Dona Ahọluduta Tọn lẹ Sọgan Yin Towe

KLISTIANI apọsteli Paulu didẹ́ to ogbè titengbe azán etọn gbè tọn delẹ mẹ. E ko mọ nuhe sọzẹn hẹ wepinplọn wehọmẹ alavọ tọn to egbehe de yí. E duvivi dagbenu po jlọjẹ lẹpo heyin tovi Lomunu de tọn lẹ po. (Owalọ lẹ 21:37-​40; 22:​3, 28) Kunnudenu jlọjẹ tọn ehelẹ sọgan ko hẹn ewọ penugo nado lẹzun adọkunnọ bo diyin. Ṣogan, e dọmọ: “Onú heyin ale hlan mi lẹ, ehelẹ wẹ yẹn ko hia do nugúgú mẹ na Klisti . . . yẹn sọ hia yé di omí, na yẹn nido duale Klisti tọn.” (Filippinu lẹ 3:​7, 8) Naegbọn Paulu do dọho to aliho mọnkọtọn mẹ?

Na yinyin yinyọnẹn dai taidi Sauli Talsu tọn podọ taidi homẹkẹndomẹtọ mẹhe ‘yin Aliho lọ ji tọn lẹ’ tọn de, Paulu lẹzun yisenọ to whenuena e ko yin nina numimọ Jesu heyin finfọnsọnku bo yin gigopana lọ tọn godo. (Owalọ lẹ 9:​1-19) Na Paulu, numimọ ehe to aliho he yì Damasku ji dohia ẹ hezeheze dọ Jesu wẹ yin Mẹssia dopagbe, kavi Klisti lọ, heyin gandutọ sọgodo Ahọluduta dopagbe lọ tọn. E sọ hẹn diọdo ayidego tọn de wá gbẹzan Paulu tọn mẹ, dile e yin didohia gbọn hodidọ huhlọnnọ etọn heyin didọ to aga lọ dali do. To hogbe devo lẹ mẹ, na yinyin nugbonọ po ahundoponọ po wutu, Paulu lẹnvọjọ.​—Galatianu lẹ 1:​13-16.

To Biblu mẹ, hogbe nuyiwa tọn lọ “lẹnvọjọ” nọ saba yin lilẹdogbedevomẹ sọn hogbe Glẹki tọn de mẹ he to paa mẹ nọ zẹẹmẹdo “to yinyọnẹn-godo,” he gbọnvo na “yinyọnẹn-jẹnukọn.” Gbọnmọ dali, lẹnvọjọ bẹ diọdo de to ayiha, walọyizan, kavi lẹndai mẹde tọn mẹ hẹn, yèdọ gbigbẹ́ aliho dai tọn mẹtọn lẹ dai taidi nuhe ma sọgbe. (Owalọ lẹ 3:19; Osọhia 2:5) To whẹho Paulu tọn mẹ, e ma na dotẹnmẹ nujijọ ayidego tọn enẹ to aliho he yì Damasku ji nado yin numimọ numọtolanmẹ tọn kavi sinsẹ̀n tọn de poun gba. Na ewọ e yin nukunhunnamẹ de hlan nugbo lọ dọ aliho gbẹzan etọn dai tọn, to ma yọ́n Klisti mẹ, yin ovọ́. E sọ yọnẹn ga, dọ nado sọgan mọaleyi sọn oyọnẹn he e ṣẹṣẹ mọyi gando Klisti go etọn mẹ, e dona wà nude nado basi vọjlado na aliho gbẹzan tọn etọn.​—Lomunu lẹ 2:4; Efesunu lẹ 4:24.

Diọdo de He Hẹn Dona lẹ Wá

Jẹnukọn, oyọnẹn gando Jiwheyẹwhe go Paulu tọn wá na taun tọn sọn hagbẹ klandovo Falesi lẹ tọn mẹ, he ewọ yin hagbẹ etọn de. Nuyise yetọn lẹ bẹ suhugan tamẹnuplọnmẹ po aṣa gbẹtọvi tọn po hẹn. Na nuvẹun sinsẹ̀n tọn lẹ wutu, zohunhun po vivẹnudido Paulu tọn lẹ po yin anadena to aliho agọ̀ mẹ. Dile etlẹ yindọ e lẹndọ emi to Jiwheyẹwhe sẹ̀n, e to avùnho sọta ẹ wẹ na taun tọn.​—Filippinu lẹ 3:​5, 6.

To whenuena e ko mọ oyọnẹn he pegan lọ yí gando Klisti po azọngban etọn to lẹndai Jiwheyẹwhe tọn mẹ po go godo, Paulu mọ dọ emi pannukọn nudide de: Be e dona gbẹsọ yin Falesi de bo zindonukọn nado to vivi yindidi po sisi po tọn dù wẹ, kavi be e dona diọ gbẹzan etọn bo jẹ nudepope heyin dandan nado tindo alọkẹyi Jiwheyẹwhe tọn wà ji wẹ ya? Po homẹhunhun po, Paulu basi nudide he sọgbe lọ, na e dọmọ: “Na winyan wẹndagbe Klisti tọn tọn ma hù mi gba; na huhlọn Jiwheyẹwhe tọn hlan whlẹngán wẹ na omẹ dopodopo he yise; hlan Ju whẹ́, podọ hlan Glẹki ga.” (Lomunu lẹ 1:16) Paulu lẹzun yẹwhehodọtọ zohunhunnọ wẹndagbe lọ tọn gando Klisti po Ahọluduta lọ po go.

To owhe susu lẹ godo, Paulu dọna Klistiani hatọ etọn lẹ dọmọ: “Yẹn ma hia dee di mẹhe alọ etọn ko jẹ e go gba: ṣigba onú dopo he wẹ yẹn to wiwà, yẹn to jìwọn nuhe tin to godo lẹ go, bosọ to alọ dlẹn do nuhe tin to nukọn lẹ, yẹn to whinwhlẹndo nado jẹ fie ohia lọ te hlan ale oylọ daho Jiwheyẹwhe tọn to Klisti Jesu mẹ.” (Filippinu lẹ 3:​13, 14) Paulu mọaleyi sọn wẹndagbe lọ mẹ na e de sọn ojlo mẹ nado gbẹ́ nuhe ko to dindọ̀n ẹn sọn Jiwheyẹwhe dè dai podọ e yí ahundopo do doafọna yanwle he tin to kọndopọmẹ hẹ lẹndai Jiwheyẹwhe tọn lẹ.

Etẹwẹ Hiẹ na Wà?

Vlavo agọe pete wẹ hiẹ ko sè gando wẹndagbe Ahọluduta lọ tọn go. Be todido gbẹninọ kakadoi to paladisi pipé de mẹ ma fọ́n ojlo towe dote ya? Jọwamọnu de poun wẹ e na yin eyin e wàmọ, na mímẹpo wẹ tindo ojlo jọwamọ tọn de nado nọgbẹ̀ bo duvivi ogbẹ̀ tọn to jijọho po hihọ́ po mẹ. Biblu dọ dọ Jiwheyẹwhe ko ‘sọ yí mavọmavọ’ do ahun mítọn mẹ. (Yẹwhehodọtọ 3:11) Enẹwutu jọwamọnu wẹ e yin na mí nado tindo todido to ojlẹ lọ mẹ to whenuena gbẹtọ lẹ sọgan nọgbẹ̀ kakadoi to jijọho po ayajẹ po mẹ. Podọ enẹ wẹ yin nuhe wẹndagbe Ahọluduta lọ tọn nọ zedonukọnnamẹ.

Ṣigba, nado hẹn todido enẹ yin nujọnu tọn, hiẹ dona dindona bosọ mọdona nuhe wẹndagbe lọ bẹhẹn. Apọsteli Paulu dotuhomẹnamẹ dọmọ: “Mì . . . mọdona [na mìde] nuhe ojlo Jiwheyẹwhe tọn he yọ́n, alọkẹyi, bo sọ sọgbe nẹ yin.” (Lomunu lẹ 12:2) Enẹwutu, taidi Paulu, to whenuena hiẹ ko tindo oyọnẹn po nukunnumọjẹnumẹ po godo, hiẹ dona basi dide de.

To alọ devo mẹ, hiẹ sọgan ko tindo nuyise delẹ gando sọgodo towe go. Flindọ Saulu ko tindo linlẹn etọn lẹ jẹnukọn gando ojlo Jiwheyẹwhe tọn go whẹpo e do lẹzun apọsteli Paulu. Ṣigba kakati nado donukun osọhia jiawu de sọn Jiwheyẹwhe dè, naegbọn hiẹ ma nado pọ́n whẹho lọ hlan sọn pọndohlan nujikudo tọn de mẹ? Kanse dewe dọ: ‘Be yẹn yọ́n nuhe ojlo Jiwheyẹwhe tọn yin gando gbẹtọvi po aigba po go na taun tọn ya? Kunnudenu tẹwẹ yẹn sọgan na nado hẹn nuyise ṣie lẹ lodo? Be kunnudenu ṣie sọgan nọte gligli to dogbapọnnanu to hinhọ́n Ohó Jiwheyẹwhe tọn, yèdọ Biblu nukọn ya?’ Nudepope ma na gú we sọn dogbigbapọnna nuyise sinsẹ̀n tọn towe lẹ mẹ to aliho ehe mẹ gba. Na nugbo tọn, hiẹ dona jlo nado wàmọ na Biblu dotuhomẹnamẹ dọmọ: “Mì nọ dindona onú popo dagbedagbe, mì hẹn ehe yin dagbe go gligli.” (1 Tẹsalonikanu lẹ 5:21) To popolẹpo mẹ, be e mayin alọkẹyi Jiwheyẹwhe tọn wẹ yin nujọnu hugan lọ na taun tọn ya?​—Johanu 17:3; 1 Timoti 2:​3, 4.

Sinsẹ̀ngán lẹ sọgan dopagbe sọgodo mavọmavọ de tọn na mí. Ṣigba adavo opagbe enẹ yin zize sinai do nuplọnmẹ Biblu tọn lẹ ji, e ma na gọalọna mí nado mọ dona Ahọluduta Jiwheyẹwhe tọn lẹ gba. To Yẹwhehodidọ Osó ji tọn diyin etọn mẹ, Jesu na avase mẹ sinsinyẹn dọmọ: “E ma yín mẹdepope he ylọ mi, Oklunọ, Oklunọ, wẹ na biọ ahọludu olọn tọn mẹ gba; adavo ewọ he wà ojlo Otọ́ ṣie he tin to olọn mẹ tọn.”​—Matiu 7:21.

Doayi nùzindonuji Jesu tọn do ojlo Otọ́ etọn tọn wiwà ji go taidi nujinọtedo lọ na dona Ahọluduta Jiwheyẹwhe tọn tọn lẹ mimọyi. To hogbe devo lẹ mẹ, nuhe sọgan tindo awusọhia jijọ-di-Jiwheyẹwhe tọn lẹ ma nọ yin alọkẹyi gbọn Jiwheyẹwhe dali na dandan tọn gba. Na nugbo tọn, Jesu zindonukọn nado dọmọ: “Omẹ susu wẹ na dọ hlan mi to azán nẹ gbè, dọ, Oklunọ, Oklunọ, be míwlẹ ma ko dọdai gbọn oyín towe mẹ? podọ gbọn oyín towe mẹ mí ko yàn lẹgba lẹ jẹgbonu? Podọ oyín towe mẹ mí wà azọ́n huhlọnnọ susu te? Whenẹnu wẹ yẹn na yigbe hlan yé dọ, Yẹn ma yọ́n mì gbede, mì tọ́n sọn dè e, mì azọ́n ylankan wàtọ.” (Matiu 7:22, 23) E họnwun dọ, nujọnu hugan lọ wẹ yindọ mí ni hẹn ẹn diun dọ mí mọnukunnujẹ nuhe wẹndagbe gando Ahọluduta lọ go yin mẹ ganji podọ to enẹgodo yinuwa to kọndopọmẹ hẹ ẹ.​—Matiu 7:​24, 25.

Alọgọ Tin-to-Aimẹ

Hugan owhe 100, Kunnudetọ Jehovah tọn lẹ ko to yẹwheho wẹndagbe Ahọluduta Jiwheyẹwhe tọn tọn dọ. Gbọn yizan owe zinjẹgbonu lẹ tọn gblamẹ podọ gbọn yizan hodidọ tọn dali, yé to alọgọna gbẹtọ lẹ lẹdo aihọn pé nado tindo oyọnẹn he pegan nuhe Ahọluduta lọ yin, dona he e na hẹnwa lẹ, po nuhe mẹde dona wà nado mọ dona mọnkọtọn lẹ tọn po.

Mí na tuli we nado kẹalọyi owẹ̀n he Kunnudetọ Jehovah tọn lẹ to yẹwheho etọn dọ lọ. Gbọn alọkikẹyi po nuyiwa do wẹndagbe lọ ji po dali, hiẹ sọgan mọ dona daho lẹ yí e mayin todin kẹdẹ gba ṣigba to sọgodo ga to whenuena Ahọluduta Jiwheyẹwhe tọn na dugán do aihọn lọ blebu ji.​—1 Timoti 4:8.

Yinuwa todin, na dona Ahọluduta Jiwheyẹwhe tọn tọn lẹ ko sẹpọ!

[Yẹdide to weda 7]

Gbọn owe zinjẹgbonu lẹ po hodidọ lẹ po gblamẹ, Kunnudetọ Jehovah tọn lẹ to yẹwheho wẹndagbe Ahọluduta Jiwheyẹwhe tọn tọn dọ