Yẹwhehodọtọ 3:11—“Ewọ Ko Basi Onú Whanpẹnọ Lẹpo to Ojlẹ Etọn Mẹ”

“Ewọ ko basi onú whanpẹnọ lẹpo to ojlẹ etọn mẹ. Ewọ tlẹ ko yí madopodo do ahun yetọn mẹ; ṣogan gbẹtọvi ma sọgan mọnukunnujẹ azọ́n he Jiwheyẹwhe nugbo lọ ko basi lẹ mẹ sọn bẹjẹeji jẹ vivọnu.”—Yẹwhehodọtọ 3:11, Lẹdogbedevomẹ Aihọn Yọyọ Tọn.

“E ko basi onú popo dagbedagbe to whenu etọn; e yí wẹkẹ do ayiha yetọn mẹ ga, mọ omẹ de ma sọgan mọdona azọ́n he Jiwheyẹwhe to wiwà sọn dodo kakajẹ opodo.”—Yẹwhehodọtọ 3:11, Biblu Wiwe lọ—Gun Alada.

Zẹẹmẹ Yẹwhehodọtọ 3:11 Tọn

“Ewọ ko basi onú whanpẹnọ lẹpo to ojlẹ etọn mẹ.” Hogbe Heblugbe tọn he yin lilẹdo “whanpẹnọ” tofi, ma to alọdlẹndo nuhe yọnwhanpẹ kavi jẹaṣọ́ de poun. E gán sọ yin lilẹdo nuhe “yè basi titona ganji,” “he sọgbe,” kavi “he jẹ.” (Yẹwhehodọtọ 3:11, nudọnamẹ odò tọn) Azọ́n whanpẹnọ Jiwheyẹwhe tọn lẹ ma nọte do nuhe e dá lẹpo kẹdẹ ji, amọ́ e sọ bẹ nuhe e nọ wà lẹpo nado hẹn ojlo etọn di hẹn.—Daniẹli 2:21; 2 Pita 3:8; Osọhia 4:11.

“Ewọ tlẹ ko yí madopodo do ahun yetọn mẹ.” Jiwheyẹwhe dá gbẹtọvi lẹ nado nọgbẹ̀ kakadoi. (Salmu lẹ 37:29) Enẹwutu, e sọgbe dọ ni yí ojlo lọ nado nọgbẹ̀ kakadoi do ahun yetọn mẹ. Amọ́, asu po asi po tintan lọ, Adam po Evi po vẹtolina Jiwheyẹwhe bo hẹn okú wá yede po kúnkan yetọn lẹ po ji. (Jenẹsisi 3:17-19; Lomunu lẹ 5:12) Etomọṣo, Jiwheyẹwhe dopagbe nado “hẹn pekọ wá na ojlo nutogbẹ̀ lẹpo tọn,” kakajẹ ojlo gbẹtọvi lẹ tọn nado nọgbẹ̀ kakadoi ji. (Salmu lẹ 145:16) Biblu dọ lehe Jehovah ko hẹn ẹn yọnbasi na gbẹtọvi lẹ whladopo dogọ nado tindo todido ogbẹ̀ madopodo tọn do.—Lomunu lẹ 6:23.

“Gbẹtọvi ma sọgan mọnukunnujẹ azọ́n he Jiwheyẹwhe nugbo lọ ko basi lẹ mẹ sọn bẹjẹeji jẹ vivọnu.” Nuyọnẹn Jiwheyẹwhe tọn siso bosọ gbloada sọmọ bọ Biblu dọ dọ “aliho etọn lẹ ma yọ́n dinmọ.” (Lomunu lẹ 11:33) Ṣigba, Jiwheyẹwhe jlo vẹkuvẹku nado hẹn lẹndai etọn lẹ zun yinyọnẹn na mẹhe nọ jlo na hẹn homẹ etọn hùn lẹ.—Amọsi 3:7.

Nujijọ He Lẹdo Yẹwhehodọtọ 3:11 Lẹ

Ahọlu Sọlomọni Islaeli hohowhenu tọn wẹ kàn owe Yẹwhehodọtọ tọn, yèdọ dawe de he diyin na nuyọnẹn he Jiwheyẹwhe na ẹn wutu. Owe lọ bẹ ayinamẹ he yọ́n-na-yizan lẹ hẹn gando nuhe yin nujọnu nugbonugbo to gbẹ̀mẹ lẹ po nuhe ma doale lẹ po go. (Yẹwhehodọtọ 1:2, 3; 2:1, 17; 7:1; 12:1, 13) To weta 3tọ mẹ, Sọlomọni dọhodo ninọmẹ delẹ he mẹ yè nọ saba jugbọn to gbẹ̀mẹ ji. E donù nuwiwa voovo lẹ kavi azọ́n delẹ go. (Yẹwhehodọtọ 3:1-8, 10) Jiwheyẹwhe ko na mẹdekannujẹ gbẹtọvi lẹ nado de depope to nuwiwa ehelẹ mẹ he mẹ yé na do mahẹ te, podọ to whenue e jlo yé. (Deutelonomi 30:19, 20; Jọṣua 24:15) Sọlomọni basi zẹẹmẹ dọ e na biọ dọ gbẹtọvi lẹ ni yinuwa sọgbe hẹ lẹndai Jiwheyẹwhe tọn bosọ kẹalọyi “ojlẹ dide” Etọn, whẹpo do sọgan duvivi azọ́n sinsinyẹn yetọn tọn nugbonugbo. Sọlomọni ylọ ehe dọ “nunina Jiwheyẹwhe tọn.”—Yẹwhehodọtọ 3:1, 12, 13.

Pọ́n video kleun ehe nado mọ nue to owe Yẹwhehodọtọ tọn mẹ delẹ.