Kanbiọ lẹ sọn Wehiatọ lẹ Dè

Be Uli wẹ Jehovah basi alẹnu etọn hẹ Ablaham te kavi to Halani?

Kandai alẹnu he Jehovah basi hẹ Ablaham tọn yin mimọ tintan to Gẹnẹsisi 12:1-3 mẹ, he dọmọ: “OKLUNỌ dọ hlan Ablam, dọmọ, Tọ́n sọn aigba towe ji, sọn hẹnnumẹ towe lẹ mẹ, sọn owhé otọ́ towe tọn gbè, yì aigba he yẹn na dohia we lọ ji: yẹn nasọ yí we do basi akọta daho de, . . . to hiẹ mẹ wẹ yè na dona hẹnnu aigba tọn lẹpo te.”a Jehovah sọgan ko basi alẹnu ehe hẹ Ablaham to whenuena e tin to Uli bo vọ́ nùzindeji to whenuena Ablaham tin to Halani.

To owhe kanweko tintan whenu, Stefani dlẹnalọdo gbedide Jehovah tọn dọ Ablaham dona sẹtẹn yì Kenani. To hodidọ hlan Tòhódọtọ Ju lẹ tọn mẹ, e dọmọ: ‘Jiwheyẹwhe gigo tọn sọawuhia Ablaham otọ́ mítọn, whenuena e tin to Mẹsopotamia, whẹpo e do yin waṣinu to Halani, bosọ dọ hlan ẹn, dọ, Yì sọn aigba towe ji, podọ sọn hẹnnumẹ towe lẹ mẹ, bo wá aigba he yẹn na dohia we ji.’ (Owalọ lẹ 7:2, 3) Uli wẹ Ablaham wá sọn podọ dile Stefani dohia do, finẹ wẹ e sè gbedide lọ te to tintan whenu nado yì Kenani. (Gẹnẹsisi 15:7; Nẹhemia 9:7) Stefani ma donù alẹnu he Jiwheyẹwhe basi hẹ Ablaham go gba, ṣigba to Gẹnẹsisi 12:1-3, alẹnu enẹ yin kinkọndopọ hẹ gbedide lọ nado tọ́n yì Kenani. Enẹwutu e sọgbe hẹ lẹnpọn dagbe nado yise dọ Uli wẹ Jehovah basi alẹnu lọ hẹ Ablaham te.

Ṣigba, sọwhiwhe yíyí do hia kandai Gẹnẹsisi tọn dohia dọ Jehovah vọ́ alẹnu etọn dọ hlan Ablaham to Halani, kẹdẹdile e vọ́ dọvọdọ etọn basi bosọ hẹn adà voovo etọn lẹ gblodeji to godo mẹ to ojlẹ voovo lẹ mẹ do. (Gẹnẹsisi 15:5; 17:1-5; 18:18; 22:16-18) Sọgbe hẹ Gẹnẹsisi 11:31, 32, Tẹla, otọ́ Ablaham tọn tọ́n sọn Uli yì Kenani, bọ Ablaham, Sala, po Lọti po yì hẹ ẹ. Yé wá Halani bosọ nọ̀ finẹ kakajẹ okú Tẹla tọn whenu. Ablaham nọ̀ Halani na ojlẹ dindẹn taun nado sọgan bẹ adọkunnu lẹ pli jẹ obá de mẹ. (Gẹnẹsisi 12:5) Podọ to ojlẹ de mẹ, Nahọli, nọvisunnu Ablaham tọn lọsu sẹtẹn wá finẹ.

To whenuena Biblu ko dọho do okú Tẹla tọn ji godo, e dọ linlin hodidọ Jehovah tọn lẹ hlan Ablaham bosọ zindonukọn dọmọ: “Mọwẹ Ablaham tọ́n yì, dile OKLUNỌ ko dọ na ẹn do.” (Gẹnẹsisi 12:4) Enẹwutu, Gẹnẹsisi 11:31–12:4 na kunnudenu he lodo dọ Jehovah dọ ohó heyin kinkàndai to Gẹnẹsisi 12:1-3 mẹ lẹ to okú Tẹla tọn godo. Eyin mọwẹ e yin, be Ablaham tọ́n sọn Halani bo sẹtẹn yì aigba he Jehovah dohia lọ ji to gbeyiyi mẹ hlan gbedide de he e ko ṣẹṣẹ sè gọna dehe e sè to tintan whenu to owhe delẹ die wayi jẹnukọn to Uli.

Sọgbe hẹ Gẹnẹsisi 12:1, Jehovah degbena Ablaham dọmọ: “Tọ́n sọn aigba towe ji, sọn hẹnnumẹ towe lẹ mẹ, sọn owhé otọ́ towe tọn gbè.” Uli yin “aigba” Ablaham tọn to ojlẹ de mẹ, podọ “owhé” otọ́ etọn tọn tin to finẹ. Ṣigba, otọ́ Ablaham tọn sẹtẹn na whédo etọn yì Halani, bọ Ablaham wá ylọ ofi enẹ dọ aigba etọn. To whenuena e ko yí owhe susu zan to Kenani godo, bo do devi etọn hlan yì ‘otò etọn mẹ podọ yì hẹnnumẹ etọn lẹ dè’ nado dín asi de na Isaki, devi lọ yì “otò Nahọli tọn mẹ” (vlavo Halani kavi fidevo he sẹpọ finẹ). (Gẹnẹsisi 24:4, 10) To finẹ devi lọ mọ Lebeka to hẹnnumẹ Ablaham tọn lẹ ṣẹnṣẹn, yèdọ to whẹndo daho Nahọli tọn mẹ.—Gẹnẹsisi 22:20-24; 24:15, 24, 29; 27:42, 43.

To hodidọ etọn hlan Tòhódọtọ Ju lẹ tọn mẹ, Stefani dọmọ: “To godo whenuena otọ́ etọn kú, finẹ wẹ [Jiwheyẹwhe hẹn Ablaham nado] sọn wá aigba he ji, fie mìwlẹ to ninọ to dinvie.” (Owalọ lẹ 7:4) Ehe dohia dọ Jiwheyẹwhe dọho hlan Ablaham to Halani. E sọgbe hẹ lẹnpọn dagbe nado yise dọ to nujijọ enẹ whenu Jehovah vọ́ nùzindo alẹnu etọn ji hẹ Ablaham dile e yin linlin etọn na to Gẹnẹsisi 12:1-3 mẹ do, to whenuena e yindọ alẹnu lọ jẹ nuyiwa ji to whenuena Ablaham sẹtẹn yì Kenani. Enẹwutu, dogbigbapọnna kunnudenu lẹpo planmẹ jẹ tadona lọ kọ̀n dọ Jehovah to tintan whenu sọgan ko basi alẹnu etọn hẹ Ablaham to Uli bosọ vọ́ nùzindeji to Halani.

[Nudọnamẹ Odò Tọn]