Klistiani Lẹngbọhọtọ lẹ Emi, ‘Mì Hùn Ahun Mìtọn Do Nùvo’!

“OKLUNỌ wẹ lẹngbọhọtọ ṣie; yẹn ma na gbọ̀agba.” Po hogbe enẹlẹ po, Davidi do jidide mlẹnmlẹn etọn to Jiwheyẹwhe etọn mẹ hia. Nado dọ to gbigbọ-liho, Jehovah deanana ẹn yì “fie amamú kikọ́ te” po “agbàdo osin awumiọn tọn mẹ” po, bo to anadena ẹn “gbọn aliho dodo tọn ji.” To whenuena e yin lilẹdo pé gbọn nukundiọsọmẹtọ lẹ dali, Davidi mọ godonọnamẹ po tulinamẹ po yí, he whàn ẹn nado dọna Jehovah dọmọ: “Yẹn ma obu na di na oylan de: na hiẹ tin to dè e.” Na e tindo Lẹngbọhọtọ Nupojipetọ mọnkọtọn de wutu, Davidi magbè nado “nọ nọ̀ ohọ̀ OKLUNỌ tọn mẹ doidoi.”—Psalm 23:1-6.

Visunnu dopo akàn Jiwheyẹwhe tọn lọsu tindo numimọ mẹtọnhopọn owanyinọ Jehovah tọn, podọ ewọ gbọn gbesisọ dali de mẹtọnhopọn ehe hia to nuyiwa etọn hẹ devi etọn lẹ mẹ to aigba ji ninọ ojlẹ gli tọn etọn whenu. Enẹwutu Owe-wiwe lẹ dlẹnalọdo ewọ taidi “lẹngbọhọtọ dagbe lọ,” “lẹngbọhọtọ daho,” po “ogán lẹngbọhọtọ tọn” po.—Johanu 10:11; Heblu lẹ 13:20; 1 Pita 5:2-4.

Jehovah po Jesu Klisti po to mẹhe yiwanna yé lẹ yìn zọnmii. To apadewhe, lẹngbọ yìnyìn yetọn nọ yin didohia to owanyi yiyido wleawuna lẹngbọhọtọ pẹvi lẹ to agun lọ mẹ mẹ. Paulu dọho hlan lẹngbọhọtọ pẹvi mọnkọtọn lẹ to whenuena e dọmọ: “Mì payi mìde go, po apó he [gbigbọ wiwe] yí mì do basi nugopọntọ na lẹpo po, nado nọ yìn agun Jiwheyẹwhe tọn, he e yí ohùn [Visunnu edetiti, NW] tọn do họ̀.”—Owalọ lẹ 20:28.

Apó lọ yìnyìn to kọndopọmẹ hẹ aliho nuyiwa tọn heyin zizedai gbọn Jehovah po Klisti Jesu po dali mayin azọngban he bọawu de gba, ṣigba e yin onú titengbe taun todin hugan gbede pọ́n. Lẹnnupọndo nuhe hugan Kunnudetọ livi dopo he ko yin bibaptizi to owhe atọ̀n he wayi lẹ gblamẹ ji! Omẹ yọyọ mọnkọtọn lẹ ma tindo dodonu gbigbọmẹ tọn he nọ wá sọn owhe susu nuwiwa tọn mẹ gba. Sọ, lẹnnupọn ga, do Kunnudetọ enẹlẹ he gbẹsọ yin ovivu kavi jọja aflanmẹ lẹ ji. Yé tindo nuhudo ayidonugo tọn e mayin sọn mẹjitọ yetọn lẹ kẹdẹ dè gba ṣigba sọn lẹngbọhọtọ pẹvi agun lọ tọn lẹ lọsu dè ga.

Na nugbo tọn, Klistiani lẹpo wẹ nọ wá kọgbidinamẹ gbonu tọn lẹ glọ, gọna kọgbidinamẹ hagbẹ tọn. Mẹlẹpo wẹ dona dovivẹnu nado nọavunte sọta mẹdindọn huhlọnnọ lọ nado hodo aliho aihọn lọ tọn heyin pekọ-mẹdetiti tọn. To otò delẹ mẹ, wẹnlatọ Ahọluduta tọn lẹ sọgan yin hinhẹn jẹflumẹ na gbeyiyi ma mọyi na owẹ̀n yetọn wutu. Wẹnlatọ susu wẹ tindo nuhahun titengbe agbasalilo tọn lẹ. Nuhahun akuẹzinzan tọn lẹ sọgan to mẹwhinwhàn mẹdevo lẹ tọn nado dín Ahọluduta lọ jẹnukọn whẹ́ hò yí. Na nugbo tọn, mímẹpo—gọna mẹhe ko dẹn to nugbo mẹ lẹ—wẹ tindo nuhudo bosọ jẹna alọgọ lẹngbọhọtọ owanyinọ lẹ tọn.

Mẹwhinwhàn He Sọgbe

Klistiani owhe kanweko tintan whenu tọn lẹ yin tudohomẹna dọ: ‘Mì hùn ahun mìtọn do nùvo’! (2 Kọlintinu lẹ 6:11-13) Klistiani mẹho lẹ na wà dagbe nado hodo ayinamẹ ehe to nukunpipedo azọngban lẹngbọhihọ́ tọn yetọn lẹ go mẹ. Nawẹ yé sọgan wàmọ gbọn? Podọ etẹwẹ dogbọn devizọnwatọ lizọnyizọnwiwa tọn lẹ dali, he susu yetọn yin lẹngbọhọtọ sọgodo tọn lẹ?

Eyin Klistiani mẹho lẹ na yin dona de na apó lọ, yé dona yin whinwhàn gbọn nuhe hugan linlẹn azọngban tọn de dali. Yé yin ayinamẹ na dọmọ: “Mì nọ yìn lẹngbọpa Jiwheyẹwhe tọn he tin mì ṣẹnṣẹn, e gbọn mananọmawà dali blo, adavo po ojlo po; e mayin adọwhẹn tọn gba, adavo ojlo zògbè tọn.” (1 Pita 5:2, wekun flinflin lẹ yin mítọn) Enẹwutu lẹngbọ yìnyìn kọdetọn dagbe tọn bẹ ojlonọ-yinyin po ojlo zogbènọ-yinyin nado sẹ̀n mẹdevo lẹ po hẹn. (Johanu 21:15-17) E zẹẹmẹdo nuhudo lẹngbọ lọ lẹ tọn lẹ mimọ po yinyin awuyatọ nado yinuwa po. E zẹẹmẹdo jẹhẹnu dagbe Klistiani tọn lẹ heyin yinyọnẹn taidi sinsẹ́n gbigbọ Jiwheyẹwhe tọn lẹ tọn didohia dile yè to nuyiwa hẹ mẹdevo lẹ.—Galatianu lẹ 5:22, 23.

Lẹngbọ yìnyìn to whedelẹnu nọ bẹ mẹmẹsunnu lẹ didlapọn to owhé yetọn lẹ gbè hẹn.a Ṣigba lẹngbọhọtọ he ‘hùn ahun yetọn do nùvo’ lẹ nọ yí yedelẹ zan. Enẹwẹ nado dọ dọ, yé nọ wà nususu hugan dlapọn lẹngbọhọtọ tọn vlavo tọn lẹ bibasi. Yé nọ yí dagbenu dotẹnmẹ hundote lẹpo tọn zan nado yìn mẹdevo he tin to apó lọ mẹ lẹ.

Pinplọn Mẹdevo lẹ Nado Lẹzun Lẹngbọhọtọ

Mẹmẹsunnu depope, mahopọnna owhe etọn, he to ‘pipegan na azọngban nugopọntọ tọn to azọ́n dagbe de jlo.’ (1 Timoti 3:1) Devizọnwatọ lizọnyizọnwiwa tọn susu ko do ojlonọ-yinyin hia nado pegan na lẹblanulọkẹyi dogọ lẹ. Enẹwutu, mẹho lẹ nọ gbọn homẹhunhun dali gọalọna mẹmẹsunnu ojlonọ ehelẹ nado ze afọdide nujọnu tọn ehe to ‘pipegan na azọngban nugopọntọ tọn’ mẹ. Ehe zẹẹmẹdo pinplọn yé nado yin lẹngbọhọtọ kọdetọn dagbenọ.

Na titẹdo nujinọtedo yiaga Jiwheyẹwhe tọn lẹ go pẹkipẹki wutu, agun Klistiani Jehovah tọn ma ko yin hinhẹnzun madogannọ gbọn lẹngbọhọtọ lalonọ taidi dehe yin zẹẹmẹ basina to Ezekiẹli 34:2-6 mẹ lẹ nkọtọn dali gba. Ehelẹ yin wangbẹna to nukun Jehovah tọn mẹ bosọ yinmọ to aliho he sọgbe mẹ. Kakati nado na núdùdù apó lọ, yé na núdùdù yedelẹ. Yé gboawupo nado hẹn awutunọ lẹ lodo, nado hẹnazọngbọna azọ̀ntọ lẹ, nado blapana dehe gbleawu lẹ, kavi nado hẹn dehe yin vunvunpe kavi bu lẹ lẹkọ. To nuyiwa taidi ohla lẹ kakati ni yin lẹngbọhọtọ mẹ, yé nọ gbidikọna lẹngbọ lẹ zẹjlẹgo. Lẹngbọ heyin kọgbẹ́ e go lẹ yin vúnvúnpe, bo to dindanpe légbe-lègbe matin mẹdepope nado penukundo yé go.—Jẹlemia 23:1, 2; Nahumi 3:18; Matiu 9:36.

To ma taidi lẹngbọhọtọ nugbomadọtọ enẹlẹ mẹ, Klistiani lẹngbọhọtọ lẹ nọ hodo apajlẹ Jehovah tọn. Yé nọ gọalọ nado deanana lẹngbọ lẹ jẹ “amamú kikọ́” gbigbọmẹ tọn po “agbàdo osin awumiọn tọn” po kọ̀n. Yé nọ dovivẹnu nado deanana yé “gbọn ali dodo tọn ji” gbọn alọgigọna yé nado mọnukunnujẹ Ohó Jehovah tọn mẹ ganji podọ nado yí ì do yizan mẹ na yedetiti dali. Yé sọgan wà ehe po kọdetọn dagbe po na yé ‘pegan nado plọnmẹ’ wutu.—1 Timoti 3:2.

Suhugan nuplọnmẹ mẹho lẹ tọn nọ yin wiwà sọn oplò ji to opli agun tọn lẹ whenu. Ṣigba, mẹho lẹ sọ nọ plọnmẹ to dodonu mẹdopodopo tọn ji ga. Nugbo wẹ dọ, delẹ pọnte to nupinplọn omẹ dopodopo mẹ, to whenuena devo lẹ tindo nunina to hodidọ lẹ mẹ. Ṣigba nugopipe he yido taun to adà mẹpinplọn tọn dopo mẹ ma nọ hẹn mẹde ma nado pegan taidi mẹplọntọ de na taun tọn gba. Mẹho lẹ nọ plọnmẹ, gbọn yíyí dotẹnmẹ he hundote hlan yé lẹpo zan dali, gọna dlapọn lẹngbọhọtọ tọn. Dlapọn lẹngbọhọtọ tọn delẹ nọ yin bibasi to dodonu aṣa tọn ji, di apajlẹ, to dlapọn heyin titobasina lẹ whenu. Ṣigba suhugan dlapọn lẹngbọhọtọ tọn sọgan sọ yin bibasi to aliho he mayin aṣa tọn sọmọ mẹ, he sọ yin alemọyinu daho de ga.

Lẹngbọhọtọ lẹ po Mẹplọntọ lẹ po to Ojlẹ Dopolọ Mẹ

Doto de tindo nuhudo oyọnẹn po numimọ po tọn nado sọgan wà azọ́n etọn. Ṣigba awutunọ etọn lẹ nọ yọ́n pinpẹn etọn to whenuena e do homẹdagbe, awuvẹmẹ, mẹtọnhopọn, po ojlo nujọnu tọn po hia. Jẹhẹnu ehelẹ dona yin apadewhe gbẹtọ-yinyin etọn tọn. Mọdopolọ jẹhẹnu mọnkọtọn lẹ dona lẹzun apadewhe gbẹtọ-yinyin mẹplọntọ po lẹngbọhọtọ dagbe de tọn po, yèdọ apadewhe nuyiwa egbesọegbesọ etọn tọn. Mẹplọntọ nujọnu tọn de na wleawufo nado plọnnu mẹhe lẹdo e lẹ to whedepopenu he e lẹzun dandan. “Ohó dopo to ojlẹ [he sọgbe, NW] etọn mẹ, nawẹ e jẹ do,” wẹ Howhinwhẹn lẹ 15:23 dọ. “Ojlẹ he sọgbe” lọ sọgan yin whenuena ewọ to hodọ sọn oplò ji, whenuena e to yẹwhehodọ sọn whédegbè jẹ whédegbè, kavi whenuena e to hodọdopọ hẹ mẹde to Plitẹnhọ Ahọluduta tọn mẹ kavi to alokan ji. Mọdopolọ, lẹngbọhọtọ dagbe de nọ dovivẹnu nado do jẹhẹnu dagbe, mẹtọnhopọn tọn lẹ hia to ojlẹ lẹpo mẹ, e mayin to whenuena e to dlapọn lẹngbọhọtọ tọn basi lẹ kẹdẹ gba. Na ‘hùnhùn ahun etọn do nùvo’ wutu, e na yí dagbenu dotẹnmẹ hundote lẹpo tọn zan nado yìn lẹngbọ lẹ, bo na yé nukunpedomẹgo he yé tindo nuhudo etọn to ojlẹ he sọgbe mẹ. Ehe wẹ yin nuhe nọ hẹn ewọ yin mẹyiwanna to nukun lẹngbọ lẹ tọn mẹ.—Malku 10:43.

Wolfgang, heyin mẹho de todin, flin dlapọn ayidedai tọn de heyin bibasi na whẹndo yetọn gbọn devizọnwatọ lizọnyizọnwiwa tọn de po asi etọn po dali. E dọmọ: “Ovi mítọn lẹ yin homẹhunnọ taun gando ayidonugo he yé mọyi po ojlẹ ayajẹ tọn he mí tindo po go. Yé gbẹ́ pò to hodọ gandego.” Mọwẹ, devizọnwatọ lizọnyizọnwiwa tọn ehe dohia dọ emi nọ hò mẹtọnpọn; e ‘hùn ahun etọn do nùvo.’

Dotẹnmẹ hundote devo nado ‘hùn ahun mẹtọn do nùvo’ wẹ gbọn awutunọ lẹ didlapọn, wekanhlanmẹ tulinamẹ tọn kleun de didohlan, kavi yiylọ yé to alokan ji dali—yèdọ nudepope he na hẹn yé yọnẹn dọ hiẹ nọ hò mẹtọnpọn! Na alọgọ to whenuena nuhudo etọn tin. Eyin yé jlo nado dọho, bo dotoai po sọwhiwhe po. Dọho dogbọn nuwiwa dagbe, ojlofọndotenamẹ yẹwhehọluduta tọn agun lọ tọn lẹ kavi fidevo tọn lẹ dali. Gọalọna yé nado ze ayidonugo do sọgodo gigonọ he yè wleawu etọn dai na mẹhe yiwanna Jehovah lẹ ji.—2 Kọlintinu lẹ 4:16-18.

To Yidogọmẹ Na Dlapọn Lẹngbọhọtọ Tọn Lẹ

To hinhẹn lẹndai dlapọn lẹngbọhọtọ tọn lẹ do ayiha mẹ mẹ, e yin nuhe họnwun dọ dlapọn lẹngbọhọtọ tọn aṣa tọn lẹ bibasi yì owhé mẹmẹsunnu lẹ tọn gbè, dile etlẹ yin nujọnu do sọ, yin apadewhe poun to nuhe e bẹhẹn lẹ mẹ. Lẹngbọhọtọ owanyinọ de nọ ‘hùn ahun etọn do nùvo’ gbọn yinyin mẹhe yọ́n dọnsẹpọ to ninọmẹ lẹpo podọ to ojlẹ lẹpo mẹ dali. Haṣinṣan zohunhunnọ he e nọ wleawuna hẹ mẹmẹsunnu etọn lẹ nọ hẹn yé deji dọ to ojlẹ zinvlu gọ́ngọ́n tọn lẹ mẹ, yé ma dona dibu na oylan depope gba, to yinyọnẹn mẹ dọ mẹmẹsunnu yiwanna yetọn, yèdọ Klistiani lẹngbọhọtọ lọ, nọ hò yetọn pọ́n.—Psalm 23:4.

Mọwẹ, mì Klistiani lẹngbọhọtọ lẹpo ni ‘hùn ahun mìtọn do nùvo.’ Mì tindo owanyi nujọnu tọn to mẹmẹsunnu mìtọn lẹ mẹ—mì na tuli yé, mì miọnhomẹna yé, mì jlọ yé dote to gbigbọmẹ to aliho he yọnbasi na mì lẹpo mẹ. Mì gọalọna yé nado yin tenọglinọ to yise mẹ. (Kọlọsinu lẹ 1:23) Na yinyin didona po Klistiani lẹngbọhọtọ he nọ ‘hùn ahun yetọn do nùvo’ lẹ po wutu, lẹngbọ lẹ ma na gbọ̀agba nudepope tọn gba. Yé na magbè, dile Davidi basi do, nado nọ nọ̀ ohọ̀ Jehovah tọn mẹ kakadoi. (Psalm 23:1, 6) Etẹwẹ lẹngbọhọtọ owanyinọ de nasọ dín hugan enẹ?

[Nudọnamẹ Odò Tọn]

[Apotin to weda 30]

Klistiani Lẹngbọhọtọ Lẹ

• Nọ wadevizọn to jejejininọ mẹ podọ sọn ojlo mẹ

• Nọ na núdùdù bo nọ penukundo apó lọ go

• Nọ gọalọna mẹdevo lẹ nado pegan nado yin lẹngbọhọtọ lẹ

• Nọ dla awutunọ lẹ pọ́n bo nọ hò yetọn pọ́n

• Nọ tin to aṣeji nado gọalọna mẹmẹsunnu yetọn lẹ to ojlẹ lẹpo mẹ

[Yẹdide to weda 31]

Vlavo to lizọnyizọn kunnudegbe tọn mẹ, to opli lẹ ji, kavi to ayidedai lẹ tẹnmẹ, mẹho lẹ nọ yin lẹngbọhọtọ to whepoponu