Mì Pegan Bosọ Sọgbe Mlẹnmlẹn

Plidopọ lẹ Nọ Hẹn Ayajẹ Mẹmẹsunnu-Yinyin Tọn Mítọn Lodo

JOSEPH F. RUTHERFORD owhe 50 mẹvi, he e ma nọ̀ná to whenuena e ko yí nudi owhe dopo zan to gànpamẹ na whẹsadokọnamẹ agọ̀ wutu godo, yí homẹhunhun do yilizọn taidi adọtẹn-namẹtọ de. E yí zohunhun do ze saki tòmẹ yìyì tọn lẹ bo gọalọna Klistiani hatọ lẹ yì abò hotẹli tọn yetọn lẹ mẹ. Awe to gàntọ hatọ dai tọn etọn lẹ mẹ​​—heyin Biblu Plọntọ hatọ lẹ—din ohọ̀ na gbẹtọgun daho de he to adọtẹn dín. Azọ́n sinsinyẹn ehe to yinyin wiwà zẹ̀ ozán homẹ go. Yemẹpo wẹ yin homẹhunnọ to nujijọ ehe tẹnmẹ. Nujijọ wunmẹ tẹwẹ?

Owhe lọ wẹ 1919, bọ Biblu Plọntọ lẹ (heyin yinyọnẹn taidi Kunnudetọ Jehovah tọn lẹ to egbehe) to tintọ́n sọn ojlẹ homẹkẹn sinsinyẹn tọn de glọ. Nado vọ́ kanṣiṣa mẹmẹsunnu-yinyin tọn yetọn hẹn lodo, yé wleawuna plidopọ de to Cedar Point, Ohio, États-Unis, sọn 1^er jẹ 8 septembre 1919. To azán he gbọngodo plidopọ lọ tọn gbè, gbẹtọgun 7 000 he yin homẹhunnọ tlala de dotoai po sọwhiwhe po to whenuena Mẹmẹsunnu Rutherford na tuli plidopọwatọ lẹ dọmọ: “Mìwlẹ wẹ yin afọzedaitọ Ahọlu ahọlu lẹ tọn po Oklunọ oklunọ lẹ tọn po, he to . . . ahọluduta gigonọ Oklunọ mítọn tọn lá na gbẹtọ lẹ.”

Plidopọ lẹ ko nọ yin bibasi to omẹ Jehovah tọn lẹ ṣẹnṣẹn sọn ojlẹ Islaeli hohowhenu tọn mẹ gbọ́n. (Eksọdusi 23:​14-17; Luku 2:​41-43) Pipli mọnkọtọn lẹ yin nuwiwa ayajẹ tọn de, nọ gọalọna mẹhe wá lẹpo nado ze ayiha yetọn do Ohó Jiwheyẹwhe tọn ji. Mọdopolọ, plidopọ Kunnudetọ Jehovah tọn lẹ tọn to ojlẹ egbezangbe tọn lẹ mẹ nọ bẹ dagbenu gbigbọmẹ tọn lẹ hẹn. Na ayidonugotọ ahundoponọ lẹ, pipli ayajẹ tọn mọnkọtọn lẹ nọ yin kunnudenu he họnwun dọ Kunnudetọ lẹ yin kinkọndopọ gbọn kanṣiṣa he lodo mẹmẹsunnu-yinyin Klistiani tọn dali.

E Nọ Biọ Vivẹnu Nado Yì

Klistiani egbezangbe tọn lẹ yọnẹn dọ plidopọ yetọn lẹ yin ojlẹ homẹmiọnnamẹ gbigbọmẹ tọn po anademẹ sọn Ohó Jiwheyẹwhe tọn mẹ po tọn. Yé nọ pọ́n opli daho ehelẹ hlan taidi aliho titengbe de nado gọalọna yé nado “pegan bosọ sọgbe to ojlo Jiwheyẹwhe tọn lẹpo mẹ.” (Kọlọsinu lẹ 4:12) Enẹwutu, Kunnudetọ lẹ nọ nọgodona pipli ehelẹ po ahun lẹpo po, bo nọ dovivẹnu sinsinyẹn nado yì yé.

Plidopọ mọnkọtọn lẹ yìyì nọ biọ yise yiyizan po duduto aliglọnnamẹnu sinsinyẹn lẹ po ji na mẹdelẹ. Di apajlẹ, lẹnnupọndo Kunnudetọ mẹhomẹ de ji to Autriche. Dile etlẹ to awutu adọ́-vivi tọn jẹ bo dona nọ do oyẹ́n egbesọegbesọ, e mọdọ emi yì plidopọ lọ to azán lẹpo ji to otò etọn mẹ. To Inde, whẹndo daho Kunnudetọ tọn de he jẹhẹ́n-klókló mọ ẹn yin awusinyẹnnu tlala nado yì plidopọ. Dopo to hagbẹ whẹndo lọ tọn lẹ mẹ gọalọ. E dọmọ: “Na yẹn ma jlo nado gọ̀n nujijọ lọ tẹnmẹ wutu, yẹn sà tómẹnu sika tọn ṣie nado suahọ gbejizọnlin lọ tọn. E sọzẹn hẹ avọ́sinsan lọ, to whenuena e yindọ gbẹdido lọ po numimọ lẹ po hẹn yise mítọn lodo.”

To Papouasie-Nouvelle-Guinée, pipli jlodotọ lẹ tọn de magbe nado yì plidopọ agbegbe tọn de to tatọ́-tònọ lọ mẹ. Yé dọnsẹpọ dawe de he tindo ahihun to gbétatò yetọn mẹ bo kàn nẹmu he e na yí nado hẹn yé yì plidopọ lọ se. To whenuena e yindọ akuẹ heyin bibiọ hugan nuhe yé tindo, yé basi tito nado wazọ́n na dawe lọ to owhé etọn gbè, bo vọ́ adohọsa etọn jlado. Yé gbọnmọ dali penugo nado yì plidopọ agbegbe tọn yetọn bosọ mọaleyi sọn tito-to-whinnu lọ blebu mẹ.

Dindẹn nọtẹn lọ tọn mayin nuhahun zẹjlẹgo nado glọnalina ojlo Kunnudetọ Jehovah tọn lẹ tọn nado yì plidopọ lẹ gba. To 1978, jọja afọzedaitọ de sọn Pologne kùn kẹkẹ na kilomẹtlu 1 200 to azán ṣidopo gblamẹ, nado yì plidopọ to Lille, France. To alúnlùn 1997 tọn whenu, asu po asi po de sọn Mongolia zingbejizọnlin na kilomẹtlu 1 200 nado yì opli Klistiani tọn to Irkutsk, Russie.

Owanyi Mẹmẹsunnu Tọn to Nuyiwa Mẹ

Kọndopọ po mẹmẹsunnu-yinyin he Kunnudetọ lẹ nọ dohia to plidopọ yetọn lẹ ji po nọ yin ayidego hezeheze gbọn ayidonugotọ ahundoponọ lẹ dali. Mẹsusu ko yin nuyiwadeji na yé mọdọ mẹnukuntahihopọn matin to plidopọwatọ lẹ ṣẹnṣẹn podọ zohunhun nujọnu tọn tin, etlẹ yin to mẹhe dukosọhẹ yéde whla tintan lẹ ṣẹnṣẹn.

To plidopọ akọjọpli tọn agọe tọn de whenu to Australie, mẹhe nọ deanana saditọ lẹ he zọnhẹ plidopọwatọ afọzedaitọ lẹ na osẹ dopo jlo nado nọ hẹ yé dogọ nado sọgan duvivi gbẹdohẹmẹ yetọn tọn. Na owanyi po pọninọ yetọn po yinuwadeji wutu, lehe yé jẹakọ hẹ yede do paṣa ẹ tlala, to whenuena e yindọ suhugan yetọn ma ko yọ́n yede dai. Whẹpo e nido yì, e dọ̀n ayidonugo yetọn. To yiylọ yé dọ “mẹmẹsunnu po mẹmẹyọnnu lẹ po” godo, e jẹ nudọdo yé ji ṣigba ma penugo nado dotana, na numọtolanmẹ sinsinyẹn he e tindo hẹn ẹn nado jẹ dasin kùn ji.

To 1997, plidopọ agbegbe tọn tintan yin bibasi to ogbè atọ̀n mẹ to Sri Lanka to aihundatẹn daho de mẹ. Tito-to-whinnu lọ blebu yin zizedonukọnnamẹ to ojlẹ dopolọ mẹ to Glẹnsigbe, Sinhalese-gbè, po Tamil-gbè po mẹ. To aihọn he mẹ ayimajai to susudeji to hẹnnu lẹ ṣẹnṣẹn ehe mẹ, pipli ogbè atọ̀n tọn mọnkọtọn yin ayidego tlala. Ponọ dopo kanse mẹmẹsunnu de dọmọ: “Mẹnu wẹ to anadena plidopọ ehe, Sinhalese lẹ, Tamil lẹ, kavi Glẹnsigbe-dotọ́ lẹ?” “E mayin depope to pipli lọ lẹ mẹ wẹ to anadena plidopọ lọ gba,” wẹ mẹmẹsunnu lọ na gblọndo dọ. “Mímẹpo wẹ to ehe wà dopọ.” E vẹawu na ponọ lọ nado kẹalọyi gblọndo lọ. To whenuena pipli atọ̀n lẹpo kọnawudopọ to odẹ̀ tadona tọn mẹ, “Niṣẹ” pọmẹ tọn lọ whàn aihundatẹn lọ, bọ plidopọwatọ lẹ sọ bẹ pẹhiho jẹeji to ajiji mẹ́. E vẹawu nado mọ depope to mẹplidopọ lẹ mẹ he ma kùn dasin. Mọwẹ, plidopọ lẹ nọ hẹn ayajẹ mẹmẹsunnu-yinyin tọn lodo na taun tọn.​​—Psalm 133:1.a

[Nudọnamẹ Odò Tọn]