yin ṣiṣakadopọ po whẹdida dodo po, ṣigba whẹdida mawadodo nọ gbà todido bosọ nọ finyọ́n pọndohlan dagbe hù. Dile Anne Frank po awubla po wá mọ do, gbẹtọ lẹ ma sọgan wleawuna todido yetọn lẹ do dodonu he bẹ bẹwlu, yajiji, po okú po hẹn ji gba. Taidi ewọ, mímẹpo tindo ojlo vẹkuvẹku na nuhe yọ́n hugan de.

Ojlo ehe ko plan omẹ ahunjijlọnọ lẹ nado tẹnpọn nado hẹn whẹdida dodo jẹ obá de mẹ wá ogbẹ́ gbẹtọvi tọn mẹ. Hlan yanwle enẹ kọ̀n, Nulila Akọjọpli tọn na Jlọjẹ Gbẹtọvi tọn, heyin alọkẹyi to 1948 gbọn Plidopọ Paa Plidopọ Akọta lẹ tọn dali, dọmọ: “Gbẹtọvi lẹpo yin jiji do mẹdekannujẹ mẹ bosọ yin onú dopolọ to yẹyi po jlọjẹ po mẹ. Yé yin nina lẹnpọn po ayihadawhẹnamẹnu po bo dona yinuwa hlan ode awetọ to gbigbọ mẹmẹsunnu-yinyin tọn mẹ.”

Ehelẹ na jide tọn yin hodidọ nuyọnẹn tọn lẹ, ṣigba gbẹtọvi lẹ gbẹsọ dẹn taun do yanwle họakuẹ enẹ kọ̀n jijẹ—yèdọ ogbẹ́ jijlọ de to fie mẹlẹpo nọ duvivi jlọjẹ dopolọ lẹ te bọ mẹlẹpo nọ yinuwa hẹ hatọ yetọn lẹ taidi mẹmẹsunnu. Yanwle ehe kọ̀n jijẹ, dile Nulila homẹbibiọ Plidopọ Akọta lẹ tọn dlẹnalọdo do, na yinuwa taidi “dodonu na mẹdekannujẹ, whẹdida dodo, po jijọho po to aihọn lọ mẹ.”

Be whẹdida mawadodo ko lẹzun apadewhe ogbẹ́ gbẹtọvi tọn sọmọ bọ e ma sọgan yin didesẹ gbede wẹ ya? Kavi be dodonu dolido de na mẹdekannujẹ, whẹdida dodo, po jijọho po sọgan yin didoai to alọpa de mẹ ya? Eyin mọwẹ, mẹnu wẹ sọgan do e ai bosọ yin nujikudonọ dọ mẹlẹpo na mọaleyi?

[Asisa Yẹdide Tọn to weda 3]

UPI/Corbis-Bettmann

    Gun Publications | (1976-2025)
    Ṣí Adà Towe
    Hùn Adà Towe
    • Gungbe
    • Dohlan
    • Nujlomẹ Lẹ
    • Copyright © 2025 Watch Tower Bible and Tract Society of Pennsylvania
    • Osẹ́n Nọtẹn lọ Tọn Lẹ
    • Osẹ́n Nudọnamẹ Mẹdetiti Tọn
    • De Osẹ́n Nudọnamẹ Tọn Lẹ
    • JW.ORG
    • Hùn Adà Towe
    Dohlan