Kanbiọ lẹ sọn Wehiatọ lẹ Dè

Nukun tẹwẹ Klistiani nugbo lẹ dona yí do pọ́n walọyizan he gbayipe heyin vọkan tito-to-whinnu zomọ nudọnamẹ-sẹdo ajọwiwa tọn nina mẹdevo lẹ?

Mẹdelẹ sọgan gbọn nuṣiwa dali tẹnpọn nado din whẹjijọ na walọyizan ehe gbọn alọdlẹndo ohó Jesu tọn lẹ dali dọmọ: “Vọnu wẹ mì mọyi, vọnu wẹ mì ni na omẹ.” Na nugbo tọn, Jesu ma to alọdlẹndo owe he tindo jlọjẹ owe vọzin tọn kavi tito-to-whinnu zomọ nudọnamẹ-sẹdo (tito-to-whinnu blebu) tọn, yèdọ yizan azọ́nwanu he nọ yin anadena gbọn osẹ́n dali tọn lẹ ninamẹ vọnu gba. Nuhe dọ e te wẹ nunamẹ heyin apadewhe lizọnyizọn lọ tọn. Jesu dọna apọsteli he jei tòdaho po gbétatò voovo lẹ po mẹ dọ yé dona dọyẹwheho Ahọluduta lọ tọn, hẹn awutunọ lẹ jẹgangan, bosọ yàn aovi lẹ. Kakati nado doahi na ehe, apọsteli lẹ dona ‘na omẹ vọnu.’​—Matiu 10:7, 8.

Po sọha he to jijideji po zomọ nudọnamẹ-sẹdo mẹdetiti po ajọwiwa po tọn lẹ, mẹsusu ko tindo nuhudo tito-to-whinnu blebu tọn. To paa mẹ ehe dona yin hihọ̀. Nugbo wẹ dọ, mẹdelẹ nọ kàn tito-to-whinnu he yé nọ hẹn tin-to-aimẹ vọnu bọ yé sọ nọ dọ dọ e sọgan yin vivọkan bo na yin nina mẹdevo depope. Ṣigba suhugan tito-to-whinnu blebu zomọ nudọnamẹ-sẹdo tọn nọ yin sisà. Vlavo na yizan mẹdetiti tọn yetọn to whégbè kavi na yizan ajọwiwa tọn, mẹhe nọ yí tito-to-whinnu blebu lọ zan lẹ yin nukundo nado họ̀ ẹ, yèdọ nado suahọ na ẹn. Eyin mẹdepope yí kavi basi vọkan tito-to-whinnu blebu de tọn bo ma suahọ etọn, enẹ ma sọgbe hẹ osẹ́n, dile e na yin do na vọkan susu owe lẹ tọn bibasi, etlẹ yin to whenuena ehelẹ yin ninamẹ vọnu.

Suhugan tito-to-whinnu zomọ nudọnamẹ-sẹdo tọn lẹ (gọna aihundida lẹ) nọ tindo jlọjẹ sọgbe hẹ osẹ́n, bọ nunọ kavi mẹhe nọ yí ì zan nọ yin bibiọ nado setonuna awuwledainanu po dogbó tangan etọn lẹ po. Susu gbedewema mọnkọtọn lẹ tọn dọ dọ omẹ dopo akàn wẹ sọgan tindo e bosọ yí tito-to-whinnu lọ zan​—nọ saba tindo e to zomọ nudọnamẹ-sẹdo tọn dopo kẹdẹ ji, vlavo to zomọ nudọnamẹ-sẹdo whégbè tọn kavi dehe tin to ajọwatẹn kavi wehọmẹ de ji. Gbedewema delẹ dọ dọ mẹhe nọ yí ì zan lọ sọgan tindo vọkan he nọ yin sisẹdo de na edetiti, ṣigba e ma dona basi vọkan etọn na mẹdevo lẹ gba. Eyin nunọ lọ jlo nado namẹ tito-to-whinnu lọ blebu (gọna gbedewema po kandai nudọnamẹ tọn po), ewọ sọgan wàmọ. Ṣigba, ewọ gbọnmọ dali hẹn jlọjẹ he e tindo nado zán ẹn bú. Gbedewema lẹ gbọnvo, enẹwutu mẹhe to hihọ̀ tito-to-whinnu de kavi yin nina dopo dona dindona nuhe gbedewema tangan enẹ bẹhẹn lẹ.

Akọta susu wẹ tin to pipli gbekọndopọ jlọjẹ owe vọzin tọn he nọ basi-hihọ́na “nutindo nuyọnẹntọ” lẹ tọn mẹ, taidi tito-to-whinnu zomọ nudọnamẹ-sẹdo tọn lẹ, podọ yé nọ tẹnpọn nado hẹn osẹ́n jlọjẹ owe vọzin tọn lodo. Di dohia, The New York Times heyin 14 janvier 2000 tọn, na linlin dọ “ponọgán Allemagne po Danemark po tọn lẹ wle pipli he yé ylọ dọ jaguda-gbẹ́ nukundeji zomọ nudọnamẹ-sẹdo lẹ tọn de” he nọ basi vọkan bosọ nọ má tito-to-whinnu zomọ nudọnamẹ-sẹdo tọn po aihundida tọn po lẹ, yèdọ tlẹ nọ sà delẹ to Internet ji.

Etẹwẹ yin nujinọtedo agun Klistiani tọn do ehe ji? Eyọ́n, Jesu dọmọ: “Mì yí onú he yin Sesali tọn hlan Sesali, podọ onú he yin Jiwheyẹwhe tọn hlan Jiwheyẹwhe.” (Malku 12:17) Enẹ biọ to Klistiani lẹ si nado setonuna osẹ́n otò tọn lẹ he ma sọta osẹ́n Jiwheyẹwhe tọn. Gando gandudu lẹ go, apọsteli Paulu wlan dọmọ: “Mì gbọ gbigbọ lẹpo ni yin mẹmẹglọ hlan huhlọn daho lẹ . . . Mẹdepope he diọnukunsọ huhlọn, e diọnukunsọ osẹ́ndoai Jiwheyẹwhe tọn: podọ yé he diọnukunsọ lẹ na mọ whẹgbledo yí hlan yede.”​—Lomunu lẹ 13:1, 2.

Mẹho lẹ to agun Klistiani tọn mẹ ma tindo azọngban nado to dodinna zomọ nudọnamẹ-sẹdo mẹdevo lẹ tọn gba, taidi mẹhe yin gbedena nado dinmọ bosọ hẹn osẹ́n jlọjẹ owe vọzin tọn lẹ lodo. Ṣigba yé yise bosọ nọ plọnmẹ dọ Klistiani lẹ dona dapana zize nuhe mayin yetọn bo dona tẹnpọn nado nọ setonuna osẹ́n. Ehe nọ basi-hihọ́na Klistiani lẹ sọn yinyin yasana taidi sẹ́nhẹngbatọ lẹ mẹ, podọ e nọ hẹn yé penugo nado tindo ayihadawhẹnamẹnu dagbe de to Jiwheyẹwhe nukọn. Paulu wlan dọmọ: “Enẹwutu mì ma sọgan nọma yin mẹmẹglọ, e ma yin na homẹgble tọn kẹdẹ wutu gba, ṣigba na [ayihadawhẹnamẹnu] wutu ga.” (Lomunu lẹ 13:5) Mọdopolọ Paulu do ojlo Klistiani nugbo lẹ tọn hia to hogbe ehelẹ mẹ dọmọ: “Mí dotu dọ mí tindo [ayihadawhẹnamẹnu] dagbe bosọ jlo nado tin to owalọ dagbe mẹ to onú lẹpo mẹ.”​—Heblu lẹ 13:18.

[Apotin to weda 29]

Ajọwatẹn po wehọmẹ delẹ po nọ họ̀ gbedewema voovo he nọ dọ sọha mẹhe yin dotẹnmẹ na nado yí tito-to-whinnu lọ zan lẹ tọn. To 1995, agun Kunnudetọ Jehovah tọn lẹ tọn dọhodo hosọ de ji he bẹ ayinamẹ ehe hẹn dọ:

“Suhugan azọ́nwhé lẹ tọn he wleawuna bosọ nọ sà tito-to-whinnu zomọ nudọnamẹ-sẹdo tọn lẹ tindo jlọjẹ owe vọzin tọn na ehelẹ, bọ yé wleawuna gbedewema de he basi todohukanji lehe tito-to-whinnu lọ lẹ sọgan yin yiyizan sọgbe hẹ osẹ́n gbọn tọn. Gbedewema lọ nọ saba dọ dọ mẹhe tindo e lọ ma sọgan na vọkan tito-to-whinnu lọ tọn lẹ mẹdevo lẹ gba; na nugbo tọn, osẹ́n jlọjẹ owe vọzin akọjọpli tọn hẹn ẹn yin nuhe jẹagọdo osẹ́n nado wàmọ. . . . Ajọwatẹn daho delẹ nọ sà zomọ nudọnamẹ-sẹdo tọn lẹ he mẹ yè ko wleawu onú lẹ tọn do po tito-to-whinnu he tindo gbedewema lẹ po. Ṣigba, ajọwatẹn zomọ nudọnamẹ-sẹdo tọn delẹ ma nọ wleawuna gbedewema lẹ gba na tito-to-whinnu he yé ko wleawu etọn do e mẹ jẹnukọn lẹ yin vọkan he ma sọgbe hẹ osẹ́n lẹ wutu, he zẹẹmẹdo dọ núhọ̀tọ lọ gbasẹ́n eyin e yí tito-to-whinnu lọ zan. Gando ehe go, Klistiani lẹ dona dapana yiyi do e mẹ, kavi didesẹ sọn tito-to-whinnu nudọnamẹ tọn he tindo jlọjẹ owe vọzin tọn lẹ (dile e yin do na owe Ogbẹ́ tọn lẹ) po dehe yin vivọkan matin gbedenamẹ sọgbe hẹ osẹ́n tọn po sọn nunọ lọ lẹ dè.”