“Nugbo lọ Nasọ Hẹn Mì Jẹ Mẹdekannu”
“MÌWLẸ nasọ yọ́n nugbo, nugbo lọ nasọ hẹn mì jẹ mẹdekannu.” Mọwẹ Jesu dọ dile e to nuplọn gbẹtọgun lẹ to tẹmpli he tin to Jelusalẹm mẹ. (Johanu 8:32) Apọsteli Jesu tọn lẹ sọgan yọ́n nuplọnmẹ Jesu tọn lẹ po awubibọ po dọ nugbo lọ wẹ. Yé ko mọ kunnudenu susugege dọ bẹjẹeji mẹplọntọ yetọn tọn yin sọn olọn mẹ wá.
ṢIGBA, to egbehe, mẹdelẹ sọgan mọ ẹn taidi awusinyẹnnamẹnu nado yọ́n nugbo lọ he go Jesu dọho gando. Taidi to azán yẹwhegan Isaia tọn lẹ gbè, to egbehe mẹdelẹ tin “he to oylan ylọ dọ dagbe . . ., bo to dagbe ylọ dọ oylan, he yí zinvlu do hinhọ́n tẹnmẹ, bo yí hinhọ́n do zinvlu tẹnmẹ; he yí vivẹ́ do vivi tẹnmẹ, bosọ yí vivi do vivẹ́ tẹnmẹ.” (Isaia 5:20) Po linlẹn, tamẹnuplọnmẹ, gọna ninọmẹ-gbẹzan voovo tọn he nọ yin zizedaga to egbehe po, mẹsusu nọ tindo numọtolanmẹ lọ dọ onú lẹpo wẹ yin nudopolọ podọ nudepope ma tin bo yin nugbo gba.
To whenuena Jesu dọ na mẹplidopọ etọn lẹ dọ nugbo lọ na hẹn yé jẹ mẹdekannu, yé yigbe gbọn didọ dali dọmọ: “Okún Ablaham tọn wẹ míwlẹ, mí ma ko tin to mẹglọnọ mẹ hlan mẹde gbede: nawẹ hiẹ dọ do, Mìwlẹ na yin hinhẹn jẹ mẹdekannu?” (Johanu 8:33) Yé ma lẹndọ yé tindo nuhudo mẹde kavi nudepope tọn nado hẹn yé jẹ mẹdekannu gba. Ṣigba to enẹgodo Jesu basi zẹẹmẹ dọmọ: “Nugbo, nugbo, wẹ yẹn dọ hlan mì, Mẹdepope he waylando wẹ afanumẹ ylando tọn.” (Johanu 8:34) Nugbo he go Jesu to hodọ gando lọ sọgan hùn aliho lọ dote hlan mẹdekannujẹ sọn ylando si. Jesu dọmọ: “Eyin Ovi na hẹn mì jẹ mẹdekannu, mìwlẹ na jẹ mẹdekannu nugbo.” (Johanu 8:36) Enẹwutu nugbo he nọ hẹn gbẹtọ jẹ mẹdekannu wẹ nugbo lọ dogbọn Jesu Klisti dali, yèdọ Visunnu Jiwheyẹwhe tọn. Yise to avọ́sinsan ogbẹ̀ gbẹtọ pipé Jesu tọn mẹ kẹdẹ wẹ sọgan hẹn mẹde jẹ mẹdekannu sọn ylando po okú po si.
To nujijọ devo whenu Jesu dọmọ: “Lẹ̀ yé wé to nugbo towe mẹ: ohó towe wẹ nugbo.” (Johanu 17:17) Ohó Jiwheyẹwhe tọn dile e yin didọ to Biblu mẹ do wẹ nugbo lọ he sọgan hẹn mẹdekannujẹ wá sọn sinsẹ̀n-bibasi otangblo po lalo tọn po si. Biblu bẹ nugbo lọ hẹn dogbọn Jesu Klisti dali, ehe nọ plan gbẹtọ lẹ jẹ yise didohia to ewọ mẹ kọ̀n bosọ nọ hùn aliho lọ hlan todido yọnwhanpẹ de na sọgodo dote. Nuhe jiawu taun de wẹ e yin nado yọ́n nugbo Ohó Jiwheyẹwhe tọn!
Nawẹ e yin onú titengbe sọ nado yọ́n nugbo lọ? Sinsẹ̀n susu to egbehe, dile yé tlẹ sọalọakọ́n nado to hihodo Biblu lọ sọ, nọ yin nuyiwadeji taun dogbọn tamẹnuplọnmẹ po aṣa gbẹtọ tọn lẹ po dali. Whlasusu, sinsẹ̀ngan lẹ nọ yin ahunmẹduna nado mọ nukundagbe gbẹtọ lẹ tọn hugan lehe gbesisọ-yinyin wẹndomẹ yetọn tọn nọ duahunmẹna yé do. Mẹdelẹ nọ lẹndọ Jiwheyẹwhe nọ tindo pekọ to wunmẹ sinsẹ̀n-bibasi tọn depope mẹ, eyin e ko gbẹ́ yin ahundopo tọn. Ṣigba Jesu Klisti basi zẹẹmẹ dọmọ: “Ojlẹ lọ ja, dinvie sọ wẹ, whenuena sinsẹ̀ntọ nugbonọ lẹ na sẹ̀n Otọ́ to [gbigbọ] po nugbo po mẹ: na nugbo mẹmọnkọ tọn wẹ Otọ́ to díndín nado yin sinsẹ̀ntọ etọn lẹ.”—Johanu 4:23.
Eyin mí jlo na sẹ̀n Jiwheyẹwhe po alọkẹyi po, mí dona yọ́n nugbo lọ. Ehe yin whẹho nujọnu tọn de. Ayajẹ mavọmavọ mítọn sinai deji. Enẹwutu, mẹdopodopo dona kanse ede dọmọ: ‘Be aliho sinsẹ̀n-bibasi tọn ṣie yin alọkẹyi dogbọn Jiwheyẹwhe dali ya? Be yẹn tindo ojlo nujọnu tọn to nugbo Ohó Jiwheyẹwhe tọn pinplọn mẹ ya? Kavi be yẹn to budi na nuhe dodinnanu sọwhiwhe tọn sọgan dehia wẹ ya?’