Etẹwẹ Họakuẹ Hugan?
Nuhe họakuẹ taun de tintindo nọ hẹn aglinjijẹ wá. Ṣigba etẹwẹ onú enẹ lọ sọgan yin? Be akuẹ susugege wẹ? Aṣọdonu he vẹahi taun de wẹ? Kavi yindidi po gigo po wẹ ya? Mẹsusu nọ yí nukun nuhọakuẹ taun tọn do pọ́n onú ehelẹ. Onú ehelẹ tintindo sọgan hẹn gbẹninọ bọawu, hẹn gbẹzan tindo zẹẹmẹ, kavi hẹn mẹde nado diyin bosọ tindo kọdetọn dagbe. Be mí to kanván nado tindo onú enẹlẹ, bo to linlẹn dọ yé na hẹn yanwle podọ ojlo mítọn lẹ na sọgodo di wẹ ya?
NA TAUN tọn, gbẹtọ lẹ nọ yí nukun nuhọakuẹ tọn do pọ́n nude gbọn obá he mẹ onú lọ hẹn pekọ wá na nuhudo kavi ojlo mẹdetiti tọn yetọn lẹ sọ ji. Mí nọ wlebòna nuhe hẹn mí tindo numọtolanmẹ dagbemẹ-ninọ tọn bo na nukundido vivomẹninọ sọgodo tọn mí lẹ taun. Mí nọ wlebòna nuhe nọ hẹn kọgbọ, homẹmiọn kavi mẹyinyọnẹn afọdopolọji tọn wá na mí lẹ. Ṣogan, pinpọn nude hlan dọ e họakuẹ sinai do ojlo he to didiọ mítọn lẹ ji nọ yin nukunta tọn po ojlẹ gli tọn de po. Na taun tọn, mí nọ yọnẹn dọ nude họakuẹ taun eyin e hẹn pekọwana nuhudo mítọn lẹ.
Nuhudo etẹ tọn wẹ mí tindo taun? Nudepope ma sọgan họakuẹ gba eyin e ma tindo jẹhẹnu titengbe dopo, enẹwẹ ogbẹ̀. Matin ogbẹ̀, mí ma sọgan tin gba. Ahọlu Sọlọmọni Islaeli hohowhenu tọn wlan dọmọ: “Oṣiọ lẹ ma yọ́n nude . . . Azọ́n matin, linlẹn matin, zinzan matin, kavi nuyọnẹn to kutomẹ [yọdo paa gbẹtọvi tọn mẹ].” (Yẹwhehodọtọ 9:5, 10) Eyin mí kú, mí nọ yin hinhẹn gánnugánnu nado jo nuhe mí tindo lẹpo do. Enẹwutu, nuhe mí tindo nuhudo etọn hugan wẹ nuhe na hẹn ogbẹ̀ mítọn dote. Etẹwẹ sọgan wàmọ?
Etẹwẹ Na Hẹn Ogbẹ́ Mítọn Dote?
‘Hihọ́ wẹ akuẹ tin na,’ wẹ Ahọlu Sọlọmọni dọ. (Yẹwhehodọtọ 7:12) Po akuẹ susu po, mí sọgan họ̀ núdùdù bosọ gbá owhé dagbe de. Akuẹ sọgan hẹn mí penugo nado duvivi gbejizọnlin bibasi yì fidindẹn lẹ tọn. E sọgan wleawu dandannu lẹ tọn na mí to whenuena mí poyọnho kavi lẹzun madogánnọ bo ma sọgan wazọ́n ba. Susu wẹ yin ale he nọ wá sọn akuẹ tintindo mẹ. Etomọṣo, akuẹ ma sọgan hẹn ogbẹ̀ dote gba. Apọsteli Paulu dotuhomẹna Timoti dọmọ: “Naṣẹ mẹhe yin adọkunnọ to aihọn he mẹ lẹ, dọ yé yigo blo, dọ yé sọ dotudo adọkun he ma nọte go blo, adavo do Jiwheyẹwhe ogbẹ̀nọ go.” (1 Timoti 6:17) Akuẹ he tin to aihọn ehe mẹ lẹpo ma sọgan họ̀ ogbẹ̀ na mí gba.
Lẹnnupọndo numimọ dawe de he yin Hitoshi tọn ji. Na e whẹ́n to whẹndo hẹntọnọ de mẹ wutu, Hitoshi jlo vẹkuvẹku nado lẹzun adọkunnọ. E tindo yise to huhlọn akuẹ tọn mẹ sọmọ bọ e lẹndọ yè tlẹ sọgan yí akuẹ do họ̀ gbẹtọ. Enẹgodo dawe de wá ohọ̀n etọn ji bo kanse e eyin e yọnẹn dọ Jesu Klisti kú do ota etọn mẹ. Kanbiọ lọ paṣa Hitoshi taun na e ma lẹndọ mẹde na kú do ota gbẹtọ taidi emitọn mẹ gba. E yì togunmẹ hodidọ Biblu tọn de tẹnmẹ podọ e sọ paṣa ẹ nado se tudohomẹnamẹ lọ dọ ‘nukun dona yin dopo.’ Hodọtọ lọ basi zẹẹmẹ dọ nukun heyin “dopo” nọ mọnu hlan sọgodo bo nọ tin to gbigbọmẹnu lẹ ji. (Luku 11:34) Kakati nado to kanván to akuẹ godo, Hitoshi jẹ nuhe họakuẹ to gbigbọmẹ lẹ ze do otẹn tintan mẹ ji to gbẹzan etọn mẹ.
Nutindo agbasa tọn lẹ sọgan sọ hẹn dolilo po hihọ́ po wá na mí jẹ obá de mẹ. Nususu tintindo sọgan de magbọjẹ mítọn gando nuhudo egbesọegbesọ tọn go pò. Owhé dagbe de to lẹdo whanpẹnọ de mẹ sọgan hẹn mí tindo pekọ nuwadotana tọn. Avọ̀ he tin to zoji po gbẹduhun dagbe de po sọgan hẹn pipà mẹdevo lẹ tọn wá na mí.
Dona de wẹ e yin nado ‘duvivi magbọjẹ mítọn tọn.’ (Yẹwhehodọtọ 3:13) Podọ agbasanu susugege tintindo sọgan hẹn ẹn bọawuna mẹyiwanna mítọn lẹ nado ‘vò, bo dù, bo to nùnù, bosọ to vivi ogbẹ̀ tọn dù.’ Ṣigba, nuhọakuẹ ojlẹ gli tọn wẹ agbasanu lẹ tindo. To avase nina sọta nukunkẹn mẹ, Jesu Klisti dọmọ: “To gege gbẹtọ tọn de mẹ ma wẹ ogbẹ̀ etọn nọte te sọn nuhe ewọ tindo lẹ mẹ gba.” (Luku 12:15-21) Mahopọnna lehe nutindo lẹ sù sọ kavi họakuẹ sọ, yé ma sọgan na ogbẹ̀ mí gba.
Di apajlẹ, Liz wlealọ hẹ dawe heyin adọkunnọ tlala de. E dọmọ: “Mí tindo owhé whanpẹnọ de po gbẹduhun awe po, podọ ninọmẹ akuẹzinzan tọn mítọn na mí mẹdekannujẹ nado duvivi nudepope he aihọn tindo nado zedonukọnnamẹ to agbasanu-liho tọn. . . . Ṣigba e sọgan taidi nupaṣamẹ, dọ yẹn gbẹsọ nọ to nuhà gando akuẹ go.” E dọmọ: “Mí jẹdò nususu tọn. E taidi dọ dile nuhe hiẹ tindo sù sọ, mọwẹ hihọ́ towe na whè do niyẹn.”
Mẹsusu sọ nọ ze nukun nuhọakuẹ tọn do pọ́n yindidi po gigo po na yé sọgan hẹn pipà po yẹyi po wá wutu. To aihọn egbehe tọn mẹ, agbasazọ́n dagbe de yin wadotana he nọ fọ́n nuvẹun dote. Awuwiwlena nugopipe kavi azọ́nyinyọnẹn tangan de sọgan gọalọna mí nado diyin. Mẹdevo lẹ sọgan pà mí, yí nukun nujọnu tọn do pọ́n linlẹn mítọn lẹ, bo nọ tin to jejeji nado mọ nukundagbe mítọn. Ehe lẹpo sọgan hẹn aglinjijẹ po pekọ po wá. Ṣigba, e nọ busẹ to godo mẹ. Sọlọmọni tindo gigo po huhlọn he ahọlu de sọgan tindo lẹpo po, ṣigba e doavigbe dọmọ: “Oflin matin na nuyọnẹntọ po nulunọ po kakadoi . . . yè na wọn popolẹpo.” (Yẹwhehodọtọ 2:16) Yindidi po gigo po ma nọ namẹ ogbẹ̀ gba.
Celo heyin anazọnwatọ de wá yọnẹn to godo mẹ dọ nude tin he họakuẹ taun hugan yindidi. Na e tindo nugopipe vonọtaun de wutu, e pegan nado yì wehọmẹ de he hẹn azọ́nyinyọnẹn etọn pọnte deji. Azọ́n etọn lẹ mọ pipà yí to linlinnamẹnu lẹ mẹ podọ sọn anazọnwatọ devo lẹ dè to madẹnmẹ. Susu anazọnwiwa etọn lẹ tọn yin didohia to tòdaho Europe tọn lẹ mẹ. Celo dọmọ: “Yẹn dona yigbe dọ anazọnwiwa wẹ yin nujọnu hugan to gbẹzan ṣie mẹ na ojlẹ de. Ṣigba, yẹn wá yọnẹn dọ, afọdidona agbasazọ́n ehe zọnmii na taidi tintẹnpọn nado sẹ̀n ogán awe nkọtọn. (Matiu 6:24) Yẹn yọnẹn dọ nuhe yin nujọnu hugan he yẹn sọgan wà wẹ nado dọyẹwheho wẹndagbe Ahọluduta Jiwheyẹwhe tọn. Enẹwutu yẹn basi nudide mẹdetiti tọn nado jo anazọnwiwa dó.”
Etẹwẹ Họakuẹ Hugan?
To whenuena e yindọ nudepope mayin nujọnu kavi họakuẹ matin ogbẹ̀, etẹwẹ mí sọgan tindo he sọgan na mí nujikudo dọ mí na to gbẹnọ zọnmii? Ogbẹ̀ lẹpo wẹ wá sọn Jehovah Jiwheyẹwhe dè. (Psalm 36:9) Na taun tọn, “ewọ mẹ wẹ míwlẹ togbẹ̀ te, bo to whinwhàn, bosọ tindo tintin mítọn.” (Owalọ lẹ 17:28) E nọ na ogbẹ̀ madopodo mẹhe e yiwanna lẹ taidi nunina de. (Lomunu lẹ 6:23) Etẹwẹ mí dona wà nado pegan na nunina enẹ?
Nunina ogbẹ̀ madopodo tọn mimọyi mítọn sinai do haṣinṣan pẹkipẹki de tintindo hẹ Jehovah ji. Enẹwutu, nukundagbe etọn tintindo họakuẹ hugan nudevo depope he mí sọgan tindo. To whenuena mí tindo e, mí na tindo nukundido ayajẹ nujọnu po kakadoi tọn po. Ṣigba, matin nukundagbe Jiwheyẹwhe tọn, mí na pannukọn vasudo kakadoi. To whelọnu lo, e họnwun dọ nuhe họakuẹ hugan lọ wẹ nudepope he na gọalọna mí nado tindo haṣinṣan dagbe de hẹ Jehovah.
Nuhe Mí Dona Wà
Kọdetọn dagbe tintindo mítọn sinai do oyọnẹn tintindo mítọn ji. Ohó Jehovah tọn, heyin Biblu wẹ yin asisa oyọnẹn he pegan lọ tọn. Ewọ kẹdẹ wẹ dọ nuhe mí dona wà nado hẹn homẹ Jiwheyẹwhe tọn hùn na mí. Enẹwutu mí dona yí sọwhiwhe do plọn Owe-wiwe. Vivẹnudido sọwhiwhe tọn nado plọn nuhe go mí pé lẹpo gando Jehovah Jiwheyẹwhe po Jesu Klisti po go nọ dekọtọn do ‘oyọnẹn he nọ zẹẹmẹdo ogbẹ̀ madopodo’ mẹ. (Johanu 17:3) Adọkun he na yin bowlena de wẹ oyọnẹn mọnkọtọn yin!—Howhinwhẹn lẹ 2:1-5.
Oyọnẹn he mí nọ mọyi sọn Ohó Jiwheyẹwhe tọn mẹ nọ hẹn mí pegan nado ze afọdide he bọdego lọ, enẹ wẹ yise didohia to Jesu Klisti mẹ. Jehovah degbè dọ mẹhe ja emi dè lẹpo ni wàmọ gbọn Jesu gblamẹ. (Johanu 14:6) Na taun tọn, “whlẹngán masọ tin to mẹdevo dè” gba. (Owalọ lẹ 4:12) Lunluntọ́n mítọn ma sinai do ‘fataka kavi sika ji gba, ṣigba do ohùn họakuẹ Klisti tọn ji.’ (1 Pita 1:18, 19) Mí dona do yise mítọn hia gbọn nuhe Jesu plọnmẹ lẹ yiyise po apajlẹ etọn hihodo po dali. (Heblu lẹ 12:1-3; 1 Pita 2:21) Podọ lehe avọ́sinsan etọn họakuẹ sọ! Alemọyi etọn lẹ yiyizan nọ do sọgodo madopodo gbẹtọvi lẹpo tọn hia. To whenuena e yin yiyizan to gigọ́mẹ do ota mítọn mẹ, mí nọ mọ nunina ogbẹ̀ madopodo tọn he họakuẹ nugbonugbo tọn yí.—Johanu 3:16.
Jesu dọmọ: “Hiẹ na yí ayiha towe lẹpo, podọ alindọn towe lẹpo po nuyọnẹn towe lẹpo po do yiwanna Oklunọ Jiwheyẹwhe towe.” (Matiu 22:37) Nado yiwanna Jehovah zẹẹmẹdo dọ “mí ni yìn osẹ́n etọn lẹ.” (1 Johanu 5:3) Osẹ́n etọn lẹ biọ dọ mí ni nọ kada na aihọn, tindo walọ jijlọ, bosọ yí nugbonọ-yinyin do nọgodona Ahọluduta etọn. Gbọn mọwiwà dali wẹ mí nọ ‘de ogbẹ̀’ kakati ni yin okú. (Deutelonomi 30:19) Eyin mí ‘dọnsẹpọ Jiwheyẹwhe, ewọ na dọnsẹpọ mí.’—Jakobu 4:8.
Jidide dọ mí tindo nukundagbe Jiwheyẹwhe tọn họakuẹ tlala hugan adọkun he tin to aihọn mẹ lẹpo. Mẹhe tindo e lẹ wẹ yin adọkunnọ hugan to aihọn mẹ! Enẹwutu, mì gbọ mí ni vánkan nado tindo adọkun he họakuẹ taun lọ, yèdọ alọkẹyi Jehovah tọn. Na taun tọn, mì gbọ mí ni setonuna tudohomẹnamẹ apọsteli Paulu tọn dọmọ: “Nọ hodo dodo, jijọ-di-Jiwheyẹwhe, yise, owanyi, homẹfa, walọmimiọn. Nọ hoavùn dagbe yise tọn, yí alọ do ogbẹ̀ madopodo ji.”—1 Timoti 6:11, 12.
[Yẹdide to weda 21]
Etẹwẹ họakuẹ na we hugan? Akuẹ, nutindo agbasa tọn lẹ, yindidi, kavi nudevo de ya?
[Yẹdide to weda 23]
Mí dona nọ yí sọwhiwhe do plọn Owe-wiwe