Mì Pà Jehovah Na Nuyiwa Jiawu Etọn Lẹ!
“Ayiha ṣie jlayinna [Jehovah, NW] . . . na ewọ he yin hlọnhlọnnọ ko wà nuhe klo lẹ hlan mi.”—LUKU 1:46-49.
1. Nuyiwa jiawu tẹlẹ wẹ e jẹ dọ mí ni pà Jehovah na?
JEHOVAH jẹ nado yin pipà na nuyiwa jiawu etọn lẹ. To whenuena yẹwhegán Mose hẹn tundote Islaeli tọn sọn Egipti wá oflin mẹ, e lá dọmọ: “Nukun mìwlẹ tọn lẹ ko mọ azọ́n daho [Jehovah, NW ] tọn lẹpo he e wà.” (Deutelonomi 11:1-7) Mọdopolọ, to whenuena angẹli Gabliẹli lá jiji Jesu tọn he na jọ to nukọnmẹ na awhli alọji Malia, yọnnu lọ dọmọ: “Ayiha ṣie jlayinna [Jehovah, NW ] . . . na ewọ he yin hlọnhlọnnọ ko wà nuhe klo lẹ hlan mi.” (Luku 1:46-49) Taidi Kunnudetọ Jehovah tọn lẹ, mí nọ pà ẹ na nuyiwa jiawu mọnkọtọn lẹ taidi túntún Islaeli dote sọn kanlinmọgbenu Egipti tọn podọ na ohò Visunnu vivẹ etọn tọn mimọ to azọ́njiawu-liho.
2. (a) Etẹwẹ “lẹndai madopodo” Jiwheyẹwhe tọn zẹẹmẹdo na gbẹtọvi tonusetọ lẹ? (b) Numimọ tẹwẹ Johanu mọ to lopo Patmos tọn ji?
2 Susu nuyiwa jiawu Jehovah tọn lẹ ko yin kinkọndopọ hẹ “lẹndai madopodo” etọn nado dona gbẹtọvi tonusetọ lẹ gbọn Mẹssia po gandudu Ahọluduta tọn etọn po gblamẹ. (Efesunu lẹ 3:8-13) Lẹndai enẹ to nukọnzindo vudevude to whenuena apọsteli Johanu yọnhonọ lọ yin dotẹnmẹ na nado pọ́nnu gbọn ohọ̀n numimọ tọn he hùndonuvo to olọn mẹ lọ mẹ. E sè ogbè he taidi opẹ̀n tọn de dọmọ: “Hẹ aga wá ofi, yẹn nasọ yí nuhe ma na nọma wá jọ to sọgodo hia we.” (Osọhia 4:1) To whenue gandudu Lomu tọn yàn ẹn dogbé yì lopo Patmos ji “na ohó Jiwheyẹwhe tọn, po kunnuhó Jesu Klisti tọn po” wutu, Johanu mọ “osọhia Jesu Klisti tọn” yí. Nuhe apọsteli lọ mọ bo sè do nususu hia gando lẹndai mavọmavọ Jiwheyẹwhe tọn go, bo gbọnmọ dali wleawuna wuntuntun gbigbọmẹ tọn po tulinamẹ he wá do ganmẹ po na Klistiani nugbo lẹpo.—Osọhia 1:1, 9, 10.
3. Mẹnu wẹ mẹho 24 he Johanu mọ to numimọ etọn mẹ lẹ nọtena?
3 Gbọn ohọ̀n he yin hunhundonuvo to olọn mẹ lọ gblamẹ, Johanu mọ mẹho 24, he yin zizedo ofìn ji bo yin jẹgbakun ṣinyọ́nna taidi ahọlu lẹ. Yé ṣinyọ́n akọ́nnu ai to Jiwheyẹwhe nukọn bo dọmọ: “[Jehovah, NW ] mítọn podọ Jiwheyẹwhe mítọn, hiẹ wẹ jẹ nado yí gigo, yẹyi, po huhlọn po: na hiẹ wẹ dá onú popo, podọ to ojlo towe mẹ wẹ yé do tin, bọ yè sọ do dá yé.” (Osọhia 4:11) Mẹho enẹlẹ nọtena Klistiani yiamisisadode lẹpo he ko yin finfọnsọnku do otẹn yiaga he Jiwheyẹwhe dopagbe etọn na yé lẹ mẹ. Yé yin whinwhàn nado pà Jehovah na nuyiwa jiawu etọn he tindo kanṣiṣa hẹ nudida lẹ. Awú nọ jí mílọsu ga gando kunnudenu ‘huhlọn mavọmavọ Jehovah tọn po Jiwheyẹwhe-yinyin etọn po’ go. (Lomunu lẹ 1:20) Podọ lehe nuhe mí plọn dogbọn Jehovah dali sù sọ, mọwẹ whẹwhinwhẹ́n he mí tindo nado pà ẹ na nuyiwa jiawu etọn lẹ nọ sù sọ.
Mì Lá Nuyiwa Jehovah Tọn He Jẹna Pipà Lẹ!
4, 5. Na apajlẹ lehe Davidi pà Jehovah gbọn tọn lẹ.
4 Psalm-kantọ Davidi pà Jiwheyẹwhe na nuyiwa jiawu Etọn lẹ. Di apajlẹ, Davidi jihàn dọmọ: “Mì jihàn do pà OKLUNỌ he sinai to Ziọni: mì lá azọ́n etọn to gbẹtọ lẹ mẹ. Walẹblanu na mi, OKLUNỌ E, pọ́n nukunbibia he yẹn to mimọ to alọ yé he gbẹwanna mi lẹ tọn mẹ, hiẹ he ze ota ṣie daga sọn họngbó okú tọn lẹ ji. Na yẹn nido dọ pipà towe lẹpo to họngbó viyọnnu Ziọni tọn lẹ mẹ.” (Psalm 9:11, 13, 14) To yẹdide họgbigbá tẹmpli lọ tọn zizedo alọmẹ na visunnu etọn Sọlọmọni pó godo, Davidi dona Jiwheyẹwhe bo pà ẹ, dọmọ: “OKLUNỌ E, towe kiklo yin, po huhlọn po, po gigo po, po awhàngbigba po, po gigo daho po . . . Towe wẹ ahọludu, OKLUNỌ E, hiẹ wẹ yè sọ zedaga di ota to popo ji. . . . Enẹwutu dinvie, Jiwheyẹwhe mítọn, mí dopẹna we, bosọ pà oyín towe gigonọ.”—1 Otannugbo lẹ 29:10-13.
5 Owe-wiwe basi oylọna mí—mọwẹ, dotuhomẹna mí pludopludo—nado pà Jiwheyẹwhe, dile Davidi basi do. Owe Psalm lẹ tọn bẹ hogbe pipà hlan Jiwheyẹwhe tọn susu hẹn, podọ nudi odaa ohàn ehelẹ tọn wẹ yin kinkàn gbọn Davidi dali. Ewọ nọ pà bo nọ dopẹna Jehovah to whepoponu. (Psalm 69:30) Humọ, sọn ojlẹ fliflimẹ tọn lẹ mẹ, ohàn he Davidi po mẹdevo lẹ po pà to gbọdo sọn olọn mẹ wá glọ lẹ ko yin yiyizan nado pà Jehovah.
6. Nawẹ Psalm gbọdo lẹ sọawuhia nado yọn-na-yizan na mí gbọn?
6 Lehe Psalm lẹ yọn-na-yizan na sinsẹ̀n-basitọ Jehovah tọn lẹ do sọ! To whenuena mí jlo na dopẹna Jehovah na nuyiwa jiawu etọn lẹpo do ota mítọn mẹ, ayiha mítọn sọgan yawu lẹhlan hogbe dagbedagbe he yin mimọ to Psalm mẹ lẹ ji. Di apajlẹ, to whenuena mí fọ́n wá ogbẹ̀ to azán yọyọ de gbè, mí sọgan yin whinwhàn nado yí hogbe mọnkọtọn lẹ zan taidi ehelẹ: “Onú dagbe wẹ nado na opẹ́ OKLUNỌ, podọ nado jihàn pipà tọn hlan oyín towe, hiẹ Gigogán: nado do dagbewanyi towe hia to afọnnu, podọ nugbo towe to zánmẹ zánmẹ, . . . na hiẹ, OKLUNỌ, ko hẹn homẹ ṣie hùn gbọn azọ́n towe lẹ dali: yẹn na yí ayajijẹ do jihàn to azọ́n alọ towe tọn lẹ mẹ.” (Psalm 92:1-4) To whenuena mí dùto aliglọnnamẹnu nukọnyiyi gbigbọmẹ tọn mítọn de ji, mí sọgan yin whinwhàn nado do ayajẹ po pinpẹn-nutọn-yinyọnẹn po hia to odẹ̀ mẹ, yèdọ dile psalm-kantọ lọ basi do to whenuena e jihàn dọmọ: “Mì wá, mì gbọ mí ni yí ayajijẹ do jihàn hlan OKLUNỌ: mì gbọ mí ni dabóbó hlan awinyan whlẹngán mítọn tọn. Mì gbọ mí ni wá nukọn etọn po opẹ́ po, bosọ yí ohàn do dabóbó hlan e dè.”—Psalm 95:1, 2.
7. (a) Etẹwẹ jẹna ayidego to ohàn susu he Klistiani lẹ nọ jì lẹ mẹ? (b) Etẹwẹ yin dopo to whẹwhinwhẹ́n he wutu mí dona nọ wá opli lẹ domẹwhenu bo gbọṣi aimẹ kakajẹ vivọnu lẹ mẹ?
7 Mí nọ saba ze ogbè mítọn lẹ daga to ohàn pipà tọn lẹ jìjì hlan Jehovah mẹ to opli agun tọn lẹ, plidopọ lẹ, po plidopọ agbegbe tọn lẹ po ji. E jẹna ayidego dọ susu ohàn ehelẹ tọn wẹ yin zize sinaido linlẹn he yin gbigbọdo lẹ ji sọn owe Psalm lẹ tọn mẹ. Lehe mí yin ayajẹnọ nado tindo bẹplidopọ ohàn ojlofọndotenamẹ egbezangbe tọn lẹ nado pà Jehovah do sọ! Ohàn pipà tọn lẹ jìjì hlan Jiwheyẹwhe yin dopo to whẹwhinwhẹ́n tangan lẹ mẹ he wutu mí dona nọ yì opli mítọn lẹ domẹwhenu bosọ nọ gbọṣi aimẹ kakajẹ vivọnu, bo gbọnmọ dali do nọ tindo mahẹ po sinsẹ̀n-basitọ hatọ lẹ po to Jehovah pipà to ohàn po odẹ̀ po mẹ.
“Mì Pà Jah!”
8. Etẹwẹ hogbe lọ “Hallelujah” zẹẹmẹdo, podọ nawẹ e nọ saba yin yiyizan gbọn?
8 Hogbe lọ “Hallelujah” bẹ Jehovah pipà hẹn, yèdọ hogbe Heblugbe tọn de he yin hinhẹnwa ogbè mítọn mẹ he zẹẹmẹdo “Mì Pà Jah.” Di apajlẹ, to Psalm 135:1-3 mẹ, mí mọ oylọ-basinamẹ zohunhunnọ, nùzindonuji tọn ehe dọmọ: “[Mì pà Jah!, NW ]. Mì pà oyín OKLUNỌ tọn; mì pà ẹ, mì mẹdagun OKLUNỌ tọn lẹ emi. Mì he nọ ṣite to ohọ̀ OKLUNỌ tọn mẹ, to awá ohọ̀ Jiwheyẹwhe mítọn tọn lẹ mẹ. Mì pà [Jah, NW ]; na yinyọ́n wẹ OKLUNỌ: mì jì pipà ohàn hlan oyín etọn: na yinyọ́n wẹ.”
9. Etẹwẹ nọ whàn mí nado pà Jehovah?
9 Dile mí lẹnnupọndo azọ́njiawu nudida Jiwheyẹwhe tọn lẹ ji po nuyiwa etọn lẹpo do ota mítọn mẹ po ji, pinpẹn-nutọn-yinyọnẹn sọn ahun mẹ wá nọ whàn mí nado pà ẹ. To whenuena mí lẹnnupọndo onú jiawu he Jehovah wà na omẹ etọn lẹ to ojlẹ he wayi lẹ mẹ ji, ahun mítọn nọ whàn mí nado pà ẹ. Podọ dile mí lẹnayihamẹpọndo opagbe onú daho he Jehovah na wà to madẹnmẹ lẹ tọn ji, mí nọ dín aliho lẹ nado do pipà po pinpẹn-nutọn-yinyọnẹn po hia.
10, 11. Nawẹ tintin mítọn lọsu na mí whẹwhinwhẹ́n nado pà Jiwheyẹwhe gbọn?
10 Tintin mítọn lọsu nọ na mí whẹwhinwhẹ́n dagbe nado pà Jah. Davidi jihàn dọmọ: “Yẹn na dopẹ hlan we [Jehovah]; na awujiji po nujiawu po mẹ wẹ yè dá mi: nujiawu wẹ azọ́n towe lẹ: enẹ wẹ ayiha ṣie yọnẹn hezeheze.” (Psalm 139:14) Mọwẹ, mí yin ‘didá to azọ́njiawu-liho’ bo tindo nunina họakuẹ mọnkọtọn lẹ taidi numimọ, nusise, po nugopipe nulẹnpọn tọn po. Enẹwutu, be e ma jẹ dọ mí ni yí gbẹzan mítọn zan to aliho he na pà Basitọ mítọn mẹ ya? Paulu do linlẹn mọnkọtọn hia to whenuena e wlan dọmọ: “Eyin mì to dùdù, kavi eyin mì to nùnù, kavi nudepope mì to wiwà, mì nọ wà popo hlan gigo Jiwheyẹwhe tọn.”—1 Kọlintinu lẹ 10:31.
11 Mí na wà onú lẹpo na gigo Jehovah tọn eyin mí yiwanna ẹn nugbonugbo. Jesu dọ dọ gbedide tintan wẹ yindọ: “Hiẹ na yiwanna [Jehovah, NW ] Jiwheyẹwhe towe sọn ayiha towe lẹpo mẹ, podọ sọn alindọn towe lẹpo mẹ, podọ sọn nuyọnẹn towe lẹpo mẹ podọ sọn huhlọn towe lẹpo mẹ.” (Malku 12:30; Deutelonomi 6:5) Na jide tọn mí dona yiwanna Jehovah bo nọ pà ẹ taidi Basitọ po Nunamẹtọ “nunina dagbedagbe po nunina he sọgbe lẹpo po” tọn. (Jakobu 1:17; Isaia 51:13; Owalọ lẹ 17:28) E jẹ domọ, na nugopipe nulẹnpọn tọn mítọn lẹ, nugopipe gbigbọmẹ tọn mítọn, po huhlọn agbasalan tọn mítọn lẹ po—yèdọ jẹhẹnu po nugopipe mítọn lẹpo po—wẹ wá sọn Jehovah dè. Taidi Mẹdatọ mítọn, e jẹna owanyi po pipà mítọn po.
12. Etẹwẹ yin numọtolanmẹ towe dogbọn nuyiwa jiawu Jehovah tọn lẹ po hogbe Psalm 40:5 tọn lẹ po dali?
12 Nuyiwa jiawu Jehovah tọn lẹ na mí whẹwhinwhẹ́n madosọha lẹ nado yiwanna ẹn bo pà ẹ! “OKLUNỌ E Jiwheyẹwhe ṣie, susu wẹ azọ́n jiawu he hiẹ ko wà, po linlẹn towe po hlan míwlẹ dali,” wẹ Davidi jihàn dọ. “Yè ma sọgan hia yé hlan we kannu-kannu gba: eyin yẹn na lá, bosọ dọho yetọn, yé hú onú hihia.” (Psalm 40:5) Davidi ma sọgan hia azọ́n jiawu Jehovah tọn lẹpo gba, podọ mọjanwẹ mí lọsu lẹ ma sọgan do. Ṣigba mì gbọ mí ni nọ pà Jiwheyẹwhe to whepoponu he depope to nuyiwa jiawu etọn lẹ mẹ yin hinhẹnwa ayidonugo mítọn mẹ.
Azọ́n lẹ Tindo Kanṣiṣa hẹ Lẹndai Mavọmavọ Jiwheyẹwhe Tọn
13. Nawẹ todido mítọn tindo kanṣiṣa hẹ nuyiwa jiawu Jiwheyẹwhe tọn lẹ gbọn?
13 Todido mítọn na sọgodo tindo kanṣiṣa hẹ nuyiwa jiawu he jẹna pipà bo tin to kọndopọmẹ hẹ lẹndai mavọmavọ Jiwheyẹwhe tọn lẹ. To atẹṣiṣi Edẹni mẹ tọn godo, Jehovah dọ dọdai tintan he gọ́ na todido. To whẹdida na odàn lọ mẹ, Jiwheyẹwhe dọmọ: “Yẹn nasọ yí okẹ̀n do hiẹ po yọnnu lọ po ṣẹnṣẹn; podọ do okún towe po okún etọn po ṣẹnṣẹn: ewọ na só ota towe, hiẹ na só afọgbẹn etọn.” (Gẹnẹsisi 3:15) Todido to Okún dopagbe yọnnu lọ tọn mẹ gbẹ́ pò to ogbẹ̀ to ayiha gbẹtọvi nugbonọ lẹ tọn mẹ to whenuena Jehovah wà nuyiwa jiawu de gbọn Noa po whẹndo etọn po whinwhlẹngán dali to Singigọ lẹdo globu pé tọn he zà aihọn mẹylankan lẹ tọn de sẹ̀ mẹ godo. (2 Pita 2:5) Opagbe dọdai tọn lẹ hlan sunnu yisenọ mọnkọtọn lẹ taidi Ablaham po Davidi po namẹ wuntuntun dogọ gando nuhe Jehovah na wadotana gbọn Okún enẹ gblamẹ lọ go.—Gẹnẹsisi 22:15-18; 2 Samuẹli 7:12.
14. Etẹwẹ yin apajlẹ nuyiwa jiawu Jehovah tọn he yiaga hugan do ota gbẹtọvi lẹ tọn mẹ?
14 Dohia Jehovah tọn he yiaga hugan taidi mẹhe nọ wà azọ́n jiawu lẹ do ota gbẹtọvi lẹ tọn mẹ wá aimẹ to whenuena e ze Visunnu dopo akàn etọn—yèdọ Okún dopagbe lọ, heyin Jesu Klisti jó—taidi avọ́sinsan ofligọ tọn. (Johanu 3:16; Owalọ lẹ 2:29-36) Ofligọ lọ wleawu dodonu lọ tọn nado gbọwhẹ hẹ Jiwheyẹwhe. (Matiu 20:28; Lomunu lẹ 5:11) Jehovah bẹ omẹ tintan he gbọwhẹ hẹ ẹ lẹ plidopọ do agun Klistiani tọn, he yin didoai to Pẹntikọsti 33 W.M. tọn lọ mẹ. Po alọgọ gbigbọ wiwe tọn po, yé dọyẹwheho wẹndagbe lọ tọn gbọn filẹpo, bo to dido lehe okú po fọnsọnku Jesu tọn po hùn aliho dote na gbẹtọvi tonusetọ lẹ nado mọ dona mavọmavọ lẹ yí to gandudu Ahọluduta olọn mẹ Jiwheyẹwhe tọn glọ hia.
15. Nawẹ Jehovah ko yinuwa to aliho jiawu de mẹ to azán mítọn gbè gbọn?
15 To azán mítọn gbè, Jehovah ko yinuwa to aliho jiawu de mẹ nado bẹ Klistiani yiamisisadode he gbọngodo lẹ pli. Jẹhọn vasudo tọn lọ ko yin hinhẹndote nado dike na pipotọ gbẹtọ 144 000, he na dugán hẹ Klisti to olọn mẹ lẹ ni yin hiadonu yí do tlẹ́. (Osọhia 7:1-4; 20:6) Jiwheyẹwhe ko hẹn ẹn diun dọ Klistiani yiamisisadode lẹ yin tuntundote sọn kanlinmọgbenu gbigbọmẹ tọn mẹ sọn “Babilọni Daho” lọ, yèdọ ahọluigba sinsẹ̀n lalo aihọn tọn mẹ. (Osọhia 17:1-5) Etẹwẹ tundote enẹ to 1919 po hihọ́-basinamẹ sọn olọn mẹ wá he yé ko tindo sọn whenẹnu gbọ́n po ko dike na pipotọ mẹyiamisisadode lẹ tọn nado wà? Nado sẹ́ jẹgbonu to kunnudide godotọn lọ mẹ whẹpo Jehovah na hẹn vivọnu titonu ylankan Satani tọn wá to “nukunbibia daho” he to sisẹpọ po awuyiya po lọ mẹ.—Matiu 24:21; Daniẹli 12:3; Osọhia 7:14.
16. Kọdetọn tẹwẹ azọ́n yẹwhehodidọ-Ahọluduta lọ tọn lẹdo aihọn pé egbezangbe tọn to hinhẹnwa?
16 Kunnudetọ yiamisisadode Jehovah tọn lẹ ko yin nukọntọ zohunhunnọ to azọ́n yẹwhehodidọ-Ahọluduta lọ tọn lẹdo aihọn pé mẹ. Taidi kọdetọn de, sọha “lẹngbọ devo” lẹ he to jijideji lẹ tọn to lilẹzun sinsẹ̀n-basitọ Jehovah tọn lẹ todin. (Johanu 10:16) Mí jaya dọ dotẹnmẹ lọ gbẹ́ pò to hùnhùn na homẹmimiọnnọ aigba ji tọn lẹ nado kọnawudopọ hẹ mí to Jehovah pipà mẹ. Mẹhe kẹalọyi oylọ-basinamẹ lọ nado “wá” lẹ tin to hukan ji na whlẹngán sọn nukunbibia daho lọ mẹ, po nukundido lọ po nado to Jehovah pà kakadoi.—Osọhia 22:17.
Fọtọ́n Susu to Wiwọ̀ Wá Sinsẹ̀n-Bibasi Nugbo Mẹ
17. (a) Nawẹ Jehovah to nuyiwa jiawu lẹ wà to kọndopọmẹ hẹ azọ́n yẹwhehodidọ tọn mítọn gbọn? (b) Nawẹ Zekalia 8:23 to hẹndi mọyi gbọn?
17 Jehovah to onú jiawu he jẹna pipà lẹ basi todin to kọndopọmẹ hẹ nuwiwa yẹwhehodidọ tọn mítọn. (Malku 13:10) To owhe agọe tọn lẹ mẹ, e ko ‘hùn ohọ̀n gblagada he nọ planmẹ jẹ nuwiwa kọ̀n’ lẹ dote. (1 Kọlintinu lẹ 16:9) Ehe ko hẹn ẹn yọnbasi na wẹndagbe lọ nado yin lilá gbọn aigba-denamẹ susu ji fie kẹntọ nugbo lọ tọn lẹ nọ glọnalinamẹ te dai lẹ. Mẹsusu he nọ nọgbẹ̀ to zinvlu gbigbọmẹ tọn mẹ dai lẹ ko to alọkẹyi oylọ-basinamẹ lọ todin nado sẹ̀n Jehovah. Yé to ohó dọdai tọn ehelẹ hẹndi dọmọ: “Le wẹ OKLUNỌ awhànpa lẹ tọn dọ: To azán nẹlẹ mẹ e na wá jọ, dọ omẹ ao na tẹ́do e go, sọn akọgbè akọta lẹ tọn lẹpo mẹ, yèdọ na tẹ́do avọ̀tonu ewọ he yin Ju de tọn go, dọmọ: Míwlẹ na yì hẹ mì, na mí ko sè dọ Jiwheyẹwhe tin to mì dè.” (Zekalia 8:23) Ju gbigbọmẹ tọn lẹ, yèdọ pipotọ Klistiani yiamisisadode egbezangbe tọn lẹ, wẹ yin mẹhe go “omẹ ao” lọ lẹ na tẹ́do. To whenuena e yindọ ao sọgan nọtena sọha gigọ́ aigba ji tọn de, “omẹ ao” lọ lẹ nọtena “gbẹtọ susugege” lọ, heyin hinhẹnwa haṣinṣan mẹ hẹ “Islaeli Jiwheyẹwhe tọn,” he nọpọ́ hẹ yé bo wleawuna “apó dopo.” (Osọhia 7:9, 10; Galatianu lẹ 6:16) Lehe e yin ayajẹnu nado mọ mẹsusu sọmọ to sinsẹ̀n wiwe basi dopọ todin taidi sinsẹ̀n-basitọ Jehovah Jiwheyẹwhe tọn lẹ do sọ!
18, 19. Kunnudenu tẹwẹ dohia dọ Jehovah to didona azọ́n yẹwhehodidọ tọn?
18 Mí yin ojlofọndotena dọ fọtọ́n donu ao lẹ—na nugbo tọn, fọtọ́n donu kanweko lẹ—wẹ to alọkẹyi sinsẹ̀n-bibasi nugbo lọ to otò he mẹ sinsẹ̀n lalo lẹ ko dugán te dai bọ e sọawuhia taidi dọ mẹdepope ma na kẹalọyi wẹndagbe lọ to finẹ pọ́n gbede lẹ mẹ. Pọ́n Annuaire des Témoins de Jéhovah agọe tọn mẹ, bo doayi otò he nọ na linlin wẹnlatọ Ahọluduta tọn he bẹsọn 100 000 jẹ nudi 1 000 000 tọn todin lẹ go. Kunnudenu huhlọnnọ de wẹ ehe yin dọ Jehovah to didona azọ́n yẹwhehodidọ-Ahọluduta lọ tọn.—Howhinwhẹn lẹ 10:22.
19 Taidi omẹ Jehovah tọn lẹ, mí nọ pà bo nọ dopẹna Otọ́ mítọn olọn mẹ tọn na lẹndai nujọnu tọn, azọ́n alemọyi tọn to sinsẹ̀nzọn etọn mẹ, po pọndohlan sọgodo he họnwun de tọn po nina mí to gbẹ̀mẹ. Mí to gbẹ̀nọ to nukundido jejeji tọn mẹ na hẹndi opagbe sọn olọn mẹ wá lẹpo tọn bo magbe nado ‘hẹn mídelẹ gbọṣi owanyi Jiwheyẹwhe tọn mẹ, po pọndohlan ogbẹ̀ madopodo tọn po.’ (Juda 20, 21) Lehe homẹ mítọn hùn nado mọdọ sọha gbẹtọ susugege he to Jiwheyẹwhe pà lẹ tọn ko yiaga jẹ 6 000 000 do sọ! Po dona he họnwun Jehovah tọn po, pipotọ mẹyiamisisadode lẹ tọn to pọmẹ hẹ gbẹdohẹmẹtọ yetọn lẹngbọ devo lẹ ko yin titobasina do nudi agun 91 000 lẹ mẹ to aigba 235 lẹ ji. Mímẹpo to núdùdù gbigbọmẹ tọn dù ganji gbọn vivẹnudido madoalọte “afanumẹ nugbonọ, nuyọnẹntọ” lọ tọn dali. (Matiu 24:45) Titobasinanu yẹwhehọluduta tọn po nukunpedonugo owanyinọ he to nukọnzindo de po to anadena nuwiwa Ahọluduta tọn lẹ to alahọ 110 Kunnudetọ Jehovah tọn lẹ tọn mẹ. Mí dopẹna Jehovah dọ e ko whàn ahun omẹ etọn lẹ tọn nado ‘yí nuhọakuẹ yetọn lẹ do gbògbéna ẹn.’ (Howhinwhẹn lẹ 3:9, 10) Taidi kọdetọn de, azọ́n yẹwhehodidọ lẹdo aihọn pé tọn mítọn to nukọnzindo, bọ azọ́nwatẹn wezinzin tọn lẹ, owhé Bẹtẹli po mẹdehlan lẹ tọn po, Plitẹnhọ Ahọluduta tọn lẹ, po Plitẹnhọ Plidopọ tọn lẹ po to yinyin gbigbá dile nuhudo etọn tin do.
20. Nawẹ nulinlẹnpọndo nuyiwa jiawu Jehovah tọn he jẹna pipà lẹ ji dona yinuwado mí ji gbọn?
20 Mí ma sọgan donù nuyiwa jiawu he jẹna pipà he Otọ́ mítọn olọn mẹ tọn ko wà lẹpo go gba. Ṣigba be mẹhe yin ahunjijlọnọ depope sọgan gbẹ́ ma nado kọnawudopọ hẹ pipli mẹhe to Jehovah pà lẹ tọn ya? Na nugbo tọn lala! Enẹwutu, mì gbọ owanyina Jiwheyẹwhe tọ́ lẹpo ni yí ayajẹ do dawhá jẹgbonu dọmọ: “[Mì pà Jah!, NW ]. Mì pà OKLUNỌ sọn olọn lẹ mẹ: mì pà ẹ to fiyìji lẹ. Mì pà ẹ, mì angẹli etọn lẹ emi . . . dẹpẹ lẹ, po awhli lẹ po; yọnhonọ lẹ, po yọpọ lẹ po: mì gbọ yé ni pà oyín OKLUNỌ tọn, na oyín ewọ dopo kẹdẹ tọn wẹ gbọnvo: yẹyi daho etọn sọ ṣinyọ́n aigba po olọn po ji.” (Psalm 148:1, 2, 12, 13) Mọwẹ, mì gbọ mí ni pà Jehovah todin podọ kakadoi, na nuyiwa jiawu etọn lẹ!
Nawẹ Hiẹ Na Na Gblọndo Gbọn?
• Etẹwẹ yin delẹ to nuyiwa jiawu Jehovah tọn he jẹna pipà lẹ mẹ?
• Etẹwẹ dozolanmẹna we nado pà Jehovah?
• Nawẹ todido mítọn tindo kanṣiṣa hẹ nuyiwa jiawu Jiwheyẹwhe tọn lẹ gbọn?
• Nawẹ Jehovah to nuyiwa jiawu he jẹna pipà lẹ basi to kọndopọmẹ hẹ azọ́n yẹwhehodidọ-Ahọluduta lọ tọn gbọn?
[Yẹdide to weda 10]
Be hiẹ nọ yí ahun lẹpo do kọnawudopọ to ohàn pipà tọn lẹ jìjì hlan Jehovah mẹ ya?
[Yẹdide to weda 13]
Mí jaya dọ dotẹnmẹ lọ gbẹ́ pò to hùnhùn na homẹmiọnnọ lẹ nado kọnawudopọ hẹ mí to Jehovah pipà mẹ