Zọnlinzinzin Afọsu-Afọsi hẹ Titobasinanu Jehovah Tọn
“[Na] Jiwheyẹwhe jijọho tọn . . . ni hẹn mì sọgbe to azọ́n dagbe lẹpo mẹ nado nọ wà ojlo etọn.”—HEBLU LẸ 13:20, 21.
1. Gbẹtọ sọha nẹmu wẹ tin to aigba ji, podọ omẹ nẹmu wẹ yin hihia taidi hagbẹ sinsẹ̀n delẹ tọn?
TO OWHE 1999 tọn mẹ, sọha mẹhe tin to aigba ji lẹ tọn yì liva ṣidopo! The World Almanac dohia dọ sọn sọha ehe mẹ nudi gbẹtọ 1 165 000 000 yin Malenu; 1 030 000 000 yin Katoliki Lomu tọn; 762 000 000 yin Hindou; 354 000 000 yin Buddha-sẹ̀ntọ; 316 000 000 yin Plọtẹstant; podọ 214 000 000 yin sinsẹ̀n Orthodoxe tọn.
2. Etẹwẹ sọgan yin didọ gando ninọmẹ sinsẹ̀n tọn he tin-to-aimẹ to egbehe go?
2 To pọndohlan mẹ na kinklan po bẹwlu sinsẹ̀n tọn he tin-to-aimẹ to egbehe po, be omẹ livi susu ehe lẹpo sọgan to nuyiwa to kọndopọmẹ hẹ ojlo Jiwheyẹwhe tọn ya? Lala, “na Jiwheyẹwhe mayin nudaitọ numanukannu tọn de gba, adavo jijọho tọn.” (1 Kọlintinu lẹ 14:33) To alọ devo mẹ, etẹwẹ dogbọn mẹmẹsunnu-yinyin akọjọpli devizọnwatọ Jehovah tọn lẹ tọn dali? (1 Pita 2:17) Dodinnanu sọwhiwhe tọn dohia dọ ‘Jiwheyẹwhe jijọho tọn nọ hẹn yé sọgbe po onú dagbe lẹpo po nado wà ojlo etọn.’—Heblu lẹ 13:20, 21.
3. Etẹwẹ jọ to Jelusalẹm to Pẹntikọsti owhe 33 W.M., podọ etẹwutu?
3 Na nugbo tọn, sọha mẹhe to awukọndopọ hẹ Kunnudetọ Jehovah tọn lẹ mayin nujinọtedo de nado yọnẹn eyin yé to vivi nukundagbe sọn olọn mẹ wá tọn dù gba; mọjanwẹ sọha nulinlẹn tọn lẹ ma nọ yinuwado Jiwheyẹwhe ji do niyẹn. E ma dè Islaelivi lẹ na yé “yin susu to sọha mẹ hugan” to gbẹtọ lẹ mẹ wutu gba. Na nugbo tọn, yé yin “vude tlala” to yé mẹ. (Deutelonomi 7:7) Ṣigba na Islaeli ma yin nugbonọ wutu, to Pẹntikọsti owhe 33 W.M., Jehovah hẹn nukundagbe etọn wá agun yọyọ he bẹ hodotọ Jesu Klisti tọn lẹ hẹn ji. Yé yin dide po gbigbọ wiwe Jehovah tọn po bosọ yí zohunhun do tọ́n yì nado lá nugbo lọ gando Jiwheyẹwhe po Klisti po go hlan mẹdevo lẹ.—Owalọ lẹ 2:41, 42.
To Nukọnzindo to Whepoponu
4. Naegbọn hiẹ na dọ dọ agun fliflimẹ Klistiani tọn to nukọnzindo to whepoponu?
4 To owhe kanweko tintan whenu, agun Klistiani tọn to nukọnzindo to whepoponu, to aigba-denamẹ yọyọ lẹ hùn dote, to omẹ lẹ hẹn zun devi, bosọ to nukunnumọjẹnumẹ dogọ lẹndai Jiwheyẹwhe tọn lẹ tọn tindo. Klistiani fliflimẹ tọn lẹ zinzọnlin afọsu-afọsi hẹ nukunnumọjẹnumẹ gbigbọmẹ tọn heyin awuwlena gbọn wekanhlanmẹ heyin gbigbọdo sọn olọn mẹ lẹ gblamẹ. Na yinyin whinwhàn gbọn dlapọn sọn apọsteli lẹ po mẹdevo lẹ po dè wutu, yé basi wadotana lizọnyizọn yetọn tọn. Ehe yin kandai basina ganji to Owe Wiwe Glẹki Klistiani tọn lẹ mẹ.—Owalọ lẹ 10:21, 22; 13:46, 47; 2 Timoti 1:13; 4:5; Heblu lẹ 6:1-3; 2 Pita 3:17, 18.
5. Naegbọn titobasinanu Jiwheyẹwhe tọn to nukọnzindo to egbehe, podọ naegbọn mí dona to zọnlinzin afọsu-afọsi hẹ ẹ?
5 Taidi Klistiani fliflimẹ tọn lẹ, Kunnudetọ Jehovah tọn egbezangbe tọn lẹ ko jideji sọn sọha kleun lẹ mẹ. (Zekalia 4:8-10) Sọn vivọnu owhe kanweko 19tọ tọn gbọ́n, kunnudenu họnwun lẹ ko tin dọ gbigbọ Jiwheyẹwhe tọn tin hẹ titobasinanu etọn. Na mí ma ko ganjẹ huhlọn gbẹtọvi tọn go, ṣigba do anademẹ gbigbọ wiwe tọn go wutu, mí ko zindonukọn nado to nukọnyi to nukunnumọjẹnumẹ Owe-wiwe tọn mítọn lẹ mẹ podọ to ojlo Jiwheyẹwhe tọn wiwà mẹ. (Zekalia 4:6) Todin he mí tin to ‘azán godo tọn lẹ’ mẹ, nujọnu wẹ e yin dọ mí ni to zọnlinzin afọsu-afọsi hẹ titobasinanu Jehovah tọn he to nukọnzindo. (2 Timoti 3:1-5) Mọwiwà nọ hẹn mí penugo nado hẹn todido mítọn dogbẹ̀ podọ nado tindo mahẹ to kunnudide gando Ahọluduta he ko yin didoai Jiwheyẹwhe tọn go whẹpo opodo mlẹnmlẹn lọ nido wá titonu ehe ji.—Matiu 24:3-14.
6, 7. Adà voovo atọ̀n he mẹ titobasinanu Jehovah tọn ko zindonukọn te tẹlẹ wẹ mí na gbadopọnna?
6 Mẹhe ko bẹ gbẹdido hẹ titobasinanu Jehovah tọn jẹeji to owhe 1920, 1930, po 1940 tọn lẹ po tin to ṣẹnṣẹn mítọn. To owhe fliflimẹ tọn enẹlẹ mẹ, mẹnu to mí mẹ wẹ sọgan ko lẹnnupọndo jideji ayidego tọn po nukọnyiyi debọdo-dego tọn ehe po ji to titobasinanu lọ mẹ jẹ egbehe? Lẹnnupọndo nujijọ titengbe he kọ̀n mí ko jẹ to whenuho egbezangbe tọn mítọn mẹ lẹ ji! Na nugbo tọn, alemọyinu gbigbọmẹ tọn wẹ e yin nado lẹnnupọndo nuhe Jehovah ko wadotana gbọn mẹhe yin titobasina to yẹwhehọluduta-liho etọn lẹ gblamẹ ji.
7 Davidi hohowhenu tọn yin nuyiwadeji sisosiso to whenuena e lẹnayihamẹpọn do azọ́njiawu Jehovah tọn lẹ ji. “Eyin yẹn na lá, bosọ dọho yetọn,” wẹ e dọ, “yé hú onú hihia.” (Psalm 40:5) Mí pannukọn alọhẹndotenamẹ dopolọ, heyin nugomape nado dọ nuwiwa daho po dehe jẹna pipà Jehovah tọn lẹ po to azán mítọn gbè tọn. Etomọṣo, mì gbọ mí ni gbadopọnna ninọmẹ atọ̀n to ehe mẹ titobasinanu Jehovah tọn ko zindonukọn te: (1) nukunnumọjẹnumẹ gbigbọmẹ tọn he to nukọnzindo, (2) lizọnyizọn heyin hinhẹn pọnte bosọ gblodeji de, podọ (3) vọjlado he nọ wá do ganmẹ lẹ to aliho nuyiwa yẹwhehọluduta tọn lẹ mẹ.
Pẹdido na Nukunnumọjẹnumẹ Gbigbọmẹ Tọn
8. To kọndopọmẹ hẹ Howhinwhẹn lẹ 4:18, etẹwẹ nukunnumọjẹnumẹ gbigbọmẹ tọn ko gọalọna mí nado yọnẹn gando Ahọluduta lọ go?
8 Gando nukunnumọjẹnumẹ gbigbọmẹ tọn he to nukọnzindo go, Howhinwhẹn lẹ 4:18 ko sọawuhia nado yin nugbo. E dọmọ: “Omọ́ nugbonọ tọn taidi hinhọ́n he sẹ́, he to sisẹ́ yì nukọn kakajẹ okle.” Lehe mí dona dopẹ́ na nukunnumọjẹnumẹ gbigbọmẹ tọn he to wunhọn he mí to numimọ etọn tindo do sọ! To plidopọ Cedar Point, Ohio tọn ji to 1919, Ahọluduta Jiwheyẹwhe tọn yin nùzindeji. Jehovah na yí Ahọluduta lọ zan nado klan oyín etọn dowiwe bosọ suwhẹna nupojipetọ-yinyin etọn. Na nugbo tọn, nukunnumọjẹnumẹ gbigbọmẹ tọn ko hẹn mí penugo nado yọnẹn dọ sọn Gẹnẹsisi kakajẹ Osọhia, Biblu do lẹndai Jehovah tọn hia nado klan oyín etọn dowiwe gbọn Ahọluduta he yin gandudeji gbọn Visunnu etọn gblamẹ dali. Finẹ wẹ todido daho hugan lọ tin te na mẹhe yiwanna dodowiwa lẹ.—Matiu 12:18, 21.
9, 10. To owhe 1920 lẹ gblamẹ, etẹwẹ yin pinplọn gando Ahọluduta lọ go podọ gando titobasinanu awe he sọta yedelẹ go, podọ nawẹ ehe ko yin alọgọnamẹnu gbọn?
9 To plidopọ Cedar Point tọn ji to 1922, hodọtọ titengbe lọ, J. F. Rutherford dotuhomẹna omẹ Jiwheyẹwhe tọn lẹ nado “lá, lá, lá Ahọlu lọ po ahọluduta etọn po.” To hosọ lọ “Jiji Akọta lọ Tọn,” heyin zinzinjẹgbonu to Atọ̀họ̀-Nuhihọ́ lọ Tọn [Glẹnsigbe] 1er mars 1925 tọn mẹ, ayidonugo yin dindọn wá wuntuntun gbigbọmẹ tọn gando dọdai he ko dlẹnalọdo didoai Ahọluduta Jiwheyẹwhe tọn to 1914 lẹ ji go. E sọ yin yinyọnẹn to 1920 lẹ gblamẹ ga dọ titobasinanu awe he sọta yede wẹ tin—Jehovah tọn po Satani tọn po. Avùnhiho lọ to yìyì to ṣẹnṣẹn yetọn, podọ míwlẹ na tin to adà he gbawhàn ji eyin mí to zọnlinzin afọsu-afọsi hẹ titobasinanu Jehovah tọn kẹdẹ.
10 Nawẹ nukunnumọjẹnumẹ gbigbọmẹ tọn mọnkọtọn ko gọalọna mí gbọn? To whenuena e yindọ Ahọluduta Jiwheyẹwhe tọn po Ahọlu Jesu Klisti po mayin apadewhe aihọn tọn, míwlẹ lọsu ma sọgan yin apadewhe etọn gba. Gbọn kadaninọ na aihọn dali, mí nọ dohia dọ mí tin to adà nugbo tọn mẹ. (Johanu 17:16; 18:37) To whenuena mí doayi nuhahun sinsinyẹn he to tuklado titonu ylankan ehe lẹ go, lehe mí nọ dopẹ́ do sọ dọ mí mayin apadewhe titobasinanu Satani tọn tọn! Podọ lehe mí tindo nukundagbe do sọ nado tindo hihọ́ gbigbọmẹ tọn to titobasinanu Jehovah tọn ṣẹnṣẹn!
11. Yinkọ Owe-wiwe tọn tẹwẹ omẹ Jiwheyẹwhe tọn lẹ kẹalọyi to 1931?
11 To plidopọ Columbus, Ohio tọn ji, to 1931, yọn-na-yizan he sọgbe Isaia 43:10-12 tọn yin bibasi. Biblu Plọntọ lẹ kẹalọyi yinkọ mẹyinyọnẹn tọn lọ Kunnudetọ Jehovah tọn lẹ. Lẹblanulọkẹyi daho nankọtọn die e yin nado hẹn yinkọ Jiwheyẹwhe tọn zun yinyọnẹn na mẹdevo lẹ nido sọgan ylọ ẹ nado sọgan yin whinwhlẹngán!—Psalm 83:18; Lomunu lẹ 10:13.
12. Nukunnumọjẹnumẹ gbigbọmẹ tọn tẹ gando gbẹtọ susugege lọ go wẹ yin awuwlena to 1935?
12 Jẹnukọnna owhe 1930 tọn lẹ, susu omẹ Jiwheyẹwhe tọn lẹ tọn wẹ tindo ayihaawe gando todido yetọn na ogbẹ̀ sọgodo tọn go. Mẹdelẹ tindo linlẹn lẹ gando ogbẹ̀ olọn mẹ tọn go ṣigba yin dindọndogo gbọn nuplọnmẹ Biblu tọn lẹ gando paladisi aigba ji tọn de go dali. To plidopọ Washington, D.C. tọn ji, to 1935, ojlofọndotenamẹnu wẹ e yin nado yọnẹn dọ gbẹtọgun susugege lọ, kavi gbẹtọ susugege, Osọhia weta 7 mẹ tọn yin hagbẹ de he tindo todido aigba ji tọn. Sọn whenẹnu gbọ́n, bibẹpli gbẹtọ susugege lọ tọn ko zindonukọn po zohunhun daho hugan gbede pọ́n tọn po. Be mí ma dopẹ́ dọ gbẹtọ susugege lọ yinyọnẹn mayin nudabla de na mí ya? Nujọnu-yinyin gbẹtọ lẹ bibẹpli to sọha daho mẹ sọn akọta, akọ̀, po ogbè lẹpo po mẹ tọn nọ whàn mí nado wazọ́n sinsinyẹn dile mí to zọnlinzin afọsu-afọsi hẹ titobasinanu Jehovah tọn.
13. Whẹho titengbe tẹwẹ yin nùzindeji to plidopọ St. Louis tọn ji to 1941?
13 Whẹho titengbe hugan he dona duahunmẹna ogbẹ́ gbẹtọvi tọn yin nùzindeji to plidopọ St. Louis, Missouri tọn ji, to 1941. Gandudu, kavi nupojipetọ-yinyin wẹkẹ lọ tọn wẹ e yin. Ehe wẹ yin whẹho he dona yin dididẹ to madẹnmẹ lọ, podọ azán dobu he gbè enẹ na yin wiwà te na wá to niyaniya mẹ! Onú devo heyin nùzindeji to 1941 wẹ whẹho tenọgligo-hinhẹn tọn he gandego, he nọ na dotẹnmẹ mí nado do fie dopodopo mítọn nọte do gando nupojipetọ-yinyin Jiwheyẹwhe tọn go hia.
14. To plidopọ akọjọpli 1950 tọn ji, etẹwẹ yin pinplọn gando ahọvi heyin nùdego to Psalm 45:16 mẹ lẹ go?
14 To plidopọ akọjọpli 1950 tọn to Tòdaho New York tọn mẹ ji, ahọvi Isaia 32:1, 2 tọn lẹ yin didohia hezeheze. Ojlẹ mẹwhinwhan tọn de wẹ e yin to whenuena Mẹmẹsunnu Frederick Franz dọhodo hosọ ehe ji bosọ basi zẹẹmẹ dọ ahọvi aigba yọyọ lọ tọn lẹ tin to ṣẹnṣẹn mítọn. To plidopọ enẹ po dehe bọdego lẹ po ji, hinhọ́n gbigbọmẹ tọn he to sisẹ́ jẹgbonu susu wẹ ko tin. (Psalm 97:11) Lehe mí dopẹ́ dọ omọ́ mítọn tin “taidi hinhọ́n he sẹ́, he to sisẹ́ yinukọn” do sọ!
Nukọnzinzindo to Lizọnyizọn Mítọn Mẹ
15, 16. (a) Nawẹ mí zindonukọn to lizọnyizọn mítọn mẹ to owhe 1920 po 1930 lẹ po gblamẹ gbọn? (b) Owe tẹlẹ wẹ ko na zohunhun lizọnyizọn Klistiani tọn to owhe ao ao agọe tọn lẹ mẹ?
15 Aliho awetọ he mẹ titobasinanu Jehovah tọn ko zindonukọn te yin to kọndopọmẹ po azọ́n tangan mítọn po—yèdọ yẹwheho Ahọluduta lọ tọn didọ po gbẹtọ lẹ hinhẹnzun devi po. (Matiu 28:19, 20; Malku 13:10) Nado basi wadotana azọ́n ehe tọn, titobasinanu lọ ko to nùzindo nujọnu-yinyin lizọnyizọn mítọn hinhẹn gblodeji tọn ji gbọzangbọzan. To 1922 Klistiani lẹpo yin tudohomẹna nado tindo mahẹ to azọ́n yẹwhehodidọ tọn mẹ. E pò to mẹdopodopo si nado dike hinhọ́n etọn ni sẹ́ bo gbọnmọ dali tindo mahẹ mẹdetiti tọn to kunnudide hlan nugbo lọ mẹ. (Matiu 5:14-16) To 1927 afọdide lẹ yin zize nado de dimanche dovo taidi azán lizọnyizọn kunnudegbe tọn. Bẹjẹeji sọn février 1940, e lẹzun nuhe gbayipe nado nọ mọ Kunnudetọ lẹ to tòhomẹ-liho ajọwatẹn tọn lẹ ji nado to Atọ̀họ̀-Nuhihọ́ lọ Tọn po Consolation (Réveillez-vous! todin) po zedonukọnnamẹ.
16 Owhe 1937 tọn mọ didetọn alọnuwe apomẹ tọn Étude Modèle tọn, he zinnudo nuhudo lọ ji nado basi gọyìpọn lẹ nado sọgan plọn nugbo Biblu tọn mẹdevo lẹ. To owhe he bọdego lẹ mẹ, nuwiwa plọnmẹ Biblu tọn lẹ yin nùzindeji tlala. Zohunhun yin nina adà lizọnyizọn lọ tọn ehe po zinjẹgbonu owe lọ “Que Dieu soit reconnu pour vrai” to 1946 gọna Nugbo he Nọ Planmẹ Sọyi Ogbẹ̀ Mavọmavọ Mẹ to 1968 tọn po. To alọnu din, mí to owe Oyọnẹn He Nọ Planmẹ Sọyi Ogbẹ̀ Madopodo Mẹ yizan. Nudọnamẹ mọnkọtọn lẹ pinplọn fó nọ ze dodonu dolido Owe-wiwe tọn de dai na gbẹtọ lẹ hinhẹnzun devi.
Nukọnzinzindo to Kọndopọmẹ hẹ Vọjlado lẹ to Nuyiwa Titobasinanu Tọn lẹ Mẹ
17. To kọndopọmẹ hẹ Isaia 60:17, nawẹ titobasinanu Jehovah tọn ko zindonukọn gbọn?
17 Aliho atọ̀ntọ he mẹ titobasinanu Jehovah tọn ko zindonukọn te gando vọjlado lẹ to nuyiwa titobasinanu tọn lẹ mẹ go. Sọgbe hẹ Isaia 60:17, Jehovah dopagbe dọmọ: “To otẹn gànvẹẹ tọn mẹ yẹn na hẹn sika wá, to otẹn gànyuu tọn mẹ, yẹn na hẹn fataka wá, to otẹn atin tọn mẹ, gànvẹẹ, to otẹn osé tọn mẹ, gànyuu: yẹn na basi ogán towe lẹ na jijọho, podọ azọ́ngán towe lẹ na dodo.” To kọndopọmẹ hẹ dọdai ehe, afọdide lẹ ko yin zize nado hẹn nukunpedonugo azọ́n yẹwhehodidọ-Ahọluduta tọn po lẹngbọpa apó lọ tọn yìnyìn po tọn pọnte.
18, 19. Vọjlado tẹlẹ wẹ ko tin to nuyiwa titobasinanu tọn mẹ to owhe lẹ gblamẹ?
18 To 1919 anademẹtọ sinsẹ̀nzọn tọn de nọ yin dide to agun dopodopo he biọ he yin titobasina na lizọnyizọn kunnudegbe tọn mẹ. Ehe na zohunhun lizọnyizọn mítọn to kunnudegbe. Vòbibla na mẹho lẹ po diakoni lẹ po dide yin alọdotena to 1932, bo dohiagona adadidiọ mítọn sọn aliho nuyiwa vòbibla tọn lẹ mẹ. Nujijọ ayidego tọn devo wá aimẹ to 1938 to whenuena devizọnwatọ agun tọn lẹpo jẹ yinyin dide ji to kọndopọmẹ pẹkipẹki hẹ tito mẹdide gbọn nuyiwa yẹwhehọluduta tọn lẹ dali kẹdẹdile e nọ yin bibasi do to agun fliflimẹ Klistiani tọn mẹ. (Owalọ lẹ 14:23; 1 Timoti 4:14) To 1972 nugopọntọ lẹ po devizọnwatọ lizọnyizọnwiwa tọn lẹ po nọ yin dide nado wadevizọn, dile sunnu mọnkọtọn lẹ wà do to Klistiani fliflimẹ tọn lẹ ṣẹnṣẹn. Kakati nado tindo sunnu dopo akàn nado wadevizọn taidi nugopọntọ agun de tọn, Filippinu lẹ 1:1 po wefọ devo lẹ po dohia dọ mẹhe jẹ nubiọtomẹsi Owe-wiwe tọn kọ̀n na nugopọntọ lẹ nọ wleawuna pipli mẹho lẹ tọn de.—Owalọ lẹ 20:28; Efesunu lẹ 4:11, 12.
19 To 1975 tito de jẹ nuyiwa ji na wedegbẹ́ Hagbẹ Anademẹtọ Kunnudetọ Jehovah tọn lẹ tọn nado penukundo nuwiwa lẹdo aihọn pé titobasinanu Jiwheyẹwhe tọn tọn go. Wedegbẹ́ Alahọ tọn lẹ yin dide nado penukundo azọ́n lọ go to aigba-denamẹ yetọn lẹ ji. Sọn whenẹnu gbọ́n, ayidonugo ko yin nina hinhẹn bọawu azọ́n lọ tọn to tatọ́-tẹnnọ podọ to alahọ Ogbẹ́ Watch Tower tọn lẹ mẹ nado ‘sọgan mọdona nuhe yin nujọnu hugan lẹ.’ (Filippinu lẹ 1:9, 10) Azọngban he tin to abọ́ lẹngbọhọtọ pẹvi Klisti tọn lẹ tọn ji bẹ nukọntọ-yinyin to azọ́n wẹndagbe-jijlá tọn mẹ, mẹpinplọn to agun lọ mẹ, po lẹngbọpa Jiwheyẹwhe tọn yìnyìn ganji tọn po hẹn.—1 Timoti 4:16; Heblu lẹ 13:7, 17; 1 Pita 5:2, 3.
Nukọntọ-Yinyin Zohunhunnọ Jesu Tọn
20. Etẹwẹ zọnlinzinzin afọsu-afọsi hẹ titobasinanu Jehovah tọn biọ dọ mí ni yọnẹn gando otẹn Jesu tọn go?
20 Nado to zọnlinzin afọsu-afọsi hẹ titobasinanu he to nukọnzindo Jehovah tọn biọ dọ mí ni yọ́n azọngban he Jiwheyẹwhe dè na Jesu Klisti taidi “ota agun tọn.” (Efesunu lẹ 5:22, 23) Isaia 55:4, lọsu sọ jẹ na ayidego ga, to fie mí yin didọna te dọmọ: “Doayi e go, yẹn [Jehovah] ko yí ewọ na gbẹtọ lẹ na kunnudetọ nukọntọ, togán na gbẹtọ lẹ.” Na jide tọn Jesu yọ́n lehe yè nọ deanananu do. E sọ yọ́n lẹngbọ etọn lẹ po nuyiwa yetọn lẹ po. Na nugbo tọn, to whenuena e dla agun ṣinawe he tin to Asia Pẹvi lẹ pọ́n, whla atọ́n wẹ e dọ dọ: “Yẹn yọ́n azọ́n towe [lẹ].” (Osọhia 2:2, 19; 3:1, 8, 15) Jesu sọ yọ́n nuhudo mítọn lẹ ga, kẹdẹdile Otọ́ etọn, Jehovah wà do. Whẹpo e do na Odẹ̀ Apajlẹ tọn lọ, Jesu dọmọ: “Otọ́ mìtọn yọ́n nuhe mì tindo nuwhèdo na, whẹpo mì do biọ ẹ.”—Matiu 6:8-13.
21. Nawẹ nukọntọ-yinyin Jesu tọn nọ yin didohia to agun Klistiani tọn mẹ gbọn?
21 Nawẹ nukọntọ-yinyin Jesu tọn nọ yin didohia gbọn? Aliho dopo wẹ gbọn nugopọntọ Klistiani tọn lẹ, yèdọ ‘nunina to sunnu lẹ mẹ’ dali. (Efesunu lẹ 4:8) Osọhia 1:16 do nugopọntọ yiamisisadode lẹ hia taidi dọ yé tin to adusilọ Klisti tọn mẹ, yèdọ to anademẹ etọn glọ. To egbehe, Jesu nọ deanana tito lọ na mẹho lẹ, vlavo sunnu mọnkọtọn lẹ tindo todido olọn mẹ tọn kavi aigba ji tọn. Dile e yin zẹẹmẹ etọn basi to hosọ he jẹnukọn mẹ do, yé nọ yin dide gbọn gbigbọ wiwe dali to kọndopọmẹ hẹ nubiọtomẹsi Owe-wiwe tọn lẹ. (1 Timoti 3:1-7; Titu 1:5-9) To owhe kanweko tintan mẹ, pipli sunnu mẹho lẹ tọn de to Jelusalẹm wleawuna hagbẹ anademẹtọ de he nọ penukundo agun lẹ po nuwiwa yẹwhehodidọ-Ahọluduta lọ tọn po go to paa mẹ. Aliho nuyiwa tọn dopolọ nọ yin hihodo to titobasinanu Jehovah tọn mẹ to egbehe.
To Zọnlinzin hẹ Ẹ Afọsu-Afọsi!
22. Alọgọ tẹwẹ Hagbẹ Anademẹtọ nọ wleawuna?
22 Dagbenu Ahọluduta tọn lẹ to aigba ji ko yin zizedo alọmẹ na “afanumẹ, nugbonọ nuyọnẹntọ,” he Hagbẹ Anademẹtọ Kunnudetọ Jehovah tọn lẹ tọn yin nukunmọnu etọn. (Matiu 24:45-47) Hagbẹ Anademẹtọ nọ yin ahunmẹduna na taun tọn gando awuwiwlena nudọnamẹ gbigbọmẹ tọn lẹ po anademẹ na agun Klistiani tọn po go. (Owalọ lẹ 6:1-6) Ṣigba, to whenuena nugbajẹmẹji jọwamọ tọn lẹ gando sinsẹ̀n-basitọ hatọ lẹ go, Hagbẹ Anademẹtọ nọ biọ to nuyizan sọgbe hẹ osẹ́n dopo kavi susu si nado wleawuna kọgbọ bo jla owhé po Plitẹnhọ Ahọluduta tọn heyin hinhẹngble lẹ po do. Eyin Klistiani delẹ yin nuyiwa hẹ po kanyinylan po kavi yin homẹkẹndo, afọdide lẹ nọ yin zize nado jlọ yé dote to gbigbọ-liho. Podọ ‘to ojlẹ awusinyẹn tọn’ mẹ, vivẹnu lẹpo nọ yin dido nado hẹn azọ́n yẹwhehodidọ tọn nado to nukọnzindo.—2 Timoti 4:1, 2.
23, 24. Mahopọnna nudepope he jọ do omẹ etọn lẹ go, etẹwẹ Jehovah nọ wleawuna to whepoponu, podọ etẹwẹ dona yin gbemima mítọn?
23 Mahopọnna nudepope he jọ do omẹ etọn lẹ go, Jehovah nọ wleawuna núdùdù gbigbọmẹ tọn po anademẹ he nuhudo etọn tin lẹ po to whepoponu. Jiwheyẹwhe sọ nọ na wuntuntun po zinzin po hlan mẹmẹsunnu azọngbannọ lẹ nado wleawuna nukọnyiyi dogọ po vọjlado lẹ po to nuyiwa titobasinanu yẹwhehọluduta tọn lẹ mẹ. (Deutelonomi 34:9; Efesunu lẹ 1:16, 17) Matin awugbopo, Jehovah nọ wleawuna nuhe mí tindo nuhudo etọn nado hẹn azọ́ndenamẹ gbẹtọ lẹ hinhẹnzun devi tọn mítọn di podọ nado basi wadotana lizọnyizọn mítọn tọn lẹdo aihọn pé.—2 Timoti 4:5.
24 Mí tindo jidide mlẹnmlẹn dọ Jehovah ma na gbẹ́ omẹ nugbonọ etọn lẹ dai pọ́n gbede; e na whlẹn yé gán sọn “nukunbibia daho” he ja lọ mẹ. (Osọhia 7:9-14; Psalm 94:14; 2 Pita 2:9) Mí tindo whẹwhinwhẹ́n lẹpo nado hẹn jidide he mí tindo to tintan whenu go kakajẹ opodo. (Heblu lẹ 3:14) Enẹwutu, mì gbọ mí ni magbe nado to zọnlinzin afọsu-afọsi hẹ titobasinanu Jehovah tọn.
Nawẹ Hiẹ Na Na Gblọndo Gbọn?
• Naegbọn mí sọgan dọ dọ titobasinanu Jehovah tọn to nukọnzindo?
• Kunnudenu tẹwẹ tin dọ omẹ Jiwheyẹwhe tọn lẹ to vivi nukunnumọjẹnumẹ gbigbọmẹ tọn he to nukọnzindo de tọn dù?
• Aliho tẹlẹ mẹ wẹ nukọnyiyi ko sọawuhia to lizọnyizọn Klistiani tọn mẹ te?
• Vọjlado he wá do ganmẹ tẹlẹ wẹ ko yin bibasi to nuyiwa titobasinanu tọn lẹ mẹ to devizọnwatọ Jehovah tọn lẹ ṣẹnṣẹn?
[Yẹdide to weda 17]
Taidi Davidi, mí ma sọgan dọ azọ́njiawu Jehovah tọn lẹpo gba
[Yẹdide to weda 18]
Lẹngbọpa Jiwheyẹwhe tọn ko mọaleyi sọn vọjlado he nọ wá do ganmẹ to nuyiwa titobasinanu tọn mẹ lẹ mẹ