Kanbiọ lẹ sọn Wehiatọ lẹ Dè
Mí hia to 1 Pita 4:3 mẹ dọ Klistiani delẹ ko tindo mahẹ to “boṣiọ sinsẹ̀n he ylanhu mẹ.” Be e mayin boṣiọ sinsẹ̀n lẹpo wẹ ylan, yin whẹgbledo bosọ yin gbigbẹdai gbọn Jiwheyẹwhe dali ya?
Mọwẹ, to pọndohlan Jiwheyẹwhe tọn mẹ boṣiọ sinsẹ̀n lẹpo wẹ ylan. Mẹhe to nukundagbe etọn dín lẹ ma dona sẹ̀n boṣiọ gba.—1 Kọlintinu lẹ 5:11; Osọhia 21:8.
Ṣigba, e taidi dọ apọsteli Pita to alọdlẹndo boṣiọ sinsẹ̀n sọn pọndohlan he gbọnvo de mẹ. Onú dopo wẹ yindọ, to suhugan akọta hohowhenu tọn lẹ mẹ, boṣiọ sinsẹ̀n gbayipe taun bo masọ yin aliglọnna to osẹ́n-liho gbọn aṣẹpatọ lẹ dali gba. Enẹwẹ yindọ, osẹ́n otò tọn ma gbẹ́ boṣiọ sinsẹ̀n dai gba. Boṣiọ sinsẹ̀n delẹ tlẹ sọ yin apadewhe nubiọtomẹsi akọta kavi gandudu lẹ tọn. To linlẹn enẹ mẹ, mẹdelẹ ko tindo mahẹ to ‘boṣiọ sinsẹ̀n he mayin aliglọnna to osẹ́n-liho lẹ mẹ’ whẹpo do lẹzun Klistiani. (New World Translation, vọkan 1950 tọn) Di dohia, e sọgan yin ayidego dọ Nẹbukadnẹzali Ahọlu Babilọninu lẹ tọn ze boṣiọ sika tọn de dai, ṣigba devizọnwatọ Jehovah tọn lẹ Ṣadlaki, Mẹṣaki, po Abẹdi-nẹgo po gbẹ́ nado sẹ̀n ẹn.—Daniẹli 3:1-12.
Sọn pọndohlan devo mẹ, hùnwhẹ boṣiọ sinsẹ̀n tọn susu wẹ nọ bẹ walọyizan ylankan lẹ hẹn he nọ jẹagọdo nuyiwa jọwamọ kavi walọdagbe tọn lẹ. (Lomunu lẹ 2:14, 15) Apọsteli Paulu wlanwe gando walọyizan mẹdèpo tọn lẹ go, he ‘ma sọgbe hẹ jọwamọ’ bosọ ‘kudiho,’ podọ walọyizan ehelẹ nọ saba yin apadewhe hùnwhẹ sinsẹ̀n tọn lẹ. (Lomunu lẹ 1:26, 27) Mẹhe nọ tindo mahẹ to boṣiọ sinsẹ̀n he ylanhu mẹ lẹ ma to nuyiwa sọgbe hẹ walọyizan jọwamọ tọn lẹ gba. Na taun tọn e sọgbe dọ mẹhe to lilẹzun Klistiani lẹ ko jo walọyizan he gblezọn enẹlẹ do.
To yidogọmẹ na nuhe ko yin didọ wayi lẹ, Jehovah Jiwheyẹwhe gbẹ́ boṣiọ sinsẹ̀n wunmẹ he gbayipe to mẹhe mayin Ju lẹ ṣẹnṣẹn dai. Enẹwutu, e mayin nuhe sọgbe gba.a—Kọlọsinu lẹ 3:5-7.
[Nudọnamẹ Odò Tọn]
a Hogbe Glẹki tọn he tin to 1 Pita 4:3 mẹ to paa mẹ zẹẹmẹdo “boṣiọ sinsẹ̀n he ma sọgbe hẹ osẹ́n.” Hodidọ lọ ko yin lilẹdogbedevomẹ to Biblu Glẹnsigbe tọn mẹ to aliho voovo mẹ taidi “boṣiọ sinsẹ̀n he jẹagọdo osẹ́n,” “boṣiọ sinsẹ̀n he yin gbigbẹdai,” podọ “boṣiọ sinsẹ̀n he jẹagọ.”