Jidedomẹgo Sọgan Yin Hinhẹngọwa!
DILE etlẹ yindọ nuhahun jimadedomẹgo agọe tọn yin ohia ‘azán godo tọn’ lẹ tọn, jimadedomẹgo ko lẹzun kunnudenu he họnwun na owhe fọtọ́n he wayi lẹ ga. (2 Timoti 3:1) E bẹjẹeji to tintan whenu to nọtẹn he ma yọnbasi de mẹ—yèdọ to paladisi mẹ. Biblu dọ gando nọtẹn lọ go dọmọ: “Jiwheyẹwhe do ojipa de do whèzẹtẹn dali to Edẹni mẹ; finẹ wẹ e yí sunnu he e do lọ do. Podọ sọn aigba mẹ wẹ OKLUNỌ Jiwheyẹwhe hẹn atin hunkọhunkọ wú jẹgbonu, he yọnwhanpẹ na pinpọ́n, bosọ yọ́n na núdùdù: atin ogbẹ̀ tọn lọ ga to ṣẹnṣẹn ojipa lọ tọn podọ atin yinyọ́n dagbe po oylan po tọn lọ.”—Gẹnẹsisi 2:8, 9.
Wefọ he bọdego lẹ tá hinhọ́n do nuhe ehe tindo nado wà po nuhahun jimadedomẹgo egbezangbe tọn po ji. Mí hia dọmọ: “OKLUNỌ Jiwheyẹwhe sọ degbena sunnu lọ, dọmọ, atin he tin to ojipa mẹ lẹpo hiẹ sọgan yí ojlo do dù sọn e mẹ. Ṣigba sọn atin yinyọ́n dagbe po oylan po lọ tọn mẹ hiẹ ma na dù: gbeegbe hiẹ dù enẹtọn mẹ hiẹ na kú dandan.” (Gẹnẹsisi 2:16, 17) Be Adam tindo whẹwhinwhẹ́n depope nado tindo ayihaawe do nuhe Jehovah dọ ji ya?
Mí hia dọmọ: “Odàn sọ yin zinzintọ hú kanlin gbémẹ tọn lẹpo he OKLUNỌ Jiwheyẹwhe dá. E sọ dọ hlan yọnnu lọ, dọmọ, Ojé, Jiwheyẹwhe ko dọmọ Mì ma na dù to atin lẹ mẹ he tin to ojipa mẹ lẹ depope? Yọnnu lọ sọ dọ hlan odàn lọ, dọmọ, Mí sọgan dù to sinsẹ́n atin he to jipa mẹ tọn lẹ mẹ. Ṣigba sọn sinsẹ́n atin he tin to ojipa ṣẹnṣẹn tọn mẹ, Jiwheyẹwhe ko dọmọ, Mì ma na dù sọn e mẹ, mọ mì ma na doalọ e go, mì nikaa kú. Odàn lọ sọ dọ hlan yọnnu lọ, dọmọ, mì ma na kú dandan gba: na Jiwheyẹwhe yọnẹn dọ azán he gbè mìwlẹ dù to e mẹ te, whenẹnu wẹ yè na hùn nukun mìtọn, bọ mìwlẹ na tin di Jiwheyẹwhe, bo nọ yọ́n onú dagbe po oylan po. Whenuena yọnnu lọ mọ dọ atin lọ yọ́n na núdùdù, podọ e sọ yọnwhanpẹ to nukunta, podọ atin he yè na jlo nado hẹn mẹde yọnnuin, e yí sọn sinsẹ́n etọn mẹ, bo dù, bosọ na asú etọn po e po, ewọ sọ dù.”—Gẹnẹsisi 3:1-6.
To gbigbẹ́ avase họnwun Jiwheyẹwhe tọn mẹ, Adam po Evi po do jimadedomẹgo hia to Jehovah mẹ. Yé hodo apajlẹ nukundiọsọmẹtọ Jiwheyẹwhe tọn yèdọ Satani, he ko dọho hlan Evi gbọn odàn paa de gblamẹ. Satani gbọ̀agba jidedomẹgo tọn to aliho gandudu Jehovah tọn mẹ. Na ehe po awagundido po gọna ahun nujikudo tọn de po wutu, e ṣiatẹ sọta Jiwheyẹwhe bo hẹn ali bu na gbẹtọ lẹ biọ nudopolọ wiwà mẹ. E yinuwado yé ji nado lẹn dọ Jiwheyẹwhe ma dona yin jidedego gba.
Etẹwẹ Yin Kọdetọn lọ? Haṣinṣan Nukundiọsọmẹ Tọn Lẹ
Hiẹ sọgan ko doayi e go dọ mẹhe ma nọ dejido mẹdevo go lẹ nọ mọ ẹn yin awusinyẹnnu nado hẹn họntọn-yinyin lẹ go. Publilius Syrus, wekantọ Latin tọn owhe kanweko tintan J.W.M. tọn lọ, wlan dọmọ: “Jidedomẹgo wẹ yin kanṣiṣa họntọn-yinyin tọn dopo lọ.” Gbọn nuyiwa atẹṣiṣi tọn yetọn dali, Adam po Evi po dohia dọ yé ma dejido Jiwheyẹwhe go gba. Enẹwutu, na taun tọn Jiwheyẹwhe matindo whẹwhinwhẹ́n depope nado dejido yé go gba. Taidi kọdetọn gbigbà hanyan jidide, kavi jidedomẹgo tọn, gbẹtọvi tintan lẹ hẹn họntọn-yinyin Jiwheyẹwhe tọn bu. Dohia depope matin dọ Jehovah dọho hlan yé whladopo dogọ pọ́n gbede to whenuena e gblewhẹ okú tọn do yé na atẹṣiṣi yetọn wutu godo.
Haṣinṣan to Adam po Evi po ṣẹnṣẹn sọ jiya ga. Jehovah na avase Evi dọmọ: “To awufiẹsa mẹ wẹ hiẹ na nọ jivi te; awuvivi towe na tin to asú towe de, ewọ wẹ nasọ dugán to ojí we.” (Gẹnẹsisi 3:16, wekun flinflin lẹ yin mítọn) The Jerusalem Bible dọmọ: “Ewọ na duklunọ do ji we.” Kakati nado yí tatọ-yinyin owanyinọ zan do asi etọn ji, dile Jiwheyẹwhe ko jlo do, Adam lẹzun ogán etọn, bo duklunọ do e ji.
To whenuena yé ko waylando godo, Adam tẹnpọn nado sisẹ́ whẹgbledomẹ lọ do asi etọn ji. To linlẹn etọn mẹ nuhe yọnnu lọ ko wà wẹ zọ́n bọ yé do yin yinyan sọn jipa pipé de mẹ biọ aigba he mayin jijlado de mẹ, bo yin whẹgbledo nado yin afanumẹ to ninọmẹ mapenọ-yinyin tọn lẹ mẹ whẹpo do lẹ́gọdo kọgudu mẹ. (Gẹnẹsisi 3:17-19) Mí sọgan lẹnnupọn deji ganji dọ ehe yin asisa wiwọ́ tọn de to omẹ awe lẹ ṣẹnṣẹn. Adam sọgan ko yinuwa-zẹjlẹgo, po gbè-zeyiaga po dọ emi ma na dotoai hlan Evi pọ́n gbede ba. E yọnbasi dọ e na ko tindo numọtolanmẹ whẹsunamẹ tọn to didọna ẹn mẹ dọ, ‘Sọn din sọyi, yẹn wẹ yin aṣẹpatọ lọ!’ To alọ devo mẹ, Evi sọgan ko mọ dọ Adam ko gboawupo to azọngban etọn mẹ taidi tatọ whẹndo tọn, bo hẹn ẹn nado hẹn jidedomẹgo bu to ewọ mẹ. To obá depope mẹ, gbọn dido jimadedomẹgo hia to Jiwheyẹwhe mẹ dali, gbẹtọvi lẹ hẹn họntọn-yinyin yetọn po e po bu bo hẹn haṣinṣan yetọn hẹ ode awetọ gble.
Mẹnu Go Wẹ Mí Sọgan Dejido?
E mayin mẹlẹpo wẹ jẹ na jidedomẹgo mítọn gba, dile apajlẹ Adam po Evi po tọn dohia do. Nawẹ mí sọgan yọ́n mẹhe jẹ po mẹhe ma jẹ na jidedomẹgo mítọn po gbọn?
Psalm 146:3 na avase mí dọmọ: “Mì dotudo ahọvi lẹ go blo, kavi do ovi gbẹtọ tọn go, mẹhe mẹ whlẹngán depope ma tin te.” Podọ to Jẹlemia 17:5-7 mẹ, mí hia dọmọ: “Dẹ̀hodonọ wẹ omẹ lọ he dotudo gbẹtọ go, bo hẹn agbasalan zun awà etọn, podọ ayiha mẹhetọn fọ́nyì sọn OKLUNỌ dè.” To alọ devo mẹ, “Donanọ wẹ omẹ lọ he dotudo OKLUNỌ go, podọ tudonú mẹhetọn OKLUNỌ yin.”
E yin alọkẹyi dọ, jidedo gbẹtọvi lẹ go ma nọ ylan to whepoponu gba. Wefọ enẹlẹ to nuagokun lọ dohia poun dọ jidedo Jiwheyẹwhe go ma nọ yin tẹnmẹ-diọna gbede gba, ṣigba jidedo gbẹtọvi mapenọ lẹ go sọgan planmẹ jẹ nugbajẹmẹji kọ̀n to whedelẹnu. Di apajlẹ, mẹhe dejido gbẹtọvi lẹ go nado wà nuhe Jiwheyẹwhe kẹdẹ wẹ sọgan wà—yèdọ nado wleawuna whlẹngán bo hẹn jijọho gigọ́ po hihọ́ po wá—ko pànta flumẹjijẹ mẹ.—Psalm 46:9; 1 Tẹsalonikanu lẹ 5:3.
Na taun tọn, gbẹtọvi lẹ po nuzedai gbẹtọ tọn lẹ po jẹ na jidedego jẹ obá lọ he mẹ yé yinuwa to kọndopọmẹ hẹ lẹndai Jiwheyẹwhe tọn bo do nunọwhinnusẹ́n jijọ-di-Jiwheyẹwhe tọn lẹ hia te. Gbọnmọ dali, eyin mí dona whàn mẹdevo lẹ nado tindo jidide to mí mẹ, mí dona dọ nugbo, bo yin nugbodọtọ po mẹhe go yè sọgan ganjẹ po. (Howhinwhẹn lẹ 12:19; Efesunu lẹ 4:25; Heblu lẹ 13:18) Gbọn mídelẹ yiyizan to kọndopọmẹ hẹ nunọwhinnusẹ́n Biblu tọn lẹ dali kẹdẹ wẹ jidide he mẹdevo lẹ zedo mí mẹ na yin whẹsuna bo dohia nado yin asisa dolilo pọmẹ tọn po tulinamẹ tọn po.
Jidedomẹgo Hinhẹngọwa
Kunnudetọ Jehovah tọn lẹ tindo dodonu he lodo de na zize jidedomẹgo do Jiwheyẹwhe mẹ bo nọ na tuli mẹdevo lẹ nado wà nudopolọ. Jehovah yin nugbonọ po nugbodọtọ po, mẹhe sọgan yin ginganjẹ e go to whepoponu nado wà nuhe e ko dọ, na “e glo Jiwheyẹwhe nado dolalo” wutu. Jidide heyin zizedo Jiwheyẹwhe owanyinọ ji ma sọgan planmẹ jẹ flumẹjijẹ mẹ pọ́n gbede gba.—Heblu lẹ 6:18; Psalm 94:14; Isaia 46:9-11; 1 Johanu 4:8.
Gbẹtọ he yin kinkọndopọ to tintindo jidide to Jehovah mẹ lẹ po mẹhe nọgbẹ̀ gbọn nunọwhinnusẹ́n etọn lẹ dali po nọ yin whinwhan sinsinyẹn nado do jidide hia to ode awetọ mẹ. To aihọn he to oya nuhahun jimadedomẹgo tọn ji de mẹ, ayajẹ nankọ die nado mọ gbẹtọ he go yè sọgan dejido lẹ! Lẹnnupọndo lehe aihọn na gbọnvo do eyin mí sọgan tindo jidide mlẹnmlẹn to nuhe mẹlẹpo nọ dọ kavi nọ wà mẹ! To aihọn yọyọ he Jiwheyẹwhe ko dopagbe etọn mẹ ehe wẹ na yin whẹho lọ. Nuhahun jimadedomẹgo tọn ma na tin whladopo dogọ pọ́n gbede ba!
Be hiẹ na jlo nado nọgbẹ̀ to whenẹnu ya? Eyin mọwẹ, Kunnudetọ Jehovah tọn lẹ basi oylọ na we nado hẹn jidide towe lodo to Jiwheyẹwhe mẹ podọ to opagbe etọn lẹ mẹ gbọn nupinplọn dogọ dogbọn nubiọtomẹsi etọn lẹ dali na gbẹninọ. Oplọn Biblu tọn de nọ ze kunnudenu lẹ donukọnnamẹ dọ Jiwheyẹwhe tin, dọ e tindo ojlo to dagbemẹ-ninọ gbẹtọvi lẹ tọn mẹ, podọ e na yinuwa to madẹnmẹ nado jla nuhahun aihọn tọn do gbọn Ahọluduta etọn gblamẹ. Gbẹtọ livi susu wẹ ko plọn nado tindo jidide to Jiwheyẹwhe mẹ podọ to Ohó etọn, yèdọ Biblu lọ mẹ. Homẹ Kunnudetọ Jehovah tọn lẹ tọn na hùn nado basi dohia sinsẹ̀nzọn gbangba oplọn Biblu tọn he yé nọ zedonukọnnamẹ vọnu na we. Kavi kanwe hlan zinjẹgbonutọ linlinnamẹwe ehe tọn lẹ na nudọnamẹ yinukọn dogọ.
[Yẹdide to weda 5]
Jimadedo Jiwheyẹwhe go nọ planmẹ jẹ haṣinṣan gbẹtọvi tọn hinhẹngble kọ̀n
[Yẹdide to weda 6]
Gbẹtọvi lẹ jẹ na jidedego eyin yé yinuwa to kọndopọmẹ hẹ nunọwhinnusẹ́n jijọ-di-Jiwheyẹwhe tọn lẹ