Jọja lẹ Emi, Mì Pà Jehovah!
“Mì pà OKLUNỌ sọn aigba homẹ, . . . dẹpẹ lẹ, po awhli lẹ po.”—PSALM 148:7, 12.
1, 2. (a) Alọhẹndotenamẹ tẹlẹ wẹ jọja susu yọnẹn ganji? (b) Naegbọn jọja lẹ ma dona gblehomẹ na dogbó he mẹjitọ yetọn lẹ dena yé lẹ wutu?
JỌJA lẹ nọ saba yọ́n nuhe dotẹnmẹ ma ko yin nina yé nado wà lẹ ganji. Susu yetọn sọgan dọna we owhe he yé dona tindo whẹpo dotẹnmẹ na yin nina yé nado dasá ali na yede kavi nọ̀ nukle kakajẹ ganhiho de mẹ to zánmẹ kavi kùn mọto. To whedelẹnu, jọja de sọgan mọdọ obiọ vivẹvivẹ emitọn susu wẹ nọ mọ gblọndo dopolọ yí dọ, “Nọte bo whẹ́n pẹẹde dogọ.”
2 Mì jọja lẹ yọnẹn dọ to pọndohlan mẹjitọ mìtọn lẹ tọn mẹ, nuyọnẹnnu wẹ e yin nado de dogbó enẹlẹ na mì, vlavo nado basi hihọ́na mì. Na jide tọn, mì sọ yọnẹn ga dọ homẹ Jehovah tọn nọ hùn eyin mì setonuna mẹjitọ mìtọn lẹ. (Kọlọsinu lẹ 3:20) Ṣigba, be mì nọ lẹndọ alọhẹndotenamẹ ehelẹ zọ́n bọ gbẹzan mìtọn ma tlẹ ko bẹjẹeji wẹ ya? Be nuhe yin nujọnu lẹpo wẹ glo mì kakajẹ whenue mì na whẹ́n mẹho ya? Lalo pete wẹ e na yin nado lẹnmọ! Azọ́n de to yìyì to alọnu to egbehe he họakuẹ taun hú lẹblanulọkẹyi devo depope he mì sọgan to tenọpọn. Be mì jọja lẹ yin dotẹnmẹna nado tindo mahẹ to azọ́n ehe mẹ ya? Gbau, podọ Jiwheyẹwhe Gigogán lọsu na ede wẹ to oylọ-basina mì nado wàmọ!
3. Azọ́n vonọtaun tẹwẹ Jehovah basi oylọna jọja lẹ nado wà, podọ kanbiọ tẹlẹ wẹ mí na gbadopọnna todin?
3 Azọ́n tẹ hodọ wẹ mí te? Doayi hogbe wefọ he ji hosọ ehe sinai do tọn lẹ go dọmọ: “Mì pà OKLUNỌ sọn aigba homẹ, . . . dẹpẹ lẹ, po awhli lẹ po, yọnhonọ lẹ, po yọpọ lẹ po.” (Psalm 148:7, 12) Lẹblanulọkẹyi daho he mì sọgan tindo lọ yin nùzindeji tofi: Mì sọgan pà Jehovah. Taidi jọja de, be homẹ towe nọ hùn nado tindo mahẹ to azọ́n enẹ mẹ ya? Numọtolanmẹ he mẹsusu tindo niyẹn. Nado mọ nuhewutu numọtolanmẹ mọnkọtọn tintindo do sọgbe, mì gbọ mí ni gbadopọnna kanbiọ atọ̀n. Tintan, naegbọn hiẹ dona pà Jehovah? Awetọ, nawẹ a sọgan pà ẹ po kọdetọn dagbe po gbọn? Atọ̀ntọ, whetẹnu wẹ yin ojlẹ dagbe lọ nado bẹ Jehovah pipà jẹeji?
Naegbọn Hiẹ Dona Pà Jehovah?
4, 5. (a) Sọgbe hẹ Psalm 148tọ lọ, ninọmẹ jiawu tẹ mẹ wẹ mí tin te? (b) Nawẹ nudida he ma nọ dọho kavi lẹnnupọn lẹ sọgan pà Jehovah gbọn?
4 Whẹwhinwhẹ́n titengbe dopo nado pà Jehovah wẹ yindọ ewọ wẹ Mẹdatọ lọ. Psalm 148tọ lọ dọ̀n ayidonugo mítọn wá nugbo ehe ji. Yí nukun homẹ tọn do pọ́n: Eyin a dọnsẹpọ pipli gbẹtọ susu tọn de he to ohàn dagbedagbe he whànmẹ de ji to pọmẹ, etẹwẹ na yin numọtolanmẹ towe? Etẹwẹ lo eyin hàngbe lọ lẹ yin hogbe he a yọnẹn nado yin nugbo lẹ, bo de linlẹn he a yọnẹn nado yin nujọnu, ayajẹnu, podọ ojlofọndotenamẹnu lẹ tọ́n? Be e na jlo we nado plọn hàngbe lọ lẹ bo kọnawudopọ hẹ yé ya? Suhugan mítọn wẹ na jlo. Eyọn, Psalm 148tọ lọ dohia dọ hiẹ tin to ninọmẹ mọnkọtọn de mẹ, yèdọ dehe tlẹ sọ jiawu hugan de. Psalm enẹ basi zẹẹmẹ pipli daho de tọn, he to Jehovah pà to pọmẹ. Ṣigba, dile hiẹ to psalm lọ hia, nude sọgan paṣa we. Etẹwẹ yin nulọ?
5 Susu pipàtọ he Psalm 148 dlẹnalọdo lẹ tọn ma sọgan dọho kavi lẹnnupọn gba. Di apajlẹ, mí hia dọ owhè, osun, sunwhlẹvu lẹ, kẹnsu, jẹhọn, osó lẹ po okọ́ta lẹ po to Jehovah pà. Nawẹ nudida he ma tindo gbọfufu ehelẹ sọgan wà onú mọnkọtọn gbọn? (Wefọ 3, 8, 9) Na nugbo tọn, yé sọgan wà ehe to aliho dopolọ he mẹ atin lẹ, nudida ohù mẹ tọn lẹ, po kanlin lẹ po nọ wàmọ te. (Wefọ 7, 9, 10) Be a ko mọ họyiyi owhè tọn whanpẹnọ de, kavi mọ bọ osun to jujuyi gbọ̀n agahomẹ he gọ́ na sunwhlẹvu lẹ ṣẹnṣẹn, kavi jaya nado mọ kanlin he to aihunda lẹ, kavi awú ko ji we nado mọ lẹdo dagbedagbe de pọ́n ya? Eyin mọwẹ, a ko “sè” ohàn pipà tọn sọn nudida lẹ dè. Nuhe Jehovah dá lẹpo nọ flinnu mí dọ ewọ wẹ Mẹdatọ ganhunupotọ lọ, podọ dọ mẹdepope ma tin to wẹkẹ lọ blebu mẹ he tindo huhlọn, nuyọnẹn, kavi owanyi sọ ewọ.—Lomunu lẹ 1:20; Osọhia 4:11.
6, 7. (a) Nudida nuyọnẹntọ tẹlẹ wẹ Psalm 148tọ lọ dohia he to Jehovah pà? (b) Naegbọn mí sọgan yin whinwhàn nado pà Jehovah? Na apajlẹ de.
6 Psalm 148tọ lọ sọ do nudida nuyọnẹntọ lẹ hia he to Jehovah pà. To wefọ 2 mẹ, mí mọ “awhànpa” olọn mẹ tọn Jehovah tọn, yèdọ angẹli lẹ, he to Jiwheyẹwhe pà. To wefọ 11 mẹ, gbẹtọ huhlọnnọ podọ nukundeji lẹ, taidi ahọlu lẹ po whẹdatọ lẹ po, yin oylọ-basina nado kọnawudopọ to pipà lọ mẹ. Eyin angẹli huhlọnnọ lẹ yí homẹhunhun do to Jehovah pà, gbẹtọvi tata tẹwẹ sọgan gbọn jlọjẹ dali dọ dọ emi ko yiaga gbau nado wàmọ? To enẹgodo, to wefọ 12 po 13 po mẹ, mì jọja lẹ yin oylọ-basina nado kọnawudopọ bo pà Jehovah ga. Be hiẹ yin whinwhàn nado wàmọ ya?
7 Lẹnnupọndo apajlẹ ehe ji. Eyin a tindo họntọn vivẹ de he tindo nugopipe vonọtaun de—vlavo to aihundida lanmẹyiya tọn, anazọ́n, kavi húnhiho mẹ—be a na dọho etọn na whẹndo towe po họntọn towe devo lẹ po ya? Matin ayihaawe hiẹ na wàmọ. Eyọn, nupinplọn dogbọn nuhe Jehovah ko wà lẹpo dali sọgan yinuwado mí ji to aliho dopolọ mẹ. Di dohia, Psalm 19:1, 2 dọ dọ sunwhlẹvu olọn tọn lẹ nọ hẹn “ohó túntún jẹgbonu.” Na nuhe dù míwlẹ, eyin mí lẹnnupọndo onú jiawu he Jehovah ko wà lẹ ji, mí ma sọgan nọma dọhona mẹdevo lẹ gando Jiwheyẹwhe mítọn go.
8, 9. Whẹwhinwhẹ́n tẹlẹ wutu wẹ Jehovah jlo dọ mí ni nọ pà emi?
8 Whẹwhinwhẹ́n titengbe devo nado pà Jehovah wẹ yindọ ewọ jlo dọ mí ni wàmọ. Etẹwutu? Be e tindo nuhudo pipà tọn sọn gbẹtọvi lẹ dè wutu wẹ ya? Lala. Mí gbẹtọvi lẹ sọgan nọ tindo nuhudo pipà tọn to whedelẹnu, ṣigba Jehovah yiaga hú mí tlala. (Isaia 55:8) E ma tindo ayihaawe depope gando edetiti kavi jẹhẹnu etọn lẹ go gba. (Isaia 45:5) Etomọṣo, e jlo dọ mí ni nọ pà emi podọ homẹ etọn nọ hùn eyin mí wàmọ. Etẹwutu? Lẹnnupọndo whẹwhinwhẹ́n awe ji. Tintan, e yọnẹn dọ mí tindo nuhudo nado pà emi. E dá mí po nuhudo gbigbọmẹ tọn de po, yèdọ nuhudo sinsẹ̀n-bibasi tọn. (Matiu 5:3) Eyin Jehovah mọdọ mí to pekọhẹnwana nuhudo enẹ, homẹ etọn nọ hùn, kẹdẹdile homẹ mẹjitọ towe lẹ tọn nọ hùn nado mọdọ a to núdùdù he yé yọnẹn dọ e na wà dagbe na we lẹ dù do.—Johanu 4:34.
9 Awetọ, Jehovah yọnẹn dọ mẹdevo lẹ tindo nuhudo nado sè pipà emitọn sọn mí dè. Apọsteli Paulu wlan hogbe helẹ hlan sunnu jọja Timoti dọmọ: “Payi dewe po mẹpinplọn towe po go; nọ nọte to yé mẹ; na ehe wiwà mẹ hiẹ na whlẹn dewe, po yé he to ohó towe sè lẹ po.” (1 Timoti 4:16) Mọwẹ, eyin a nọ plọnnu mẹdevo lẹ dogbọn Jehovah Jiwheyẹwhe dali, bo nọ pà ẹ, yelọsu sọgan plọn nado yọ́n Jehovah ga. Oyọnẹn mọnkọtọn sọgan dekọtọn do whlẹngán mavọmavọ mẹ na yé!—Johanu 17:3.
10. Naegbọn mí nọ yin whinwhàn nado pà Jiwheyẹwhe mítọn?
10 Ṣigba whẹwhinwhẹ́n devo sọ tin nado pà Jehovah. Flin apajlẹ he yin nina dai gando họntọn nugopetọ towe lọ go. Eyin a sè bọ mẹdevo lẹ to lalodo dokọna ẹn, bo to yinkọ dagbe etọn hẹngble, be a ma na magbe dogọ nado pà ẹ ya? Eyọn, mẹsusu wẹ to yinkọ Jehovah tọn hẹngble to aihọn ehe mẹ. (Johanu 8:44; Osọhia 12:9) Enẹwutu, mẹhe yiwanna ẹn lẹ nọ yin whinwhàn nado dọ nugbo gando ewọ go, bo jla linlin agọ̀ lọ lẹ do. Be hiẹ lọsu na jlo nado do owanyi po pinpẹn-nutọn-yinyọnẹn towe po hia Jehovah bo dohia dọ ewọ wẹ a kẹalọyi taidi Gandutọ kakati nido yin kẹntọgán etọn Satani ya? Hiẹ sọgan wà enẹ lẹpo gbọn Jehovah pipà dali. Todin, kanbiọ he bọdego lọ wẹ yindọ, nawẹ a sọgan wà ehe gbọn?
Lehe Jọja Delẹ Pà Jehovah Gbọn
11. Apajlẹ Biblu tọn tẹlẹ wẹ dohia dọ jọja lẹ sọgan tindo kọdetọn dagbe taun to Jehovah pipà mẹ?
11 Biblu dohia dọ jọja lẹ nọ saba tindo kọdetọn dagbe taun to Jehovah pipà mẹ. Di apajlẹ, viyọnnu Islaelivi de tin he yin hinhẹn yì kanlinmọgbenu gbọn Silianu lẹ dali. E yí adọgbigbo do dekunnuna mẹmẹnu etọn gando yẹwhegán Jehovah tọn Eliṣa go. Nuhe e dọ lẹ wá dekọtọn do azọ́njiawu de mẹ, bọ kunnudenu huhlọnnọ de yin nina. (2 Ahọlu lẹ 5:1-17) Jesu lọsu dekunnu po adọgbigbo po to ovu-whenu. To nujijọ jọja-whenu etọn tọn lẹpo he sọgan ko yin kinkàndai to Owe-wiwe mẹ, Jehovah de dopo, enẹ wẹ nuhe jọ to whenuena Jesu, to owhe 12-mẹvi-yinyin mẹ, yí adọgbigbo do kanhose sinsẹ̀n-nuplọnmẹtọ lẹ to tẹmpli mẹ to Jelusalẹm bọ nukunnumọjẹnumẹ etọn gando aliho Jehovah tọn lẹ go hẹn avò vò yé tlala.—Luku 2:46-49.
12, 13. (a) Etẹwẹ Jesu wà to tẹmpli mẹ ojlẹ vude jẹnukọnna okú etọn, podọ nawẹ ehe yinuwado mẹhe tin to finẹ lẹ ji gbọn? (b) Nawẹ Jesu yinuwa hlan pipà he yọpọvu lẹ na gbọn?
12 Taidi sunnu mẹho de, Jesu sọ na tuli ovi lẹ nado pà Jehovah. Di apajlẹ, azán vude poun jẹnukọnna okú etọn, Jesu yí whenu zan to tẹmpli mẹ to Jelusalẹm. Biblu dọ dọ e wà “onú jiawu lẹ” to finẹ. E yàn mẹhe diọ fiwiwe enẹ zun odò ajotọ tọn lẹ jẹgbonu. E sọ hẹnazọ̀ngbọna nukuntọ́nnọ lẹ po sẹkunọ lẹ po. Mẹhe tin to finẹ lẹpo, titengbe sinsẹ̀ngán lẹ, dona ko yin whinwhàn nado pà Jehovah po Ovi etọn, Mẹssia lọ po. Ṣigba, e blawu dọ to azán enẹlẹ gbè mẹsusu ma na pipà mọnkọtọn lẹ gba. Yé yọnẹn dọ Jesu yin didohlan gbọn Jiwheyẹwhe dali, ṣigba yé dibusi sinsẹ̀ngán lẹ. Ṣogan, pipli de dọho jẹgbonu po adọgbigbo po. Be a yọ́n mẹhe wàmọ lẹ ya? Biblu dọmọ: “Whenuena ogán yẹwhenọ lẹ tọn, po wekantọ lẹ po mọ onú jiawu lẹ he [Jesu] basi, bọ yọpọvu lẹ to awhádo to tẹmpli mẹ dọ Hosana hlan Visunnu Davidi tọn; e gblehomẹna yé susu, yé sọ dọhlan [Jesu] dọmọ, Hiẹ sè nuhe omẹ helẹ to didọ?”—Matiu 21:15, 16; Johanu 12:42.
13 Yẹwhenọ enẹlẹ to nukundo dọ Jesu na bọnùdo na yọpọvu he to pipà ẹ lẹ. Be ewọ wàmọ ya? Paali! Jesu gblọnna yẹwhenọ lọ lẹ dọmọ: “Mọwẹ: mìwlẹ ma ko hia gbede, dọ, Sọn onù yọpọvu lẹ tọn mẹ, podọ sọn ovi he to anọ́nù lẹ tọn mẹ wẹ hiẹ ko hẹn pipà sọgbe te?” Na nugbo tọn, Jesu po Otọ́ etọn po hùnhomẹ do pipà yọpọvu lọ lẹ tọn go. Ovi enẹlẹ to wiwà nuhe mẹho he to finẹ lẹpo dona ko wà. To ayiha yọpọvu tọn yetọn mẹ, onú ehe lẹpo sọgan ko taidi nuhe họnwun gblegede. Yé mọ bọ dawe ehe wà onú jiawu lẹ, yí adọgbigbo po yise po do dọho, bo do owanyi zogbe hia hlan Jiwheyẹwhe po omẹ etọn lẹ po. Mẹhe e sọalọakọ́n dọ emi yin lọ wẹ e yin nugbonugbo—yèdọ “Visunnu Davidi tọn,” Mẹssia dopagbe lọ. Yọpọvu enẹlẹ yin didona na yise yetọn wutu, bo tlẹ tindo lẹblanulọkẹyi lọ nado hẹn dọdai de di.—Psalm 8:2.
14. Nawẹ nunina he jọja lẹ tindo hẹn yé pegan nado pà Jiwheyẹwhe gbọn?
14 Etẹwẹ mí sọgan plọn sọn apajlẹ ehelẹ mẹ? Mí plọn dọ jọja lẹ sọgan yin kọdetọn dagbenọ taun to Jehovah pipà mẹ. Yé nọ saba tindo nunina lọ nado mọ nugbo to aliho he họnwun bo bọawu mẹ, bosọ nọ yí jejejininọ po zohunhun po do do yise yetọn hia. Yé sọ tindo nunina he yin nùdego to Howhinwhẹn lẹ 20:29 mẹ dọmọ: “Gigo dẹpẹ lẹ tọn wẹ huhlọn yetọn.” Mọwẹ, mì jọja lẹ tindo huhlọn po zohunhun po, ehe yin nujọnu taun to Jehovah pipà mẹ. Na taun tọn, nawẹ mì sọgan yí nunina mọnkọtọn lẹ zan ganji gbọn?
Nawẹ Hiẹ Sọgan Pà Jehovah Gbọn?
15. Mẹwhinwhàn tẹwẹ yin dandannu nado pà Jehovah po kọdetọn dagbe po?
15 Eyin mẹde na na pipà po kọdetọn dagbe po, ahun mẹ wẹ e nọ bẹjẹeji sọn. Hiẹ ma sọgan pà Jehovah po kọdetọn dagbe po eyin a to ehe wà kiki na mẹdevo lẹ jlo dọ a ni wàmọ poun wutu gba. Flindọ, dehe klohugan to gbedide lẹpo mẹ wẹ yindọ: “Hiẹ na yí ayiha towe lẹpo, podọ alindọn towe lẹpo po nuyọnẹn towe lẹpo po do yiwanna [Jehovah] Jiwheyẹwhe towe.” (Matiu 22:37) Be a ko plọn nado yọ́n Jehovah gbọn Ohó etọn pinplọn na dewe dali ya? Na nugbo tọn, nupinplọn mọnkọtọn nọ hẹnmẹ tindo owanyi na Jehovah. Aliho jọwamọ tọn lọ nado do owanyi enẹ hia wẹ nado pà ẹ. Eyin mẹwhinwhàn towe họnwun bo lodo, be a ko wleawufo nado pà Jehovah po zohunhun po.
16, 17. Adà tẹwẹ walọ mítọn nọ yiwà to Jehovah pipà mẹ? Na apajlẹ de.
16 Todin, whẹpo hiẹ na tlẹ do lẹnnupọndo nuhe a na dọ ji, lẹnnupọndo lehe a na yinuwa do ji. Eyin viyọnnu Islaelivi azán Eliṣa tọn gbè tọn enẹ ko yin hábamẹtọ, mẹmasitọ, kavi nugbomadọtọ to paa mẹ dai wẹ, be a lẹndọ Silianu he wle e lẹ na ko dotoaina ohó etọn gando yẹwhegán Jehovah tọn go ya? Vlavo yé ma na ko wàmọ. Mọdopolọ, gbẹtọ lẹ na nọ saba dotoaina we hugan eyin yé mọdọ a tindo sisi, bo yin nugbodọtọ, podọ walọ dagbenọ. (Lomunu lẹ 2:21) Apajlẹ dopo die.
17 To Portugal, viyọnnu owhe 11-mẹvi de pehẹ kọgbidinamẹ to wehọmẹ nado basi hùnwhẹ he ayihadawhẹnamẹnu etọn he yin pinplọn gbọn Biblu dali ma kẹalọyi lẹ. Po sisi po, e basi zẹẹmẹ nuhewutu e ma sọgan yigbe tọn na mẹplọntọ etọn yọnnu, ṣigba mẹplọntọ lọ ṣàn ẹn kò. Dile ojlẹ to yìyì, mẹplọntọ lọ tẹnpọn whlasusu nado dowinyan ẹn, bo nọ yí sinsẹ̀n etọn do davlẹ. Ṣigba, viyọnnu jọja lọ hẹn walọ sisi tọn etọn go. To owhe lẹ godo, mẹmẹyọnnu jọja enẹ to devizọnwa taidi gbehosọnalitọ whepoponu tọn, lizọnyizọnwatọ whenu-gigọ́ tọn de. To plidopọ de ji, dile e to baptẹm-yitọ lẹ pọ́n, e yọ́n dopo to yé mẹ. Mẹplọntọ etọn dai tọn lọ wẹ! To yedelẹ gbigbofán po dasin po godo, mẹplọntọ lọ basi zẹẹmẹ na mẹmẹyọnnu jọja lọ dọ emi ma wọ̀n walọ sisi tọn etọn gbede. Kunnudetọ de ko dla mẹplọntọ lọ pọ́n, bọ ewọ ko dọho dogbọn walọ wehọmẹvi etọn hoho lọ tọn dali. Taidi kọdetọn de, plọnmẹ Biblu de bẹjẹeji bọ yọnnu ehe kẹalọyi nugbo Biblu tọn. Mọwẹ, walọ towe sọgan yin aliho huhlọnnọ de nado pà Jehovah!
18. Etẹwẹ jọja de sọgan wà eyin e nọ whleawu nado bẹ hodọdopọ lẹ jẹeji sinai do Biblu po Jehovah Jiwheyẹwhe po ji?
18 Be e nọ vẹawuna we to whedelẹnu nado bẹ hodọdopọ lẹ jẹeji do yise towe ji to wehọmẹ wẹ ya? E ma yin hiẹ kẹdẹ wẹ enẹ nọ wà gba. Ṣigba, a sọgan kànayiha bọ mẹdevo lẹ na nọ kanhose we do yise towe ji. Di apajlẹ, eyin e sọgbe hẹ osẹ́n bosọ yin alọkẹyi nado wàmọ, naegbọn hiẹ ma na nọ hẹn owe sinai do Biblu ji lẹ bo nọ hia yé to núdùdù-whenu kavi to ojlẹ devo he mẹ dotẹnmẹ yin nina nado wàmọ te lẹ? Wehọmẹvigbẹ́ towe lẹ sọgan kanhose we gando nuhe hia a te go. Eyin a na gblọndo yé bo dọ nuhe a yiwanna to hosọ kavi owe he hia a te lọ mẹ na yé, a sọgan mọdọ bleun dopo janwẹ hodọdopọ dagbe de nọ bẹjẹeji. Flin nado nọ kàn kanbiọ lẹ sè, nado yọ́n nuhe wehọmẹvigbẹ́ towe lẹ yise. Nọ dotoai po sisi po, bo nọ má nuhe a ko plọn sọn Biblu mẹ lẹ hẹ yé. Dile numimọ he tin to weda 29 ji lẹ dohia do, jọja susu wẹ to gigopana Jiwheyẹwhe to wehọmẹ. Ehe nọ hẹn ayajẹ daho wá na yé bo nọ gọalọna mẹsusu nado yọ́n Jehovah.
19. Nawẹ jọja lẹ sọgan lẹzun kọdetọn dagbenọ dogọ to lizọnyizọn họndekọn-jẹ-họndekọn tọn mẹ gbọn?
19 Lizọnyizọn họndekọn-jẹ-họndekọn tọn wẹ yin aliho kọdetọn dagbenọ hugan lọ nado pà Jehovah. Eyin hiẹ ma ko to mahẹ tindo to e mẹ, naegbọn a ma na yí ehe do basi yanwle towe? Eyin hiẹ ko to mahẹ tindo, be yanwle devo lẹ tin he a sọgan zedonukọnna dewe ya? Di apajlẹ, kakati nado nọ dọ nudopolọ to ohọ̀n dopodopo kọ̀n, dín aliho lẹ nado hẹn nuzedonukọnnamẹ towe pọnte, gbọn ayinamẹ yọn-na-yizan lẹ kinkanse mẹjitọ towe lẹ po numimọnọ devo lẹ po dali. Plọn nado nọ yí Biblu zan dogọ, nado nọ basi gọyìpọn kọdetọn dagbenọ lẹ, podọ nado bẹ plọnmẹ Biblu de jẹeji. (1 Timoti 4:15) Eyin a nọ pà Jehovah to aliho ehelẹ mẹ ganji, a na lẹzun kọdetọn dagbenọ dogọ, bo nasọ duvivi lizọnyizọn towe tọn dogọ.
Whetẹnu Wẹ Hiẹ Dona Bẹ Jehovah Pipà Jẹeji?
20. Naegbọn jọja lẹ ma dona nọ lẹndọ emi whè gbau nado pà Jehovah?
20 To kanbiọ atọ̀n hodọdopọ ehe tọn lẹ mẹ, gblọndo dehe gbọngodo lọ tọn wẹ bọawu hugan. Biblu na gblọndo lọ tlọlọ dọmọ: “Flin Mẹdatọ towe to azán ovu-whenu towe tọn.” (Yẹwhehodọtọ 12:1) Mọwẹ, din wẹ ojlẹ lọ nado bẹ Jehovah pipà jẹeji. E bọawu taun nado dọ dọ: “N’ko whè gbau nado pà Jehovah. N’ma tlẹ yọ́n nude. N’dona nọte bo whẹ́n pẹẹde dogọ.” E ma na yin hiẹ wẹ yin omẹ tintan he lẹnmọ gba. Di apajlẹ, jọja Jẹlemia dọna Jehovah dọmọ: “Jé, Oklunọ JIWHEYẸWHE! Doayi e go, yẹn ma sọgan dọho: na yẹn yin yọpọvu wutu.” Jehovah vọ́ jide na ẹn dọ whẹwhinwhẹ́n depope ma tin nado dibu. (Jẹlemia 1:6, 7) Mọdopolọ, nudepope ma dona dobuna mí eyin mí to Jehovah pà. Awugble depope ma sọgan wá mí ji he Jehovah ma sọgan desẹ.—Psalm 118:6.
21, 22. Naegbọn jọja he to Jehovah pà lẹ yin yiyijlẹdo ahún go, podọ naegbọn nuyijlẹdonugo enẹ do yin tulinamẹnu?
21 Enẹwutu, mí to tudohomẹna mì jọja lẹ dọmọ: Mì ma whleawu nado pà Jehovah blo! Todin he mì gbẹ́ yin jọja, ojlẹ dagbe hugan lọ die nado tindo mahẹ to azọ́n titengbe hugan he to yinyin wiwà to aigba ji to egbehe mẹ. Eyin mì wàmọ, mì na lẹzun apadewhe onú jiawu de tọn—enẹ wẹ whẹndo olọn po aigba po tọn he bẹ mẹhe to Jehovah pà lẹ hẹn. Homẹ Jehovah tọn nọ hùn nado mọdọ mì tin to whẹndo ehe mẹ. Doayi nuhe psalm-kantọ lọ dọna Jehovah to gbọdo glọ lẹ go dọmọ: “Gbẹtọ towe lẹ na yin ojlonọ to azán huhlọn towe tọn gbè; to whanpẹ walọ wiwe tọn mẹ, sọn adọ̀ afọnnu fuu tọn mẹ; Hiẹ tindo ahún ovu-whenu towe tọn.”—Psalm 110:3.
22 Ahún fifá he to sisẹ́ to hinhọ́n afọnnu tọn mẹ lẹ nọ yọ́npọ́n taun, kavi e ma yin mọwẹ? Yé nọ miọnawunamẹ, bo nọ to kinkọ́n, bo masọ nọ yọ́n hia na yé sù zẹjlẹgo wutu. Nukun he Jehovah nọ yí do pọ́n mì jọja he to pipà ẹ po nugbonọ-yinyin po to ojlẹ awusinyẹn tọn ehelẹ mẹ niyẹn. Na nugbo tọn, nudide he mì basi nado pà Jehovah nọ hẹn homẹ etọn hùn. (Howhinwhẹn lẹ 27:11) Enẹwutu, jọja lẹ emi, mì dovivẹnu lẹpo nado pà Jehovah!
Nawẹ Hiẹ Na Na Gblọndo Gbọn?
• Etẹwẹ yin whẹwhinwhẹ́n titengbe delẹ nado pà Jehovah?
• Apajlẹ Biblu tọn tẹlẹ wẹ dohia dọ jọja lẹ sọgan tindo kọdetọn dagbe taun to Jehovah pipà mẹ?
• Nawẹ jọja lẹ sọgan pà Jehovah gbọn to egbehe?
• Whetẹnu wẹ jọja lẹ dona bẹ Jehovah pipà jẹeji, podọ etẹwutu?
[Yẹdide lẹ to weda 25]
Eyin họntọn towe tindo nugopipe vonọtaun de, be a ma na dọ ehe na mẹdevo lẹ ya?
[Yẹdide to weda 27]
Wehọmẹvigbẹ́ towe lẹ sọgan tindo ojlo to nuyise towe lẹ mẹ
[Yẹdide to weda 28]
Eyin a jlo na hẹn lizọnyizọn towe pọnte dogọ, kàn ayinamẹ sè Kunnudetọ numimọnọ de