‘Na Nugbo Tọn Oklunọ Yin Finfọ́n!’

Lẹnnupọn do lehe devi Jesu tọn lẹ yin ayimajainọ do sọ to whenuena Oklunọ yetọn yin hùhù ji. Todido yetọn sọawuhia taidi oṣiọ dile agbasa he Josẹfu Alimatetọ tẹ́ do yọ̀do mẹ te do. Oṣiọ wẹ nukundido depope dọ Jesu na hẹn Ju he tin to zẹ̀gẹ̀ Lomunu lẹ tọn glọ jẹ mẹdekannu ga.

EYIN enẹ wẹ yin opodo whẹho lọ tọn, e yọnbasi dọ devi Jesu tọn lẹ na ko busẹ sọn aimẹ taidi hodotọ mẹsusu he do yede hia di Mẹssia lẹ tọn. Ṣigba Jesu tin to ogbẹ̀! Sọgbehẹ Owe-wiwe, e sọawuhia hodotọ etọn lẹ to nujijọ voovo lẹ mẹ ojlẹ vude to okú etọn godo. Enẹwutu, delẹ to yé mẹ yin whinwhàn nado lá dọmọ: ‘Na nugbo tọn Oklunọ ko yin finfọ́n!’​—Luku 24:34.

Devi lẹ dona yiavunlọ na yise yetọn to Jesu mẹ taidi Mẹssia lọ. To mọwiwà mẹ, yé dlẹnalọdo fọnsọnku etọn sọn oṣiọ lẹ mẹ na taun tọn taidi kunnudenu dolido Mẹssia-yinyin etọn tọn. Na nugbo tọn, “huhlọn daho wẹ apọsteli lẹ do dekunnu fọnsọnku Jesu Oklunọ tọn.”​—Owalọ lẹ 4:33.

Eyin mẹdepope ko dohia pọ́n dọ fọnsọnku ehe yin mẹkiklọ de​—vlavo gbọn hinhẹn dopo to devi lẹ mẹ yigbe dọ e yin mọ kavi gbọn didohia dọ agbasa Jesu tọn gbọṣi yọ̀do mẹ dali​—sinsẹ̀n Klistiani tọn dona ko gboawupo to bẹjẹeji gbọ́n. Ṣigba e ma wàmọ gba. To yinyọnẹn dọ Klisti tin to ogbẹ̀, hodotọ Jesu tọn lẹ yì filẹpo nado to fọnsọnku etọn lá, podọ gbẹtọ susugege lẹzun yisenọ to Klisti heyin finfọnsọnku lọ mẹ.

Naegbọn hiẹ lọsu ga sọgan tindo yise to fọnsọnku Jesu tọn mẹ? Kunnudenu tẹwẹ tin to finẹ dọ nujijọ tangan de wẹ ehe yin?

Naegbọn Kunnudenu lẹ Dona Yin Dogbapọnna?

Kandai wẹndagbe tọn ẹnẹ lẹ na linlin do fọnsọnku Jesu tọn ji. (Matiu 28:1-10; Malku 16:1-8; Luku 24:1-12; Johanu 20:1-29)a Adà Owe-wiwe Glẹki Klistiani tọn devo lẹ dọho po nujikudo po gando finfọ́n Klisti sọn oṣiọ lẹ mẹ go.

Abajọ fọnsọnku Jesu tọn do yin lilá gbọn hodotọ etọn lẹ dali! Eyin ewọ yin finfọ́n do ogbẹ̀ gbọn Jiwheyẹwhe dali na taun tọn, enẹ wẹ yin linlin he paṣamẹ hugan he aihọn ko sè pọ́n. E zẹẹmẹdo dọ Jiwheyẹwhe tin. Humọ, e zẹẹmẹdo dọ Jesu tin to ogbẹ̀ to alọnu din.

Nawẹ enẹ gando go we gbọn? Eyọ́n, Jesu hodẹ̀ dọmọ: “Podọ ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.” (Johanu 17:3) Mọwẹ, mí sọgan tindo oyọnẹn ogbẹ̀-namẹ tọn Jesu po Otọ́ etọn po tọn. Gbọn oyọnẹn mọnkọtọn yiyizan dali, eyin etlẹ yindọ mí dona kú, mílọsu sọgan yin finfọnsọnku, to whenuena e yindọ Jesu lọsu yin finfọ́n. (Johanu 5:28, 29) Mí sọgan tindo todido ogbẹ̀ madopodo tọn to aigba paladisi tọn de ji to Ahọluduta olọn mẹ tọn Jiwheyẹwhe tọn glọ to alọ Visunnu heyin gigopana etọn, Jesu Klisti tọn mẹ, yèdọ Ahọlu ahọlu lẹ tọn lọ.​—Isaia 9:6, 7; Luku 23:43; Osọhia 17:14.

Enẹwutu, to whelọnu lo, kanbiọ lọ dọ vlavo Jesu yin finfọ́n sọn oṣiọ lẹ mẹ na taun tọn yin onú titengbe. E yinuwa do ogbẹ̀ mítọn dintọn po nukundido mítọn na sọgodo po go. Enẹwutu wẹ mí basi oylọna we nado gbadopọnna kunnudenu debọdo-dego ẹnẹ dọ Jesu kú bosọ yin finfọnsọnku.

Jesu Kú to Pòtin Ji Nugbonugbo

Ayihaawe tindotọ delẹ dọ dọ, dile etlẹ yindọ yè whè ewọ do pòtin ji, Jesu ma kú do pòtin ji nugbonugbo gba. Yé dọ dọ e sẹpọ kúdonu poun wẹ bọ ewọ yin hinhẹngọwa ogbẹ̀ gbọn fifá yọ̀do mẹ tọn dali. Ṣogan, asisa he tin-to-aimẹ lẹpo wẹ dohia dọ oṣiọ Jesu tọn wẹ yin zizedo yọ̀do mẹ.

To whenuena e yindọ Jesu yin hùhù to gbangba, kunnudetọ lẹ tin hlan nugbo lọ dọ e kú do pòtin de ji na taun tọn. Okú etọn yin kunnudena gbọn awhàngan he penukundo mẹhùhù lọ go dali. Azọ́nyọnẹntọ de wẹ awhàngán enẹ yin mẹhe azọ́ndenamẹ etọn bẹ gbemima dọ Jesu ko kú na nugbo tọn hẹn. Humọ, gbọn nujikudo tintindo dọ Jesu ko kú kẹdẹ dali wẹ Ayimatẹngán Pọntiu Pilati do jo agbasa Jesu tọn hlan Josẹfu Alimatetọ nado yì di.​—Malku 15:39-46.

Yọ̀do lọ Yin Mimọ to Ovọ́

Yọ̀do he to ovọ́ lọ na devi lẹ kunnudenu tintan yetọn gando fọnsọnku Jesu tọn go, podọ kunnudenu ehe matindo ayihaawe gba. Jesu yin dìdì do yọ̀do yọyọ de mẹ, dehe ma ko yin yiyizan pọ́n gbede. E ma dẹndo fie e yin whiwhe-do-nùgo te gba bo sọgan yin mimọ po awubibọ po to whenẹnu matin nuṣiwa. (Johanu 19:41, 42) Kandai Wẹndagbe tọn lẹpo yigbe dọ whenuena họntọn Jesu tọn lẹ wá yọ̀do lọ kọ̀n to afọnnu awetọ okú etọn tọn, agbasa etọn ko busẹ.​—Matiu 28:1-7; Malku 16:1-7; Luku 24:1-3; Johanu 20:1-10.

Yọ̀do he to ovọ́ lọ yin nupaṣamẹ na kẹntọ Jesu tọn lẹ, kẹdẹdile e yin do na họntọn etọn lẹ. Kẹntọ etọn lẹ ko to kanván na whenu dindẹn nado mọdọ e yin hùhù bosọ yin dìdì. Na yé ko jẹ yanwle yetọn kọ̀n wutu, yé dovivẹnu nado ze nuhọ́tọ de do finẹ bosọ tlẹ́ yọ̀do lọ. Etomọṣo, to afọnnu azán tintan osẹ tọn, e ko jẹvọ́.

Be họntọn Jesu tọn lẹ wẹ ze agbasa etọn sọn yọ̀do lọ mẹ ya? Paali, to whenuena e yindọ Wẹndagbe lẹ dohia dọ yé yin ayimajainọ tlala to okú etọn godo. Humọ, devi etọn lẹ ma na ko zindonukọn nado jiya homẹkẹn po okú po tọn na nude he yé yọnẹn nado yin mẹkiklọ.

Mẹnu wẹ hẹn yọ̀do lọ jẹvọ́? E yọnbasi dọ kẹntọ Jesu tọn lẹ wẹ na yin omẹ godo tọn lẹ he na ko ze agbasa lọ. Eyin yé tlẹ wàmọ, yé na ko hẹn ẹn zun yinyọnẹn to godo mẹ na taun tọn nado jẹagọdo alọsọakọ́n devi lẹ tọn dọ Jesu ko yin finfọnsọnku bosọ tin to ogbẹ̀. Ṣigba onú mọnkọtọn depope ma jọ gba, na Jiwheyẹwhe wẹ ko yinuwa wutu.

Osẹ lẹ to godo mẹ, kẹntọ Jesu tọn lẹ ma yinuwa po agọjẹdonu sinsinyẹn po gba to whenuena Pita dohia dọmọ: “Mì sè ohó helẹ, mì omẹ Islaeli tọn lẹ emi: Jesu Nazalẹti tọn, dawe jlodè sọn Jiwheyẹwhe dè hlan mì gbọn azọ́n huhlọnnọ lẹ po nujiawu lẹ po po ohia lẹ po dali, he Jiwheyẹwhe wà gbọn e dali to ṣẹnṣẹn mìtọn, yèdọ dile mìlọsu yọnẹn do; mẹhe yè yí gbemima yinyọnẹn tọn po yinyọnẹn dai Jiwheyẹwhe tọn po do johlan, mìwlẹ yí ì, mì sọ gbọn alọ ylankan mẹ whè e do [yatin] go, bosọ hù i: mẹhe Jiwheyẹwhe ze tite whenuena e túnkan awufiẹsa okú tọn: na e ma sọgan yín wiwà dọ yè ni gbọn alọ etọn mẹ hẹn e go gba. Na Davidi dọho gbọn ewọ tọn dali, dọ, Yẹn mọ Oklunọ to whepoponu to nukọn ṣie . . . Humọ agbasa ṣie na gbọjẹ to todido mẹ ga: na hiẹ ma na jo ayiha ṣie do kutomẹ, mọ hiẹ ma sọ to na dike Mẹwiwe towe ni mọ ogble.“​—Owalọ lẹ 2:22-27.

Mẹsusu Mọ Jesu Heyin Finfọnsọnku

To owe Owalọ lẹ tọn mẹ, Wẹndagbe kàntọ Luku dọmọ: “[ Jesu] mẹhe . . . do ede hia hlan [apọsteli lẹ] ga to ogbẹ̀ to oyaji etọn godo gbọn ohia nugbo susu dali, bo to awusọhia hlan yé kaka azán kande, bosọ to ohó nuhe gbọn ahọludu Jiwheyẹwhe tọn dali lẹ dọ.” (Owalọ lẹ 1:​2, 3) Devi delẹ mọ Jesu heyin finfọnsọnku lọ to nujijọ voovo lẹ mẹ​—to jipa de mẹ, aliho de ji, to núdùdù de whenu, to Huto Tibéliade tọn.​—Matiu 28:8-10; Luku 24:13-43; Johanu 21:1-23.

Homọdọdonugotọ lẹ tindo ayihaawe gando nugbo-yinyin awusọhia ehelẹ tọn go. Yé dọ dọ wekantọ lẹ wẹ yí linlin lọ do e mẹ, kavi dọ yé do nuhe taidi vogbingbọn he tin to e mẹ lẹ hia. Na taun tọn, vogbingbọn vude he tin to kandai Wẹndagbe tọn lẹ mẹ dohia dọ gbekọndopọ nuglọ tọn depope matin to e mẹ gba. Oyọnẹn mítọn gando Jesu go nọ yin hinhẹn gbloada to whenuena wekantọ dopo basi zẹẹmẹ lẹ he yidogọna kandai devo lẹ heyin nujijọ tangan lẹ tọn to gbẹzan aigba ji Klisti tọn mẹ.

Be odlọ nukle tọn de wẹ awusọhia Jesu tọn lẹ to finfọnsọnku godo yin ya? Nudindọn depope he gando whẹho enẹlẹ go ma sọgbe hẹ lẹnpọn dagbe, to whenuena e yindọ ewọ yin mimọ gbọn gbẹtọ susu dali. To yé mẹ wẹ whèhutọ lẹ, yọnnu lẹ, ahọluzọnwatọ de, gọna apọsteli ayihaawe tindotọ lọ Tọmasi, mẹhe kudeji to whenuena e mọ kunnudenu he mayọ́n gbẹdai lọ kẹdẹ dọ Jesu ko yin finfọ́n sọn oṣiọ lẹ mẹ tin te. (Johanu 20:24-29) To nujijọ voovo lẹ mẹ, devi Jesu tọn lẹ to tintan whenu ma yọ́n Oklunọ yetọn heyin finfọnsọnku lọ gba. To ojlẹ de mẹ, hugan gbẹtọ 500 mọ ẹn, suhugan mẹhe tọn gbẹ́ pò to ogbẹ̀ to whenuena apọsteli Paulu yí nujijọ enẹ zan taidi kunnudenu to avùnlọyiyi na fọnsọnku etọn mẹ.​—1 Kọlintinu lẹ 15:6.

Jesu He to Ogbẹ̀ Tindo Nugandomẹgo do Gbẹtọ lẹ Ji

Fọnsọnku Jesu tọn mayin whẹho tlintlindo-dindin kavi nudindọn tọn de poun gba. Nugbo lọ dọ e to ogbẹ̀ ko yinuwa do gbẹtọ lẹ ji to filẹpo to aliho mẹjlọdote tọn mẹ. Sọn owhe kanweko tintan whenu gbọ́n, gbẹtọ madosọha wẹ ko diọ sọn vọdonanu kavi agọjẹdo sinsẹ̀n Klistiani tọn mlẹnmlẹn mẹ jẹ nujikudo pete tintindo dọ sinsẹ̀n nugbo wẹ e yin kọ̀n. Etẹwẹ diọ yé? Owe-wiwe lẹ pinplọn dohia yé dọ Jiwheyẹwhe fọ́n Jesu sọnku wá ogbẹ̀ taidi nudida gbigbọnọ gigonọ de to olọn mẹ. (Filippinu lẹ 2:8-11) Yé ko yí yise zan to Jesu mẹ podọ to awuwledainanu Jehovah Jiwheyẹwhe tọn mẹ na whlẹngán gbọn avọ́sinsan ofligọ Klisti tọn gblamẹ. (Lomunu lẹ 5:8) Omẹ mọnkọtọn lẹ ko mọ ayajẹ nujọnu tọn gbọn ojlo Jiwheyẹwhe tọn wiwà po gbẹninọ sọgbe hẹ nuplọnmẹ Jesu tọn lẹ po dali.

Lẹnnupọndo nuhe e zẹẹmẹdo nado yin Klistiani de to owhe kanweko tintan mẹ ji. Ale depope matin to yindidi, huhlọn, kavi adọkun mẹ. To vogbingbọn mlẹnmlẹn mẹ, susu Klistiani fliflimẹ tọn lẹ ‘yí homẹhunhun do yí agbàn yetọn he yè hẹngble lẹ’ na yise yetọn wutu. (Heblu lẹ 10:34) Sinsẹ̀n Klistiani tọn nọ biọ gbẹzan avọ́sinsan tọn po homẹkẹndomẹ tọn po he nọ dekọtọn do okú mẹ to whẹho susu mẹ.

Jẹnukọnna lilẹzun hodotọ Klisti tọn lẹ, mẹdelẹ tindo nukundido dagbe lẹ na nuhe dù yindidi, po adọkun po. Saulu Talsu tọ́ plọnnu to Osẹ́n plọnmẹtọ he diyin lọ Gamalieli glọ bo ko jẹ yindi ji to nukun Ju lẹ tọn mẹ. (Owalọ lẹ 9:1, 2; 22:3; Galatianu lẹ 1:14) Ṣogan, Saulu lẹzun apọsteli Paulu. Ewọ gọna mẹsusu devo lẹ gbẹ́ yindidi po huhlọn he aihọn ehe nọ zedonukọnnamẹ po dai. Etẹwutu? Nado sọgan hẹn owẹ̀n todido nugbo tọn he sinai do opagbe Jiwheyẹwhe tọn lẹ ji gọna nugbo lọ dọ Jesu Klisti ko yin finfọnsọnku sọn oṣiọ lẹ mẹ gbayipe. (Kọlọsinu lẹ 1:28) Yé tindo ojlo nado jiya na aliho nuyiwa tọn de he yé yọnẹn dọ e yin zizedai do nugbo ji.

Onú dopolọ yin nugbo gando gbẹtọ livi susu go to egbehe. Hiẹ sọgan mọ yé to agun Kunnudetọ Jehovah tọn lẹ mẹ lẹdo aihọn pé. Kunnudetọ lẹ to oylọ zohunhun tọn basi na we wá hùnwhẹ okú Klisti tọn whemẹwhemẹ tọn tẹnmẹ, ehe na wá aimẹ to họyiyi owhè tọn godo to dimanche 8 avril 2001. Homẹ yetọn na hùn nado mọ we to nujijọ enẹ tẹnmẹ podọ to opli yetọn lẹpo ji na oplọn Biblu tọn he nọ yin bibasi to Plitẹnhọ Ahọluduta tọn yetọn mẹ.

Naegbọn hiẹ ma nado plọnnu dogọ, e mayin gando okú po fọnsọnku Jesu tọn po go kẹdẹ gba ṣigba gando ogbẹ̀ po nuplọnmẹ etọn lẹ po go ga? E basi oylọna mí nado wá ewọ dè. (Matiu 11:28-30) Yinuwa todin nado tindo oyọnẹn Jehovah Jiwheyẹwhe tọn po Jesu Klisti tọn po. Mọwiwà sọgan zẹẹmẹ do ogbẹ̀ mavọmavọ to Ahọluduta Jiwheyẹwhe tọn glọ to alọ Visunnu vivẹ́ etọn tọn mẹ.

[Nudọnamẹ Odò Tọn]

[Yẹdide to weda 7]

Livi susu mọ ayajẹ nugbo taidi hodotọ Jesu Klisti tọn lẹ

[Asisa Yẹdide Tọn to weda 6]

Sọn Self-Pronouncing Edition of the Holy Bible mẹ, he bẹ King James po Revised Versions po hẹn