Teninọ po ‘Nukundido Jejejininọ Tọn’ Po
“Na nukundido [jejejininọ] nudida tọn nọtepọn osọhia ovi Jiwheyẹwhe tọn lẹ tọn.”—LOMUNU LẸ 8:19.
1. Dopolọ yinyin tẹwẹ tin to ninọmẹ Klistiani egbezangbe tọn lẹ po Klistiani owhe kanweko tintan tọn lẹ po ṣẹnṣẹn?
NINỌMẸ Klistiani nugbo egbezangbe tọn lẹ tọn taidi dehe yin Klistiani owhe kanweko tintan whenu tọn lẹ tọn. Dọdai de gọalọna devizọnwatọ Jehovah tọn azán enẹlẹ gbè tọn lẹ nado yọ́n whenuena Mẹssia lọ na sọawuhia. (Daniẹli 9:24-26) Dọdai dopolọ dọ dọdai vasudo Jelusalẹm tọn ṣigba ma bẹ nudọnamẹ depope hẹn he na gọalọna Klistiani lẹ nado yọnẹn jẹnukọn whenuena todaho enẹ na yin vivasudo gba. (Daniẹli 9:26b, 27) Mọdopolọ, dọdai de sọn olọn mẹ wá hẹn Biblu plọntọ ahundoponọ owhe kanweko 19tọ lẹ nado tin to nukundido mẹ. Gbọn kinkọn “ojlẹ ṣinawe” Daniẹli 4:25 tọn lẹ dopọ hẹ “ojlẹ Kosi lẹ tọn” dali, yé to nukundo dọ Klisti na mọ huhlọn Gandudu tọn yí to 1914. (Luku 21:24, King James Version; Ezekiẹli 21:25-27) Dile etlẹ yindọ owe Daniẹli tọn bẹ dọdai susu lẹ hẹn, depope to ehelẹ mẹ ma gọalọna Biblu plọntọ egbezangbe tọn lẹ nado yọ́n ojlẹ tangan he mẹ titonu Satani tọn blebu na yin vivasudo gba. (Daniẹli 2:31-44; 8:23-25; 11:36, 44, 45) Ṣigba, ehe na jọ to madẹnmẹ, na mí to gbẹnọ to “ojlẹ opodo lọ tọn” mẹ wutu.—Daniẹli 12:4.a
Alihihọ́ to Tintin Tofi Klisti Tọn Whenu
2, 3. (a) Etẹwẹ yin kunnudenu he klo hugan lọ dọ mí to gbẹnọ to tintin tofi Klisti tọn to huhlọn ahọlu tọn whenu? (b) Etẹwẹ dohia dọ Klistiani lẹ dona tin to aṣeji to tintin tofi Klisti tọn whenu?
2 Nugbo wẹ dọ, dọdai de ze Klistiani lẹ do ninọmẹ nukundido tọn mẹ whẹpo Klisti do yin nina huhlọn Ahọludu tọn to 1914. Ṣigba “ohia” he Klisti na heyin tintin tofi etọn tọn podọ vivọnu titonu onú lẹ tọn dè nujijọ lẹ hia. Podọ suhugan ehelẹ tọn na yin mimọ to whenuena tintin tofi etọn ko bẹjẹeji godo. Nujijọ mọnkọtọn lẹ—yèdọ awhàn lẹ, núdùdù whèdomẹ, aigba sisọsisọ lẹ, azọ̀nylankan lẹ, jideji sẹ́nhẹngba tọn, homẹkẹn dido Klistiani lẹ, po yẹwheho wẹndagbe Ahọludu lọ tọn didọ lẹdo aihọn pé po—yinuwa taidi kunnudenu daho lọ dọ mí to gbẹnọ todin to tintin tofi Klisti tọn to huhlọn ahọlu tọn whenu.—Matiu 24:3-14; Luku 21:10, 11.
3 Etomọṣo, bladopọ ayinamẹ mẹjijodo Jesu tọn hlan devi etọn lẹ wẹ: “Mì payi, na mì ni sọ nọ họ́ mìde, . . . mì to ali họ́.” (Malku 13:33, 37; Luku 21:36) Sọwhiwhe yíyí do hia lẹdo hodidọ tudohomẹnamẹ tọn ehelẹ nado to ali họ́ dohia dọ Klisti ma to hodọ na taun tọn dogbọn tintin to aṣeji na ohia bẹjẹeji tintin tofi etọn tọn dali gba. Kakatimọ, ewọ to gbedena devi nugbonọ etọn lẹ nado to ali họ́ to tintin tofi etọn whenu. Etẹwẹ Klistiani nugbonọ lẹ dona to ali họ́ na?
4. Lẹndai tẹwẹ ohia he Jesu na lọ na yiwà?
4 Jesu dọ dọdai daho etọn to gblọndo mẹ na kanbiọ lọ he dọmọ: “Dọ na mí, whenuena onú helẹ [nujijọ he na planmẹ jẹ vasudo whenu-nu Ju lẹ tọn kọ̀n] na jọ? etẹwẹ na yin ohia wiwá towe tọn, po opodo aihọn tọn po?” (Matiu 24:3) Ohia heyin didọdai lọ na yinuwa e mayin nado do tintin tofi Klisti tọn hia kẹdẹ wẹ gba ṣigba nujijọ lẹ ga he na planmẹ jẹ vivọnu titonu ylankan onú lẹ tọn egbezangbe tọn mẹ.
5. Nawẹ Jesu dohia gbọn dọ dile emi na tlẹ tin tofi to gbigbọmẹ, e na gbẹsọ pò “ja”?
5 Jesu dohia dọ to ‘tintin tofi’ (Glẹki, pa·rou·siʹa) etọn whenu ewọ na wá to huhlọn po gigo po mẹ. Gando ‘wiwá’ mọnkọtọn (heyin hiadogona gbọn wunmẹ hogbe Glẹki tọn erʹkho·mai dali), e lá dọmọ: “Whenẹnu wẹ ohia Ovi gbẹtọ tọn na sọawuhia to olọn mẹ; whenẹnu wẹ whẹndo he tin to aihọn mẹ lẹpo na blawu, yé nasọ mọ Ovi gbẹtọ tọn sọn aslọ olọn tọn lẹ go ja, po huhlọn po, po gigo daho po. . . . Dinvie mì plọn oló ovotin tọn; Whenuena ala etọn ṣẹṣẹ tọ́n, bosọ kọamà, mìwlẹ yọnẹn dọ ojlẹ alúnlún tọn sẹpọ: Yèdọ mọkẹdẹ wẹ mìwlẹ ga, whenuena mìwlẹ mọ onú helẹ pó, mì ni yọnẹn dọ e [Klisti] sẹpọ, yèdọ to ohọ̀n ji. . . . Enẹwutu mì nọ họ́ mìde: na mì ma yọ́n azán he gbè Oklunọ mìtọn ja. . . . Enẹwutu mì ni wleawu dai: na ojlẹ he mẹ mì ma lẹn do wẹ Ovi gbẹtọ tọn ja.”—Matiu 24:30, 32, 33, 42, 44, wekun flinflin lẹ yin mítọn.
Naegbọn Jesu Klisti Do Wá?
6. Nawẹ vasudo “Babilọni Daho lọ” tọn na wá gbọn?
6 Dile etlẹ ko tin tofi taidi Ahọlu sọn 1914 gbọ́n, Jesu Klisti dona gbẹsọ dawhẹna titonu lẹ po omẹ dopodopo lẹ po whẹpo do hẹn whẹdida ṣẹ do mẹhe e mọ nado yin mẹylankan lẹ ji. (Yijlẹdo 2 Kọlintinu lẹ 5:10 go.) To madẹnmẹ Jehovah na yí do ahun mẹ na togan tonudọtọ lẹ nado và “Babilọni Daho lọ” sudo, yèdọ ahọluigba sinsẹ̀n lalo aihọn tọn. (Osọhia 17:4, 5, 16, 17) Apọsteli Paulu gbọn gbesisọ dali dọ dọ Jesu Klisti na và ‘dawe sẹ́nhẹngbatọ lọ’ sudo—yèdọ nukọntọ atẹṣitọ sinsẹ̀n Mẹylọhodotọklisti tọn lẹ, heyin adà diyin “Babilọni Daho lọ” tọn. Paulu wlan dọmọ: “Yè na dè dawe sẹ́nhẹngba nẹ hia, mẹhe Oklunọ Jesu na yí gbigbọ onù etọn mẹ tọn do sudo, bo nasọ yí sisẹ́ gigo etọn do sukúndona.”—2 Tẹsalonikanu lẹ 2:3, 8, NW.
7. To whenuena Visunnu gbẹtọ tọn na wá to gigo etọn mẹ, whẹdida tẹwẹ e na hẹn ṣẹ?
7 To sọgodo he ko sẹpọ lọ mẹ, Klisti na dawhẹna gbẹtọ akọta lẹpo tọn to dodonu lehe yé ko yinuwa hlan mẹmẹsunnu etọn he gbẹ́ pò to aigba ji lẹ tọn do ji. Mí hia dọmọ: “Ṣigba whenuena Ovi gbẹtọ tọn na wá to gigo etọn mẹ, po angẹli lẹpo po e po, whenẹnu wẹ e na sinai to ofin gigo etọn tọn ji. Nukọn etọn wẹ yè na bẹ akọta lẹpo pli do: e nasọ klan yé dovo sọn yenọzo go, dile lẹngbọhọtọ nọ klan lẹngbọ etọn lẹ sọn gbọgbọẹ lẹ go do. E nasọ yí lẹngbọ lẹ do adusilọ etọn mẹ, ṣigba gbọgbọẹ lẹ do amiyọn mẹ. . . . Ahọlu nasọ gblọn, bo dọ hlan [lẹngbọ lẹ], dọmọ, Nugbo wẹ yẹn dọ hlan mì, Le mìwlẹ basi i hlan dopo to mẹmẹsunnu ṣie helẹ mẹ, yèdọ pẹvipete helẹ yẹn wẹ mì basi i hlan. . . . Podọ [gbọgbọẹ lẹ] wẹ na juyi oya madopodo mẹ; ṣigba dodonọ lẹ biọ ogbẹ̀ madopodo mẹ.”—Matiu 25:31-46.
8. Nawẹ Paulu basi zẹẹmẹ wiwá Klisti tọn nado hẹn whẹdida ṣẹ do gbẹtọ jijọ-madi-Jiwheyẹwhe tọn lẹ ji gbọn?
8 Dile e yin didohia to oló lẹngbọ po gbọgbọẹ lẹ tọn po mẹ do, Jesu na hẹn whẹdida godo tọn ṣẹ do gbẹtọ jijọ-madi-Jiwheyẹwhe tọn lẹpo ji. Paulu na jide hatọ yisenọ he to yaji lẹ na “[pọngbọ] to whenuena yè na do Jesu Oklunọ hia sọn olọn mẹ, po angẹli huhlọnnọ etọn lẹ po, mẹhe to ahọsu yí to yé he ma yọ́n Jiwheyẹwhe lẹ go, podọ yé he ma setonuna wẹndagbe Jesu Klisti Oklunọ mítọn tọn lẹ, to miyọ́n he to jiji mẹ; mẹhe yè na yí viva madopodo do sayana sọn Oklunọ nukọn, podọ sọn gigo huhlọn etọn tọn mẹ; whenuena ewọ na wá nado yin omẹ he yè na pagigona to mẹwiwe etọn lẹ mẹ.” (2 Tẹsalonikanu lẹ 1:7-10) Po nujijọ ojlofọndotenamẹ tọn ehe lẹpo po to nukọn mítọn, be mí ma dona yí yise zan bo tin to aṣeji na wiwá Klisti tọn po jejejininọ po ya?
Teninọ Pọ́n Osọhia Klisti Tọn po Jejejininọ Po
9, 10. Naegbọn mẹyiamisisadode he pò to aigba ji lẹ gbẹsọ pò to tenọpọn osọhia Jesu Klisti tọn po jejejininọ po?
9 ‘Osọhia Oklunọ Jesu tọn sọn olọn mẹ’ ma na yin nado hẹn vasudo wá mẹylankan lẹ ji kẹdẹ gba ṣigba nado suahọ dodonọ lẹ ga. Pipotọ mẹmẹsunnu yiamisisadode Klisti tọn he gbẹsọ pò to aigba ji lẹ sọgan gbẹsọ jiya jẹnukọnna osọhia Klisti tọn, ṣigba yé nọ jaya to todido gigonọ olọn mẹ tọn yetọn mẹ. Hlan Klistiani yiamisisadode lẹ, apọsteli Pita wlan dọmọ: “Mì ni jiya, sọle mì yin mahẹtọ to yajiji Klisti tọn mẹ do; na whenuena yè dè gigo etọn hia, mì nido jaya to homẹhunhun susu mẹ.”—1 Pita 4:13.
10 Mẹyiamisisadode lẹ ko magbè nado gbọṣi nugbonọ-yinyin mẹ kakajẹ whenuena Klisti ‘na hò yé plidopọ do ewọ dè’ na ‘jẹhẹnu heyin whiwhlepọn’ yise yetọn tọn ‘nido yin mimọ nado jẹ na pipà, yẹyi, po gigo po to osọhia Jesu Klisti tọn whenu.’ (2 Tẹsalonikanu lẹ 2:1; 1 Pita 1:7) Gando Klistiani nugbonọ heyin jiji gbọn gbigbọ dali mọnkọtọn lẹ go, e sọgan yin didọ dọmọ: “Okunnuho Klisti tọn ko yin hinhẹn lodo to mì mẹ, sọmọ bọ mì ma yì godo to nunina depope mẹ; dile mì to tenọpọn gigọwa Jesu Klisti Oklunọ mítọn tọn po jejejininọ po.”—1 Kọlintinu lẹ 1:6, 7, NW.
11. Dile yé to tenọpọn osọhia Jesu Klisti tọn, etẹwẹ Klistiani yiamisisadode lẹ wà?
11 Pipotọ mẹyiamisisadode lẹ tọn má numọtolanmẹ Paulu tọn lẹ, mẹhe wlan dọmọ: “Yẹn hia dọ oya whenu dinvie tọn ma jẹ nado yí jlẹdo gigo he yè na sọhia to mí mẹ go gba.” (Lomunu lẹ 8:18) Yise yetọn ma dona yin hinhẹndote gbọn sọha yíyí na ojlẹ lẹ dali gba. Yé hẹnalọnujan to sinsẹ̀nzọn Jehovah tọn mẹ, bo nọ wleawuna apajlẹ jiawu de na gbẹdohẹmẹtọ yetọn lẹ, yèdọ “lẹngbọ devo” lẹ. (Johanu 10:16) Mẹyiamisisadode ehelẹ yọnẹn dọ opodo titonu ylankan ehe tọn ko sẹpọ, podọ yé sọ nọ setonuna tudohomẹnamẹ Pita tọn dọmọ: “Mì blá gbaja otùnu mìtọn tọn gligli, mì yin huwhẹnọ, bosọ to todo jẹ opodo na ojọmiọn he yè na hẹnwa na mì to osọhia Jesu Klisti tọn whenu.”—1 Pita 1:13.
‘Nukundido Jejejininọ Nudida Tọn’
12, 13. Nawẹ nudida gbẹtọvi tọn lẹ yin ‘hinhẹn jẹ mẹmẹglọ hlan ovọ́’ gbọn, podọ etẹwẹ yin ojlo lẹngbọ devo lẹ tọn?
12 Be lẹngbọ devo lẹ lọsu tindo nude he yé na donukun po jejejininọ po ya? Po jide po yé tindo. To hodidọ do todido gigonọ mẹhe yin sọdodovi gbọn Jehovah dali taidi “ovi lẹ” po “whédutọ dopọ hẹ Klisti” to Ahọluduta olọn tọn mẹ lẹ po ji godo, Paulu dọmọ: “Na nukundido [jejejininọ] nudida tọn nọtepọn osọhia ovi Jiwheyẹwhe tọn lẹ tọn. Na yè hẹn nudida yin mẹmẹglọ hlan ovọ́, e mayin po ojlo po gba, ṣigba gbọn linlẹn omẹ he yí dopolọ do mẹglọ to todido mẹ tọn dali. Na yè na whlẹn nudida lọsu sọn mẹmẹglọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ.”—Lomunu lẹ 8:14-21; 2 Timoti 2:10-12.
13 Gbọn ylando Adam tọn dali, kúnkan etọn lẹpo wẹ yin hinhẹnwa “mẹmẹglọ hlan ovọ́” mẹ, yèdọ yin jiji do kanlinmọgbenu ylando po okú po tọn mẹ. Yé ma ko penugo nado hẹn yedelẹ jẹ mẹdekannu sọn mẹmẹglọ mọnkọtọn mẹ gba. (Psalm 49:7; Lomunu lẹ 5:12, 21) Etẹ, lehe lẹngbọ devo lẹ to jijlo nado yin ‘hinhẹn jẹ mẹdekannu sọn mẹmẹglọ hẹngble tọn mẹ’ do sọ! Ṣigba whẹpo enẹ nido jọ, onú delẹ dona jọ sọgbe hẹ ojlẹ po whenu Jehovah tọn lẹ po.
14. Etẹwẹ “osọhia ovi Jiwheyẹwhe tọn lẹ tọn” na bẹhẹn, podọ nawẹ ehe na dekọtọn do ‘hinhẹn gbẹtọvi lẹ jẹ mẹdekannu sọn mẹmẹglọ hẹngble tọn mẹ’ gbọn?
14 Pipotọ mẹyiamisisadode “ovi Jiwheyẹwhe tọn lẹ tọn” dona yin ‘sisọhia’ whẹ́. Etẹwẹ ehe na bẹhẹn? To ojlẹ sisọ Jiwheyẹwhe tọn mẹ, e na họnwun hlan lẹngbọ devo lẹ dọ mẹyiamisisadode lẹ ko yin “hiadogona” bosọ yin gigopana nado duahọlu hẹ Klisti to godo mẹ. (Osọhia 7:2-4) “Ovi Jiwheyẹwhe tọn lẹ” heyin finfọnsọnku nasọ yin ‘sisọhia’ to whenuena yé na tindo mahẹ po Klisti po to titonu ylankan Satani tọn vivasudo mẹ. (Osọhia 2:26, 27; 19:14, 15) Enẹgodo, to Gandudu Owhe Fọtọ́n Klisti tọn whenu, yé nasọ yin ‘sisọhia’ yinukọn dogọ taidi nuyizan yẹwhenọduta tọn lẹ to alemọyi avọ́sinsan ofligọ Jesu tọn nina “nudida“ gbẹtọvi tọn lẹ mẹ. Ehe na dekọtọn do ‘hinhẹn gbẹtọvi jẹ mẹdekannu sọn mẹmẹglọ hẹngble tọn mẹ’ podọ to agọgbọnẹnmẹ bibiọ “mẹdekannujẹ he do gigo ovi Jiwheyẹwhe tọn lẹ tọn mẹ.” (Lomunu lẹ 8:21; Osọhia 20:5; 22:1, 2) Po nukundido jiawu mọnkọtọn lẹ po, be nupaṣamẹ de wẹ e yin dọ lẹngbọ devo lẹ to “tenọpọn osọhia ovi Jiwheyẹwhe tọn lẹ tọn” po ‘nukundido jejejininọ tọn’ po ya?—Lomunu lẹ 8:19.
Homẹfa Jehovah Tọn Zẹẹmẹdo Whlẹngán
15. Etẹwẹ mí ma dona wọnji gbede gando ojlẹ dide Jehovah tọn na nujijọ lẹ go?
15 Jehovah wẹ yin Ganmẹ-pọntọ Daho lọ. Ganmẹ-pinpọn na nujijọ lẹ etọn na sọawuhia nado yin dehe sọgbe mlẹnmlẹn. Onú lẹ sọgan nọ ma jọ to whepoponu dile míwlẹ na mídetiti nọ donukun do. Etomọṣo, mí sọgan tindo yise mlẹnmlẹn dọ opagbe Jiwheyẹwhe tọn lẹpo na yin hinhẹndi. (Jọṣua 23:14) E sọgan dike na onú lẹ ni to jijọ na ojlẹ dindẹn hugan lehe mẹsusu donukun do. Ṣigba mì gbọ mí ni dín nado mọnukunnujẹ aliho etọn lẹ mẹ bosọ tin to awujiji mẹ na nuyọnẹn etọn. Paulu wlan dọmọ: “Ṣo! Na adọkun, nuyọnẹn po zìnzìn Jiwheyẹwhe tọn po siso sọ! Nawẹ whẹdida etọn lẹ yin dinmamọdona sọ, podọ aliho etọn lẹ sọ hugan dindinmọ! Na mẹnu wẹ ko yọ́n ayiha Oklunọ tọn? kavi mẹnu wẹ yin lẹnhẹtọ etọn?”—Lomunu lẹ 11:33, 34.
16. Mẹnu lẹ wẹ na mọaleyi sọn homẹfa Jehovah tọn mẹ?
16 Pita wlan dọmọ: “Enẹwutu, mẹyiwanna emi, le mìwlẹ to nukundo onú helẹ nkọtọn [vasudo “olọn” po “aigba” hoho tọn lẹ po gọna dehe na diọtẹnmẹ na yé heyin “olọn yọyọ lẹ” po “aigba yọyọ” he Jiwheyẹwhe dopagbe etọn po], mì yin vivẹnunọ, na yè nido mọ mì to e dè to jijọho mẹ, to matin apà podọ madowango mẹ. Na mì nisọ lẹn ẹn dọ, [homẹfa] Oklunọ mítọn tọn whlẹngán wẹ.” Na homẹfa Jehovah tọn wutu, livi susu lẹ to yinyin nina dotẹnmẹ hundote lọ nado yin whinwhlẹngan gbọn ‘azán Jehovah tọn’ gblamẹ, ehe na wá madonukun “di ajotọ.” (2 Pita 3:9-15, wekun flinflin lẹ yin mítọn) Homẹfa etọn sọ to dotẹnmẹ na dopodopo mítọn lẹ nado to ‘azọ́n whlẹngán mítọn tọn wà to obu po sisọsisọ po mẹ.’ (Filippinu lẹ 2:12) Jesu dọ dọ mí dona ‘payi míde go’ bosọ ‘nọ họ́’ mídelẹ eyin mí jlo na yin alọkẹyi bo tindo kọdetọn dagbe to ‘teṣiṣi to Ovi gbẹtọ tọn nukọn.’—Luku 21:34-36; Matiu 25:31-33.
Zindonukọn Nado Yí Akọndonanu Do Nọte
17. Hogbe apọsteli Paulu tọn tẹlẹ wẹ mí dona setonu na?
17 Paulu dotuhomẹna mẹmẹsunnu gbigbọmẹ tọn etọn lẹ nado ze nukun yetọn lẹ, ‘e mayin do nuhe yè mọ lẹ ji gba, ṣigba onú he yè ma mọ lẹ.’ (2 Kọlintinu lẹ 4:16-18) E ma jlo dọ nudepope ni hẹn pọndohlan yetọn na alemọyi olọn mẹ tọn heyin zizedonukọnna yé dozinvlu gba. Vlavo Klistiani yiamisisadode lẹ wẹ mí yin kavi mí yin apadewhe lẹngbọ devo lẹ tọn, mì gbọ mí ni ze ayiha mítọn lẹ do todido jiawu heyin zizedonukọnna mí ji bo ma gbọjọ blo. Mì gbọ mí ni ‘yí akọndonanu do nọte,’ bo dohia dọ “míwlẹ matin to yé he to agọjo yì godo hlan dindọn mẹ lẹ gba; adavo yé he yise hlan whlẹngán ayiha tọn.”—Lomunu lẹ 8:25; Heblu lẹ 10:39.
18. Naegbọn mí sọgan gbọn jidide dali jo ojlẹ lẹ po whenu lẹ po do alọ Jehovah tọn mẹ?
18 Mí sọgan gbọn jidide dali jo ojlẹ lẹ po whenu lẹ po do alọ Jehovah tọn mẹ. Hẹndi dọdai etọn lẹ tọn “ma na [gbọwhenu] gba” sọgbe hẹ todohukanji ojlẹ tọn etọn. (Habbakuk 2:3) Enẹwutu, tudohomẹnamẹ Paulu tọn hlan Timoti tindo zẹẹmẹ dogọ na mí. E dọmọ: “Yẹn degbena we to Jiwheyẹwhe nukọn, podọ to Jesu Klisti Oklunọ nukọn, mẹhe na dawhẹna omẹ he to ogbẹ̀ po oṣiọ lẹ po to awusọhia etọn po ahọludu etọn po whenu; nọ dọyẹwheho ohó lọ tọn; do magbọjẹ na dewe to ojlẹ mẹ podọ to mayin ojlẹ mẹ . . . Nọ to azọ́n yẹwhehodọtọ tọn wà pé, bo nọ wazọ́n devizọn towe tọn diun hezeheze.”—2 Timoti 4:1-5.
19. Etẹwẹ ojlẹ gbẹsọ tin na omẹ Jehovah tọn lẹ nado wà, podọ etẹwutu?
19 Ogbẹ̀ lẹ tin to owù mẹ—míwlẹ po kọmẹnu mítọn lẹ tọn po. Paulu wlan dọmọ: “Payi dewe po mẹpinplọn towe po go; nọ nọte to yé mẹ; na ehe wiwà mẹ hiẹ na whlẹn dewe, po yé he to ohó towe se lẹ po.” (1 Timoti 4:16) Ojlẹ ko whègli taun na titonu onú lẹ tọn ehe. Dile mí to tenọpọn nujijọ ojlofọndotenamẹ tọn he tin to nukọn mítọn lẹ po jejejininọ po, mì gbọ mí ni yọnẹn to whepoponu dọ e gbẹsọ yin ojlẹ po whenu Jehovah tọn po na omẹ etọn lẹ nado dọyẹwheho wẹndagbe Ahọluduta lọ tọn. Azọ́n lọ dona yin tadona jẹ pekọ etọn kọ̀n. “Whenẹnu,” dile Jesu dọ do, “wẹ opodo na wá.”—Matiu 24:14.
[Nudọnamẹ Odò Tọn]
a Pọ́n weta 10 po 11 po owe lọ Oyọnẹn He Nọ Planmẹ Sọyi Ogbẹ̀ Madopodo Mẹ tọn, heyin zinzinjẹgbonu gbọn Watchtower Bible and Tract Society of New York, Inc. dali.
To Dogbapọn Mẹ
● Gando sọha yíyí na ojlẹ lẹ go, nawẹ ninọmẹ mítọn yin nudopolọ po dehe yin Klistiani owhe kanweko tintan whenu tọn lẹ tọn po gbọn?
● Naegbọn Klistiani lẹ dona “to ali họ́,” etlẹ yin to tintin tofi Klisti tọn whenu?
● Naegbọn gbẹtọ lẹ tin to nukundido mẹ na “osọhia ovi Jiwheyẹwhe tọn lẹ tọn”?
● Naegbọn mí sọgan gbọn jidide dali jo ojlẹ lẹ po whenu lẹ po do alọ Jehovah tọn mẹ?
[Yẹdide to weda 17]
Klistiani lẹ dona tin to aṣeji na nukundido wiwá Klisti tọn
[Yẹdide to weda 18]
Pipotọ mẹyiamisisadode lẹ tọn hẹnalọnujan to sinsẹ̀nzọn Jehovah tọn mẹ, bo ma ze yise yetọn sinai do sọha yíyí na ojlẹ lẹ ji gba