Hẹn Jidide Towe Do Jehovah Go Lodo

Sébibla ylankan de to yinyin awuwlena. Ahọluzọnwatọ he tin to otẹn he yiaga mẹ to aigba lọ ji lẹpo ko kọngbedopọ bo ko de linlẹn de tọ́n dọ osẹ́n yọyọ de ni yin didetọn. Yé jlo nado hẹn ẹn yin sẹ́nhẹngba he jẹna okú de na mẹdepope he tindo mahẹ to sinsẹ̀n-bibasi he Tohọluduta lọ ma kẹalọyi mẹ.

BE EHE dọnú taidi nuhe hiẹ jẹakọhẹ de ya? Whenuho bẹ apajlẹ susu mẹhe lẹhlan osẹ́n nado wleawuna danuwiwa lẹ tọn hẹn. Nujijọ aga tọn wá aimẹ to Ahọluigba Pẹlsia tọn whenu to azán yẹwhegán Daniẹli tọn lẹ gbè. Osẹ́n lọ, he Ahọlu Daliusi wá doalọ e mẹ to godo mẹ, yigbe dọmọ: “Mẹdepope he na biọ onú-biọ de sọn yẹwhe depope si kavi gbẹtọ na azán ogbàn, adavo sọn hiẹ si, ahọlu E, ewọ na yin zizedlan biọ odò kinnikinni lẹ tọn mẹ.”​—Daniẹli 6:​7-9.

Etẹwẹ Daniẹli na wà to budonamẹnu okú tọn enẹ glọ? Be e na gbẹ́ to jidedo Jiwheyẹwhe etọn, Jehovah go zọnmii wẹ, kavi be e na jogbe bo wà dile ahọlu lọ biọ do wẹ ya? Kandai lọ dọna mí dọmọ: “Podọ whenuena Daniẹli yọnẹn dọ yè doalọ wewinwlan lọ mẹ, e yì biọ ohọ̀ etọn mẹ; (dinvie ovẹ́sẹ́ etọn lẹ tin hùnhùn to abò etọn mẹ hlan Jelusalẹm dali;) ewọ bosọ jẹklo to kligonu etọn lẹ ji whla atọ̀n to gbèdopo, bo hodẹ̀, bosọ na opẹ́ lẹ to Jiwheyẹwhe etọn nukọn, dole e nọ wà do daidai.” (Daniẹli 6:10) Mí yọ́n pipòtọ kandai lọ tọn ganji. Daniẹli yin zize dlan odò kinnikinni lẹ tọn mẹ na yise etọn wutu, ṣigba Jehovah “blá onù kinnikinni lẹ tọn” bosọ whlẹn devizọnwatọ nugbonọ etọn gán.​—Heblu lẹ 11:33; Daniẹli 6:​16-​22.

Ojlẹ Mẹdetiti-Gbigbejepọn Tọn

To egbehe, devizọnwatọ Jehovah tọn lẹ to gbẹnọ to aihọn kanylantọ de mẹ, bo nọ pannukọn owù susu lẹ na dagbemẹ-ninọ agbasamẹ po gbigbọmẹ tọn yetọn lẹ po. Di apajlẹ, to wangbẹnamẹ sinmẹ agbasa tọn ylankan he gbajẹgbonu to otò delẹ mẹ whenu, Kunnudetọ susu ko yin hùhù. To fidevo lẹ, devizọnwatọ Jehovah tọn lẹ ko pannukọn whèdomẹ núdùdù tọn, awusinyẹnnamẹ akuẹzinzan tọn, nugbajẹmẹji jọwamọ tọn lẹ, awutu sinsinyẹn, po ninọmẹ he nọ ze ogbẹ̀ do owù mẹ devo lẹ po. To yidogọ mẹ, yé dona doakọnna homẹkẹn, kọgbidinamẹ sọn agbasazọ́n mẹ, podọ mẹwhlepọn susu devo lẹ nado waylan, he popolẹpo ko ze gbigbọnọ-yinyin yetọn do owù mẹ. Na nugbo tọn, Kẹntọ daho lọ, yèdọ Satani ko magbe nado và devizọnwatọ Jehovah tọn lẹ sudo to aliho nuyiwa tọn depope he sọgan tindo kọdetọn dagbe yiyizan mẹ.​—1 Pita 5:8.

Eyin mí wá pannukọn ninọmẹ mọnkọtọn lẹ, etẹwẹ mí sọgan wà? To whenuena e yindọ jọwamọnu wẹ e yin nado dibu to whenuena ogbẹ̀ mẹtọn tin to owù mẹ, mí sọgan hẹn hogbe mẹhẹndeji apọsteli Paulu tọn lẹ do ayiha mẹ dọmọ: “[Jehovah] ko dọmọ, Yẹn ma na jo we dai gbede, kavi gbẹ́ we gba. Sọmọ bọ míwlẹ po tugbigbo po do dọmọ, [Jehovah] wẹ alọgọtọ ṣie, yẹn ma to obu na di; na nuhe gbẹtọ na wà do mi.” (Heblu lẹ 13:​5, 6) Mí sọgan deji dọ Jehovah nọ tindo numọtolanmẹ enẹ dopolọ gando devizọnwatọ etọn lẹ go to egbehe. Nalete, onú dopo wẹ nado yọ́n opagbe Jehovah tọn ṣigba onú devo wẹ nado tindo nujikudo dọ ewọ na yinuwa do ota mítọn mẹ. Enẹwutu nujọnu wẹ e yin ga dọ mí ni gbadopọnna dodonu he ji jidide do Jehovah go yin zize sinai do podọ dọ mí ni wà nuhe go mí pé lẹpo nado hẹn jidide mítọn lodo bosọ hẹn ẹn dote. Eyin mí wà enẹ, ‘jijọho Jiwheyẹwhe tọn he hú linlẹn lẹpo na whlá ahun mítọn po huhlọn apọ̀nmẹ tọn mítọn lẹ po to Klisti Jesu mẹ.’ (Filippinu lẹ 4:7) To whenẹnu eyin whlepọn lẹ tlẹ wá, mí na penugo nado lẹnnupọn hezeheze bosọ pehẹ yé po nuyọnẹn po.

Dodonu na Jidide do Jehovah Go

Mí tindo whẹwhinwhẹ́n susu na taun tọn nado dejido Mẹdatọ mítọn Jehovah go. Whẹwhinwhẹ́n tintan wẹ yindọ Jehovah yin Jiwheyẹwhe owanyinọ he nọ hò devizọnwatọ etọn lẹ tọn pọ́n taun. Nujijọ susu wẹ yin kinkàndai to Biblu mẹ he dọna mí gando mẹtọnhopọn owanyinọ Jehovah tọn na devizọnwatọ etọn lẹ go. To zẹẹmẹ bibasi do lehe Jehovah yinuwa hẹ omẹ dide etọn lẹ, yèdọ Islaelivi lẹ do ji mẹ, Mose wlan dọmọ: “Ewọ mọ ẹn to aigba gbọgbé de mẹ, podọ to zungbo vọjẹ gbigbó lọ mẹ; e lẹdo e pé, e yí tuklajẹ na ẹn, e whlá ẹ di azìn nukun etọn tọn lọ.” (Deutelonomi 32:10) To ojlẹ egbezangbe tọn lẹ mẹ, Jehovah gbẹ́ pò to nukunpedo devizọnwatọ etọn lẹ go taun, taidi pipli de podọ di mẹdopodopo lẹ. Di apajlẹ, to whenuena Kunnudetọ delẹ tindo numimọ núdùdù whèdomẹ tọn sinsinyẹn to tòwhan Bosnie tọn whenu, Jehovah hẹn ẹn diun dọ yé mọ kọgbọ he yé tindo nuhudo etọn sinsinyẹn yí gbọn vivẹnudido adọgbigbo tọn mẹmẹsunnu yetọn he tin to Croasie po Autriche po lẹ tọn dali, mẹhe ze ogbẹ̀ yetọn lẹ do owù mẹ nado zìn gbejizọnlin gbọ̀n lẹdo he gọna owù taun lẹ mẹ nado hẹn nuyizan kọgbọ tọn lẹ yì na mẹmẹsunnu yetọn lẹ.a

To whenuena e yindọ Jehovah Jiwheyẹwhe yin Ganhunupotọ, na jide tọn e nọ penugo nado basi hihọ́na devizọnwatọ etọn lẹ to ninọmẹ depope glọ. (Isaia 33:22; Osọhia 4:8) Ṣigba eyin Jehovah tlẹ dike delẹ to devizọnwatọ etọn lẹ mẹ ni yin nugbonọ kakajẹ okú, e gbẹsọ nọ penukundo yé go bo nọ gọalọna yé nado hẹn tenọgli yetọn go, bo hẹn yé penugo nado nọtegli masẹafọ, yin ayajẹnọ, podọ ayiha whiwhẹnọ kakajẹ vivọnu. Enẹwutu mí sọgan tindo jidide dopolọ dile psalm-kàntọ lọ wà do dọmọ: “Jiwheyẹwhe wẹ fibẹtado po huhlọn mítọn po, alọgọ alọnu-alọnu tọn to tukla mẹ. Enẹwutu wẹ míwlẹ ma to obu na di, eyin aigba tlẹ diọ, bọ yè sọ hẹn osó daho lẹ yì do [to] ohù mẹ.”​—Psalm 46:​1, 2.

Biblu sọ dohia ga dọ Jehovah yin Jiwheyẹwhe nugbonọ. Ehe zẹẹmẹdo dọ e nọ hẹn opagbe etọn lẹ di to whepoponu. Na nugbo tọn, Biblu basi zẹẹmẹ etọn taidi Jiwheyẹwhe “he ma nọ dolalo.” (Titu 1:2) To whenuena e yindọ Jehovah basi dọvọdọ ojlo tintindo etọn nado whlá bo whlẹn devizọnwatọ etọn lẹ gán pludopludo, mí sọgan deji mlẹnmlẹn dọ e mayin dọ e penugo kẹdẹ wẹ gba ṣigba sọ wleawufo ga nado hẹn opagbe etọn lẹ di.​—Job 42:2.

Aliho lẹ Nado Hẹn Jidide Mítọn Lodo

Dile etlẹ yindọ mí tindo whẹwhinwhẹ́n lẹpo nado ze jidide mítọn do Jehovah mẹ, mí ma dona yí whẹho lọ do gbẹ̀n asajikan gba. Ehe yinmọ na aihọn lọ to paa mẹ tindo yise vude poun to Jiwheyẹwhe mẹ wutu, podọ walọyizan mọnkọtọn sọgan hẹn jidide mítọn to Jehovah mẹ gbọjọ po awubibọ po. Enẹwutu, mí dona dovivẹnu taun nado hẹn jidide mítọn lodo bosọ hẹn ẹn dote. Jehovah yọ́n ehe ganji, podọ e ko wleawuna aliho he mẹ mí sọgan wàmọ te.

Tintan, e ko wleawuna Ohó heyin kinkàndai etọn, yèdọ Biblu, he bẹ kandai nuyiwa huhlọnnọ susu he e wà do ota devizọnwatọ etọn lẹ tọn mẹ hẹn. Lẹnnupọndeji poun, jidide nẹmu wẹ hiẹ sọgan tindo do mẹde go eyin yinkọ etọn kẹdẹ wẹ hiẹ yọnẹn? Vlavo vude poun, eyin hiẹ na tlẹ tindo depope. Hiẹ dona yọ́n aliho he mẹ e nọ yinuwa te po nuyiwa etọn lẹ po nado sọgan dejido ewọ go, e mayin mọwẹ ya? Dile mí hia bo lẹnayihamẹpọn do kandai Biblu tọn mọnkọtọn lẹ ji, oyọnẹn Jehovah tọn po aliho jiawu etọn lẹ po tintindo mítọn nọ siso deji, bọ mí nọ wá mọnukunnujẹ lehe yè sọgan dejido ewọ go sọ mẹ dogọ. Gbọnmọ dali jidide mítọn to ewọ mẹ nọ yin hinhẹn lodo. Psalm-kàntọ lọ ze apajlẹ whanpẹnọ de dai to whenuena e dọ to odẹ̀ vivẹ de mẹ hlan Jiwheyẹwhe dọmọ: “Yẹn na dọho azọ́n OKLUNỌ tọn: na yẹn na nọ flin azọ́njiawu etọn hoho tọn lẹ. Yẹn na [lẹnayihamẹpọndo] azọ́n towe lẹpo [ji] ga, bo nasọ nọ lẹn azọ́n towe lẹpo pọ́n.”​—Psalm 77:​11, 12.

To yidogọmẹ na Biblu, mí tindo asisa susugege núdùdù gbigbọmẹ tọn to owe Biblu tọn he nọ yin awuwlena gbọn titobasinanu Jehovah tọn dali lẹ mẹ. Gọna onú devo lẹ, owe ehelẹ nọ saba bẹ kandai mẹwhinwhàn tọn gbẹzan devizọnwatọ egbezangbe Jiwheyẹwhe tọn lẹ hẹn, bo nọ do lehe Jehovah penugo nado wleawu alọgọ po kọgbọ tọn po na yé to whenuena yé pehẹ ninọmẹ todido matindo tọn lẹ. Di apajlẹ, Martin Poetzinger, he to godo mẹ lẹzun dopo to Hagbẹ Anademẹtọ Kunnudetọ Jehovah tọn lẹ tọn, bẹ awutu sinsinyẹn de to whenuena e to sinsẹ̀nzọnwa taidi gbehosọnalitọ de to agbegbe Europe tọn he mayin otò etọn mẹ. E ma tindo akuẹ depope, podọ doto depope ma jlo nado mọ ẹn. Ṣigba Jehovah ma jo e do gba. To godo mẹ, doto-gán dotowhé lẹdo lọ mẹ tọn yin dindọnsẹpọ. Na e yin mẹhe tindo yise sinsinyẹn to Biblu mẹ wutu, dawe he jọmẹ ehe penukundo Mẹmẹsunnu Poetzinger go dile e na ko basi na visunnu etọn titi do, bo wàmọ vọnu ma yí akuẹ depope. Otàn mẹdetiti tọn mọnkọtọn lẹ hihia sọgan hẹn jidide mítọn to Otọ́ olọn mẹ tọn mítọn mẹ lodo na taun tọn.

Alọgọ họakuẹ devo he Jehovah nọ wleawuna nado hẹn jidide mítọn lodo to ewọ mẹ wẹ lẹblanulọkẹyi họakuẹ odẹ̀ tọn. Apọsteli Paulu gbọn owanyi dali dọna mí dọmọ: “Mì jẹtukla nudepope tọn blo; ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onú popo mẹ.” (Filippinu lẹ 4:6) “Onú popo” sọgan bẹ numọtolanmẹ, nuhudo, obu, po magbọjẹ mítọn lẹ po hẹn. Lehe odẹ̀ mítọn lẹ yin gbọzangbọzan tọn bo wá sọn ahun mẹ do sọ, mọwẹ jidide to Jehovah mẹ mítọn na yin do niyẹn.

To whenuena Jesu Klisti tin to aigba ji, e yì nọtẹn he tin to olá lẹ mẹ ede ṣo nado hodẹ̀ to whedelẹnu ma nado yin ayihafẹsẹna. (Matiu 14:23; Malku 1:35) Whẹpo e nido basi nudide sinsinyẹn lẹ, e tlẹ nọ yí ozán blebu zan to dẹ̀hiho hlan Otọ́ etọn mẹ. (Luku 6:​12, 13) E mayin nupaṣamẹ gba dọ jidide do Jehovah go Jesu tọn sinyẹn sọmọ bọ e do penugo nado doakọnna mẹwhlepọn he ylan hugan he ma ko wá mẹdepope ji pọ́n lọ. Hogbe godo tọn etọn lẹ to yatin ji wẹ: “Otọ́, alọ towe mẹ wẹ yẹn jo gbigbọ ṣie do.” Hodidọ jidide tọn enẹ dohia dọ kakajẹ vivọnu, jidide do Otọ́ etọn go etọn ma depò gba, yèdọ dile Jehovah ma tlẹ dademẹ nado whlẹn ẹn gán do sọ.​—Luku 23:46.

Nuyizan devo nado jlọ jidide do Jehovah go mítọn dote wẹ gbẹdido gbesisọmẹ tọn hẹ mẹhe nọ dejido ewọ go po ahun lẹpo po lẹ. Jehovah degbena omẹ etọn lẹ nado nọ pli dopọ to gbesisọmẹ nado plọnnu dogọ gando ewọ go podọ nado nọ na tuli ode awetọ. (Deutelonomi 31:12; Heblu lẹ 10:24, 25) Gbẹdido mọnkọtọn nọ hẹn jidide do Jehovah go mítọn lodo, bo nọ hẹn mí penugo nado doakọnna whlepọn sinsinyẹn yise tọn lẹ. To otò Aflika tọn dopo mẹ to fie azọ́n yẹwhehodidọ tọn ko yin alọhẹndotena te, yè gbẹ́ dọ Kunnudetọ Jehovah tọn lẹ ma na tindo hihọ́ ponọ lẹ tọn, gbedewema gbejizọnlin bibasi tọn lẹ, kandai alọwle tọn lẹ, nukunpedomẹgo dotowhé tọn, po agbasazọ́n lẹ po. To whenuena tòwhan bẹjẹeji to lẹdo dopo mẹ, omẹ 39, he mẹ ovi lẹ tin te heyin hagbẹ agun he tin to lẹdo lọ mẹ lẹ tọn nọ̀ aná he yido tlala de glọ na nudi osun ẹnẹ to danfafa ji nado sọgan họ̀ngán sọn sòdide he tin to tòpẹvi yetọn mẹ si. To awusinyẹnnamẹnu zẹjlẹgo mọnkọtọn glọ, hodidọ do wefọ Biblu tọn egbesọegbesọ tọn ji po opli devo lẹ po yetọn na huhlọn yé taun. Gbọnmọ dali yé penugo nado doakọnna ninọmẹ ylankan lọ bo gbọṣi ninọmẹ dagbe gbigbọmẹ tọn mẹ. Numimọ ehe do nuhọakuẹ pipli to gbesisọmẹ hẹ omẹ Jehovah tọn lẹ tọn hia hezeheze.

To tadona mẹ, nado hẹn jidide do Jehovah go mítọn lodo, mí dona yin zohunhunnọ to azọ́n yẹwhehodidọ-Ahọluduta tọn mẹ, bo nọ wleawu to whepoponu nado má wẹndagbe lọ hẹ mẹdevo lẹ. Ehe yin didohia gbọn numimọ mẹwhinwhàn tọn wẹnlatọ jọja zohunhunnọ de to Canada he to awutu sinsinyẹn leucémie tọn jẹ dali. Mahopọnna awutu sinsinyẹn etọn, e jlo nado lẹzun gbehosọnalitọ whepoponu tọn, enẹ wẹ, lizọnyizọnwatọ whenu-gigọ́ tọn. To ojlẹ de mẹ he awutu etọn depò vude, e tindo agbasalilo sọmọ nado yí osun dopo zan to lizọnyizọn lọ mẹ taidi gbehosọnalitọ alọgọtọ tọn. Enẹgodo ninọmẹ etọn sọ ylan deji taun, bọ e kú to osun kleun delẹ godo. Etomọṣo, e hẹn dolilo gbigbọmẹ tọn go taun kakajẹ okú etọn, yèdọ jidide do Jehovah go etọn ma depò to ojlẹ depope mẹ gba. Onọ̀ etọn flin dọmọ: “Kakajẹ okú etọn whenu, onú mẹdevo lẹ tọn nọ duahunmẹna ẹn hugan edetiti tọn. E nọ na tuli yé nado plọn Biblu, bo nọ dọna yé dọ, ‘Mí na nọpọ́ to Paladisi mẹ.’ ”

Jidide Do Jehovah Go Mítọn Didohia

“Na le agbasa matin gbigbọ yin oṣiọ, mọkẹdẹ wẹ yise matin azọ́n yin oṣiọ ga.” (Jakobu 2:26) Nuhe Jakobu dọ gando yise to Jiwheyẹwhe mẹ go sọgan sọ yin didọ gando jidide do Ewọ go mítọn go ga. Mahopọnna lehe mí dọ dọ mí dejido Jiwheyẹwhe go sọ, e ma na tindo zẹẹmẹ gba adavo mí do jidide enẹ hia gbọn nuwiwa mítọn lẹ dali. Ablaham dejido Jehovah go mlẹnmlẹn bosọ do jidide enẹ hia gbọn tonusise mlẹnmlẹn hlan gbedide etọn lẹ dali, yèdọ etlẹ yin jẹ obá awuwiwle nado yí visunnu etọn, Isaki do sanvọ́ tọn mẹ. Na jidide po tonusise vonọtaun mọnkọtọn po wutu, Ablaham wá yin yinyọnẹn taidi họntọn Jehovah tọn.​—Heblu lẹ 11:​8-​10, 17-​19; Jakobu 2:​23.

Mí ma dona nọte dọ whlepọn sinsinyẹn de ni wá mí ji whẹpo mí nido do jidide to Jehovah mẹ mítọn hia gba. Jesu dọna devi etọn lẹ dọmọ: “Ewọ heyin nugbonọ to onú pẹvi tlala de mẹ, e na yin nugbonọ to onú susu mẹ ga: podọ ewọ he yin mawadodonọ to onú pẹvi tlala de mẹ, sọ yin mawadodonọ to onú susu mẹ ga.” (Luku 16:10) Mí dona plọn nado dejido Jehovah go to nuwiwa egbesọegbesọ tọn mítọn lẹpo mẹ, bo setonuna ẹn etlẹ yin to whẹho he sọgan taidi nuhe mayin nujọnu sọmọ lẹ mẹ. To whenuena mí mọ alemọyi he nọ wá sọn tonusise mọnkọtọn lẹ mẹ, jidide do Otọ́ olọn mẹ tọn mítọn go mítọn nọ yin hinhẹn lodo, bo nọ hẹn mí penugo nado pannukọn whlepọn sẹhundaga lẹ.

Dile aihọn lọ to dindọnsẹpọ opodo ylankan etọn, omẹ Jehovah tọn lẹ na tindo numimọ whlepọn po owù dogọ lẹ tọn po janwẹ. (Owalọ lẹ 14:22; 2 Timoti 3:12) Gbọn awuwiwlena jidide he lodo bosọ yin mlẹnmlẹn tọn to Jehovah mẹ todin dali, mí sọgan pọ́n nukọn hlan na lunluntọ́n biọ aihọn yọyọ dopagbena lọ mẹ​—vlavo gbọn gbẹninọ gbọn nukunbibia daho lọ mẹ dali kavi gbọn fọnsọnku dali. (2 Pita 3:13) Mí ma dona dike jidide matindo depope to adà mítọn mẹ ni hẹn haṣinṣan họakuẹ mítọn hẹ Jehovah gble. To whelọnu, nuhe yin didọ gando Daniẹli go to whenuena e ko yin whinwhlẹngán sọn odò kinnikinni lẹ tọn mẹ godo sọgan sọ yin didọ gando míwlẹ go ga dọmọ: “Yè ma mọ hunkọ awugble tọn de to ewọ go gba, na ewọ ko [dejido] Jiwheyẹwhe etọn mẹ wutu.”​—Daniẹli 6:23.

[Nudọnamẹ Odò Tọn]

[Yẹdide to weda 9]

Hihia kandai devizọnwatọ nugbonọ Jehovah tọn lẹ tọn, taidi Martin Poetzinger tọn, nọ hẹn yise lodo