“Ogbè Klan Mí Ṣigba Owanyi Kọ̀n Mí Dopọ”

Whlẹngán. Mẹdekannujẹ. Tundote. Na owhe kanweko susu, gbẹtọ lẹ ko to kọgbọ dín vẹkuvẹku sọn agbàn pinpẹn po magbọjẹ gbẹ̀mẹ tọn lẹ po mẹ. Nawẹ mí sọgan pehẹ nuhahun gbẹ̀mẹ tọn lẹ gbọn? Be mí na wá mọ whlẹngán ya? Eyin mọ wẹ, gbọnna?

WHẸHO enẹlẹ yin hodọdeji to plidopọ agbegbe debọdo-dego azán atọ̀n tọn, he yin titobasina gbọn Kunnudetọ Jehovah tọn lẹ dali, bẹsọn mai 2006. Hosọ plidopọ lọ tọn wẹ “Whlẹngán Ko Sẹpọ!”

Afọzedaitọ fọtọ́n susu lẹ wá ṣiẹnẹ to plidopọ ehelẹ mẹ sọn otò voovo lẹ mẹ. Plidopọ ṣiẹnẹ ehelẹ yin bibasi to juillet po août 2006 po to Prague, he yin tatọ́-tònọ République tchèque tọn; to Bratislava, tatọ́-tònọ Slovaquie tọn; to Chorzow po Poznan po to Pologne;a podọ to tòdaho Allemagne tọn atọ́n mẹ—yèdọ Dortmund, Frankfurt, Hamburg, Leipzig, po Munich po. Sọha mẹhe wá plidopọ ehe lẹpo tọn lán to 313 000 ji.

Gbigbọ nankọ wẹ yin didohia to plidopọ ehelẹ ji? Etẹwẹ linlinnamẹnu lẹ dọ gando plidopọ lọ lẹ go? Podọ etẹwẹ yin numọtolanmẹ plidopọ-watọ lẹ tọn to enẹ godo?

Awuwiwlena Plidopọ lọ Lẹ

Jonọ lẹ po Kunnudetọ lẹdo lọ lẹ tọn po to jejeji na plidopọ lọ lẹ na yé yọnẹn dọ nujijọ ayidego gbigbọmẹ tọn lẹ wẹ yé na yin. E ma bọawu nado dín adọtẹn dagbe lẹ mọ na afọzedaitọ lọ lẹ. Di apajlẹ, na plidopọ Chorzow tọn, Kunnudetọ Pologne tọn lẹ ze yede jo nado kẹalọyi jonọ diblayi 13 000 sọn Whèzẹtẹn-waji Europe tọn do owhé yetọn lẹ gbè. Afọzedaitọ lẹ wá sọn Arménie, Bélarus, Estonie, États-Unis, Géorgie, Kazakhstan, Kyrgyzstan, Lettonie, Lituanie, Moldavie, Russie, Tajikistan, Turkménistan, Ukraine, po Uzbekistan po.

Susu afọzedaitọ lẹ tọn dona ko jẹ awuwlena gbejizọnlin yetọn ji na osun susu jẹnukọn. Owhe dopo jẹnukọn wẹ Tatiana, wẹndagbe-jlatọ whenu-gigọ́ tọn de to Kamchatka, yèdọ lopo Russie tọn de he tin to agewaji whèzẹtẹn Japon tọn, ko jẹ akuẹ jọ ji na gbejizọnlin etọn. E dona zingbejizọnlin na nudi kilomẹtlu 10 500. Tintan, e dó agahun na ganhiho 5; enẹgodo, e nọ̀ pinpán mẹ na nudi azán atọ̀n, podọ to godo mẹ, e yí ganhiho 30 zan to ahihun mẹ whẹpo do jẹ Chorzow.

Mẹdezejotọ fọtọ́n susu lẹ wẹ wazọ́n nado wleawuna plidopọ lọ, bo hẹn aihundatẹn lanmẹyiya tọn lọ lẹ po lẹdo yetọn lẹ po jẹaṣọ́ na sinsẹ̀n-bibasi. (Deutelonomi 23:14) Nado donù apajlẹ dopo poun go, to Leipzig Kunnudetọ lẹdo lọ tọn lẹ jẹtukla taun nado hẹn aihundatẹn lọ do wiweji, bosọ dopagbe nado wà nudopolọ to plidopọ lọ godo. Taidi kọdetọn de, nukunpedonugotọ he haya aihundatẹn lọ na yé lẹ basi dide nado jo akuẹ susu he yé dona sú na wiwejininọ do na yé.

Oylọ-Basinamẹ Lẹ

Lẹdo aihọn pé, agun lẹ basi nujijla na Plidopọ “Whlẹngán Ko Sẹpọ!” tọn lẹ taun. Mẹhe dona yì plidopọ agbegbe vonọtaun lẹ tindo mahẹ to nujijla ehe mẹ po zohunhun po. Yé zindonukọn nado to nujijla basina plidopọ lọ kaka biọ zánmẹ to azán he jẹnukọnna bẹjẹeji plidopọ lọ tọn. Be zohunhun yetọn de sinsẹ́n tọ́n ya?

Kunnudetọ Pologne-nu de he nọ yin Bogdan dukosọ hẹ dawe yọnhonọ de he jlo na yì plidopọ lọ ṣigba dọ dọ emi ma tindo akuẹ sọmọ nado zingbejizọnlin na kilomẹtlu 120 yì Chorzow. E wá sọawuhia dọ tẹnmẹ dopo na vò to ahihun he agun lẹdo lọ tọn haya mẹ. Bogdan dọmọ: “Mí dọna dawe lọ dọ e sọgan hodo mí yì vọnu eyin e fọ́nzán wá fie mí na súnhún sọn to ogàn atọ́n daa mẹ.” E kẹalọyi oylọ-basinamẹ lọ bo yì plidopọ lọ. To godo mẹ, e kanwe hlan mẹmẹsunnu lẹ dọmọ: “To plidopọ ehe yìyì godo, n’magbe nado vọ́ gbẹtọ-yinyin ṣie jlado.”

To Prague dawe de he nọ̀ dopo to hotẹli he afọzedaitọ he wá sọn Grande-Bretagne lẹ yizan mẹ, dọna plidopọwatọ lẹ to whèjai dopo dọ emi lọsu tin to plidopọ lọ tẹnmẹ to gbenẹgbe. Etẹwẹ whàn ẹn nado wá? Dawe lọ dọ dọ to whenuena emi ko mọ oylọ-basinamẹ yí sọn wẹnlatọ voovo ao si to tòhomẹ-liho tòdaho lọ tọn lẹ ji godo, emi mọ dọ emi dona yì! Plidopọ lọ yinuwadeji tlala bọ e to jejeji nado plọn nususu dogọ.—1 Timoti 2:3, 4.

Tito-to-Whinnu Dagbe Gbigbọmẹ Tọn

Tito-to-whinnu lọ dọhodo lehe mí sọgan duto nuhahun voovo lẹ ji do. Ayinamẹ họnwun lẹ yin nina sọn Owe-wiwe mẹ gando lehe nuhahun ehelẹ sọgan yin dididẹ kavi yin akọndona do go.

Mẹhe yọnhowhe, agbasamalo, okú mẹyiwanna de tọn kavi nuhahun mẹdetiti tọn devo to tuklado lẹ mọ tulinamẹ yí sọn Biblu mẹ he na gọalọna yé nado hẹn pọndohlan dagbe go. (Psalm 72:12-14) Asu po asi po lẹ gọna mẹjitọ lẹ sè ayinamẹ Biblu tọn lẹ do lehe yé sọgan duvivi alọwle ayajẹnọ de tọn do ji podọ lehe yé sọgan pọ́n ovi yetọn lẹ go whẹ́n po kọdetọn dagbe po gbọn. (Yẹwhehodọtọ 4:12; Efesunu lẹ 5:22, 25; Kọlọsinu lẹ 3:21) Jọja Klistiani lẹ—he nọ mọ ayinamẹ nuyọnẹn tọn lẹ yí sọn Ohó Jiwheyẹwhe tọn mẹ to whégbè podọ to agun mẹ, ṣigba hùndonuvo hlan nuyiwadomẹji ylankan hagbẹ lẹ tọn to wehọmẹ—mọ ayinamẹ yọ́n-na-yizan lẹ yí nado sọgan pehẹ kọgbidinamẹ hagbẹ lẹ tọn podọ nado “họ̀nna wantuntun yọpọ whenu tọn.”—2 Timoti 2:22.

Mẹmẹsunnu-Yinyin Lẹdo Aihọn Pé Tọn De

Kunnudetọ Jehovah tọn lẹ nọ mọ anademẹ dagbe Owe-wiwe tọn yí to opli yetọn lẹ ji to whepoponu. (2 Timoti 3:16) Ṣigba, nuhe hẹn plidopọ ehelẹ gbọnvo wẹ yin dọ gbẹtọ akọ̀ voovo lẹ tọn wẹ pli dopọ. Tito-to-whinnu gbigbọmẹ tọn dopolọ wẹ yin zizedonukọnnamẹ to plidopọ agbegbe vonọtaun lọ lẹpo ji to ogbè voovo lẹ mẹ. To azán dopodopo ji, delẹ to Hagbẹ Anademẹtọ Kunnudetọ Jehovah tọn lẹ tọn mẹ nọ dọ togunmẹho, podọ linlin he wá sọn otò devo lẹ mẹ hẹn tito-to-whinnu lọ vivi dogọ. Hodidọ po linlin ehelẹ po nọ yin lilẹdogbedevomẹ na mẹlẹpo nido mọaleyi.

Afọzedaitọ lẹ nọ to jejeji nado jẹakọ hẹ mẹmẹsunnu po mẹmẹyọnnu yetọn he wá sọn otò devo mẹ lẹ po. “Vogbingbọn ogbè tọn ma tlẹ yin nuhahun na mí,” wẹ afọzedaitọ dopo dọ. “Kakatimọ, e yidogọna ayajẹ nujijọ lọ tọn. Aṣa voovo lẹ mẹ wẹ jonọ lọ lẹ wá sọn, ṣigba, yemẹpo wẹ yin kinkọndopọ gbọn yise dopolọ dali.” Nuhe plidopọwatọ Munich tọn lẹ dọ die: “Ogbè klan mí ṣigba owanyi kọ̀n mí dopọ.” Mahopọnna fie yé wá sọn po ogbè yetọn po, plidopọwatọ lọ lẹ mọ dọ họntọn nugbo lẹ ṣẹnṣẹn wẹ yé te—yèdọ mẹmẹsunnu po mẹmẹyọnnu gbigbọmẹ tọn lẹ po.—Zekalia 8:23.

Hogbe Pinpẹn-Nutọn-Yinyọnẹn Tọn Lẹ

To plidopọ Pologne tọn lẹ whenu, ninọmẹ aimẹ tọn tẹ́n gbemima po akọndonanu plidopọwatọ lẹ tọn pọ́n. Gbọnvona dọ jikun ja na suhugan azán lọ lẹ tọn, aimẹ sọ fá taun—yèdọ kakajẹ 14°C. Mẹmẹsunnu de sọn États-Unis dọmọ: “N’ma ko mọ bọ ninọmẹ aimẹ tọn ylan bosọ fá domọ pọ́n to plidopọ de whenu, podọ n’ma mọnukunnujẹ tito-to-whinnu lọ mẹ sọmọ. Ṣigba, ninọmẹ akọjọpli tọn he vẹawu nado yise lọ, gbigbọ dagbe po johẹmẹ mayọnjlẹ he mí duvivi etọn po súdo enẹ lẹpo tọn. Plidopọ ehe ma sọgan yin winwọn!”

Nude he plidopọwatọ he nọ dó Pologne-gbè lẹ ma sọgan wọn wẹ didetọn owe lọ Étude perspicace des Écritures tọn to Pologne-gbè mẹ—ehe yin ahọsumẹ dagbe de na fifá po jikun po he yé doakọnna. Owe yọyọ lọ Vivez en gardant à l’esprit le jour de Jéhovah he yin didetọn sọ hẹn ayajẹ susu wá to Plidopọ Agbegbe “Whlẹngán Ko Sẹpọ!” tọn lẹpo ji.

Susu mẹhe wá lẹ tọn na gbẹ́ nọ flin plidopọ lọ na whẹwhinwhẹ́n devo lẹ wutu. Kristina, mẹmẹyọnnu République tchèque tọn de he ze ede jo nado hodo pipli afọzedaitọ he wá sọn tògodo lẹ tọn de to ahihun mẹ, flin dọmọ: “To whenue mí to e zun whedenu dọ na míde, mẹmẹyọnnu dopo dọ̀n mí jẹ apadopo, bo gbò mi fán bo dọ dọ: ‘N’mọ dọ n’ma jẹdò nude tọn! Mì nọ hẹn núdùdù kaka wá fie mí sinai do bo tlẹ sọ nọ hẹn sìnnùnù wá na mí. N’dopẹ́ tlala na owanyi mẹde-yido-sanvọ́ tọn mìtọn.’ ” Nuhe hodọ e te lọ wẹ yin tito núdùdù whèmẹ tọn he nọ yin bibasi na afọzedaitọ tògodo tọn lẹ. “Mí ma ko wazọ́n mọnkọtọn pọ́n,” wẹ mẹmẹsunnu de dọ. “Azọ́n lọ biọ dọ mí ni nọ wleawuna núdùdù whèmẹ tọn na gbẹtọ diblayi 6 500 to azán dopodopo ji. Ojlofọndotenamẹnu wẹ e yin nado mọ lehe mẹsusu, yèdọ kakajẹ yọpọvu lẹ ji, ze yede jo nado gọalọ do.”

Mẹmẹyọnnu de he zingbejizọnlin sọn Ukraine yì Chorzow na plidopọ lọ dọmọ: “Owanyi, nukunpedomẹgo po alọtútlú yisenọ hatọ mítọn lẹ tọn po whàn mí taun. Hogbe whè do mí nado do pinpẹn-nutọn-yinyọnẹn mítọn hia.” Podọ Annika, owhe ṣinatọ̀n mẹvi de he wá sọn Finlande, kanwehlan wekantẹn alahọ Kunnudetọ Jehovah tọn lẹ tọn to Pologne dọmọ: “Plidopọ lọ vivi taun hugan nuhe n’sọgan ko lẹn. Onú dagbe wẹ nado tin to titobasinanu Jehovah tọn mẹ, na yè sọgan tindo họntọn lẹ lẹdo aihọn pé!”—Psalm 133:1.

Nuhe Nupọntọ lẹ Dọ

Jẹnukọnna plidopọ lọ lẹ, tito sadidi tọn yin bibasi na delẹ to afọzedaitọ lọ lẹ mẹ. To glètoho Bavière tọn mẹ, jonọ lọ lẹ nọ nọte to Plitẹnhọ Ahọluduta tọn lẹ kọ̀n, bọ Kunnudetọ lẹdo lọ tọn lẹ nọ dokuavọna yé. Dohia owanyi mẹmẹsunnu tọn ehe yinuwado anademẹtọ sadidi tọn he ma yin Kunnudetọ de ji tlala. Afọzedaitọ de na linlin dọmọ: “To whenuena mí lẹkọja hotẹli to ahihun lọ mẹ, anademẹtọ sadidi tọn lọ dọ dọ mí gbọnvo taun na pipli devo he nọ disa wá finẹ lẹ. Nusisọ́ mítọn jẹaṣọ́, podọ mẹlẹpo wẹ kọngbedopọ hẹ mẹhe to nukọntọ yin to pipli lọ mẹ lẹ. Mẹzunzun po bẹwlu po ma tin. E paṣa ẹ lehe jonọ he ma yọ́n yedelẹ sọgan yawu lẹzun họntọn vivẹ́ domọ gbọn.”

Mẹmẹsunnu de he wazọ́n to Azọ́nwatẹn Sinsẹ̀nzọn Linlin tọn to plidopọ Prague tọn ji dọmọ: “To dimanche afọnnu, ponọ-gán he to anadena ponọ he yin dide nado basi hihọ́ to plidopọ lọ tẹnmẹ lẹ wá dla mí pọ́n. E doayi e go dọ jijọho to ṣẹnṣẹn mítọn bo dọ dọ emi ma tindo nudepope nado wà. E sọ donù e go dọ mẹhe nọ nọ̀ lẹdo aihundatẹn lọ tọn mẹ delẹ ko kanhose gando nuhe to jijọ to finẹ go. Eyin e ylọ yinkọ Kunnudetọ Jehovah tọn lẹ tọn, yé nọ saba jọsi, bọ ponọ-gán lọ nọ dọna yé dọ: ‘Eyin mẹlẹpo nọ zan walọ Kunnudetọ Jehovah tọn lẹ tọn vude poun, ponọ de ma tlẹ nasọ tin ba.’ ”

Mẹsusu Ko Mọ Whlẹngán!

Ohó Jiwheyẹwhe tọn, Biblu nọ yinuwa taidi aná de to aṣa lẹ ṣẹnṣẹn, bo nọ kọ̀n Klistiani lẹ dopọ to jijọho po pọninọ po mẹ. (Lomunu lẹ 14:19; Efesunu lẹ 4:22-24; Filippinu lẹ 4:7) Plidopọ agbegbe vonọtaun “Whlẹngán Ko Sẹpọ!” tọn lọ do ehe hia. Kunnudetọ Jehovah tọn lẹ ko mọ whlẹngán yí sọn susu azọ̀nylankan he to yasana aihọn ehe lẹ si. Nuvẹun, kanyinylan, po akọ̀ ṣinṣinyan po—nado donù vude poun to azọ̀n he jẹ aihọn te lẹ go—ko dibla busẹ sọn ṣẹnṣẹn yetọn, podọ yé to nukọnpọnhlan ojlẹ lọ whenuena aihọn lẹpo na vò sọn nuhahun mọnkọtọn lẹ si.

Mẹhe yì plidopọ ehelẹ tẹnmẹ lẹ yí nukun yetọn lẹ do mọ pọninọ he tin to Kunnudetọ otò po aṣa voovo lẹ tọn po ṣẹnṣẹn. Ehe sọawuhia hezeheze to vivọnu plidopọ lọ lẹ tọn. Mẹlẹpo to pẹ́hò, bo to họntọn yetọn yọyọ lẹ gbòfán, bosọ to fọto godo tọn lẹ de. (1 Kọlintinu lẹ 1:10; 1 Pita 2:17) Po ayajẹ po gọna nujikudo dọ whlẹngán sọn hunyanhunyan po nuhahun lẹpo po mẹ ko sẹpọ, afọzedaitọ lọ lẹ lẹkọyi owhé po agun yetọn lẹ po mẹ po gbemima he yin hinhẹn jẹ yọyọ de po nado tẹdo “ohó ogbẹ̀ tọn” Jiwheyẹwhe tọn go gligli.—Filippinu lẹ 2:15, 16.

[Nudọnamẹ Odò Tọn]

[Apotin/Yẹdide to weda 10]

Ogbè Koatọ́n-Nukundopo Dọnú Taidi Dopo

To plidopọ ṣinẹnẹ lọ lẹpo ji, tito-to-whinnu lọ nọ yin zizedonukọnnamẹ to ogbè lẹdo lọ tọn mẹ. To plidopọ he yin bibasi to Allemagne lẹ whenu, hodidọ lẹ sọ yin nina do ogbè 18 devo lẹ mẹ. To Dortmund hodidọ lẹ yin zizedonukọnnamẹ to arabe, espagnol, farsi, portugais, po russe po mẹ; to Frankfurt: anglais, français, po serbe/croate po; to Hamburg: danois, néerlandais, suédois, po tamoul po; to Leipzig: chinois, polonais, po turc po; podọ to Munich: grec, italien, po Ogbè Alọ-Yido-Dọho Allemagne tọn po. To plidopọ Prague tọn ji, hodidọ lẹpo yin nina do anglais, russe, po tchèque po mẹ. To Bratislava, tito-to-whinnu lọ tin to anglais, hongrois, slovaque, po Ogbè Alọ-Yido-Dọho Slovaquie tọn po mẹ. To Chorzow, ogbè he mẹ e yin bibasi te lẹ wẹ polonais, russe, ukrainien, po Ogbè Alọ-Yido-Dọho Pologne tọn po. Podọ to Poznan, polonais po finnois po mẹ wẹ e yin bibasi te.

Popolẹpo yin ogbè 26! Na nugbo tọn, ogbè klan plidopọwatọ lọ lẹ, ṣigba owanyi yetọn kọ̀n yé dopọ.

[Yẹdide to weda 9]

To Frankfurt, afọzedaitọ Croatie tọn lẹ jaya nado mọ “Traduction du monde nouveau” yí to ogbè yetọn mẹ