Be Hiẹ Flin Ya?

Be hiẹ ko yọ́n pinpẹn zinjẹgbonu agọe Atọ̀họ̀-Nuhihọ́ Lọ Tọn lẹ tọn hihia ya? Eyọn, pọ́n vlavo eyin hiẹ sọgan na gblọndo na kanbiọ he bọdego helẹ:

• To Lomunu lẹ 5:​3-5, naegbọn apọsteli Paulu slẹ todido to vivọnu hodidọ debọdo-dego lọ tọn?

Paulu ze onú debọdo-dego he Klistiani lẹ nọ tindo numimọ etọn lẹ donukọnnamẹ​—nukunbibia, akọ́ndonanu, ninọmẹ heyin alọkẹyi, po todido po. “Todido” ehe mayin todido bẹjẹeji tọn he mẹde nọ tindo sọn Biblu mẹ gba, ṣigba todido heyin hinhẹn lodo, he siso, he gbayipe he Klistiani de sọgan wá tindo dile ojlẹ to yìyì wẹ.​—15/12, weda 22-3.

• Naegbọn Klistiani de sọgan tindo ojlo to aihundida lanmẹyiya tọn he nọ yin bibasi to Grèce hohowhenu tọn lẹ mẹ to egbehe?

Nukunnumimọjẹ wunmẹ po aṣa aihundida nẹlẹ tọn po mẹ sọgan tá hinhọ́n do wefọ Biblu tọn sọha delẹ ji. Delẹ to enẹlẹ mẹ dlẹnalọdo ‘agbàwhinwhlẹn sọgbe hẹ osẹ́n lẹ,’ ‘dide agbàn pinpẹn lẹpo dai bo pọnhlan Jesu apajlẹnọ lọ,’ ‘hinhọ̀n alewezun lọ jẹ opodo,’ po ‘mimọ jẹgbákún lọ, kavi ale lọ yí’ po. (2 Timoti 2:5; 4:​7, 8; Heblu lẹ 12:​1, 2; 1 Kọlintinu lẹ 9:​24, 25; 1 Pita 5:4)​—1/1, weda 28-​30.

• Aliho yọyọ he mẹ wẹndagbe lọ na yin lilá te tẹwẹ yin hinhẹnwa aimẹ to janvier 1914?

“Photo-Drame de la création” yin didetọn to whenẹnu. E bẹ nuzedonukọnnamẹ adà-ẹnẹ tọn de hẹn he bẹ adà yẹdide he nọ whàngo lẹ tọn hẹn po yẹdide adógo tọn sinmẹ susu tọn kanweko po hẹn, bọ suhugan ehe tọn nọ zọnpọ hẹ kavi nọ bẹ hóyido-kanji glamafonu tọn lẹ hẹn heyin hodidọ zẹẹmẹ bibasi tọn lẹ. Vọkan 20 Drame ehe lẹ tọn yin awuwlena bo yin yiyizan lẹdo aihọn pé nado plọn owẹ̀n Biblu tọn gbẹtọ lẹ.​—15/1, weda 8-9.

• Nawẹ Hagbẹ Anademẹtọ gbọnvona nuyizan sọgbe hẹ osẹ́n de do?

To whenuena e yindọ gbọn vòbibla dali wẹ anadenanutọ nuyizan sọgbe hẹ osẹ́n tọn lẹ nọ yin dide do tẹnmẹ gbọn hagbẹ etọn lẹ dali, Hagbẹ Anademẹtọ ma nọ yin dide gbọn gbẹtọ depope dali gba ṣigba nọ yin dide gbọn Jesu Klisti dali. Nuhudo depope matin dọ anadenanutọ nuyizan sọgbe hẹ osẹ́n tọn voovo he Kunnudetọ Jehovah tọn lẹ nọ yizan lẹ ni yin Hagbẹ Anademẹtọ lẹ gba. To opli whemẹwhemẹ tọn agọe tọn heyin Watch Tower Bible and Tract Society of Pennsylvania tọn ji, mẹhe yin Hagbẹ Anademẹtọ he to nuyiwa taidi anadenanutọ po mẹhe tin to otẹn azọngban tọn mẹ etọn lẹ po de sọn ojlo mẹ bo tọ́nsọn otẹn yetọn lẹ mẹ. Mẹmẹsunnu he whèwhín “lẹngbọ devo” lẹ tọn kẹalọyi otẹn he jẹvọ́ lẹ. (Johanu 10:16) Gbọnmọ dali Hagbẹ Anademẹtọ sọgan yí ojlẹ dogọ zan to awuwiwlena núdùdù gbigbọmẹ tọn mẹ podọ to nukunpipedo nuhudo gbigbọmẹ tọn mẹmẹsunnu-yinyin lẹdo aihọn pé tọn go.​—15/1, weda 29, 31.

• Apajlẹ Biblu tọn awe tẹlẹ wẹ mí sọgan gbadopọnna nado plọn lehe mí sọgan pehẹ gbigbọjọ do?

Dopo wẹ Hanna, onọ̀ Samuẹli tọn. E sọgan ko na dotẹnmẹ ede nado yin hinhẹn gbọjọ to whenuena Eli, heyin yẹwhenọ daho Islaeli tọn tindo linlẹn agọ̀ de gando ewọ go. Kakatimọ, e hẹn nugbo lẹ họnwun madoadúdẹji ṣigba gbọn sisi dali hlan Eli. Humọ, Hanna ma hẹn Eli do homẹ gba. Awetọ wẹ Malku, he sọgan ko yin hinhẹn gbọjọ to whenuena apọsteli Paulu ma jlo nado hẹn ẹn yì gbejizọnlin mẹdehlan tọn de ji. Kakati nado yin hinhẹn gbọjọ na lẹblanulọkẹyi ehe hinhẹnbu etọn wutu, e zindonukọn to sinsẹ̀nzọn etọn mẹ po zohunhun po, bo basi gbejizọnlin hẹ Balnaba.​—1/2, weda 20-2.

• Etẹwutu wẹ Klistiani lẹ dona họ́ yede gando vọkan tito-to-whinnu zomọ nudọnamẹ-sẹdo tọn lẹ nina mẹdevo lẹ, kavi yíyí sọn mẹdevo lẹ si go?

Suhugan tito-to-whinnu zomọ nudọnamẹ-sẹdo tọn lẹ (gọna aihundida lẹ) tindo gbedewema lẹ he na aṣẹ mẹhe tindo po mẹhe to yiyizan po nado tindo tito-to-whinnu lọ to zomọ nudọnamẹ-sẹdo tọn dopo ji. Na taun tọn osẹ́n jlọjẹ nunọ tọn gbigbà wẹ e yin nado basi vọkan lẹ na mẹdevo lẹ, yèdọ etlẹ yin to whenuena mí to yé namẹ vọnu. Klistiani lẹ nọ jlo nado setonuna osẹ́n lọ, heyin ‘nado na nuhe yin Sesali tọn lẹ hlan Sesali.’ (Malku 12:17)​—15/2, weda 28-9.

• Mẹnu wẹ Cyrille po Méthode po yin, podọ yidogọ tẹwẹ yé basi na Biblu pinplọn?

Yé yin nọvisunnu mẹjitọ dopolọ tọn awe heyin jiji to Tẹsalonika, Grèce, to owhe kanweko ṣinẹnẹ tọn mẹ lẹ. Yé wleawuna wekun he na yin kinkàn de na ogbè Slave tọn lẹ bosọ basi lẹdogbedevomẹ suhugan Biblu lọ tọn do ogbè Slavon tọn mẹ.​—1/3, weda 28-9.

• Etẹwẹ hodidọ lọ ‘nulinlẹnpọn to gbigbọ-liho’ zẹẹmẹdo?​—Lomunu lẹ 8:6.

E zẹẹmẹdo nado yin anadena, bo yin whinwhàn gbọn huhlọn yido-wazọ́n Jehovah tọn dali. Mí sọgan dike huhlọn gbigbọ Jiwheyẹwhe tọn ni yinuwa to mí mẹ gbọn Biblu hihia po pinplọn po dali, gbọn tonusisena osẹ́n Jiwheyẹwhe tọn lẹ po ahundopo po dali, podọ gbọn dẹ̀hiho na gbigbọ Jiwheyẹwhe tọn dali.​—15/3, weda 15.

• Etẹwẹ mí sọgan wà eyin mí lẹndọ yè ma mọnukunnujẹ mí go?

Nujọnu wẹ e yin nado dín nado hẹn whẹho lọ họnwun to gbigbọ owanyi tọn mẹ. Eyin e sọawuhia dọ enẹ ma na tindo kọdetọn dagbe, ma hẹn todido bu blo. Biọ nukunnumọjẹnumẹ po alọgọ po sọn Jehovah dè, mẹhe ‘to ahun lẹ gbeje pọ́n.’ (Howhinwhẹn lẹ 21:2; 1 Samuẹli 16:7)​—1/4, weda 21-3.