Sẹ̀n Jiwheyẹwhe po Gbigbọ Ojlo Tintindo Tọn de Po

“YẸN na yí homẹhunhun susugege do zan bosọ yin mẹzinzan mlẹnmlẹn na alindọn mìtọn lẹ,” wẹ apọsteli Paulu wlan. (2 Kọlintinu lẹ 12:15, NW ) Etẹwẹ hogbe ehelẹ dọna we gando pọndohlan po walọyizan he devizọnwatọ Jehovah tọn lẹ dona tẹnpọn nado wleawuna po go? Sọgbe hẹ weyọnẹntọ Biblu tọn dopo, to whenuena Paulu wlan hogbe enẹlẹ hlan Klistiani he tin to Kọlinti lẹ, e to didọ dọmọ: “Yẹn tindo ojlo nado yí huhlọn ṣie, podọ whenu, podọ gbẹzan, po nuhe yẹn tindo lẹpo po zan na dagbemẹ-ninọ mìtọn, dile otọ́ de nọ gbọn homẹhunhun dali wà na ovi etọn lẹ do.” Paulu wleawufo nado “yin mẹzinzan mlẹnmlẹn,” kavi nado ‘yin zinzan mlẹnmlẹn jẹ nuṣikọnamẹ kọ̀n,’ eyin enẹ wẹ na yin nuhe yin bibiọ nado hẹn lizọnyizọn Klistiani tọn etọn di.

Humọ, Paulu “yí homẹhunhun susugege” do wà ehe lẹpo. E “tindo ojlo mlẹnmlẹn” nado wàmọ, wẹ Bible de Jérusalem dọ. Etẹwẹ dogbọn hiẹ dali? Be hiẹ to jijlo nado yí whenu, huhlọn, nugopipe, po nutindo towe lẹ po zan to devizọnwiwa dohlan Jehovah Jiwheyẹwhe mẹ podọ na dagbenu mẹdevo lẹ tọn, yèdọ eyin mọwiwà tlẹ zẹẹmẹdo yinyin “zinzan mlẹnmlẹn jẹ nuṣikọnamẹ kọ̀n” to whedelẹnu ya? Podọ be hiẹ na “yí homẹhunhun susugege” do wà ehe ya?

Yé Gbẹ́ Mlẹnmlẹn Nado Sẹ̀n Jiwheyẹwhe

E mayin dọ suhugan gbẹtọ lẹ tọn nọ whleawu nado sẹ̀n Jiwheyẹwhe kẹdẹ wẹ gba, ṣigba yé nọ gbẹ́ mlẹnmlẹn nado wàmọ. Gbigbọ yetọn yin pinpẹn-nutọn-mayọnẹn tọn, mẹdekannujẹ ṣejannabi tọn, yèdọ etlẹ yin atẹṣiṣi tọn. Satani doyẹklọ Adam po Evi po biọ aliho nulẹnpọn tọn mọnkọtọn de mẹ. E gbọn nuṣiwa dali dọ dọ yé na “tin di Jiwheyẹwhe, bo na nọ yọ́n onú dagbe po oylan po”—yèdọ penugo nado basi nudide na yedelẹ na nuhe dù nuhe sọgbe po dehe ma sọgbe po. (Gẹnẹsisi 3:1-5) Mẹhe tindo gbigbọ mọnkọtọn to egbehe lẹ nọ lẹndọ yé dona tindo mẹdekannujẹ mlẹnmlẹn nado wà nuhe yé jlo lẹ matin gbedido depope hlan Jiwheyẹwhe kavi didademẹ depope sọn ewọ dè nkọtọn. (Psalm 81:11, 12) Yé nọ jlo na yí nuhe yé tindo lẹpo zan to afọdidona dagbenu yedetiti tọn lẹ kẹdẹ mẹ.—Howhinwhẹn lẹ 18:1.

Vlavo hiẹ ma tindo pọndohlan zẹjlẹgo tọn ehe gba. E yọnbasi dọ hiẹ yọ́n pinpẹn nunina ogbẹ̀ tọn he hiẹ to vivi etọn dù todin podọ etlẹ yin todido jiawu gbẹninọ kakadoi to paladisi aigba ji tọn de mẹ tọn tlala. (Psalm 37:10, 11; Osọhia 21:1-4) Hiẹ sọgan do pinpẹn-nutọn-yinyọnẹn sisosiso hia hlan Jehovah na dagbewà etọn lẹ hlan we. Ṣigba mímẹpo dona tin to aṣeji hlan owù lọ dọ Satani sọgan sọtadona nulẹnpọn mítọn to aliho mọnkọtọn de mẹ bọ sinsẹ̀nzọn mítọn sọgan lẹzun nuhe mayin alọkẹyi to Jiwheyẹwhe dè na taun tọn. (2 Kọlintinu lẹ 11:3) Nawẹ ehe sọgan jọ gbọn?

Sinsẹ̀nzọn sọn Ojlo mẹ Wá Yin Bibiọ

Jehovah nọ jlo sinsẹ̀nzọn sọn ojlo mẹ wá, ahun lẹpo tọn. E ma nọ hẹn mí po huhlọn po pọ́n gbede nado wà ojlo etọn gba. Satani wẹ sọgan wà nudepope nado gbidikọna kavi klọ gbẹtọ lẹ biọ ojlo etọn wiwà mẹ. To kọndopọmẹ hẹ sinsẹ̀nzọnwiwa hlan Jiwheyẹwhe, Biblu nọ dọho gando azọngban, gbedide lẹ, nubiọtomẹsi lẹ, po mọmọ po go. (Yẹwhehodọtọ 12:13; Luku 1:6) Ṣogan, mẹwhinwhàn tintan mítọn na Jiwheyẹwhe sinsẹ̀n wẹ yindọ mí yiwanna ẹn.—Eksọdusi 35:21; Deutelonomi 11:1.

Mahopọnna lehe Paulu yí ede zan to sinsẹ̀nzọn Jiwheyẹwhe tọn mẹ sọ, e yọnẹn dọ ehe na yin ovọ́ ‘eyin emi ma tindo owanyi.’ (1 Kọlintinu lẹ 13:1-3) To whenuena Biblu kàntọ lẹ dlẹnalọdo Klistiani lẹ taidi afanumẹ Jiwheyẹwhe tọn lẹ, yé ma to alọdlẹndo kanlinmọ-yinyin mlẹnmlẹn heyin zize sinai do mẹhẹn po huhlọn po ji gba. (Lomunu lẹ 12:11; Kọlọsinu lẹ 3:24) Nuhe e zẹẹmẹdo wẹ mẹdezejo po ojlo po sinai do owanyi sisosiso, sọn ahun mẹ wá na Jiwheyẹwhe po Visunnu etọn, Jesu Klisti po ji.—Matiu 22:37; 2 Kọlintinu lẹ 5:14; 1 Johanu 4:10, 11.

Sinsẹ̀nzọn mítọn hlan Jiwheyẹwhe sọ dona do owanyi sisosiso de hlan gbẹtọ lẹ hia. “Míwlẹ to dẹẹdẹwà to mì ṣẹnṣẹn, dile ovipọntọ nọ to ayipa ovi etọn lẹ go do,” wẹ Paulu wlan hlan agun he tin to Tẹsalonika. (1 Tẹsalonikanu lẹ 2:7) To aigba susu ji to egbehe, onọ̀ lẹ tindo azọngban sọgbe hẹ osẹ́n de nado penukundo ovi yetọn lẹ go. Ṣigba na jide tọn suhugan onọ̀ lẹ tọn ma nọ wà ehe nado setonuna osẹ́n poun gba, be yé nọ wàmọ wẹ ya? Lala. Yé nọ wà ẹ na yé yiwanna ovi yetọn lẹ wutu. Etẹ, yèdọ onọ̀ mẹgopọntọ de nọ yí homẹhunhun do basi avọ́sinsan daho lẹ do ota ovi etọn lẹ tọn mẹ! Na Paulu tindo ‘owanyi sinsinyẹn’ mọnkọtọn na mẹhe e to lizọnyizọn wà na lẹ wutu, ewọ yin ‘homẹhẹnhunna taun’ (“tindo ojlo,” King James Version; “homẹhunnọ,” New International Version) nado yí ogbẹ̀ ede tọn zan to alọgigọna yé mẹ. (1 Tẹsalonikanu lẹ 2:8) Owanyi na whàn mí nado hodo apajlẹ Paulu tọn.—Matiu 22:39.

Etẹwẹ Dogbọn Sinsẹ̀nzọn Awuwhiwhle Tọn Dali?

Nugbo wẹ dọ, mí ma dona dike owanyi mẹdetiti tọn ni sinyẹn hugan owanyi na Jiwheyẹwhe po gbẹtọ lẹ po gba. Yin e mayin mọ, owù nujọnu tọn de tin dọ mí sọgan to sinsẹ̀nzọn he mayin ahun lẹpo tọn, heyin awuwhiwhle tọn kẹdẹ wà. Mí tlẹ sọgan jẹ awuwlena homẹgble, yèdọ numọtolanmẹ bẹwlu tọn delẹ ji dọ mí ma sọgan zan gbẹzan mítọn lẹ to aliho he mẹ mí jlo te mlẹnmlẹn gba. Ehe jọ do Islaelivi delẹ he hẹn owanyi yetọn na Jiwheyẹwhe bu ṣigba gbẹsọ nọ basi sinsẹ̀nzọn delẹ hlan ewọ sọn linlẹn azọngbannọ-yinyin tọn mẹ lẹ go. Etẹwẹ yin kọdetọn lọ? Jiwheyẹwhe sinsẹ̀n lẹzun “agbọpemẹnu de” na yé.—Malaki 1:13.

Avọ́nunina depope heyin nina hlan Jiwheyẹwhe nọ saba yin “madoazọ̀n,” he matindo oblọ, yèdọ ‘dehe yọ́n hugan’ he tin-to-aimẹ. (Levitiku 22:17-20; Eksọdusi 23:19) Ṣigba, kakati nado yí kanlin he yọ́n hugan yetọn lẹ hlan Jehovah, omẹ azán Malaki gbè tọn lẹ jẹ dehe yé lọsu masọ tindo ojlo na na taun tọn lẹ na ji. Etẹwẹ yin nuyiwa Jehovah tọn? E dọna yẹwhenọ lọ lẹ dọmọ: “Whenuena mìwlẹ yí [kanlin] nukuntọ́nnọ do na avọ́nunina na avọ́sannu [mì nọ dọ dọ], e ma yin oylan de! Podọ whenuena mìwlẹ yí sẹkunọ po lanmẹzọnnọ po do na avọ́nunina, e mayin oylan de! Yí i dinvie hlan togán towe; ewọ na yin homẹhunnọ to dè we? Kavi ewọ na kẹalọyi we? . . . Podọ mìwlẹ ko sọ hẹn enẹ he yè bẹ́ gbọn huhlọnnu dali wá, po sẹkunọ lọ po, po lanmẹzọnnọ lọ po; le wẹ mìwlẹ hẹn avọ́nunina lọ wá do: be yẹn do [tindo homẹhunhun to ehe mẹ] sọn alọ mìtọn mẹ?”—Malaki 1:8, 13.

Nawẹ ehe sọgan jọ do depope to mí mẹ go gbọn? Avọ́sinsan mítọn lẹ sọgan lẹzun “agbọpemẹnu de” na mí eyin mí ma tindo ahun po gbigbọ ojlo tintindo nugbonugbo tọn de po. (Eksọdusi 35:5, 21, 22; Levitiku 1:3; Psalm 54:6; Heblu lẹ 13:15, 16) Di apajlẹ, be ojlẹ he mayin nujọnu na mí lẹ wẹ Jehovah nọ mọyi ya?

Be mẹdepope sọgan lẹnnupọn sisosiso dọ Jiwheyẹwhe na ko kẹalọyi eyin hagbẹ whẹndo tọn linlẹn dagbenọ de kavi Levinu zohunhunnọ de to aliho de mẹ hẹn Islaelivi he ma tindo ojlo de po huhlọn po nado de kanlin he yọ́n hugan etọn na avọ́sinsan to whenuena ewọ ma jlo nado yí ì do sanvọ́ na taun tọn ya? (Isaia 29:13; Matiu 15:7, 8) Jehovah gbẹ́ avọ́sinsan mọnkọtọn lẹ po mẹhe na yé lẹ lọsu po dai to agọgbọnẹnmẹ.—Hosea 4:6; Matiu 21:43.

Hùnhomẹ Nado Wà Ojlo Jiwheyẹwhe Tọn

Nado wà sinsẹ̀nzọn he Jiwheyẹwhe na kẹalọyi, mí dona hodo apajlẹ Jesu Klisti tọn. “Yẹn ma to ojlo ṣie lọsu dín gba,” wẹ e dọ, “adavo ojlo mẹhe do mi hlan tọn.” (Johanu 5:30) Jesu mọ ayajẹ daho to Jiwheyẹwhe sinsẹ̀n sọn ojlo mẹ wá mẹ. Jesu hẹn hogbe dọdai tọn Davidi tọn lẹ di dọmọ: “Homẹ ṣie hùn nado wà ojlo towe, Jiwheyẹwhe ṣie E.”—Psalm 40:8.

Dile etlẹ yindọ Jesu hùnhomẹ to ojlo Jehovah tọn wiwà mẹ, ehe ma nọ bọawu to whepoponu gba. Lẹnnupọndo nuhe jọ tlolo jẹnukọnna wiwle, whẹdanamẹ, po hùhù etọn po ji. Dile e tin to jipa Gẹtsemani tọn, Jesu yin “awublanọ susu” bosọ ‘tindo numọtolanmẹ awufiẹsa tọn.’ Numọtolanmẹ kọgbidinamẹ tọn lọ sinyẹn sọmọ bọ, dile e to dẹ̀ho, “odẹ́n etọn sọ taidi kùnkùn daho ohùn tọn . . . do aigba.”—Matiu 26:38; Luku 22:44.

Naegbọn Jesu tindo numimọ awufiẹsa tọn mọnkọtọn? Na jide tọn e mayin na dagbenu-mẹdetiti tọn kavi awuwhiwhle nado wà ojlo Jiwheyẹwhe tọn wutu gba. Ewọ wleawufo nado kú, bo tlẹ jẹagọ sinsinyẹn do hogbe Pita tọn lẹ dọmọ: “Jiwheyẹwhe ni wàlẹblanu to oji we, Oklunọ: ehe ma na tin hlan we gba.” (Matiu 16:21-23) Nuhe to ahunmẹduna Jesu wẹ lehe okú etọn taidi sẹ́nhẹngbatọ heyin vivlẹko de na yinuwado Jehovah po oyín wiwe Etọn po ji do. Jesu yọnẹn dọ Otọ́ emitọn na tindo numọtolanmẹ awufiẹsa tọn tlala nado mọ Visunnu yiwanna etọn yin nuyiwahẹ to aliho kanyinylan tọn mọnkọtọn de mẹ.

Jesu sọ mọnukunnujẹemẹ ga dọ emi to sisẹpọ ojlẹ titengbe de to hẹndi lẹndai Jehovah tọn tọn mẹ. Titẹdo osẹ́n Jiwheyẹwhe tọn lẹ go po nugbonọ-yinyin po na dohia zẹ̀ ayihaawe tintindo depope go dọ Adam sọgan ko basi nudide dopolọ. Nugbonọ-yinyin Jesu tọn na hùngona alọsọakọ́n lalo tọn Satani tọn mlẹnmlẹn dọ gbẹtọvi lẹ ma na dè sọn ojlo mẹ wá nado sẹ̀n Jiwheyẹwhe po nugbonọ-yinyin po to whlepọn glọ gba. Gbọn Jesu gblamẹ, Jehovah na gbidi Satani sẹ̀ to godo mẹ bosọ dè nugandomẹgo atẹṣiṣi etọn tọn lẹ sẹ̀.—Gẹnẹsisi 3:15.

Azọngban pligidi nankọtọn die tin to abọ́ Jesu tọn lẹ ji! Oyín Otọ́ etọn tọn, jijọho wẹkẹ mẹ tọn, po whlẹngán whẹndo gbẹtọvi tọn po popolẹpo sinai do nugbonọ-yinyin Jesu tọn ji. To ehe yinyọnẹn mẹ, e hodẹ̀ dọmọ: “Otọ́ ṣie E, eyin e sọgan yin wiwà, gbọ kọfo he ni juwayi sọn oji e: e mayin le yẹn jlo do gba, adavo le hiẹ jlo do.” (Matiu 26:39) Yèdọ etlẹ yin to kọgbidinamẹ he sinyẹn tlala lẹ glọ, Jesu ma hokọ̀ to ojlonọ-yinyin etọn mẹ nado jo ede na ojlo Otọ́ etọn tọn gba.

‘Gbigbọ Yin Ojlonọ, Ṣigba Agbasa Yin Madogánnọ’

To whenuena e yindọ Jesu jiya numọtolanmẹ flumẹjijẹ sinsinyẹn tọn dile e to Jehovah sẹ̀n, mílọsu sọgan donukun Satani nado yí kọgbidinamẹ zan do mí ji taidi devizọnwatọ Jiwheyẹwhe tọn lẹ. (Johanu 15:20; 1 Pita 5:8) Humọ, mí yin mapenọ. Enẹwutu eyin mí tlẹ dè sọn ojlo mẹ wá nado to Jiwheyẹwhe sẹ̀n, e ma na bọawu na mí nado wàmọ gba. Jesu mọ lehe apọsteli etọn lẹ vánkan sọ nado sọgan wà nuhe ewọ biọ to yé si lẹpo. Enẹwutu wẹ e do dọmọ: “Gbigbọ to jijlo, ṣigba agbasa yin madogánnọ.” (Matiu 26:41) Nude mayin madogánnọ to agbasa pipé gbẹtọvi tọn etọn mẹ to jọwamọ-liho gba. Ṣigba, madogán agbasa mẹ tọn devi etọn lẹ tọn wẹ e tindo to ayiha mẹ, yèdọ mape he yé ko dugu etọn sọn Adam mapenọ dè. Jesu yọnẹn dọ na mapenọ-yinyin he yè ko dugu etọn po dogbó gbẹtọvi tọn he nọ dekọtọn sọn e mẹ lẹ po tọn wutu, yé dona vánkan nado sọgan wà nuhe yé jlo na wà to sinsẹ̀nzọn Jehovah tọn mẹ lẹpo.

Enẹwutu, to whelọnu lo, numọtolanmẹ mítọn sọgan taidi apọsteli Paulu tọn, mẹhe tindo awufiẹsa sisosiso to whenuena mapenọ-yinyin glọnalina nugopipe etọn nado sẹ̀n Jiwheyẹwhe to gigọ́mẹ. “Na [nugopipe] nado jlo tin to dè e,” wẹ Paulu wlan, “ṣigba [nugopipe] nado wà enẹ he yọ́n ma tin.” (Lomunu lẹ 7:18) Mílọsu mọdọ mí ma sọgan nọ wà onú dagbe he mí jlo nado wà lẹpo to gigọ́mẹ gba. (Lomunu lẹ 7:19) Ehe mayin na awuwhiwhle depope to adà mítọn mẹ wutu gba. Madogán agbasa tọn wẹ nọ glọnalina vivẹnudido he tlẹ yọ́n hugan mítọn lẹ.

Mì gbọ mí ni ma hẹn todido bu blo. Eyin mí wleawufo sọn ahun mẹ wá nado wà nuhe go mí pé lẹpo, Jiwheyẹwhe na kẹalọyi sinsẹ̀nzọn mítọn na jide tọn. (2 Kọlintinu lẹ 8:12) Mì gbọ mí ni ‘wà nuhe go mí pé lẹpo’ nado hodo apajlẹ gbigbọ Klisti tọn heyin mẹdezejo mlẹnmlẹn hlan ojlo Jiwheyẹwhe tọn tọn. (2 Timoti 2:15; Filippinu lẹ 2:5-7; 1 Pita 4:1, 2) Jehovah na dona bosọ nọgodona gbigbọ ojlo tintindo tọn mọnkọtọn. Ewọ na na mí ‘huhlọn he hugan jọwamọ tọn’ nado hẹn madogán mítọn lẹ tin to jlẹkaji. (2 Kọlintinu lẹ 4:7-10) Po alọgọ Jehovah tọn po míwlẹ, taidi Paulu, na “yí homẹhunhun susugege do zan bosọ yin mẹzinzan mlẹnmlẹn” to sinsẹ̀nzọn họakuẹ Etọn mẹ.

[Yẹdide to weda 21]

Paulu sẹ̀n Jiwheyẹwhe sọn ojlo mẹ wá jẹ nugopipe etọn lẹpo kọ̀n

[Yẹdide to weda 23]

Jesu wà ojlo Otọ́ etọn tọn, etlẹ yin to kọgbidinamẹ he sinyẹn hugan lẹ glọ