Basi Yizan Dagbe Hugan Gbẹzan Towe Tọn — WESẸDOTẸN INTẸNẸT JI TỌN Watchtower Tọn

Basi Yizan Dagbe Hugan Gbẹzan Towe Tọn

OTỌ́ lọ tin to họmẹ, to adọ́zan ji, bo to kúkú jei sọn azọ̀n agbasa wiwọ̀ tọn si. Visunnu etọn tin to azọ́nhọsa, bo to azọ́nwanu otọ́ etọn tọn lẹ súnsún. Dile azọ́nwanu lọ lẹ tin to alọmẹ na ẹn, e lẹnnupọn dogbọn onú dagbe he otọ́ etọn ko yí yé do basi lẹ dali. Dile etlẹ yindọ azọ́nhọsa lọ ma dẹn do ohọ̀ lọ, e yọnẹn dọ otọ́ emitọn ma nasọ biọ finẹ pọ́n gbede ba, yèdọ ma nasọ doalọ azọ́nwanu he e nọ yizan po awubibọ po sọmọ lẹ go gbede ba. Ojlẹ enẹ ko wayi.

Ovi lọ lẹnnupọn do wefọ he tin to Yẹwhehodọtọ 9:10 mẹ ji he dọmọ: “Onú depope alọ towe mọ yin wiwà, yí huhlọn towe lẹpo do wà ẹ; na azọ́n matin, linlẹn matin, zinzan matin, kavi nuyọnẹn to kutomẹ fie hiẹ jei.” E yọ́n wefọ enẹ ganji. E ko yí ì zan whla susu to whenuena e to nugbo Biblu tọn plọnmẹ dọ okú yin ninọmẹ nudemayiwà tọn. Todin zínpinpẹn hodidọ Sọlọmọni tọn jẹ ahun etọn go—mí dona zan gbẹzan to gigọ́mẹ bo duvivi azán mítọn lẹ tọn to whenuena mí sọgan wàmọ na ojlẹ lọ na wá to whenuena mí ma na penugo nado wàmọ ba.

Duvivi Ogbẹ̀ Tọn

To owe Yẹwhehodọtọ tọn blebu mẹ, Ahọlu nuyọnẹntọ Sọlọmọni dotuhomẹna wehiatọ etọn lẹ nado mọ vividudu to ogbẹ̀ mẹ. Di apajlẹ, weta 3, dọmọ: “Yẹn yọnẹn dọ dagbe de matin to yé mẹ, adavo na gbẹtọ ni to ayajẹ, bosọ to dagbe wà to ayiha etọn mẹ. Podọ na mẹdopodopo ni to dùdù, bosọ to nùnù, na e ni to vivi magbọjẹ etọn lẹpo tọn dù, nunina Jiwheyẹwhe tọn wẹ.”—Yẹwhehodọtọ 3:12, 13.

Sọlọmọni yin gbigbọdo gbọn Jiwheyẹwhe dali nado basi dọvọdọ linlẹn ehe tọn dọmọ: “Doayi e go, ehe yẹn mọ nado yin dagbe bosọ jẹ na omẹ de wẹ nado dù, bosọ nù, na e ni to jijọho dù to magbọjẹ etọn he e basi to owhè glọ lẹpo mẹ, to gbẹzan etọn lẹpo mẹ, he Jiwheyẹwhe yí na ẹn: na ehe wẹ mimá etọn.—Yẹwhehodọtọ 5:18.

Mọdopolọ, e dotuhomẹna jọja lẹ dọmọ: “To ayajẹ to ovú whenu towe hiẹ omẹ winyanwinyan e, bosọ gbọ ayiha towe ni doawuyana we to ovú whenu towe, bosọ to zọnlinzin to aliho ayiha towe tọn ji, podọ to mimọ nukun towe tọn mẹ.” (Yẹwhehodọtọ 11:9a) Lehe e yin nuhe yọ́n do sọ nado duvivi huhlọn po nugopipe jọja whenu tọn po to gigọ́mẹ!—Howhinwhẹn lẹ 20:29.

‘Flin Mẹdatọ Towe’

Nugbo wẹ dọ, Sọlọmọni ma to didọ dọ nuyọnẹnnu wẹ nado doafọna nulẹpo he sọgan dọ̀n ahun kavi nukun mítọn lẹ gba. (Yijlẹdo 1 Johanu 2:16 go.) Ehe họnwun hezeheze sọn nuhe e dọ bọdego mẹ dọmọ: “Ṣigba hiẹ ni yọ́n ehe dọ, na onú helẹ [yanwle he sọgan na pekọ ojlo mìtọn lẹ] Jiwheyẹwhe na hẹn we biọ whẹdida mẹ.” (Yẹwhehodọtọ 11:9b) Mahopọnna sọha owhe mítọn tọn, mí dona flin dọ Jiwheyẹwhe nọ doayi nuhe mí to gbẹzan mítọn lẹ yí do wà go bo nasọ dawhẹna mí to gbesisọmẹ hẹ ẹ.

Lehe e yin nulúnọnu do sọ nado lẹndọ mí sọgan zan gbẹzan ṣejannabi tọn bo sisẹ mẹdezejo jijọ-di-Jiwheyẹwhe tọn hlan owhe godo tọn lẹ mẹ! Ogbẹ̀ mítọn sọgan wá vivọnu to ojlẹ depope mẹ. Yin e ma tlẹ yinmọ, Jiwheyẹwhe sinsẹ̀n ma nọ bọawu to owhe yọnhopipo tọn mẹ gba. To nugbo ehe yinyọnẹn mẹ, Sọlọmọni wlan dọmọ: “Flin Mẹdatọ towe to azán ovu whenu towe tọn, whenuena azán oylan tọn ma ko wá, bọ owhe ma ko sẹyamẹ, whenuena hiẹ na dọmọ, yẹn ma tindo homẹhun to yé mẹ gba.”—Yẹwhehodọtọ 12:1.

Yọnho-whe nọ yinuwadomẹji. To hogbe yẹhiadonu tọn lẹ mẹ Sọlọmọni basi zẹẹmẹ nuyiwadomẹji yọnho-whe mẹ tọn lẹ bọdego. Alọ po awa lẹ po nọ gbọjọ, afọ lẹ na lẹzun madogánnọ, bọ adú lẹ na whè to sọha mẹ. Oda lẹ na wé bo na ja yìngbe. Amlọn ma nọ yìkànmẹ ba bọ yè nọ yin finfọ́n gbọn ogbè ohẹ de tọn dali. Awutugonu numọtolanmẹ tọn lẹ—numimọ, nusise, alọdidonugo, owansise, po otọ́n tọn po—popolẹpo nọ depò. Agbasa he ko gbọjọ lọ nọ dekọtọn do budisi ayijijẹ po “sisọsisọ” devo lẹ po mẹ to aligbọntẹn paa lẹ ji. Yigodo yinukọn omẹ lọ na kú.—Yẹwhehodọtọ 12:2-7.

Owhe yọnho mẹ tọn yin nugbajẹmẹji taun na mẹhe ko gboawupo nado ‘flin Mẹdatọ Daho yetọn’ to ovu whenu yetọn lẹ. Na hinhẹn gbẹzan etọn gú wutu, omẹ mọnkọtọn ‘ma tindo homẹhun depope’ to owhe godo tọn lẹ mẹ gba. Aliho gbẹzan jijọ-madi-Jiwheyẹwhe tọn lọsu sọgan yidogọna nuhahun po awufiẹsa yọnhopipo tọn lẹ po. (Howhinwhẹn lẹ 5:3-11) E blawu dọ, to sọgodo pinpọnhlan mẹ, omẹ mọnkọtọn lẹ ma nọ mọ sọgodo depope ṣigba yọdo poun.

Ayajijẹ to Yọnho Mẹ

Ehe ma zẹẹmẹdo dọ yọnhonọ lẹ ma sọgan duvivi ogbẹ̀ tọn gba. To Biblu mẹ, “azán gaa, po ogbẹ̀ gaa po” yin kinkọndopọ hẹ dona Jiwheyẹwhe tọn ga. (Howhinwhẹn lẹ 3:1, 2) Jehovah dọna họntọn etọn Ablaham dọmọ: “Ṣigba hiẹ . . . yè nasọ diṣiọ towe to yọnhopipo dagbedagbe mẹ.” (Gẹnẹsisi 15:15) Mahopọnna awusinyẹnnamẹnu yọnhopipo tọn lẹ, Ablaham tindo jijọho po vivo po to owhe godo tọn etọn lẹ mẹ, bo nọ pọ́n godo hlan po pekọ po na gbẹzan mẹdezejo hlan Jehovah tọn. E sọ to nukọn pọnhlan to yise mẹ na “otò daho de he tindo dodo [nujọnu tọn],” yèdọ Ahọluduta Jiwheyẹwhe tọn. (Heblu lẹ 11:10) Gbọnmọ dali, e kú “mẹhoho he gọ́ na owhe susu.”—Gẹnẹsisi 25:8.

Enẹwutu Sọlọmọni dotuhomẹnamẹ dọmọ: “Eyin gbẹtọ tin họ̀ owhe susu, [gbọ e ni] sọ to ayajẹ to yé omẹ pó mẹ.” (Yẹwhehodọtọ 11:8) Vlavo mí yin jọja kavi mẹhomẹ, ayajẹ nugbo yin kinkọndopọ hẹ haṣinṣan mítọn hẹ Jiwheyẹwhe.

Dile jọja he tin to azọ́nhọsa lọ dotẹnna azọ́nwanu godo tọn otọ́ etọn tọn lẹ, e lẹnnupọn do onú ehelẹ ji. E lẹnnupọn do mẹhe e yọnẹn lẹpo ji he nọ tẹnpọn nado basi yizan dagbe hugan gbẹzan yetọn lẹ tọn ṣigba ma nọ tindo ayajẹ na yé ma tindo haṣinṣan depope hẹ Mẹdatọ yetọn wutu. Lehe e taidi nuhe sọgbe do taun dọ to tulinina nado jaya to gbẹzan mẹde tọn whenu godo, Sọlọmọni dotana whẹho lẹ po hogbe lọ lẹ po dọmọ: “Gbọ mí ni sè opodo ohó lẹpo pete tọn: Dibusi Jiwheyẹwhe bosọ yìn osẹ́n etọn lẹ: na ehe wẹ azọ́n gbẹtọ lẹpo tọn pete”!—Yẹwhehodọtọ 12:13.