Osẹ́n Sika Tọn—Nuplọnmẹ Akọjọpli Tọn De

“Enẹwutu onú depope mìwlẹ jlo gbẹtọ ni wà hlan mì, mọkẹdẹ wẹ mì ni wà hlan yé.”—Matiu 7:12.

OHÓ enẹlẹ yin didọ to diblayi owhe fọtọ́n donu awe die wayi gbọn Jesu Klisti dali to Yẹwhehodidọ diyin Osó ji tọn etọn mẹ. To owhe kanweko he wayi lẹ mẹ, nususu ko yin didọ bo yin kinkàn gando hodidọ he bọawu enẹ go. Di apajlẹ, e ko yin pipà taidi “ahọ́nkan Owe-wiwe tọn,” “bladopọ azọngban Klistiani tọn hlan kọmẹnu etọn,” podọ “nunọwhinnusẹ́n dodonu walọyizan tọn de.” E ko yin yinyọnẹn sọmọ bo nọ saba yin alọdlẹndo taidi Osẹ́n Sika tọn.

Ṣigba, e mayin mẹhe ylọ yede dọ Klistiani lẹ kẹdẹ wẹ yọ́n Osẹ́n Sika tọn gba. Sinsẹ̀n Ju lẹ tọn, sinsẹ̀n Buddha tọn, po tamẹnuplọnmẹ Glẹki tọn po kẹalọyi nugbo dodonu tọn ehe to aliho voovo mẹ. Nude heyin yinyọnẹn taun na omẹ Asia tọn lẹ wẹ hodidọ Confucius, he nọ yin sisi taun to lẹdo enẹ mẹ taidi nuyọnẹntọ po mẹplọntọ he klo hugan lọ po tọn. To The Analects, heyin atọ̀ntọ to Four Books (Owe Ẹnẹ) Confucius tọn lẹ mẹ, mí mọ linlẹn ehe yin nudego whlaatọ̀n. Whlaawe, to gblọndo mẹ hlan kanbiọ wehọmẹvi lẹ tọn, Confucius dọmọ: “Nuhe hiẹ ma jlo dọ yè ni wà hlan we, ma wà ẹ hlan mẹdevo blo.” To nujijọ devo whenu, to whenuena wehọmẹvi etọn Zigong doawagun dọ “Nuhe yẹn ma jlo dọ mẹdevo lẹ ni wà hlan mi, yẹn lọsu ma nọ jlo nado wà ẹ hlan yé,” mẹplọntọ lọ gblọn po hogbe mẹhẹnlẹnnupọn tọn ehe po, “Mọwẹ, ṣigba hiẹ ma ko penugo nado wà ehe gba.”

Gando hodidọ ehe go, mí sọgan doayi e go dọ hodidọ Confucius tọn yin adà awetọ nuhe Jesu dọ to godo mẹ tọn. Vogbingbọn he họnwun lọ wẹ yindọ Osẹ́n Sika tọn he go Jesu donù nọ biọ nuyiwa nujikudo dagbewiwà hlan mẹdevo lẹ tọn. Mí ni dọ dọ gbẹtọ lẹ yinuwa to kọndopọmẹ hẹ hodidọ nujikudo Jesu tọn, bo nọ hò mẹdevo lẹ tọn pọ́n podọ ze afọdide lẹ nado gọalọna yé, bosọ nọ nọgbẹ̀ sọgbe hẹ gbedide ehe egbesọegbesọ. Be hiẹ lẹndọ enẹ na hẹn aihọn ehe yin fininọ he pọnte taun de ya? Mọwẹ, na jide tọn.

Vlavo osẹ́n lọ yin didọ to aliho nujikudo tọn mẹ, yin adadiọna, kavi to wunmẹ devo depope mẹ, nuhe yin nujọnu lọ wẹ yindọ mẹhe nọgbẹ̀ to ojlẹ voovo mẹ podọ to nọtẹn voovo mẹ bosọ wá sọn lẹdo he gbọnvo mẹ lẹ ko ze jidide zẹjlẹgo do linlẹn Osẹ́n Sika tọn ji. Ehe dohia poun dọ nuhe Jesu dọ to Yẹwhehodidọ Osó ji tọn mẹ yin nuplọnmẹ akọjọpli tọn de he gando gbẹzan gbẹtọ lẹ tọn go to filẹpo podọ to ojlẹ lẹpo mẹ.

Kanse dewe dọ: ‘Be yẹn na jlo dọ mẹdevo lẹ ni yinuwa hẹ mi po sisi po, matin mẹnukuntahopọn, podọ to nugbonọ-yinyin mẹ ya? Be yẹn na jlo nado nọgbẹ̀ to aihọn he ma tindo nuvẹun akọ̀ tọn, sẹ́nhẹngba, po awhàn po de mẹ ya? Be yẹn na jlo nado nọ whẹndo de he mẹ mẹlẹpo nọ do mẹtọnhopọn hia na numọtolanmẹ po dagbemẹ-ninọ mẹdevo lẹ tọn po ya?’ Na taun tọn, mẹnu wẹ sọgan gbẹ́ yọnbasi mọnkọtọn lẹ dai? Ṣigba nugbo he vẹawu lọ wẹ yindọ omẹ vude poun wẹ nọ duvivi ninọmẹ ehelẹ tọn. Mẹsusu ma tlẹ na donukun onú mọnkọtọn lẹ.

Osẹ́n Sika Tọn Yin Hinhẹnflu

To whenuho gblamẹ, whẹho danuwiwa do gbẹtọvi go tọn lẹ ko tin to ehe mẹ jlọjẹ gbẹtọ lẹ tọn yin gbigbẹdai mlẹnmlẹn te. Ehe bẹ ajọ́ afanumẹ sisà to Aflika tọn, osla yasanamẹ Nazi tọn lẹ, ovi lẹ hinhẹn nado wazọ́n gánnugánnu, po akọ̀ vivasudo ylankan he to jijọ to ofi susu po hẹn. Todohukanji mẹhẹnjọsi tọn lọ sọgan dite taun.

To egbehe, aihọn zomọ nuyọnẹn wintinwintin tọn mítọn nọ yin ṣejannabinọ. Omẹ vude wẹ nọ lẹnnupọndo mẹdevo lẹ ji to whenuena dagbemẹ-ninọ kavi jlọjẹ yetọn lẹ tin to owù mẹ. (2 Timoti 3:1-5) Etẹwutu mẹsusu do lẹzun fifiẹtọ, kanylantọ, po ṣejannabinọ po sọmọ? Dile Osẹ́n Sika tọn gbẹsọ yin yinyọnẹn gbayipe do to egbehe, be e mayin dọ mẹsusu to gbigbẹ́ ẹ dai dọ e mayin nujọnu, bo yin walọ dagbe hohowhenu tọn de wutu wẹ ya? E blawu dọ, enẹwẹ yin whẹho lọ etlẹ yin to mẹsusu he sọalọakọ́n dọ yé yise to Jiwheyẹwhe mẹ lẹ ṣẹnṣẹn. Podọ sọn lehe onú lẹ to yìyì do mẹ, gbẹtọ lẹ na lẹzun ṣejannabinọ dogọ.

Enẹwutu, kanbiọ titengbe he dona yin dogbapọnna lẹ wẹ: Etẹwẹ gbẹninọ sọgbe hẹ Osẹ́n Sika tọn bẹhẹn? Be mẹdepope gbẹ́ to gbẹnọ sọgbe hẹ ẹ ya? Podọ be ojlẹ de na wá tin to whenuena gbẹtọvi lẹpo na nọgbẹ̀ to kọndopọmẹ hẹ Osẹ́n Sika tọn ya? Jaale bo hia hosọ he bọdego, nado mọ gblọndo nujọnu tọn na kanbiọ ehelẹ.

[Yẹdide to weda 3]

Confucius po mẹdevo lẹ po plọnmẹ Osẹ́n Sika tọn to aliho voovo mẹ