Nukunzọ́nwatọ de Dó Okún De

Etẹwẹ vivẹnudido nukunzọ́nwatọ de tọn to Lviv, Ukraine, tindo hẹ agun Kunnudetọ Jehovah tọn lẹ tọn he nọ do Russie-gbè de zizedai to Haifa, Islaeli, to nudi kilomẹtlu 2 000 delẹ podọ to otò dindẹn voovo lẹ mẹ? Ehe wẹ yin otàn he do nugbo-yinyin Biblu tọn hodidọ Yẹwhehodọtọ 11:6 tọn hia he dọmọ: “Donú towe to afọnnufuu, podọ to whèjai a hẹn alọ towe dote blo: na hiẹ mayọ́n ehe na wà dagbe.”

OTÀN mítọn bẹjẹeji to 1990 to whenuena Ella, jọja Juvi de, to ninọ Lviv. Ella po whẹndo etọn po to awuwle nado sẹtẹn yì Islaeli. Ojlẹ vude jẹnukọnna tẹnsisẹ yetọn, Ella do dope hẹ nukunzọ́nwatọ de he yin dopo to Kunnudetọ Jehovah tọn lẹ mẹ. To ojlẹ lọ mẹ, azọ́n Kunnudetọ Jehovah tọn lẹ tọn ko yin alọhẹndotena to Ukraine. Etomọṣo, nukunzọ́nwatọ lọ de afọdide tintan nado má nuyise sinai do Biblu ji etọn lẹ hẹ Ella. E hẹn ẹn jọsi gbọn didọ dali dọ Jiwheyẹwhe tindo yinkọ mẹdetiti tọn de. Enẹ fọ́n tlintlindo-dindin Ella tọn dote, podọ hodọdopọ dagbe Biblu tọn de bọdego.

Ella duvivi hodọdopọ lọ tọn sọmọ bọ e basi obiọ na devo to osẹ he bọdego lọ mẹ podọ devo to enẹgodo. Ojlo etọn to whinwhẹ́n deji, ṣigba nuhahun de tin. Whenu to dindọnsẹpọ po awuyiya po na whẹndo lọ nado sẹtẹn yì Islaeli. Ella gbẹsọ tindo nususu nado plọn! Nado sọgan mọ suhugan yí sọn whenu he pò lọ mẹ, e basi obiọ na plọnmẹ Biblu egbesọegbesọ tọn de kakajẹ tẹnsisẹ etọn whenu. Dile etlẹ yindọ Ella ma bẹ oplọn etọn jẹeji to whenuena e jẹ Islaeli tlolo, okún nugbo tọn ko doadọ̀do dó ahun etọn mẹ. To vivọnu owhe lọ tọn, ewọ ko to Biblu plọn whladopo dogọ po zohunhun po.

Awhàn gbajẹgbonu to Agewaji Ohù Pẹlsia-nu lẹ tọn, podọ Islaeli wá mẹgbeyinyan sinsinyẹn Iraq tọn glọ. Ehe wẹ yin hosọ hodọdopọ he gbayipe tọn lọ. To nusatẹn de to gbèdopo, Ella gbláto hodidọ whẹndo he nọ do Russie-gbè de tọn he yé lọsu ṣẹṣẹ sẹtẹn wá. Dile etlẹ yindọ ewọ gbẹsọ to Biblu plọn na ede, Ella dọnsẹpọ whẹndo lọ bosọ má opagbe Biblu tọn heyin aihọn jijọho tọn de hẹ yé. Taidi kọdetọn de, onọdahó Galina lọ; onọ̀ lọ, Natasha; visunnu lọ, heyin Sasha (Ariel); po viyọnnu lọ po, Ilana, yemẹpo kọnawudopọ to oplọn Biblu tọn hẹ Ella mẹ.

Sasha wẹ yin hagbẹ tintan whẹndo lọ tọn he pegan na baptẹm​—mahopọnna whlepọn susu. Dile ewọ tlẹ yin wehọmẹvi nukundeji de do, e yin yinyàn sọn wehọmẹ na ayihadawhẹnamẹnu Klistiani tọn etọn ma na ẹn dotẹnmẹ nado tindo mahẹ to awhànzọ́n-pinplọnmẹ, heyin apadewhe tito wepinplọn wehọmẹ lọ tọn de wutu. (Isaia 2:2-4) Whẹho Sasha tọn yì Whẹdatẹn Daho Islaeli tọn to Jelusalẹm, he gbọn homẹdagbe dali degbè dọ Sasha ni yin vivọ́ gọyí na ewọ nido sọgan dotana wehọmẹ etọn. Whẹho lọ gbayipe to akọta lọ blebu mẹ. Po gbesisọ po, Islaelivi susu wẹ jẹakọhẹ nuyise Kunnudetọ Jehovah tọn lẹ tọn.a

Bọdo gbedewema-yíyí etọn sọn wehọmẹ daho go, Sasha biọ lizọnyizọn whenu-gigọ́ tọn heyin Kunnudetọ Jehovah tọn lẹ tọn mẹ. To egbehe e to sinsẹ̀nzọnwà taidi gbehosọnalitọ titengbe po mẹho agun tọn de po. Nọviyọnnu etọn pẹvi Ilana, ko kọnawudopọ hẹ ẹ to lizọnyizọn whenu-gigọ́ tọn lọ mẹ. Onọ̀ yetọn po onọdahó yetọn po yemẹpo ko lẹzun Kunnudetọ he ko yí baptẹm. Okún he nukunzọ́nwatọ lọ dó gbẹ́ pò to sinsẹ́n detọn!

To ojlẹ dopolọ mẹ, Ella to nukọnyiyi gbigbọmẹ tọn tindo zọnmii podọ to madẹnmẹ ko to yẹwhehodọ sọn whédegbè-jẹ-whédegbè. To ohọ̀n tintan etọn ji, Ella dukosọ hẹ Faina, he gọ̀ sọn Ukraine to madẹnmẹ. Faina to azọ̀n flumẹjijẹ tọn jẹ. To godo mẹ Ella wá yọnẹn dọ ojlẹ vude whẹpo e do húhú ohọ̀n Faina tọn, yọnnu he to azọ̀n flumẹjijẹ tọn jẹ lọ ko hodẹ̀ hlan Jiwheyẹwhe dọmọ: “Yẹn ma yọ́n mẹhe hiẹ yin gba, ṣigba eyin hiẹ sè nuhe dọ yẹn te, gọalọna mi.” Ewọ po Ella po tindo hodọdopọ ojlofọndotenamẹ tọn de. Faina kàn kanbiọ susu sè bosọ lẹnnupọndo gblọndo he e mọyí lẹ ji po sọwhiwhe po. To madẹnmẹ, ewọ yin dududeji dọ Kunnudetọ Jehovah tọn lẹ nọ plọnmẹ nugbo lọ sọn Biblu mẹ. E basi vọjladona tito-to-whinnu nupinplọn wehọmẹ alavọ tọn etọn na ewọ nido sọgan yí whenu susu dogọ zan hẹ agun lọ podọ to azọ́n yẹwhehodidọ tọn lọ mẹ. To mai 1994, Faina yin bibaptizi. Ewọ lọsu kẹalọyi sinsẹ̀nzọn gbehosọnalitọ tọn, bo nọ penukundo ede go gbọn azọ́n whenu-daa tọn wiwà to azọ́nwatẹn zomọ nudọnamẹ-sẹdo tọn mẹ dali.

To novembre 1994, to whenuena e to mahẹ tindo to azọ́n yẹwhehodidọ tọn mẹ, to ajijimẹ Ella tindo numọtolanmẹ madogán tọn sinsinyẹn. E yì dotowhé fie dodinnanu lẹ dohia te dọ e tindo azọ̀n apà to adọvi go tọn he to hùndi. To whèjai sọha hémoglobine Ella tọn ko yìdo jẹ 7,2. Mẹho de to agun Ella tọn mẹ, heyin azinponọ Wedegbẹ́ Whẹgbọtọ Dotowhé tọn lẹdo lọ tọn (WWD), na nudọnamẹ doto lẹ do aliho nukunpedomẹgo tọn voovo lẹ ji he ma biọ ohùndido.b Mẹzizẹ lọ yin bibasi po kọdetọn dagbe po matin ohùn, podọ Ella jẹgangan mlẹnmlẹn.​—Owalọ lẹ 15:28, 29.

Doto he nọ wazọ́n na yọnnu lẹ Ella tọn, Karl, heyin Ju Allemagne-vijiji, yin nuyiwadeji tlala. Enẹgodo e flin dọ mẹjitọ emitọn lẹ, he luntọ́n sọn Nuvasudo pligidi lọ mẹ, ko yọ́n Kunnudetọ Jehovah tọn lẹ to oslá yasanamẹ tọn lẹ mẹ. Karl kàn kanbiọ susu sè. Dile etlẹ yindọ alọnu etọn ján tlala na dotozọ́nwiwa etọn wutu, Karl dín whenu na oplọn Biblu tọn gbesisọ tọn de. To owhe he bọdego mẹ, e ko to opli Klistiani tọn sẹmẹsẹmẹ tọn lẹ yì.

Etẹwẹ ko dekọtọn sọn okún he yin didó gbọn nukunzọ́nwatọ lọ dali mẹ? Mí ko mọ nuhe jọ do Sasha po whẹndo etọn po go. Na nuhe dù Ella, ewọ yin lizọnyizọnwatọ gbehosọnalitọ titengbe de. Viyọnnu etọn, Eina, he ṣẹṣẹ fó wehọmẹ daho, ko jẹ yanwle edetiti tọn ji taidi gbehosọnalitọ de. Faina sọ to sinsẹ̀nzọnwà taidi gbehosọnalitọ titengbe de ga. Na nuhe dù Karl, yèdọ dotozọ́nwatọ yọnnu lẹ tọn heyin Ella tọn, e ko yin Kunnudetọ he yí baptẹm po devizọnwatọ lizọnyizọnwiwa tọn de po, bo to huhlọn azọ̀nhẹngbọ tọn etọn heyin nugbo Biblu tọn má hẹ awutunọ etọn lẹ po mẹdevo lẹ po.

Pipli pẹvi Russie-gbèdotọ lẹ tọn he bẹjẹeji taidi apadewhe Agun Haifa Heblu tọn ko lẹzun agun Russie-gbèdotọ zohunhunnọ de todin he tindo wẹnlatọ Ahọluduta lọ tọn he hugan 120. To apadewhe, jideji ehe wá na nugbo lọ dọ, nukunzọ́nwatọ de to Lviv yí dotẹnmẹ hundote de zan nado dó okún de wutu!

[Nudọnamẹ Odò Tọn]

[Yẹdide Otò Tọn to weda 29]

UKRAINE

ISLAELI

[Asisa Yẹdide Tọn]

Mountain High Maps® Copyright © 1997 Digital Wisdom, Inc.

[Yẹdide to wedae 30]

Ella po viyọnnu etọn, Eina po

[Yẹdide to weda 31]

Pipli ayajẹnọ heyin Kunnudetọ Russie-gbèdotọ lẹ tọn to Haifa. Amiyọn mẹ yì adusi mẹ: Sasha, Ilana, Natasha, Galina, Faina, Ella, Eina, po Karl po