Anademẹ sọn Jiwheyẹwhe dè Na Alọwlemẹ de Dide
“Yẹn na plọn we, yẹn nasọ yí afọ towe do ali he ji hiẹ na gbọn: yẹn na yí nukun ṣie do dewe hẹ we.”—PSALM 32:8.
1. Etẹlẹ wẹ yin dandannu na alọwle kọdetọn dagbenọ de?
HÚNHOTỌ lẹ jẹ ohún yetọn lẹ hò ji. Hànjitọ lọ gbọn azọ́nyinyọnẹn dali jẹ ohàn jì ji po ogbè vivi etọn po. Kọdetọn lọ yin húnhiho he vivi nado sè de. Sunnu awe to pali pinpẹn lẹ dè sọn agbànbẹhun daho de mẹ. Mẹdopo nọ yìn pali lẹ hlan awetọ etọn mẹhe nọ wún yé po awubibọ tlala po bosọ nọ nọtepọn devo. Nuwiwa awe lọ lẹ taidi nuhe ma sinyẹnawu depope. Ṣogan, mẹnu wẹ na tlẹ jlo nado tẹ́n yé pọ́n matin azọ́npinplọn, azọ́nwatọgbẹ́ nugopetọ de, podọ na taun tọn wunmẹ anademẹ he sọgbe tọn. Mọdopolọ, alọwle dagbe de sọgan taidi nuhe nọ wá aimẹ po kosọ po. Ṣigba, enẹ lọsu sinai do alọwlemẹ dagbe de ji, vivẹnudido pọmẹ tọn ji, podọ na taun tọn ayinamẹ nuyọnẹn tọn ji. Na nugbo tọn, anademẹ he sọgbe yin dandannu de.
2. (a) Mẹnu wẹ ze tito alọwle tọn dai, podọ na lẹndai tẹ? (b) Nawẹ alọwle delẹ ko yin titobasina gbọn?
2 Jọwamọnu de wẹ e yin na jọja sunnu kavi yọnnu he ma ko wlealọ de nado lẹnnupọndo alọwlemẹ de ji—yèdọ gbẹdohẹmẹtọ de na pipòtọ gbẹzan tọn. Sọn whenue gbọ́n e ko yin zizedai gbọn Jehovah Jiwheyẹwhe dali, alọwle sunnu po yọnnu po tọn ko yin aliho he sọgbe gbẹzan tọn de. Ṣigba sunnu tintan, Adam, ma dè asi na ede gba. Jehovah gbọn owanyi dali wleawu yọnnu tọn na ẹn. (Gẹnẹsisi 2:18-24) Asu po asi po tintan dona jìgbà na gbẹtọvi lẹ nido gọ́ aigba ji to godo mẹ. To kọndopọ tintan enẹ godo, tito alọwle tọn lẹ nọ saba yin bibasi gbọn mẹjitọ asi po asu yọyọ lọ tọn lẹ po dali, to whedelẹnu to whenuena yè ko mọ gbeyiyi mẹhe e bẹhẹn lẹpo tọn yí godo. (Gẹnẹsisi 21:21; 24:2-4, 58; 38:6; Jọṣua 15:16, 17) Dile etlẹ yindọ alọwle he mẹdevo basi tito etọn lẹ gbẹsọ gbayipe to aigba po aṣa delẹ po mẹ do sọ, mẹsusu nọ de alọwlemẹ na yedetiti to egbehe.
3. Nawẹ alọwlemẹ de dona yin dide gbọn?
3 Nawẹ alọwlemẹ de dona yin dide gbọn? Mẹdelẹ nọ yin nuyiwadeji gbọn awusọhia gbonu tọn dali—yèdọ nuhe yé mọdọ e dọnmẹdogo bosọ yọ́npọ́n lẹ. Mẹdevo lẹ nọ pọ́n alemọyi agbasanu tọn lẹ, yèdọ mẹde he na penukundo yé go ganji bo na penukundo nuhudo po nujlomẹ yetọn lẹ po go. Ṣigba be depope to onú awe ehelẹ kẹdẹ mẹ sọgan dekọtọn do haṣinṣan ayajẹ po pekọ tọn de po mẹ ya? ‘Nukunmẹ dagbe sọgan yin oklọ, podọ whanpẹ sọ sọgan yin ovọ́,’ wẹ Howhinwhẹn lẹ 31:30 dọ, ‘ṣigba yọnnu he dibusi Jehovah wẹ nọ hẹn gigo wá na ede.’ Podọ enẹ mẹ wẹ nuagokun titengbe de tin te: Yí Jehovah do lẹnpọn mẹ to whenuena hiẹ to alọwlemẹ de na dè.
Anademẹ Owanyinọ sọn Jiwheyẹwhe Dè
4. Alọgọ tẹwẹ Jiwheyẹwhe wleawuna gando alọwlemẹ de dide go?
4 Otọ́ owanyinọ olọn mẹ tọn mítọn, Jehovah, ko wleawuna Ohó kandai etọn nado deanana mí to whẹho lẹpo mẹ. E dọmọ: “Yẹn wẹ OKLUNỌ Jiwheyẹwhe towe, he plọn we na ale, he plan we gbọn aliho he ji hiẹ na gbọ̀n.” (Isaia 48:17) To whelọnu lo, e ma yin nupaṣamẹ gba nado mọ anademẹnu dẹn-to-aimẹ lẹ to Biblu mẹ he yọn-na-yizan na alọwlemẹ de dide. Jehovah jlo dọ alọwle mítọn lẹ ni dẹn-to-aimẹ bosọ yin ayajẹ tọn. Enẹwutu, e ko wleawu alọgọ tọn na mí nado mọnukunnujẹ bosọ yí anademẹnu ehelẹ do yizan mẹ. Be e mayin nuhe mí na donukun sọn Mẹdatọ owanyinọ mítọn dè niyẹn ya?—Psalm 19:8.
5. Etẹwẹ yin nujọnu na ayajẹ dẹn-to-aimẹ to alọwle mẹ?
5 To whenuena Jehovah ze tito alọwle tọn dai, linlẹn etọn wẹ yindọ e ni yin kọndopọ tẹgbẹ̀ tọn de. (Malku 10:6-12; 1 Kọlintinu lẹ 7:10, 11) Enẹwutu wẹ ‘ewọ do gbẹwanna gbẹdai,’ bo dike e ni nọ yin bibasi to dodonu “ogalilọ” tọn kẹdẹ ji. (Malaki 2:13-16; Matiu 19:9) Enẹwutu, alọwlemẹ de dide yin dopo to afọdide nujọnu tọn hugan he mí sọgan ze lẹ mẹ podọ yè ma dona yí nukun pẹvi do pọ́n ẹn gba. Nudide ṣinṣinyan wẹ tin he tindo yọnbasi lọ nado hẹn ayajẹ kavi awubla wá taidi alọwle. Dile nudide dagbe de sọgan hẹn ayajẹ wá gbẹzan mẹde tọn mẹ bosọ hẹn ẹn yin pekọnọ do, nudide he ma tindo nuyọnẹn de sọgan hẹn awubla tẹgbẹ̀ tọn wá. (Howhinwhẹn lẹ 21:19; 26:21) Na ayajẹ nido sọgan zindonukọn, nujọnu wẹ e yin nado yí nuyọnẹn do basi nudide podọ nado tindo ojlo nado basi gbemima dẹn-to-aimẹ de, na Jiwheyẹwhe ze alọwle dai taidi gbẹdido he nọ vùn do kọndopọ po gbekọndopọ po ji de wutu.—Matiu 19:6.
6. Naegbọn jọja sunnu po yọnnu lẹ po dona yin sọwhiwhenọ taun to whenuena yé to alọwlemẹ de na dè, podọ nawẹ yé sọgan basi nudide heyin nuyọnẹn tọn hugan gbọn?
6 Na taun tọn jọja sunnu po yọnnu po lẹ dona whesọ na whanpẹ agbasa tọn po numọtolanmẹ sinsinyẹn lẹ po ni ma do slokọna wuntuntun yetọn to whenuena yé to alọwlemẹ de na dè. Na nugbo tọn, kọndopọ heyin zize sinai do whẹwhinwhẹ́n mọnkọtọn lẹ kẹdẹ ji sọgan gblezọn biọ wangbẹna mẹ to awuyiya mẹ. (2 Samuẹli 13:15) To alọ devo mẹ, owanyi tẹgbẹ̀ tọn sọgan yin awuwlena dile mí wá yọ́n alọwlemẹ mítọn ganji podọ dile mí wá mọnukunnujẹ mídelẹ mẹ ganji. Mí sọ dona yọnẹn ga dọ nuhe yọ́n hugan na mí sọgan gọ̀n ma yin nuhe ahun mítọn nọ jlo to tintan whenu. (Jẹlemia 17:9) Enẹwẹ zọ́n bọ anademẹ sọn olọn mẹ wá heyin mimọ to Biblu mẹ do yin nujọnu taun. E nọ gọalọna mí nado yọ́n lehe mí sọgan basi nudide nuyọnẹn tọn lẹ to gbẹ̀mẹ do. Psalm-kàntọ lọ ze afọ Jehovah tọn dai to didọ mẹ dọmọ: “Yẹn na plọn we, yẹn nasọ yí afọ towe do ali he ji hiẹ na gbọn: yẹn na yí nukun ṣie do dewe hẹ we.” (Psalm 32:8; Heblu lẹ 4:12) Dile etlẹ yindọ alọwle sọgan hẹn pekọwana nuhudo jọwamọ tọn mítọn na owanyi po gbẹdohẹmẹ po, e sọ nọ ze avùnnukundiọsọmẹnu he nọ biọ whinwhẹ́n po wuntuntun po lẹ donukọnnamẹ.
7. Naegbọn mẹdelẹ ma nọ kẹalọyi ayinamẹ sinai do Biblu ji he gando alọwlemẹ de dide go, ṣogan etẹ mẹ wẹ aliho nuyiwa tọn ehe sọgan dekọtọn do?
7 Nuyiwa nuyọnẹn tọn wẹ e yin nado setonuna nuhe Dowatọ alọwle tọn tindo nado dọ do whẹho alọwlemẹ de dide tọn ji. Ṣogan, mí sọgan gbẹ́ mlẹnmlẹn to whenuena ayinamẹ sinai do Biblu ji de yin mimọyi sọn mẹjitọ kavi Klistiani mẹho lẹ dè. Mí sọgan lẹndọ yé ma mọnukunnujẹ mí mẹ to gigọ́mẹ, bọ ojlo sinsinyẹn numọtolanmẹ tọn lẹ sọgan sisẹ́ mí nado hodo ayilinlẹn ahun tọn. Ṣigba, dile mí wá pannukọn nugbo lọ, e sọgan vẹna mí dọ mí ma ko setonuna ayinamẹ nuyọnẹn tọn heyin nina na alemọyi mítọn. (Howhinwhẹn lẹ 23:19; 28:26) Mí sọgan mọ mídelẹ to alọwle he ma tindo owanyi de mẹ, po ovi he e sinyẹnawu na mí nado penukundego lẹ po podọ vlavo etlẹ yin hẹ alọwlemẹ mayisenọ de. Lehe e na blawu sọ eyin tito de he sọgan ko hẹn ayajẹ daho wá na mí wá lẹzun asisa ayimajai susu tọn do sọ!
Mẹdezejo Jijọ-Di-Jiwheyẹwhe Tọn—Họ̀nhungàn Titengbe De
8. Nawẹ mẹdezejo jijọ-di-Jiwheyẹwhe tọn nọ gọalọna alọwle de nado dẹn-to-aimẹ bosọ hẹn ayajẹ wá gbọn?
8 Nugbo wẹ dọ, awusọhia mẹdọndogo ode awetọ tọn nọ gọalọ nado hẹn alọwle de lodo. Ṣigba jẹhẹnu họakuẹ he yè tindo to kọndopọmẹ lẹ tlẹ sọ yin nujọnu hugan na kọndopọ alọwle tọn de nado dẹn-to-aimẹ bo hẹn ayajẹ wá. Mẹdezejo pọmẹ tọn hlan Jehovah Jiwheyẹwhe nọ wleawuna kọndopọ dẹn-to-aimẹ de bosọ nọ ze pọninọ daga to aliho he onú devo depope ma sọgan wàmọ te. (Yẹwhehodọtọ 4:12) To whenuena Klistiani asu po asi po de ze gbẹzan yetọn lẹ sinai do sinsẹ̀n-bibasi nugbo Jehovah tọn ji, yé nọ yin kinkọndopọ to gbigbọ-liho, to apọ̀nmẹ, podọ to walọyizan-liho. Yé nọ plọn Ohó Jiwheyẹwhe tọn dopọ. Yé nọ hodẹ̀ dopọ, podọ enẹ nọ kọ̀n ahun yetọn lẹ dopọ. Yé nọ zọnpọ yì opli Klistiani tọn lẹ bo nọ wazọ́n dopọ to lizọnyizọn kunnudegbe tọn mẹ. Ehe lẹpo nọ gọalọ nado wleawuna kọndopọ gbigbọmẹ tọn de he nọ dọ̀n yé sẹpọ yedelẹ pẹkipẹki. Podọ dehe tlẹ sọ yin nujọnu hugan, e nọ dekọtọn do dona Jehovah tọn mẹ.
9. Etẹwẹ Ablaham wà gando asi de mimọ na Isaki go, podọ etẹwẹ yin kọdetọn etọn?
9 Na mẹdezejo jijọ-di-Jiwheyẹwhe tọn etọn wutu, tọgbo nugbonọ Ablaham dín nado hẹn homẹ Jiwheyẹwhe tọn hùn to whenuena ojlẹ wá nado dè asi na visunnu etọn Isaki. Hlan devizọnwatọ whédo etọn tọn he go e dejido lọ, Ablaham dọmọ: “Yẹn nasọ hẹn we whlé gbọn OKLUNỌ, Jiwheyẹwhe olọn po aihọn po tọn dali, dọ hiẹ ma na mọ asi na visunnu ṣie to viyọnnu Kenani tọn lẹ mẹ, to yé mẹhe ṣẹnṣẹn yẹn to ninọ̀ lẹ mẹ gba. Ṣigba hiẹ na yì otò ṣie mẹ, podọ to hẹnnumẹ ṣie lẹ dè, bo mọ asi na Isaki visunnu ṣie. . . . [Jehovah] nasọ do angẹli etọn hlan nukọn towe, hiẹ na mọ asi sọn finẹ na visunnu ṣie.” Lebeka sọawuhia nado yin asi vonọtaun de, he Isaki yiwanna tlala.—Gẹnẹsisi 24:3, 4, 7, 14-21, 67.
10. Azọngban Owe-wiwe tọn tẹlẹ wẹ yin zizedo asu po asi po lẹ ji?
10 Eyin mí yin Klistiani he ma ko wlealọ lẹ, mẹdezejo jijọ-di-Jiwheyẹwhe tọn na gọalọna mí nado wleawuna jẹhẹnu lẹ he na hẹn mí penugo nado jẹ nubiọtomẹsi Owe-wiwe tọn lẹ na alọwle kọ̀n. To azọngban asu lẹ po asi lẹ po tọn mẹ wẹ ehelẹ heyin nùdego gbọn apọsteli Paulu dali tin te dọmọ: “Mì asi lẹ emi, mì nọ basi mẹmẹglọ hlan asu mìtọn lẹ taidi hlan Oklunọ . . . Mì asu lẹ emi, mì yiwanna asi mìtọn lẹ, yèdọ dile Klisti ga yiwanna agun lọ do, bosọ yí ede na ẹn . . . Mọkẹdẹ wẹ e jẹ na asu lẹ ni nọ yiwanna asi yetọn lẹ kẹdẹdi agbasa yede tọn. . . . Na dopodopo mìtọn ni yiwanna asi etọn domọ yèdọ di ede; na yọnnu ni yí yẹyi do gbògbéna asu etọn.” (Efesunu lẹ 5:22-33) Dile mí sọgan mọ do, hogbe gbọdo Paulu tọn zinnùdo nuhudo lọ na owanyi po sisi po ji. Tonusisena ayinamẹ ehelẹ bẹ obu gbégbigbò na Jehovah tọn hẹn. E nọ biọ gbemima ahundopo tọn to ojlẹ dagbe po ylankan lẹ po mẹ. Klistiani he to nulẹnpọndo alọwle ji lẹ dona penugo nado didá azọngban ehelẹ.
Dide Whenue Yè na Wlealọ
11. (a) Ayinamẹ tẹwẹ yin nina to Owe-wiwe mẹ gando whenue yè dona wlealọ go? (b) Apajlẹ tẹwẹ do nuyọnẹn he tin to ayinamẹ Biblu tọn heyin kinkàndai to 1 Kọlintinu lẹ 7:36 hihodo mẹ tọn hia?
11 Yinyọ́n whenue mí wleawufo nado wlealọ yin onú titengbe. To whenuena e yindọ ehe gbọnvo sọn mẹde dè jẹ mẹdevo dè, Owe-wiwe ma dọ owhe de gba. Ṣigba, yé dohia dọ e pọnte hugan nado nọte kaka mí nado ‘zẹ̀ owhe aflanmẹ tọn go,’ to whenuena numọtolanmẹ sinsinyẹn zanhẹmẹ tọn lẹ sọgan slokọna wuntuntun. (1 Kọlintinu lẹ 7:36) “To whenuena yẹn mọ bọ họntọn ṣie lẹ to dope do bo to alọwle, yèdọ suhugan yetọn to owhe aflanmẹ tọn yetọn lẹ mẹ, e nọ sinyẹnawu to whedelẹnu nado yí ayinamẹ ehe do yizan mẹ,” wẹ Michelle dọ. “Ṣigba yẹn yọnẹn dọ ayinamẹ lọ wá sọn Jehovah dè, podọ nuhe na yin alemọyi na mí lẹ kẹdẹ wẹ e nọ dọ na mí. Dile yẹn to tenọ nado wá wlealọ, yẹn penugo nado ze ayidonugo do haṣinṣan ṣie hẹ Jehovah ji podọ nado tindo numimọ gbẹ̀mẹ tọn delẹ, he vlavo hiẹ sọgan gọ̀n ma tindo to owhe aflanmẹ tọn towe lẹ mẹ. To owhe delẹ godo, yẹn pegan ganji nado penukundo azọngban lẹ po nuhahun he nọ fọ́n to alọwle mẹ lẹ po go.”
12. Etẹwutu e do yin nuyọnẹnnu ma nado whlẹndo biọ alọwle mẹ to whenuena yè gbẹ́ pò to jọja mẹ?
12 Mẹhe whlẹndo nado wlealọ to whenuena yé gbẹ́ tin to jọja mẹ lẹ nọ saba mọdọ nuhudo po nujlomẹ yetọn lẹ po nọ diọ dile yé to whinwhẹ́n. Whenẹnu wẹ yé nọ yọnẹn dọ nuhe yé mọ taidi nujlomẹ to tintan whenu lẹ ma gbẹsọ yin nujọnu ba. Klistiani jọja dopo magbe to ahun mẹ nado wlealọ to whenuena e na pé owhe 16. Onọ̀-daho etọn wlealọ to owhe enẹ dido mẹ, podọ onọ̀ etọn lọsu ga. To whenuena sunnu jọja he mẹ ewọ tindo ojlo te gbẹ́ nado dà ẹ to ojlẹ enẹ mẹ, e dè mẹdevo he jlo nado wàmọ. Nalete, to godo mẹ to gbẹ̀mẹ, e doavigbe tlala do nudide plaplaji tọn etọn ji.
13. Etẹwẹ mẹhe ma ko whẹ́n ganji whẹpo do wlealọ lẹ nọ saba gbọ̀agba etọn?
13 To whenuena yè to nulẹnpọndo alọwle ji, nujọnu wẹ e yin nado tindo nukunnumọjẹnumẹ he whèwhín gando nuhe e bẹhẹn lẹpo go. Alọwle aflanmẹ tọn sọgan hẹn nuhahun susu lẹ wá he e yọnbasi dọ asu po asi po jọja lọ ma ko wleawu ganji nado penukundego. Yé sọgan gọ̀n ma tindo numimọ po whinwhiwhe he yè tindo nuhudo etọn nado pehẹ kọgbidinamẹ alọwle po ovi lẹ pinpọn whẹ́n tọn po. Alọwle dona yin bibasi to whenuena mí ko wleawufo to agbasa-liho, to apọ̀nmẹ, podọ to gbigbọ-liho nado biọ haṣinṣan dẹn-to-aimẹ de mẹ kẹdẹ.
14. Nuhudo etẹ tọn wẹ yè tindo nado penukundo ninọmẹ ayimajai tọn he nọ wá aimẹ to alọwle mẹ lẹ go?
14 Paulu wlan dọ mẹhe wlealọ lẹ “na tindo tukla to agbasalan mẹ.” (1 Kọlintinu lẹ 7:28) Nuhahun lẹ na fọ́n na gbẹtọ-yinyin voovo awe wẹ kọndopọ wutu, podọ pọndohlan lẹ na nọ gbọnvo. Na mape gbẹtọvi tọn wutu, e sọgan sinyẹnawu nado hẹn azọngban Owe-wiwe tọn he mí tindo to tito alọwle tọn mẹ lẹ di. (1 Kọlintinu lẹ 11:3; Kọlọsinu lẹ 3:18, 19; Titu 2:4, 5; 1 Pita 3:1, 2, 7) E nọ biọ whinwhiwhe po dolilo gbigbọmẹ tọn po nado dín bosọ hodo anademẹ sọn olọn mẹ wá lẹ nado didẹ ninọmẹ ayimajai tọn lẹ to owanyi mẹ.
15. Azọngban tẹwẹ mẹjitọ lẹ sọgan yiwà to awuwiwlena ovi yetọn lẹ na alọwle mẹ? Basi dohia.
15 Mẹjitọ lẹ sọgan wleawuna ovi yetọn lẹ na alọwle gbọn alọgigọna yé nado mọnukunnujẹ nujọnu-yinyin hihodo anademẹ he wá sọn olọn mẹ lẹ dali. Gbọn Owe-wiwe po owe Klistiani tọn lẹ po yiyizan po azọ́nyinyọnẹn po dali, mẹjitọ lẹ sọgan gọalọna ovi yetọn lẹ nado yọnẹn eyin yewlẹ kavi alọwlemẹ sọgodo tọn yetọn ko wleawufo nado basi gbemima alọwle tọn.a Blossom heyin owhe fọtọ̀nnukun-atọ̀n mẹvi lẹndọ emi yiwanna sunnu jọja de to agun etọn mẹ. Sunnu lọ yin lizọnyizọnwatọ gbehosọnalitọ whenu-gigọ́ tọn de, podọ yé jlo nado wlealọ. Ṣigba mẹjitọ etọn lẹ dọna ẹn nado nọte na owhe dopo, na yé lẹndọ ewọ gbẹ́ pò to jọja mẹ gbau. Blossom wlan to godo mẹ dọmọ: “Yẹn dopẹ́ taun dọ yẹn dotoaina ayinamẹ nuyọnẹn tọn enẹ. To owhe dopo gblamẹ, yẹn whẹ́n deji taun bosọ jẹ mimọ ji dọ sunnu jọja ehe ma tindo jẹhẹnu lẹ he na hẹn ẹn yin alọwlemẹ dagbe de gba. E jo titobasinanu lọ do to godo mẹ, podọ yẹn họ̀ngán sọn nuhe sọgan ko yin nugbajẹmẹji de to gbẹzan ṣie mẹ mẹ. Lehe e jiawu nado tindo mẹjitọ he yè sọgan ganjẹ wuntuntun yetọn go lẹ do sọ!”
‘Wlealọ to Oklunọ mẹ Kẹdẹ’
16. (a) Nawẹ Klistiani lẹ sọgan yin whiwhlepọn gando ‘alọwiwle to Oklunọ mẹ’ go gbọn? (b) To whenuena yè yin whiwhlepọn nado wlealọ hẹ mayisenọ de, etẹ ji wẹ Klistiani lẹ dona lẹnnupọndo?
16 Anademẹ Jehovah tọn na Klistiani lẹ họnwun taun dọmọ: ‘Wlealọ to Oklunọ mẹ kẹdẹ.’ (1 Kọlintinu lẹ 7:39) Mẹjitọ Klistiani lẹ po ovi yetọn lẹ po sọgan yin whiwhlepọn to aliho ehe mẹ. Nawẹ e sọgan yinmọ gbọn? Jọja lẹ sọgan jlo nado wlealọ, ṣigba alọwlemẹ lẹ sọgan gọ̀n ma tin to agun lọ mẹ. E whè gbau e taidi dọ le ninọmẹ lọ te do niyẹn. E sọgan yindọ sọha sunnu lẹ tọn ma sù sọ yọnnu lẹ tọn to lẹdo de mẹ, kavi e sọgan yindọ yè ma mọ mẹdepope he pegan to lẹdo lọ mẹ. Sunnu jọja de he mayin hagbẹ klandowiwe agun lọ tọn sọgan do ojlo hia to Klistiani yọnnu jọja de mẹ (kavi to adà awetọ mẹ), podọ kọgbidinamẹ tin nado gbẹkọ nujinọtedo he Jehovah ko zedai lẹ go. To ninọmẹ mọnkọtọn lẹ glọ, e na yọ́n nado lẹnnupọndo apajlẹ Ablaham tọn ji. Dopo to aliho he mẹ ewọ hẹn haṣinṣan dagbe etọn hẹ Jiwheyẹwhe go te lẹ wẹ nado hẹn ẹn diun dọ visunnu etọn Isaki wlealọ hẹ sinsẹ̀n-basitọ nugbonọ Jehovah tọn de. Isaki wà nudopolọ to whẹho visunnu etọn Jakobu tọn mẹ. Ehe biọ vivẹnudido to mẹhe e bẹhẹn lẹpo si, ṣigba e hẹn homẹ Jiwheyẹwhe tọn hùn bosọ dekọtọn do dona etọn mẹ.—Gẹnẹsisi 28:1-4.
17. Naegbọn e yọnbasi dọ alọwiwle hẹ mayisenọ de na yin nugbajẹmẹji de, podọ etẹwẹ yin whẹwhinwhẹ́n titengbe lọ na ‘alọwiwle to Oklunọ mẹ kẹdẹ’?
17 To whẹho vude lẹ mẹ, mayisenọ lọ ko lẹzun Klistiani to godo mẹ. Ṣigba, alọwiwle hẹ mayisenọ lẹ ko nọ saba sọawuhia nado yin nugbajẹmẹji. Mẹhe yé yí gbemasọ do kọndopọ lẹ ma nọ tindo nuyise, nujinọtedo, kavi yanwle dopolọ lẹ gba. (1 Kọlintinu lẹ 6:14) Ehe sọgan tindo nugandomẹgo awugblenamẹ tọn lẹ do hodọdopọ ji podọ do ayajẹ alọwle tọn ji. Di dohia, yọnnu Klistiani dopo blawu tlala do nugbo lọ ji dọ to opli mẹjlọdote tọn de godo, emi ma sọgan yì whégbè bo dọhodo onú gbigbọmẹ tọn lẹ ji hẹ asu mayisenọ emitọn gba. Na nugbo tọn, dehe yin nujọnu hugan wẹ yindọ, ‘alọwiwle to Oklunọ mẹ’ yin whẹho nugbonọ-yinyin hlan Jehovah tọn de. To whenuena mí setonuna Ohó Jiwheyẹwhe tọn, ahun mítọn lẹ ma nọ gblewhẹdo mí gba, na mí to nuhe yin “jijlọ to nukun etọn lẹ mẹ” wà.—1 Johanu 3:21, 22.
18. To whenuena yè to nulẹnpọndo alọwle ji, whẹho titengbe tẹlẹ wẹ yè dona na ayidonugo, podọ etẹwutu?
18 To whenuena yè lẹnnupọndo alọwle ji, jijọ dagbe po gbigbọnọ-yinyin alọwlemẹ sọgodo tọn lọ po dona yin ahunmẹdunamẹnu titengbe de. Gbẹtọ-yinyin Klistiani tọn de, to pọmẹ hẹ owanyi na Jiwheyẹwhe po mẹdezejo ahun-lẹpo tọn po hlan ẹn, yin nuhọakuẹ taun hugan whanpẹ agbasa tọn. Alọkẹyi sọn olọn mẹ wá nọ yin vivi etọn dù gbọn mẹhe yọ́n azọngban yetọn bosọ hẹn ẹn di nado yin alọwlemẹ he lodo to gbigbọ-liho lẹ dali. Podọ dolilo klo hugan he asu po asi po de sọgan tindo nọ wá sọn mẹdezejo pọmẹ tọn hlan Mẹdatọ lọ po alọkikẹyi anademẹ etọn to gigọ́mẹ po mẹ. Jehovah nọ yin gbégbòna to aliho ehe mẹ, bọ alọwle lọ nọ bẹjẹeji to dodonu dolido gbigbọmẹ tọn he na yidogọna kọndopọ dẹn-to-aimẹ de ji.
[Nudọnamẹ Odò Tọn]
Nawẹ Hiẹ Na Na Gblọndo Gbọn?
• Naegbọn yè tindo nuhudo anademẹ sọn olọn mẹ wá tọn nado dè alọwlemẹ dagbe de?
• Nawẹ mẹdezejo jijọ-di-Jiwheyẹwhe tọn sọgan gọalọ nado hẹn kọndopọ alọwle tọn lodo gbọn?
• Nawẹ mẹjitọ lẹ sọgan wleawuna ovi yetọn lẹ na alọwle gbọn?
• Naegbọn e yin nujọnu nado ‘wlealọ to Oklunọ mẹ kẹdẹ’?
[Yẹdide to weda 17]
Ayinamẹ Jiwheyẹwhe tọn lẹ yíyí-do-yizan mẹ to alọwlemẹ towe dide mẹ sọgan dekọtọn do ayajẹ susugege mẹ
[Yẹdide to weda 18]
Dona họakuẹ lẹ nọ wá sọn ‘alọwiwle to Oklunọ mẹ kẹdẹ’ mẹ