Mì Jaya hẹ Jiwheyẹwhe Ayajẹnọ Lọ
“Na popolẹpo, mẹmẹsunnu emi, mì nọ blẹo. . . . Jiwheyẹwhe owanyi po jijọho po tọn na tin po mì po.”—2 KỌLINTINU LẸ 13:11.
1, 2. (a) Naegbọn mẹsusu ma tindo ayajẹ to gbẹ̀mẹ? (b) Etẹwẹ ayajẹ yin, podọ nawẹ hiẹ sọgan wleawuna ẹn gbọn?
TO AZÁN awubla tọn ehelẹ mẹ, whẹwhinwhẹ́n vude wẹ mẹsusu tindo nado jaya. To whenuena nugbajẹmẹji jọ do yé go kavi do mẹyiwanna yetọn de go, yé sọgan tindo numọtolanmẹ taidi Job hohowhenu tọn, mẹhe dọmọ: “Gbẹtọ he yè ji sọn yọnnu de mẹ yin azán lẹ vude tọn, bosọ gọ́ na tukla.” (Job 14:1) Klistiani lẹ ma vò sọn kọgbidinamẹ po awufiẹsa po heyin ‘ojlẹ awusinyẹnnamẹ tọn he sinyẹnawu nado pehẹ’ ehelẹ mẹ gba, podọ e ma paṣamẹ dọ devizọnwatọ nugbonọ Jehovah tọn lẹ nọ gbọjọ to whedelẹnu.—2 Timoti 3:1.
2 Etomọṣo, Klistiani lẹ sọgan yin ayajẹnọ, etlẹ yin whenuena yé tin to whlepọn glọ. (Owalọ lẹ 5:40, 41) Nado mọnukunnujẹ lehe ehe yọnbasi do mẹ, lẹnnupọn do nuhe ayajẹ yin ji whẹ́. Ayajẹ ko yin zẹẹmẹ basina taidi “numọtolanmẹ heyin zodolanmẹna gbọn tintindo kavi nukundido onú dagbe de dali.”a Enẹwutu, eyin mí yí whenu zan nado lẹnnupọn do dona he mí tindo todin lẹ ji dile mí to ayihamẹlẹnpọn do ayajẹ he to tenọpọn mí to aihọn yọyọ Jiwheyẹwhe tọn mẹ lẹ ji, mí sọgan yin ayajẹnọ.
3. To linlẹn tẹmẹ wẹ e yin didọ te dọ mẹlẹpo tindo e whè gbau whẹwhinwhẹ́n delẹ nado jaya?
3 Mẹlẹpo wẹ tindo dona delẹ he yé dona dopẹ́ na. Tatọ́ whẹndo tọn de sọgan hẹn agbasazọ́n etọn bu. To jọwamọ-liho, ewọ nọ yin ahunmẹduna. E jlo nado wleawudaina mẹyiwanna etọn lẹ. Etomọṣo, eyin ewọ tindo huhlọn to agbasa mẹ bosọ tindo agbasalilo, e sọgan dopẹ́ na enẹ. Eyin e mọ agbasazọ́n, e sọgan penugo nado wazọ́n sinsinyẹn. To alọ devo mẹ, yọnnu Klistiani de sọgan yin yasana gbọn awutuzọ̀n he nọ hẹn mẹ lẹzun madogánnọ de dali. Ṣogan, e sọgan dopẹ́ na godonọnamẹ họntọn po hagbẹ whẹndo tọn owanyinọ etọn lẹ tọn po he gọalọna ẹn nado pehẹ awutuzọ̀n etọn po yẹyi po gọna adọgbo. Podọ Klistiani nugbo lẹpo, mahopọnna ninọmẹ yetọn lẹ, sọgan jaya to lẹblanulọkẹyi Jehovah, ‘Jiwheyẹwhe ayajẹ tọn,’ po Jesu Klisti po, yèdọ ‘ayajẹnọ po Huhlọnnọ dopo lọ po’ yinyọnẹn mẹ. (1 Timoti 1:11; 6:15) Mọwẹ, Jehovah Jiwheyẹwhe po Jesu Klisti po wẹ yin ayajẹnọ daho hugan lọ. Yé ko tẹdo ayajẹ yetọn go mahopọnna nugbo lọ dọ ninọmẹ lẹ to aigba ji ko gbọnvo tlala na nuhe Jehovah ko tindo linlẹn etọn to bẹjẹeji. Apajlẹ yetọn sọgan plọnnu mí gando lehe mí sọgan tẹdo ayajẹ mítọn go do.
Yé Ma Hẹn Ayajẹ Yetọn Bú Gbede
4, 5. (a) Nawẹ Jehovah yinuwa gbọn to whenuena gbẹtọvi tintan lẹ ṣiatẹ? (b) Aliho tẹmẹ wẹ Jehovah hẹn walọyizan nujikudo tọn de go hlan gbẹtọvi lẹ te?
4 To jipa Edẹni tọn mẹ, Adam po Evi po duvivi agbasalilo dagbe tọn bosọ tindo ayiha pipé. Yé tindo azọ́n he nọ de sinsẹ́n tọ́n nado wà gọna lẹdo he sọgbe he mẹ yé na wà ẹ te lẹ. Hú popolẹpo, yé tindo lẹblanulọkẹyi hodidọ hẹ Jehovah to gbesisọmẹ tọn. Lẹndai Jiwheyẹwhe tọn wẹ e yin dọ yé ni duvivi sọgodo ayajẹ tọn de. Ṣigba mẹjitọ mítọn tintan lẹ mayin pekọnọ na nunina dagbe ehelẹ gba; yé fìn atin-sinsẹ́n heyin gbigbẹ́ na yé lọ sọn “atin yinyọ́n dagbe po oylan po lọ” mẹ. Nuyiwa tolivivẹ tọn ehe ze dodonu lọ dai na ayajẹ matindo lẹpo he míwlẹ, yèdọ kúnkan yetọn lẹ, to numimọ etọn tindo to egbehe.—Gẹnẹsisi 2:15-17; 3:6; Lomunu lẹ 5:12.
5 Etomọṣo, Jehovah ma na dotẹnmẹ walọyizan pinpẹn-nutọn-mayọnẹn Adam po Evi po tọn nado hò ayajẹ etọn yí gba. E tindo jidide dọ e whè gbau delẹ to ahun kúnkàn yetọn lẹ tọn mẹ na yin whinwhàn nado sẹ̀n emi. Na nugbo tọn, e tindo jidide sọmọ bọ e lá lẹndai etọn nado fli kúnkàn tonusetọ yetọn, etlẹ yin whẹpo Adam po Evi po do ji ovi tintan yetọn! (Gẹnẹsisi 1:31; 3:15) To owhe kanweko he bọdego lẹ mẹ, gbẹtọvi susu wẹ zinzọnlin to afọdòmẹ Adam po Evi po tọn lẹ mẹ, ṣigba Jehovah ma gbẹ́ whẹndo gbẹtọvi tọn dai na gbigbayipe tolivivẹ mọnkọtọn tọn wutu gba. Kakatimọ, e ze ayidonugo etọn do sunnu po yọnnu po he ‘hẹn ahun etọn jaya’ lẹ ji, yèdọ mẹhe dovivẹnu nujọnu tọn nado hẹn homẹ etọn hùn na yé yiwanna ẹn wutu lẹ.—Howhinwhẹn lẹ 27:11; Heblu lẹ 6:10.
6, 7. Ninọmẹ tẹlẹ wẹ gọalọna Jesu nado hẹn ayajẹ go?
6 Etẹwẹ dogbọn Jesu dali—nawẹ e hẹn ayajẹ etọn go gbọn? Taidi nudida gbigbọnọ huhlọnnọ de to olọn mẹ, Jesu tindo dotẹnmẹ hundote lẹpo nado doayi nuwiwa sunnu po yọnnu lẹ po tọn go to aigba ji. Mapenọ-yinyin yetọn họnwun, ṣogan Jesu yiwanna yé. (Howhinwhẹn lẹ 8:31) To godo mẹ, to whenuena e wá aigba ji bosọ ‘nọ nọ̀ gbẹtọvi lẹ ṣẹnṣẹn’ pọndohlan etọn gando gbẹtọvi lẹ go ma diọ gba. (Johanu 1:14) Etẹwẹ gọalọna Visunnu pipé Jiwheyẹwhe tọn nado hẹn pọndohlan nujikudo tọn mọnkọtọn go gando whẹndo gbẹtọvi ylandonọ tọn go?
7 Hú popolẹpo, Jesu yin lẹnpọn dagbenọ to nukundido etọn lẹ mẹ gando edetiti po mẹdevo lẹ po go. E yọnẹn dọ emi ma jei nado yì diọ aihọn gba. (Matiu 10:32-39) Enẹwutu e jaya etlẹ yin to whenuena gbẹtọ ahundoponọ dopo poun kẹalọyi owẹ̀n Ahọluduta lọ tọn to aliho dagbe mẹ. Dile etlẹ yindọ walọyizan po nuyiwa devi etọn lẹ tọn po ma nọ yin dagbe to whepoponu, Jesu yọnẹn dọ yé jlo na nugbo tọn nado wà ojlo Jiwheyẹwhe tọn sọn ahun mẹ wá, podọ e yiwanna yé na enẹ wutu. (Luku 9:46; 22:24, 28-32, 60-62) Na taun tọn, to odẹ̀ mẹ hlan Otọ́ olọn mẹ tọn etọn, Jesu basi bladopọ aliho gbẹzan tọn he devi etọn lẹ ko ze kakajẹ ojlẹ enẹ mẹ tọn dọmọ: “Yé ko sọ yìn ohó towe.”—Johanu 17:6.
8. Dọ aliho delẹ he mẹ mí sọgan hodo apajlẹ Jehovah po Jesu po tọn te to whenuena e wá jẹ ayajẹ mítọn go hinhẹn ji.
8 Matin ayihaawe, mímẹpo na mọaleyi sọn nulinlẹnpọn po sọwhiwhe po do apajlẹ heyin zizedai gbọn Jehovah Jiwheyẹwhe po Klisti Jesu po dali ji to whẹho ehe mẹ. Be mí sọgan hodo apajlẹ Jehovah tọn mlẹnmlẹn dogọ vlavo gbọn ma nado yin ahunmẹduna glanglan to whenuena onú lẹ ma yì dile míwlẹ jlo do dali ya? Be mí sọgan hodo afọdòmẹ Jesu tọn pẹkipẹki dogọ gbọn pọndohlan dagbe de go hinhẹn dohlan ninọmẹ mítọn dintọn dali, podọ gbọn lẹnpọn dagbenọ-yinyin to nuhe mí nọ donukun to mídelẹ po mẹdevo lẹ po si dali ya? Mì gbọ mí ni pọ́n lehe delẹ to nunọwhinnusẹ́n ehelẹ mẹ sọgan yin yiyizan to aliho yọn-na-yizan mẹ to adà he yọ́n na Klistiani zohunhunnọ lẹ to filẹpo do—yèdọ to lizọnyizọn kunnudegbe tọn mẹ.
Hẹn Pọndohlan Nujikudo Tọn Go Gando Lizọnyizọn lọ Go
9. Nawẹ ayajẹ Jẹlemia tọn yin hinhẹn jẹ yọyọ gbọn, podọ nawẹ apajlẹ etọn sọgan gọalọna mí gbọn?
9 Jehovah jlo dọ mí ni tindo ayajẹ to sinsẹ̀nzọn etọn mẹ. Ayajẹ mítọn ma dona sinai do kọdetọn he mí tindo lẹ ji gba. (Luku 10:17, 20) Yẹwhegán Jẹlemia dọyẹwheho na owhe susu to aigba-denamẹ he ma de sinsẹ́n tọ́n lẹ ji. To whenuena e ze ayidonugo etọn do nuyiwa agọ̀ gbẹtọ lọ lẹ tọn ji, e hẹn ayajẹ etọn bu. (Jẹlemia 20:8) Ṣigba to whenuena e lẹnayihamẹpọn do whanpẹ owẹ̀n etọn tọn ji, ayajẹ etọn yin hinhẹn jẹ yọyọ. Jẹlemia dọna Jehovah dọmọ: “Yè mọ ohó towe lẹ, yẹn sọ dù yé; ohó towe lẹ lọ sọ yin ayajẹ de hlan mi po homẹhun ayiha ṣie tọn po: na yè nọ ylọ mi gbọn oyín towe dali, OKLUNỌ E.” (Jẹlemia 15:16) Mọwẹ, Jẹlemia jaya to lẹblanulọkẹyi yẹwhehodidọ ohó Jiwheyẹwhe tọn etọn mẹ. Mílọsu sọgan wàmọ.
10. Nawẹ mí sọgan hẹn ayajẹ mítọn go to lizọnyizọn lọ mẹ yèdọ eyin aigba-denamẹ mítọn ma tlẹ to sinsẹ́n detọ́n todin gbọn?
10 Eyin mẹsusu tlẹ gbẹ́ nado kẹalọyi wẹndagbe lọ, mí tindo whẹwhinwhẹ́n lẹpo nado jaya dile mí to mahẹ tindo to lizọnyizọn kunnudegbe tọn mẹ. Flindọ Jehovah tindo jidide mlẹnmlẹn dọ gbẹtọvi delẹ na yin whinwhàn nado sẹ̀n ẹn. Taidi Jehovah, mí ma dona hẹn todido bu pọ́n gbede dọ e whè gbau mẹdelẹ na doayi whẹho lọ go to godo mẹ bo nasọ kẹalọyi owẹ̀n Ahọluduta lọ tọn gba. Mí ma dona wọnji dọ ninọmẹ gbẹtọ lẹ tọn nọ diọ. To whenuena yè pannukọn nuhẹnbu madonukun kavi hunyanhunyan delẹ, etlẹ yin mẹhe tindo pekọ mẹdetiti tọn hugan lẹ sọgan jẹ nulẹnpọn ji sinsinyẹn gando zẹẹmẹ ogbẹ̀ tọn go. Be hiẹ na tin to finẹ nado gọalọ to whenuena omẹ mọnkọtọn de yin ‘ahunmẹduna gando nuhudo gbigbọmẹ tọn etọn lẹ go ya’? (Matiu 5:3) Etẹ, yèdọ mẹde to aigba-denamẹ towe ji sọgan ko wleawufo nado dotoai hlan wẹndagbe lọ to whedevonu tlolo he hiẹ basi dlapọn!
11, 12. Etẹwẹ jọ to tòpẹvi dopo mẹ, podọ etẹwẹ mí sọgan plọn sọn e mẹ?
11 Ninọmẹ aigba-denamẹ mítọn tọn sọgan diọ ga. Lẹnnupọndo apajlẹ dopo ji. To tòpẹvi de mẹ, pipli asu po asi po jọja lẹ tọn he tindo kọndopọ pẹkipẹki bo tindo ovi lẹ de tin to finẹ. To whenuena Kunnudetọ Jehovah tọn lẹ basi dlapọn, yé pehẹ gbeyiyi dopolọ to ohọ̀n lẹpo kọ̀n dọ, “Mí ma tindo ojlo!” Eyin mẹde do ojlo hia to owẹ̀n Ahọluduta tọn mẹ, po awuyiya po wẹ kọmẹnu lẹ nọ hẹn ẹn gbọjọ ma nado tindo kanṣiṣa yinukọn dogọ hẹ Kunnudetọ lẹ. E họnwun dọ, avùnnukundiọsọmẹnu de wẹ eyin nado dọyẹwheho to finẹ. Etomọṣo, Kunnudetọ lẹ ma gbọjọ gba; yé zindonukọn na taun tọn nado to yẹwhehodọ. Etẹwẹ yin kọdetọn etọn?
12 To madẹnmẹ, susu to ovi he tin to tòpẹvi enẹ mẹ lẹ whẹ́n, bo wlealọ, bosọ nọ nọ̀ finẹ. To yinyọnẹn dọ aliho gbẹzan tọn yetọn ma ko dekọtọn do ayajẹ nujọnu tọn mẹ gba, delẹ to jọja he ko whẹ́n ehelẹ mẹ jẹ nugbo lọ dín ji. Yé mọ ẹn to whenuena yé kẹalọyi wẹndagbe he nọ yin lilá gbọn Kunnudetọ lẹ dali. Enẹwutu e wá yindọ to owhe susu godo, agun pẹvi lọ jẹ susudeji ji. Lẹnnupọndo ayajẹ he wẹnlatọ Ahọluduta tọn he ma gbọjọ lọ lẹ na tindo ji! Na linsinsinyẹn to owẹ̀n gigonọ Ahọluduta tọn mimá mẹ ni hẹn ayajẹ wá na mílọsu ga!
Yisenọ Hatọ lẹ Na Nọgodona We
13. Mẹnu wẹ mí sọgan lẹhlan to whenuena mí gbọjọ?
13 To whenuena kọgbidinamẹnu lẹ jideji kavi to whenuena nugbajẹmẹji lẹ jọ do go we, fie wẹ hiẹ sọgan lẹhlan na homẹmimiọn? Livi susu devizọnwatọ klandowiwe Jehovah tọn lẹ nọ lẹhlan Jehovah dè to odẹ̀ mẹ, enẹgodo hlan mẹmẹsunnu po mẹmẹyọnnu Klistiani yetọn lẹ po. To whenuena Jesu tin to aigba ji, ewọ lọsu yọ́n nuhọakuẹ godonọnamẹ devi etọn lẹ tọn. To ozán he jẹnukọnna okú etọn mẹ, e dọho gando yé go taidi “mẹhe ko nọte hẹ mi to whlepọn ṣie lẹ mẹ.” (Luku 22:28) Nugbo wẹ dọ, devi enẹlẹ yin mapenọ, ṣigba nugbonọ-yinyin yetọn yin homẹmimiọn de hlan Visunnu Jiwheyẹwhe tọn. Mí lọsu sọgan mọ huhlọn yí sọn sinsẹ̀n-basitọ hatọ lẹ dè ga.
14, 15. Etẹwẹ gọalọna asu po asi po de nado pehẹ okú visunnu yetọn tọn, podọ etẹwẹ hiẹ plọn sọn numimọ yetọn mẹ?
14 Klistiani asu po asi po de he nọ yin Michel po Diane po plọn lehe godonọnamẹ mẹmẹsunnu po mẹmẹyọnnu yetọn lẹ po tọn sọgan yin nuhọakuẹ de do. Visunnu owhe 20-mẹvi yetọn, Jonathan, heyin Klistiani de he tindo huhlọn bosọ tindo nukundido dagbe, jẹazọ̀n agbasa wiwọ̀ apọ̀nmẹ tọn. Doto lẹ tẹnpọn sinsinyẹn nado whlẹn ẹn gán, ṣigba ninọmẹ agbasalilo Jonathan tọn to yinylan deji kakajẹ whèjai dopo, bọ e damlọn to okú mẹ. Michel po Diane po jẹflumẹ. Yé yọnẹn dọ Opli Sinsẹ̀nzọn tọn, he nọ yin bibasi to whèjai enẹ, ko dibla fó. Ṣogan, na yé tindo nuhudo alọgọ tọn sinsinyẹn wutu, yé biọ to mẹho he tin to finẹ hẹ yé si nado zọnhẹ yé yì Plitẹnhọ Ahọluduta tọn mẹ. Yé jẹ finẹ to whenuena okú Jonathan tọn to yinyin lilá na agun lọ pẹpẹ. To opli godo, mẹmẹsunnu po mẹmẹyọnnu lẹ po lẹdo mẹjitọ he to avivi lọ lẹ, bosọ pla-alọ-kọna yé bosọ dọ ohó homẹmimiọn tọn lẹ. Diane flin dọmọ: “Mí ko jẹflumẹ to whenuena mí wá plitẹnhọ mẹ, ṣigba homẹmiọnnamẹ nankọ die mí mọyi sọn mẹmẹsunnu mítọn lẹ dè—lehe yé jlọ mí dote do sọ! Dile etlẹ yindọ yé ma sọgan de awufiẹsa mítọn sẹ̀, yé gọalọna mí nado doakọnna to kọgbidinamẹnu glọ!”—Lomunu lẹ 1:11, 12; 1 Kọlintinu lẹ 12:21-26.
15 Awufiẹsa hẹn Michel po Diane po nado dọnsẹpọ mẹmẹsunnu yetọn lẹ. E sọ hẹn yé nado dọnsẹpọ ode awetọ. Michel dọmọ: “Yẹn ko plọn nado nọ wlebòna asi yiwanna ṣie dogọ. To ojlẹ gbigbọjọ tọn lẹ mẹ, mí nọ dọho hẹ ode awetọ gando nugbo Biblu tọn po lehe Jehovah to alọgọna mí do po go.” Diane yidogọ dọmọ: “Todido Ahọluduta tọn tlẹ sọ tindo zẹẹmẹ dogọ na mí todin.”
16. Naegbọn e do yin onú titengbe nado dikena mẹmẹsunnu mítọn lẹ ni yọ́n nuhudo mítọn lẹ?
16 Mọwẹ, mẹmẹsunnu po mẹmẹyọnnu Klistiani tọn mítọn lẹ po sọgan yinuwa taidi ‘alọgọ mẹhẹnlodo tọn de’ na mí to ojlẹ awusinyẹn tọn lẹ whenu bo gbọnmọ dali gọalọna mí nado hẹn ayajẹ mítọn go. (Kọlọsinu lẹ 4:11) Nugbo wẹ dọ, yé ma sọgan yọ́n nuhe tin to ayiha mítọn mẹ lẹ gba. Enẹwutu, to whenuena mí tindo nuhudo alọgọ tọn, onú dagbe wẹ e yin nado dike yé ni yọnẹn. To whelọnu lo, mí sọgan do pinpẹn-nutọn-yinyọnẹn nujọnu tọn hia na homẹmimiọn wunmẹ depope he mẹmẹsunnu mítọn lẹ penugo nado wleawu etọn, bo pọ́n ẹn hlan taidi dọ e to wiwá sọn Jehovah dè.—Howhinwhẹn lẹ 12:25; 17:17.
Pọ́n Agun Towe mẹ Hlan
17. Avùnnukundiọsọmẹnu tẹlẹ wẹ onọ̀ godoponọ de pannukọn, podọ nawẹ mí nọ pọ́n mẹhe taidi ewọ lẹ hlan gbọn?
17 Lehe hiẹ doayi yisenọ hatọ towe lẹ go do sọ, mọwẹ hiẹ na plọn nado nọ yọ́n pinpẹn yetọn bosọ nọ mọ ayajẹ to gbẹdido yetọn mẹ do niyẹn. Pọ́n agun towe mẹ hlan. Etẹwẹ hiẹ mọ? Be mẹjitọ yọnnu godoponọ de tin to finẹ he to tuklajẹ nado penukundo ovi etọn lẹ go to aliho nugbo tọn ji ya? Be hiẹ ko lẹnnupọndo apajlẹ dagbe he e to zizedai ji tlala ya? Tẹnpọn nado lẹnnupọndo delẹ to nuhahun he e nọ pehẹ lẹ ji. Onọ̀ godoponọ de he nọ yin Jeanine donù delẹ to ehelẹ mẹ go dọmọ: ṣokẹdẹninọ, zanhẹmẹ zizedonukọnnamẹ sọn sunnu lẹ dè to azọ́nwatẹn, nuhahun akuẹzinzan tọn. Ṣigba aliglọnnamẹnu daho he hugan popolẹpo bẹ nukunpipedo nuhudo numọtolanmẹ ovi lẹ tọn go hẹn, to whenuena e yindọ ovi dopodopo gbọnvo, wẹ e dọ. Jeanine fọ́n nuhahun devo dote dọmọ: “E sọgan yin avùnnukundiọsọmẹ nujọnu tọn nado dapana ayilinlẹn lọ nado hẹn visunnu towe yin tatọ́ whédo lọ tọn nado sọgan sudò asu he ma tin lọ tọn. Yẹn tindo viyọnnu de, podọ e vẹawu nado flin ma nado ze nuhahun sinsinyẹn ṣie lẹ do ewọ ji.” Taidi mẹjitọ godoponọ budisi-Jiwheyẹwhe tọ́ fọtọ́n susu lẹ, Jeanine nọ wazọ́n whenu-gigọ bosọ nọ penukundo whédo etọn go. E sọ nọ plọn Biblu hẹ ovi etọn lẹ, plọnazọ́n yé to lizọnyizọn lọ mẹ, bosọ nọ plan yé wá opli agun tọn lẹ. (Efesunu lẹ 6:4) Lehe Jehovah dona yin ayajẹnọ do sọ dile e to ayido vivẹnudido whẹndo ehe tọn go egbesọegbesọ nado hẹn tenọgli go! Be e ma nọ hẹn ahun mítọn lẹ jaya nado tindo omẹ mọnkọtọn lẹ to ṣẹnṣẹn mítọn ya? Mọwẹ, na nugbo tọn.
18, 19. Basi zẹẹmẹ lehe mí sọgan hẹn pinpẹn-nutọn-yinyọnẹn mítọn siso deji na hagbẹ agun tọn lẹ do.
18 Pọ́n agun towe mẹ whladopo dogọ. Hiẹ sọgan mọ asuṣiọsi po asiṣiọsu nugbonọ lẹ po he ma nọ ‘gọ̀n’ opli lẹ ‘gbede.’ (Luku 2:37) Be yé nọ tindo numọtolanmẹ ṣokẹdẹninọ tọn to whedelẹnu ya? Mọwẹ na taun tọn. Yé nọ jẹdò alọwlemẹ yetọn tọn sinsinyẹn! Ṣigba yé nọ hẹn alọnujan to sinsẹ̀nzọn Jehovah tọn mẹ bosọ nọ tindo ojlo mẹdetiti tọn to mẹdevo lẹ mẹ. Walọyizan tenọgligli, po nujikudo tọn yetọn po nọ yidogọna ayajẹ agun lọ tọn! Klistiani he ko sẹ̀n taidi lizọnyizọnwatọ whenu-gigọ tọn na nuhe hugan owhe 30 de dọmọ: “Dopo to nuhe nọ hẹn mi tindo ayajẹ hugan lẹ mẹ wẹ mimọ mẹmẹsunnu po mẹmẹyọnnu mẹhomẹ lẹ po he ko tindo numimọ whlepọn susu tọn bo gbẹsọ to Jehovah sẹ̀n po nugbonọ-yinyin po!” Mọwẹ, Klistiani mẹhomẹ he tin to ṣẹnṣẹn mítọn lẹ yin tuli daho de na jọja lẹ.
19 Etẹwẹ dogbọn mẹyọyọ he ṣẹṣẹ jẹ gbẹdo hẹ agun lọ ji to agọe lẹ dali? Be mí ma nọ yin ojlofọndotena to whenuena yé do yise yetọn hia to opli lẹ ji ya? Lẹnnupọndo nukọnyiyi he yé ko basi lẹ ji sọn whenue gbọ́n yé jẹ Biblu plọn ji. Homẹ Jehovah tọn dona hùn do yé go tlala. Be mọwẹ e yin do na míwlẹ ya? Be mí nọ do alọkẹyinu mítọn hia, bo nọ na pipà yé na vivẹnudido yetọn lẹ ya?
20. Naegbọn e sọgan yin didọ dọ hagbẹ agun tọn dopodopo nọ yí azọngban titengbe de wà to agun mẹ?
20 Be mẹhe ko wlealọ, tlẹnnọ, kavi mẹjitọ godoponọ de wẹ hiẹ yin ya? Be tọ́ṣiọvi (kavi nọ̀ṣiọvi) de, asuṣiọsi kavi asiṣiọsu de wẹ hiẹ ya? Be mẹhe ko to awukọndopọ hẹ agun lọ na owhe susu de wẹ hiẹ kavi mẹhe ṣẹṣẹ jẹ awukọndopọ hẹ ẹ ji to agọe de wẹ hiẹ ya? Tindo nujikudo dọ apajlẹ nugbonọ towe yin tuli de na mímẹpo. Podọ to whenuena hiẹ kọnawudopọ to ohàn Ahọluduta tọn jiji mẹ, to whenuena hiẹ na gblọndo kavi penukundo azọ́ndenamẹ de go to Wehọmẹ Lizọnyizọn Yẹwhehọluduta tọn mẹ, mahẹ tintindo towe nọ yidogọna ayajẹ mítọn. Hú popolẹpo, e nọ hẹn ahun Jehovah tọn jaya.
21. Etẹlẹ wẹ mí tindo whẹwhinwhẹ́n susu nado wà, ṣigba kanbiọ tẹlẹ wẹ fọndote?
21 Mọwẹ, etlẹ yin to ojlẹ awusinyẹn tọn ehelẹ mẹ, mí sọgan yin ayajẹnọ to sinsẹ̀nzọn bibasi na Jiwheyẹwhe ayajẹnọ mítọn mẹ. Mí tindo whẹwhinwhẹ́n susu nado kẹalọyi tudohomẹnamẹ Paulu tọn he dọmọ: ‘Mì zindonukọn nado to ayajẹ, . . . podọ Jiwheyẹwhe owanyi po jijọho tọn po na tin hẹ mì.’ (2 Kọlintinu lẹ 13:11) Nalete, etẹwẹ eyin mí pannukọn nugbajẹmẹji jọwamọ tọn, homẹkẹn, kavi ninọmẹ sinsinyẹn akuẹzinzan tọn? Be e yọnbasi nado hẹn ayajẹ mítọn go etlẹ yin to ninọmẹ mọnkọtọn lẹ mẹ ya? Wá tadona kọ̀n na dewe dile hiẹ to dogbapọnna hosọ he bọdego.
[Nudọnamẹ Odò Tọn]
a Pọ́n Étude Perspicace des Écritures, Bladopọ 2, weda 45, heyin zinzinjẹgbonu gbọn Kunnudetọ Jehovah tọn lẹ dali.
Be Hiẹ Sọgan Na Gblọndo Ya?
• Nawẹ ayajẹ yin zẹẹmẹ basina gbọn?
• Nawẹ walọyizan nujikudo tọn go hinhẹn sọgan gọalọna mí nado gbọṣi ayajẹ tintindo mẹ gbọn?
• Etẹwẹ sọgan gọalọna mí nado tindo pọndohlan nujikudo tọn gando aigba-denamẹ agun mítọn tọn go?
• Aliho tẹlẹ mẹ wẹ hiẹ dona yọ́n nuhọakuẹ mẹmẹsunnu po mẹmẹyọnnu towe lẹ po tọn to agun towe mẹ?
[Yẹdide to weda 10]
Gbẹtọ he tin to aigba-denamẹ mítọn ji lẹ sọgan diọ
[Yẹdide to weda 12]
Avùnnukundiọsọmẹnu tẹlẹ wẹ mẹhe tin to agun towe mẹ lẹ nọ pannukọn?